Read Lamnso Matio 8 Bible Online

Matio 8 - Lamnso bible

Matio 8

¹Jesus sə́y fó gwan fèy, wíri lò e wùn bàm aneénín.

²Wìr wùmòʼ wáa dzə fo, a wù‑uù joy shivnsay. Wù wìy, e tsə̀m e Jesus si, e yòŋ jii, «Tàr, m kì jii, aà kòŋ, à fèr mo.»

³Jesus nèn ràmsì kiwó, e kùm sho, e sùúy jii, «M kòŋ ne, bónén ri.» Shìvnsay ku nèn mày fo wìr və̀y wùn, wù bónén.

⁴Jesus kàntì ji wù wáa yen a fó dù, e suúy e wìr. Wù ku dù duùn tìítiy, e dìn a wún və́ e taà cù, e kfə̀n fò á kifá ke cù ke Mooser‑iì suuyin ji wìr bónen fo yàsí fèn, wù fò. Wù yii bèy, é wìr dzə̀m nèn kìíy a ji wù bònén ne.

⁵Jesus dù, e nə̀ə́ e ntèʼ yee Kapeenahum, a wìr wùmòʼ dzə̀ fó, a dzə̀ mfòómé wìr veé *Rom. Wù nèn wìy, wùn Jesus tárnín,

⁶wù wáa bi jii, «Tàr, wánlè wom néŋ e lav, a virə́ʼ ví wám feyì, a bó yòʼ dzə̀ wù nànèn.»

⁷Jesus bìnèr jii, «M yíi wìy, e fèr wán woo shooy.»

⁸Mfòómé və̀y nèn kfə̀n yòŋ ji «Tàr, bó m yoʼ ghèén e wìr wo dzə̀ à nə̀ə́ e wùn lav. Ku sùúy a dzə̀ jí fo shuù, é wánlè wom bónén.

⁹M kì ji dzə̀ kí wàa dzə bèy, bìʼ fo m dzəə̀n sá, a dzə̀ m kù a yu jí wìr wo wù kér mo. A m sáʼ sa wóm woo shúu rər. M túm wír, wù kù nèn dù, jaŋ wo jaŋèn, wù kù nèn wìy. M suuy e kwàn wómé ji wú yii kin, wú kù nèn a yiì yiìn.»

¹⁰Jesus yuúrí, a ker gháʼ, e bìnkìr, e sùúy e wír ve vé‑eè wiy e wùn bàmé jii, «Vèn wáa kiíy rú jii, m yòʼ‑oo yií ne yèn wír woó Isray wùmòʼ wo wù wayin shilív e mǒ wùn moo kiŋgwìy kìn.

¹¹M suuy e vèn jii, wíri wíy lò virə́ʼ vidzə̀m fo kitu ke nsay, e nəə́ e Nyùy wòŋ woó yuv, e dzə̀ʼə̀m wùn à Abraham, à Aysi, à Jakov, a yi kiŋkàʼ ke Nyùy.

¹²Viŋgwìy vi nəə bèy, é wír veé Isray ve kì yíi a dzə kirə́ʼ kéví nèn gòʼ, a dzə̀ fó ndzə, aá dom é ŋòròʼ, aá wáa toŋnín fo, a ŋeytí sóŋ.»

¹³Jesus nèn sùúy e mfòómé və̀y jii, «Kú a dù fo laʼ, m yiì ne kinyo ke à kì wayin shilív e mǒ wùn ji dzə̀ m yiì.» Mo Jesus suuyin bey, wánlè mfòómé və̀y ku nèn bònén e ghan see shó.

¹⁴Jesus nèn lò, a dù e Pita lav, e yèn, a yìy à wiiy Pita kì néŋ e kikun, a kinjàʼ ki shúr.

¹⁵Wù dù, e ghàr kiwó kfə́, kinjàʼ ki nèn bònén. Wù nànèn e yuv, a ker áwune, a yiír.

¹⁶Yiì lòo dzə e ŋkuùr, wíri wáa wìykìr e wíri anín ve *anyùyi jívir áwune, a yen Jesus sho. Á wiy sho, wù súŋnin sùŋnín, anyùy vee shooyi nèn a màʼtì wír vìy, a nyeŋ. Wù kfən fèr aŋgàa yàsí ámóʼó adzə̀m.

¹⁷ Jesus yiì bèy, kinyo ke Aysaya woo ŋgaà ntum Nyùy‑iì suuyin kí nèn ghèén. Wù‑uù sùúy jii, «Wù‑uù bèʼèy ayàsí vér, e kfə̀n màyìr nyár yér.»

¹⁸Jesus lòo yen, a màŋgòŋ kù sí báʼti e wùn ghaŋ nyanyày, wù nèn sùúy e wón və́ lìme jii, «Vèsən lo, e tùmsín e ndzən kibàŋ və̀sə.»

¹⁹Á lò ji á sí du, wìr wo wù‑uù duŋrì nsər se Nyùy wùmòʼ wìy, e yòŋ Jesus jii, «Ŋgaà Yèʼey, aà fə̀m du fèé, bo wòsò kù yíi a ghan.»

²⁰Jesus bìnèr sho jii, «Nyám símóʼ sí kér bíi sév, a menə́n mè kér láʼ sév, yii bèy, a bó ŋgaà wo yírí dzəə̀n *Wanwìr və̀n yòʼ kér fó teʼ kfə́ kee kitú.»

²¹Ŋgaà ŋgoo və wùmòʼ kfən sùúy sho jii, «Taàtá, ku màʼtì, é m du, e dzəə̀mè tàr wor ŋkuŋ, e bó a wìy.»

²²Jesus bìnèr e woo shooy jii, «Kú a wìy wìyìn, e màʼtì, é wír ve á siìn ji aŋkfəə wìy a dzəə̀mè aŋkfə vév.»

²³Jesus nèn nə̀ə́ e kikoŋ, wón və́ lìme nəə́ fó bàm, wùn áwune wáa tumsín kibáŋ.

²⁴Kinsəm ki nèn lò, e sàsìn, a shaà kitávín, a tsəy ndzə́v, mendzə́v mè wáa liy, a nəə́ e kikoŋ, a Jesus kì buúne.

²⁵Wón və́ lìme kóʼtí, e yìm, e yòŋ jii, «Tàr, vèr sí lay e ndzəv, ku sə̀ ver.»

²⁶Jesus bìnèr jii, «Vèn fan ji ka? Vèn dzə̀ ben, a bó á yoʼ lò, a way shilív e mǒ wùn gheéy.» Wù nèn nànèn, e wàm kinsəm kìy, e kfə̀n wàm ndzə́v. Kinsəm ki tiím, ndzə́ví rə̀sìn, a tiy ji nyoòŋ.

²⁷Wón və́ lìme wáa ker gháʼ, a ghaynín jii, Jesus sà dzə̀ wír woó le, wo ndzə́v wùn à kinsəm ki yúnin wun a?

²⁸Jesus wùn à wón və́ lìme túmsín kibáŋ, e mèé e wír veé Gerasiné mbìv wòŋ. Jesus fəə́ fó kikoŋ, wùn à wír ámóʼó tárnín abaà, aànyùyi jívirì. Vé‑eè shiiy e mbvə̀ʼ se vé‑eè dzəəmè wíri shó, aá shévkir e ŋàŋ, a bó yòʼ‑oò dzə̀ wìr bàv é ghaa mbvə̀ʼ foo fèy gheéy.

²⁹Á yén Jesus, e nèn kèʼ, a rəəmé jii, «Wò woo Wan Nyùy, à taʼ ji à yée e vèr? À sí wiy ji à wáa nyàvrì e vèr, a bó fìʼ yóʼ ne ghèén à?»

³⁰Anyùy vìyi wáa rəəmé bèy, a ŋgoo kǔnnyàm kì yíkir e ghaa kirə̀ʼ fóo fèy,

³¹á nèn a lon jii, «À jum ver, à kù tsə̀nsí, é vèr túmsín a dzə̀ e ŋgoo kǔnnyàm rə̀sə wùn.»

³²Jesus bìnèr jii, «Vèn du ri fo.» Á nèn fəə̀ fo wír vìyí wùn, e dù, e nə̀ə́ e ŋgoo kǔnnyàm rə̀y wùn. Kǔnnyàm bvəə́rí, e dzə̀ŋrí kóŋ, e tòkír e kibaŋ, e làykìr.

³³Wír ve vé‑eè shiy kǔnnyàme yén bey, e nyèŋ, e dù e mvə̀mlaʼ, a fìʼtì kinyo ke kí kooyin, a fèr mo Jesus kì fèrìn wír vìy.

³⁴Wíri yú, e nèn keèmè fo mvə̀mlaʼ, a dù ji á yén a Jesus. Á dù, e yèn, e nèn lò, a lon jii, kii wun, wù lo á fo áwuné wòŋ.