Read Lamnso Matio 27 Bible Online

Matio 27 - Lamnso bible

Matio 27

¹Yiì lòo dzə kijàvndzə kijàvndzə, vitú ve atàá cù wùn à vé wòŋe dzə̀ʼə̀m, a sìysì mo dzə̀ á yiì, é bo á yúyrí Jesus.

²Á nèn lò, e kùr kóy se Jesus, e dù sho fo Payler woo ŋgaà saʼ Fòn woó *Rom.

³Judar wo wù‑uù karin menàŋ e Jesus bàm nèn yù ji á tìnén nsaʼ a ji á yúy Jesus, wù nèn kèʼ, a rə̀m ntéŋ. Wù lì mbàm see mtaár sìy, e dù, e yèn vitú ve atàá cù wùn à vé wòŋe shó,

⁴e sùúy jii, «M yiì ne kinyo ke bi kí. M yiì ne, á yúyrí wír, a bó wù yòʼ kér njò.» Á bìnèr jii, «Kiíy wò sho, bó yòʼ dzə̀ nsaʼ yer.»

⁵Judar nèn màʼ mbàm sìy e lav cù, e fəə̀, e dù, e kèsìn.

⁶Vitú ve atàá cùu siíy, e lì mbàm see shooy, e sùúy jii, «Mbàm sìn si yòʼ dzə̀ sé mbòŋ sí, dzə̀ káv mensə. Bó kí yoʼ ghèén ji á li, e wày é kibàm ke Nyùy.»

⁷Á nèn sùŋnín, e lì mbàm see shooy, e yùn kirə́ʼ shó ji á wíy a dzəə̀mè a viŋgwìy fo, a dzə̀ fo vé‑eè túŋ mbóm.

⁸Á kinyo ke kí yiìn, é bo á wáa yòŋ kirə́ʼ kee shooy jii, Kwaʼ Mensəə, e shem lán.

⁹Kí koóy bey, kinyo ke Jeremia woo ŋgaà ntum Nyùy‑iì suuyin kí nèn ghèén. Wù‑uù sùúy jii, «Vé‑eè lì mbàm see mtaár, a dzə̀ mbàm se wír veé Israyi‑iì sìysìn ji káv wìr wùmòʼ,

¹⁰ e yùn kirə́ʼ ké mbóm shó réŋréŋ mo Nyùy‑iì suuyin sá e mò ji m yún.»

¹¹Mo á liìn Jesus, e tìír e ŋgaà saʼ bàràʼ si, wù dzə́r shó jii, «À dzə̀ Fon wìr veé Juda à?» Jesus bìnèr jii, «À sùúy ne.»

¹²Vitú ve atàá cù wùn à vé wòŋe wáa toy vinyo e Jesus bàm vinín, wù kú a tiy kisə́sə, e làa yòʼ a bìnèr gheéy.

¹³Payler dzə́r shó jii, «Bó à yòʼ yú vinyo ve á suuy e wò bàm vin à?»

¹⁴A Jesus kù tíy, e làa yòʼ a ghay. Kinyo kee shooy ki tárír Payler.

¹⁵Mo yii lóo dzə e ghan sé Ŋkǎʼ Yáʼayshaà sìn, wíri lòn wir sháŋ wo áwune koŋè, ŋgaà saʼ bàràʼ fə̀ə́r.

¹⁶Wáa dzə e ghan sin, a kintìŋ ke wìr wùmòʼ kí dzə̀ é sháŋ, aá yoŋ ji Barabar.

¹⁷Wíri yiì bàʼtí, Payler dzə́r jii, «Vèn taʼ ji m fəə́r a dzə̀ la lán fo sháŋ, e fò e vèn? M fəə́r Barabar mo m fəə́r a dzə̀ Jesus wo á yoŋ ji Kristu a?»

¹⁸A wù‑uù dzə́r bèy, bìʼ fo wù‑uù kiìn jii, vé wòŋe kòʼór Jesus e kibàʼ e wùn si bèn, aá gheʼ a ghèʼèn.

¹⁹Bo taaka mo wù kì dzə̀ʼə̀mèn e wùn kirəsí ji wun sáʼ nsaʼ Jesus, wiiy və tsə́nsí ntum jii, lá wù yòʼ kùm a wír və̀y. Wù yòʼ kér a njò yìmòʼ gheéy. Wun suuy bèn a, bìʼ fo njèm se wìr və̀n si siiyin, e shì wun, ndzə rán ranén.

²⁰Mo Payler dzərin bey, vitú ve atàá cù wùn à vé wòŋe nèn a bayír màŋgòŋ və̀y jii, á wáa lon a ji wù fəə́r a dzə̀ Barabar, e yùy Jesus.

²¹Payler kfən lò, e dzə̀r jii, «Vèn suúy ri wír wo m fəə́r fo wír vee abaà víne.» Á bìnèr jii, «Kù dzə̀ Barabar.»

²²Wù dzə́r jii, «M yée le lèn e Jesus və̀n wo á yoŋ ji Kristu?» Áwune nèn sùúy shuu mòʼón jii, «Á tá é kintam.»

²³Wù kfən dzə̀r jii, «Bìʼ ka? Wù jày ka?» Wír vìyi ku màysì, a waamé waamén jii, «Á tá taán é kintam.»

²⁴Payler lòo yen ji bó dzəə̀ yòʼ dzə̀ə́, a wun lùmtín e kinyò fèn, bo lo, e fəə a melaà, wù nèn sùúy, á wìy e mendzə́v mè. Wù wáa sù wó rə́ shó e màŋgòŋ və̀y si, a ka kitú kfə́ jii, «Nyaa njò yem, bó m yòʼ kì fo wìr və̀n kpu. Ku kìíy ven.»

²⁵Màŋgòŋ və̀y nèn bìnèr jii, «Á maʼti, é mensə́ mvə mè kfə́n a dzə̀ e vèr à wón vérí vitu.»

²⁶Payler nèn fə̀ə́r Barabar, e fò aáwune, e fò Jesus, á tám e ŋgwàne. Wù yiì lò, e sùúy ji á li á ri, e dù, e tà é kintam.

²⁷Payler suúy bey, və́ vé rərí nèn lì Jesus, e nə̀ə́ sho e wùn mvə̀m ntoʼ, e bàʼtí shúu rər wo wú shiy ntoʼ yee shooy e dzə̀m. Áwune wìy, e gìm Jesus, e tàr.

²⁸Á shóʼtí ndzə̀y sə́, e lì kikúm ké afòn, e màʼ e wùn wó.

²⁹Á kfən kaàrí kicí ké njoŋ ki, e səə̀nè e kitu wo ji ntáráʼ, e tàʼ ŋkoó, e wày é kiwo wo ji kitoómé. Á yiì bèy, a koʼtí, a gvəʼtí e si wo, a bùn, a kwa jii, «Caamfoò, Fon wìr veé Juda.»

³⁰Aá kwá bèy, cú mentíy e si wo, kfə̀n sə́ ŋkoó wo wù kér e kiwo və̀y, dzəv sho fo kitu.

³¹Áwune kèŋ Jesus, e màysì, e nèn shòʼ kikúm ké afòn kìy fo wùn wó, e màʼ sə́ see ndzə̀y, e lì, a dù ji á tá é kintam.

³²Áwune fəə́, e lòo dù, wùn à wìr wùmòʼ tárnín, aá yoŋ ji Simon, a dzə̀ wír wo wù‑uù loòn fó Serina. Á nèn kàn, wù bèʼèy kicí ké kintam ke Jesus.

³³Á dù, e mèé e kirə̀ʼ ke á yoŋ ji Gorgota, a dzə̀ ji ŋgéreʼ kitu ke wìr,

³⁴e fò meluʼ e Jesus, aá bíŋrí e kifú ke shiʼirín kímóʼ kí ji kí fiʼ rəə̀r a nyár. Wù yútí, e tèn.

³⁵Á nèn tà wun e kintam, e lì ndzə̀y sə́, a tsəm kàŋ sho ji á fiʼ jàv,

³⁶a dzə fo, a shìy.

³⁷Á sáŋ njò rə, e bàrír e kintam e wùn kitu, a yì dzə̀ jii: «Və̀n dzə̀ Jesus woo Fon wìr veé Juda.»

³⁸Á kfən tàm sá ashóŋ abaà é vintam vímóʼ ví e wùn ghaŋ. Wùmòʼ é koy yìyí, wùmòʼ é koy ŋkoòvìi.

³⁹Wíri wáa shaà fo, a mèʼ vitú,

⁴⁰a te lám é wùn wó jii, «Wò‑oò yíi kèr lav cù, e bom ye sən vishiíy vitaár, sə́ ri kitú ké ki lèn. Aà fèn dzə̀ rú Wan Nyùy, à sə̀ʼə́y ri fo kintam.»

⁴¹Vitú ve atàá cù wùn à wír ve á duŋrì nsər Nyùyi, à vé wòŋe wáa sheʼ sa, a suúy jii,

⁴²«Wù‑uù ghán, luŋèr wíri, a bó yòʼ dzə̀ wù lùŋèr kfə́ kee kitú. Wun woo Fon wìr veé Isray, wù sə́ʼə́y ri lèn fo kintam, é vèr yén, e biìmé wun.

⁴³Wù‑uù dzə́ ji wun wày shilív e Nyùy wùn, a Nyùy kòŋ, wù sə̀ wun lèn. Bó yòʼ‑oò suuy wun ji wun dzə̀ Wan Nyùy à?»

⁴⁴Ashóŋ ve vé‑eè tamen wùn à Jesuse wáa shùr sa wun e liy si bey.

⁴⁵Yiì lòo dzə e ntìntìn shùy, woŋe sàsìn, e sə̀n e dzə̀m, e meé shúy sitaár.

⁴⁶ Shúy see sitaár si gheén, Jesus tóŋ kitávín jii, «Eli, Eli, lema sabaktani,» a dzə̀ jii, «Nyùy wom, Nyùy wom, à màʼày mo ji ka?»

⁴⁷Wír ve vé‑eè tíy fo ámóʼó yú, e nèn a suúy jii, wù sí jaŋ a Elija.

⁴⁸Wìr wùmòʼ nyéŋ, e dù, e wày kùshá é kiŋkway ke melùʼ, e sòv e kitu ke mbàŋ, e tsə̀nsí ji Jesus wàá nyoóŋé.

⁴⁹Ámóʼó vee wíri nèn sùúy jii, á wáa leéy rì ji Elija sà yíi wìy, e sə wun a?

⁵⁰Jesus kfən tòŋ kitávín, e nèn shèm.

⁵¹Mo wù kpuun, ndzə̀y se vé‑eè tinmen lav cù sho si ku nèn tòʼnín mbìv sibaà, e kèʼ fo kùy, e mèé fo tsən. Nsay wáa sə̀ʼ, vilán vi wáa waʼkír.

⁵²Say si kfə́n a mvə̀ʼkìr, wír Nyùy ve vé‑eè kpukin nee wáa fəəkír fo kpu anín.

⁵³Jesus wìy fəə̀ fó kpu, wír vìyi nèn dù e Nyùy ŋkàlaʼ yee Jerusalem, wír aníne yén áwune fó.

⁵⁴Mo Jesus kpuun, kitú ke vé rər wùn à wír və́ ve vé‑eè shiy fo vé‑eè taan Jesus e kintame yú mo nsay səʼ bèy, e kfə̀n yèn vinyo ve ví‑iì kooy vidzə̀m, shuu wóví yúm, á wáa suúy jii, «Wìr və̀n‑eè dzə̀ rú Wan Nyùy.»

⁵⁵Vikìy wáa tiy sa fo kwaʼda anín, a leéy. A dzə̀ ve wùn à Jesus‑eè loòn fó Galeli, a ghan, á wáa sə wun.

⁵⁶Aámóʼó dzə̀ Maria Magdalen, à Maria woo yìy à Jeem wùn Joosev, à yìy à wón Sebedi.

⁵⁷Yiì lòo dzə e ŋkuùr, wìr wùmòʼ wìy fo ntèʼ yee Arimatia, aá yoŋ ji Joosev. Wù‑uù dzə̀ ŋgaà mbàm, e kfə̀n a dzə ŋgaà ŋgoo Jesus wùmòʼ.

⁵⁸Wù dù, e yèn Payler, e lòn dzə́n Jesus fo fo. Payler biímé, e sùúy ji á du, e shòʼ, e fò á sho.

⁵⁹Á shóʼ, Joosev sə́, e boò é kintsə̀m ké ndzə̀y ke fíy ki,

⁶⁰e dù, e wày e wun woo Joosev sày ye wù‑uù lèmèn ji á wíy dzəə̀mè wun sho, a vé‑eè bùʼ a dzə̀ é wǔn kilan. Wù wáy, e dòm lúm kilan, e sə̀tí shúu sày sho, e nèn lò.[17]

⁶¹Maria Magdalen wùn Maria wo dzəə̀n yìy à Jeem wùn Joosev wáa dzə e ŋkìʼnìn sày foo fèy, a leéy.

⁶²Ndzə bvəə́shí, e ràn é kishiíy ké bam ke vé‑eè báʼti, vitú ve atàá cù wùn à wír veé mbìv *Farasii dù, e yèn Payler,

⁶³e yòŋ jii, «Wìr wo kuʼùn, vèr kù dzəə́ kuúme kinyo ke sə́ŋgúm və̀y‑iì rə́si suuy e ghan se wù‑uù dzə̀ə́ e tin. Wù‑uù suuy jii, vishiíy ví wíy meé vitaár, é wun fəə́ fó kpu.

⁶⁴Vèr nén a lon jii, à ku sùúy, aá du, a shìy say yee shooy, é vishiíy vee vitaár vi shaa. Aá dzə̀ là fó yiì bèy, ghan símóʼ sí, áàŋgaà və́ ŋgoo yiì wìy, e shòŋ dzə́n rə́, a suúy e wíri ji wù fəə̀ ne fo kpu. Á lóo suúy bèy, é kee shoon kee kimboʼtì ki nèn màysì, e fòy, e shaà ké mbìy ki.»

⁶⁵Payler biímé, e sùúy jii, «Vèn li ri vé rərí, aá wáa shìy say yee shooy kijuŋ.»

⁶⁶Áwune nèn dù, e nàŋsín tíy ye vé‑eè sətin say sho rə̀y, e fìnèr, e lèm vé rərí, á wáa shìy.