Read Lamnso Matio 28 Bible Online

Matio 28 - Lamnso bible

Matio 28

¹Kishiíy ké bam kìy ki shaà, ndzə bvəə́shí, e jàv vitsə́ʼ vitsə́ʼ, a sì kishiíy ké mbìy ki fó ŋgàm, Maria Magdalen wùn Maria woo yìy à Jeem wùn Joosev wáa dù e shùu sày.

²Nsay nèn sàsìn, a sə̀ʼ kitávín, bìʼ fo nshìylav Nyùy Tàr‑iì səʼəyin fó yuv, e tsə̀ʼ kilán ke vé‑eè sətin say sho kìy, e dzə̀ʼə̀m e kitu wo.

³A sí rəə́ ŋwaŋkìr moo kishèv, a ndzə̀y sí rán fo wùn wó ji pép.

⁴Vé rər ve vé‑eè shiy say vìyi yén bey, e yàʼ, e gbùkìr, a neŋnín moo vimkpú ve vifa.

⁵Nshìylav Nyùy rə̀y suúy e vikìy víyi jii, «Lá vèn yòʼ a fàn. M kì ji vèn taʼ a dzə̀ Jesus wo vé‑eè yuyrin é kintam.

⁶Wù yòʼ dzə̀ə́ fèn. Wù fəə̀ ne fo kpu réŋréŋ mo wù‑uù suuyì. Vèn wiy ri, e lèéy lèmé fo Tàr won‑eè néŋé.

⁷Vèn ku nyèŋ cér, e dù, e fìʼtì e wón və́ lìme ji wù fəə̀ ne fo kpu, a wù sí du fo áwuné mbìy e Galeli, aá yíi yen wun fo. Á mo kí dzəə̀n.»

⁸Vikìy víyi nèn tùmnín fo kitu ke sày, aá fan fànèn, kfə̀n shéʼri kinyo kee shooy feyì. Á nèn a nyeŋ ji á du, e fìʼtì e wón lìm Jesuse.

⁹Á lòo dù, e tò e Jesus wùn, wù shàʼtì jii, «M shaʼtì ven.» Áwune nèn gbù e si wo, a baamé wúu rə́, a fo ghvə́m sho.

¹⁰Jesus suúy jii, «Lá vèn yòʼ a fàn. Vèn wáa dù, e sùúy aàfə́r vémé jii, áwune wáa dù e Galeli, é vèr áwune tár á fo.»

¹¹Vikìy víyi lò, e lòo dù, vé rər ve vé‑eè shiy sayi siíy, e dù e mvə̀mlaʼ, e fèr vinyo ve ví kooyin vidzə̀m e vitú ve atàá cùu.

¹²Áwune yú, e nèn kùm vé wòŋe adzə̀m. Wùn áwune dzə̀ʼə̀m, e sùŋnín, e kòóy mbàm sikuʼùn, e tsə̀y shúu vé rər viy sho,

¹³e sùúy jii, á wáa fèr e wíri á ji áwune kì lóo buuné, aŋgàa ŋgoo Jesuse nyáʼtí vitsə́ʼ, e shòŋ á dzə́n Jesus.

¹⁴Á suúy bey, e nèn a naàrì jii, a kinyo kee shoon ki yiì tò e ŋgaà saʼ kitùʼùr, á wáa ròn, aáwune ku kìíy a mo vee tiím, é bo áwune boy fó fo.

¹⁵Vé rər víyi sə́ mbàm sìy, e nèn a fèr kinyo a dzə̀ ke vé‑eè feesin vituʼùr vév ji á wáa fèr. A kù dzə̀ kíwun ke wír veé Judàa yii fer, e shem lán ji vé‑eè shòŋ dzə́n Jesus a shóŋén.

¹⁶Wón lìm Jesus vee nshòv mòʼón e ghvə̀me nèn lò, e dù e Galeli, e kòʼ é gwan wo Jesus‑eè dìnèn ji wùn áwune wíy tar fo.

¹⁷Wùn áwune tár, á nèn tsə̀m e Jesus si, a fo ghvə́m sho. Yii bèy, ámóʼó wáa meŋnín wun.

¹⁸Jesus kóʼtí, e sùúy aáwune jii, «Nyùy wày ne sáʼ yeé yuv wùn à yeé nsayi e dzə̀m e mǒ kiwo.

¹⁹Vèn du ri, a ghan vitúm vidzə̀m, a yeʼéy wíri, a bìnèr ji wír vém, a way áwune é ndzəv e yír Nyùy Tàr wùn Wàn, à Kiyoy ke Ranén kí.

²⁰Vèn wáa yeʼéy áwune, aá wáa lèm sa vinyo ve mò‑oò yeʼeyin vèn shó vidzə̀m. Vèn wáa kiíy jii, m kù wíy a dzə vèsən, e dù, e meé e ghan se ndzə wíy mày.»