Read Lamnso Matio 7 Bible Online

Matio 7 - Lamnso bible

Matio 7

¹«Vèn wáa yen fó a roòmè wír fo Nyùy wáa roòmè sa ven.

²Vèn wáa kiíy jii, mo vèn roomè wír, bo kù dzə̀ mo Nyùy wíy a roòmè sa ven. Wù kù wíy a yiì kinyo e wìr réŋréŋ mo ŋgaàŋ yii e wír ámóʼó.

³Mo kí dzəə̀n bey, bìʼ ka mo nsay sə́ti sí wìr, wù kù a gheemé ji wun leéy shisám she nsay she shí toon e fər və́ si?

⁴Wù lo, wù nèn sùúy e fər və jii, wù tiím, é wun fəə́r shinsay shìy fo wùn si. A dzə̀ wù fə̀ə́r é le, a nsay si sə́tí ne rə́ yee sí?

⁵Wìr woo bey dzə̀ bìnbìnteʼnsə́m. Wù ku tòmbìy fə̀ə́r nsay se sí sətin rə́ yee sí sə́tín, e bóo fíʼ yen shisám she shí dzəə̀n e fər və́ si, e fəə́r.

⁶«A bó kí yoʼ fə̀m ghèén ji vèn li kifá ke á cuùn Nyùy sho, e màʼ e jwí si, fo sí kfə́r, e kfə̀n bìnkìr, a nyàv ven e sóŋé. A bó yòʼ dzə̀ sá, á lì *síbaŋ, e fò e kǔnnyàm, wù wàa tay e kishàʼàr.

⁷«Vèn lóo bùnrì, vèn wàa lon, é Nyùy fó. Vèn wáa tàʼ, é Nyùy yii, é vèn yén. Vèn wáa kùmrì shúu lavi, é Nyùy mvəʼ, é vèn nəə́.

⁸Vèn wáa kiíy jii, wìr wo wù kooy kifá dzə̀ á wo wù lóné. A wìr wo wù taʼ kifá yíi yen, aá mvəʼ shúu lav, é wìr wo wù kumrì nəə́.

⁹Wìr dzə̀ shó e věn mvəm wo dzə̀ wan və lòn kibán, wù fò a dzə̀ tíy shó a?

¹⁰Wù lón sə́, wù fò a dzə̀ yó sho a?

¹¹Kí nén a dzə jii, mo vèn dzəə̀n wír ve á kù yii vinyo ve bi ví, a vèn kù yòʼ kiiy mó a fo vifá ve juŋ vi e wón véné, bo dzə̀ Tàr won wo wù dzəə̀n é yuv fò vifá ve juŋ vi e wír ve á lón fo wune, e fò féyì, e shaà ven.

¹²«Kidzə̀m ki wáa dzə jii, vèn wáa yiì kinyo e wíri, a dzə̀ sá ke vèn koŋ ji á wáa yiì e vèn. Kee shooy ki tàtí kinyo ke Mooser wùn aàŋgàa ntum Nyùyi suuy kidzə̀m.

¹³«Vèn wáa tàʼ dzəə yùv a dzə̀ fó shuù wo wú fárninè. Shuu wo kuʼùné nəə a dzə̀ é və̀y, a dzəə̀ dzə̀ fó e táʼámén, a wíri shaa sho nyanyày.

¹⁴Shuu wo wú nəə kfə́ a dzə̀ é dzə̀ʼə̀m yee là mayi nen dòr é ŋàŋ, dzəə̀ yee fó wáa làynìn, a bó wíri yòʼ yén anín.

¹⁵«Vèn wáa yen fo aŋgàa ntum kimboʼtìi nəə́ e věn ŋgoo. Wír vee shooyi woóne moo nyám ye bi ye yì màʼàn juv njiì, e nə̀ə́ e njiì ŋgoo ji wun laar njiì.

¹⁶Vèn wíy kiíy aŋgaàŋ a dzə̀ fó liì wo á kérí, réŋréŋ mo á yii kiiy tíŋ kifa a dzə̀ fó kifa ke kí koom sho. Bó yòʼ dzə̀ á kòy shinyáʼ fo tiŋ kilun, a bó yòʼ dzə̀ sá á kòy bíy fó kici ké nshùn.

¹⁷A kicí kí dzə̀ ke dzə̀ á kfə̀r, kí kòóm kifá ke juŋ ki. Wáa dzə ke bó yòʼ dzə̀ á kfə̀r, kí kòóm a dzə̀ kifá ke bi kí.

¹⁸A bó yòʼ dzə̀ kicí ke dzə̀ á kfə̀r kí kfə̀n kòóm kifá ke bi kí. A bó yòʼ dzə̀ sá ke bó á yòʼ yii kfə́r ki lò, e kòóm kifá ke juŋ ki.

¹⁹Lóo dzə vicí ve bó ví yòʼ koom vifá ve juŋ vi, á gwàr vee shooy vidzə̀m, a tòn tònèn.

²⁰M fìʼsìn ne ké vici, a kù dzə̀ mo vèn wíy a kiíy aŋgàa ntum kimboʼtìi a dzə̀ fó liì wo á kérí.

²¹«Wír ve á yoŋrì mo ji Tàr, Tàr, yòʼ dzə̀ vee shooy adzə̀m ve m wíy lì ji wír vém é ghan se m sí sáʼ ji Fon. Kù wíy a dzə wír wo wù yii kinyo ke Tàr wor wo wù dzəə̀n é yuv koŋ ji wù wáa yiì.

²²Wíy lòo dzə e kishiíy kee shó, é wíri wáa yòŋrì mo anín ji ‹Tàr, Tàr›, a suúy jii, ‹Vèr‑iì ló a fìʼtì sáʼka wò wo juŋ e wíri, a yòŋ yír yé, e bó a kàntì *anyùy, aá wáa màʼtì wíri, e kfə̀n a yiì vinyo ve ghaʼtín vímóʼ ví vinín.›

²³Á lóo suúy bèy, é m nèn a jùm jùmèn jii, ‹Vèn kóʼtí fo mǒ si, bó m yòʼ‑oò lo yiì kìíy ven féyì. Vèn‑eè ghán, buʼtì a dzə̀ vinyo.›

²⁴«Vinyo vìn vidzə̀m vi nén a dzə jii, a wìr yuúri vinyo ve m tír wíri shó vìn, yii mo ví dzəə̀n, bo ŋgaàŋ fìír feyì moo wír wo wù‑uù baʼrì lav, e wày kinsə̀ŋ a dzə̀ é kitu ke kilan.

²⁵Wù bàʼrì, wuú wìy keèsì fo yuv, ndzə́v sí rúnkír, e fəə̀, a tsəy lav, kinsəm ki kfə́n a kàr, a bó yòʼ dzə̀ yì gbù, bìʼ fo vé‑eè bàʼrìn a dzə̀ é kitu ke kilan.

²⁶Wìr wáa yuurí kfə́, e làa yòʼ a yiì mo m suuyì, bo ŋgaàŋ yùŋsí moo wír wo wù‑uù baʼrì rə́ə yee lav a dzə̀ é kitu ke siy.

²⁷Wù bàʼrì, wuú wìy keèsì fo yuv, ndzə́v sí rúnkír, e fəə̀, a tsəy lav, kinsəm ki wáa kàr, yì nèn keèsì, e gbù e nsay feyì ji rìŋ.»

²⁸Jesus fèr vinyo vìn vidzə̀m, ví mày, màŋgòŋ wo wù‑uù yuúri wáa ker gháʼ,

²⁹bìʼ fo wù‑uù yéʼey moo wír wo wù kiìn kinyo ke wù suuy a dzə̀ fo wùn vifii. Wù yòʼ‑oò yéʼey moo wír ve á yii duŋrì wír veé Isray nsər se Nyùy.