Read Lamnso Maak 10 Bible Online

Maak 10 - Lamnso bible

Maak 10

¹Jesus lò fo ntèʼ yee Kapeenahum, e dù e mbìv wòŋ yee Juda, e yiì lò, e tùm ndzə́v yee Jordan, e kfə̀n é mbìv wòŋ fèsə. Mo wù‑uù ghán bèy, màŋgòŋ kú a baʼtí e wun ghaŋ, wù wáa yeʼéy áwune mo wù kù‑uù yéʼeyì.

²Wír ve vé‑eè dzəə̀n é mbìv *Farasi ámóʼó nèn lò wìy, a woóy wun, a dzər sho jii, «Nsər yèsən biímé ji dzə̀ wír, wù fə̀ə́r wiíy və á?»

³Jesus dzə́r kfə́ jii, «Mooser‑iì fò nsər e vèn ji ka?»

⁴ Áwune bìnèr jii, «Mooser‑iì lo biìmé ji dzə̀ wìr fə̀ə́r wiíy və, lóo fəə́r, wù sàŋ ŋwàʼ njàvsìn, e fò á sho.»

⁵Jesus nèn sùúy aáwune jii, «Mooser‑iì sàŋ nsər yee shooy bèy bìʼ kitú kén ke tavín kí.

⁶ Vèn wáa kuumé ji Nyùy‑iì kèʼ ndzə fo mbìy, e bòm a dzə̀ wír abaà ji lumèn wùn wiíy. Kí dzə̀ é Ŋwàʼ Nyùy jii,

⁷‹Á kinyo ke kí yiìn, é bo lùmèn maʼti tàr wov wùn yè wov, e tàtí wùn wiiy və,

⁸ áwune vee wír abàá nén a dzə wún e mòʼón.›

⁹Wìr ku nèn a yen fó jàvsìn kifá ke Nyùy tatin ne.»

¹⁰Jesus wùn à wón və́ lìme yiì lò, e nə̀ə́ e lav, á kfə́n a dzər kinyo kee shooy sho.

¹¹Wù bìnèr jii, «A wìr fə̀ə́r wiíy və, e lì wo sən, bo wù yiì kinyo ke bi kí e wiiy və réŋréŋ mo wù jàŋ wiíy wo jaŋèn.

¹²Kí kfə́n a dzə sa jii, a wiíy fəə̀ fo lum, e dù, e yèn wo sən, bo wù yiì a kinyo ke bi kí e lum və réŋréŋ mo wù dù a dzə̀ viŋkar.»

¹³Wír ámóʼó nèn a wìy e wóné ji Jesus neer á wó rə́ aáwuné vitu, e bùnrì fo fo. Á lòo wìy, wón və́ lìme nèn kèʼ, a shèm.

¹⁴Jesus yú, wún vəə́ kìn, wù suúy jii, «Vèn maʼti, é wón ve terií wáa wìy, a yen mo. Lá vèn yòʼ a shèm, bìʼ fo wír ve á wíy nəə́ e vijùŋ ve dzəə̀n vé saʼ Nyùyi kù dzə̀ wír vee moo wón vin.

¹⁵M suuy e vèn rúrú jii, a wìr dzə̀ là fóo biimé sáʼ Nyùy moo wánlè wo terí, la wù yòʼ wìy nə̀ə́ sho.»

¹⁶Wù suúy bey, e bàʼtí wón vee shooy e wùn koy, e neèr wo rə́ aáwuné vitu, e bùnrì fo fo.

¹⁷Jesus yiì lò ji wun waà sí lo, wìr wùmòʼ nyéŋ, e wìy, e tsə̀m é si wo, e yòŋ jii, «Ŋgaà Yèʼey, wò moo wír wo juŋ, a dzə̀ m yèe, e bóo wìy nəə́ e dzə̀ʼə̀m yee là may?»

¹⁸Jesus tòmbìy dzə̀r shó jii, «À yoŋ mo ji wír wo juŋ bìʼ ka? Wìr wo juŋ yòʼ dzə̀, kù jòʼsì Nyùy wùn mòʼón.

¹⁹ Fo ke à kì dzərin kí, à kì sá nsər see jii, ‹Lá wìr yòʼ yùyrí wír. Lá wìr yòʼ lì wiiy wìr, kìn ji wiíy wáa ghan viŋkar. Lá wìr yòʼ a shoŋ vishóŋ. Lá wìr yòʼ tìím vinjen ve kisaŋ vi, lá wìr shwìv wír, wìr ghvə́m á tàr wov wùn yè wov.› »

²⁰Wìr və̀y bìnèr jii, «Ŋgaà Yèʼey, mò‑oò sí lem nsər see shoon sidzə̀m fo meterí.»

²¹Jesus leéy wun, a kòŋ, e sùúy sho jii, «Bo kinyo ki dzəə́ bér kimòʼón ke dzə̀ à yiì. Dù ri, e fiìnè kéŋ yée e dzə̀m, e jàv mbàm e vé ŋgeʼe, e wìy, é wòsò wáa ghan. À yii bèy, áà nèn wìy a ker bùʼ a dzə̀ e Nyùy wòŋ woó yuv.»

²²Wìr və̀y yú kinyo kìy, e rə̀ə́y, bìʼ fo wù‑uù kér kéŋ e ŋàŋ. Wù nèn lò, a dù e wún vəə́, a sòv kitú.

²³Jesus siíy, e lèéy wón və́ lìm e si si, e sùúy jii, «Kí dzə̀ kigháʼán féyì fo ŋgaà kav nəə́ é vijùŋ ve dzəə̀n vé saʼ Nyùy.»

²⁴Áwune yú, kí tárír áwune. Jesus nèn kfə̀n yòŋ jii, «Wónen, kí ghàʼ féyì fo wìr nəə́ e Nyùy mvə̀m saʼ.

²⁵A fə̀m dzə̀ ji nyàm yee moo *kamer tósín é si ntar, bo bó yòʼ dzə̀ ŋgaà kav tàv nə̀ə́ e vijùŋ ve dzəə̀n vé saʼ Nyùy.»

²⁶Áwune yú, a ker gháʼ ye tavíné, e dzə̀r e Jesus jii, «Bo dzə̀ wìy nə̀ə́ la é dzə̀ʼə̀m yee là may lèn?»

²⁷Jesus túy sí aáwuné wùn, e lò, e bìnèr jii, «Kí gháʼ a dzə̀ fo wìr, bó kí yòʼ gháʼ Nyùy, bìʼ fo dzə̀ Nyùy, wù yiì vinyo vidzə̀m.»

²⁸Pita nèn a bi sho jii, «Yén ri mo vèr màʼtìn ne vér vee vifá vidzə̀m, a ghan e wò bàm.»

²⁹Jesus bìnèr jii, «Kú a kiíy rú jii, a wìr màʼtì láʼ rə́, kìn afə́r və́, kìn tàr wov wùn yè wov, kìn wón, kìn súm sí, bìʼ mo wùn à kinyo ke Nyùy ki,

³⁰bo ŋgaàŋ kfə̀n wíy a ker láʼ símóʼ sí, wùn aàfə́r ámóʼó, aàtàr wùn aàyìyí, à wóné, à súm sí kirə́ʼ wií é ndzə yee lèn, a wíri kfə̀n wíy a bàn wun. Fo bàm é ndzə ye yì wiyì, é wù kfə́n a ker dzəʼə̀m yee là may.

³¹Vèn wáa kiíy jii, wír anín ve á yénsin lèn ji vé mbìyi wíy kfən ji vé bàmé, é vé bàmé kfə́n ji vé mbìyi.»

³²Jesus wùn à wón və́ lìme nèn lò lèn, e lì dzə́ə Jerusalem, wù shém fó mbìy. Ghán yee shooyi tárír wón və́, e kfə̀n yiì, wír ve vé‑eè loòn fó bàmé wáa fàn. Jesus kfən lì wón və́ lìm vee nshòv sibaà, wùn áwune bàr wún, wù wáa naàrì kinyo ke kí wíy koóy wun,

³³a suúy jii, «Vèn yuúrí, vèsən sí du e Jerusalem, a dzə̀ fo á sí du, e way ŋgaà wo yírí dzəə̀n *Wanwìr a dzə̀ e vitú ve atàá cù wùn à wír ve á duŋrì nsər Nyùyí wo, aá sáʼ nsaʼ rə, e bìn ji á yúy. Á wíy way wun e vitúm ve ví sáʼ woŋ və̀n ví wo,

³⁴aáwune wáa shoór wun, a cu mentíy e wùn si, a tam e ŋgwàne, e lì, e dù, e yuyrí. Vishiíy ví wíy mee vitaár, é wù fəə́ fó kpu.»

³⁵Jeem wùn Joon vee wón Sebedíi yiì lò, e kòʼtí e Jesus ghaŋ, e sùúy sho jii, «Ŋgaà Yèʼey, kinyo kímóʼ kí dzə̀ shó, a vèr taʼ ji à ku yiì, e fò e vèr.»

³⁶Wù dzə́r jii, «Vèn taʼ ji m yée e vèn?»

³⁷Áwune bìnèr jii, «Wíy lóo dzə e ghan se à sí sáʼ vifon vé, à kù dzə̀ʼə̀r ver vitú ve ntaʼ e wò ghaa kàvàʼ.»

³⁸Jesus suúy aáwune jii, «Vèn yòʼ kì kinyo ke vèn lón kìn. A dzə̀ vèn nò bàr ŋgeʼ wo m wíy no a? A dzə̀ vèn biìmé ŋgeʼ ye m wíy nəə́ sho a?»

³⁹Áwune bìnèr jii, «Vèr dzə̀ kibáʼtín.» Jesus nèn sùúy jii, «Bo vèn wíy no fo bàr wo m wíy no, e kfə̀n wìy nəə́ sa e ŋgeʼ ye m wíy nəə́ sho.

⁴⁰Yii bèy, a bó yòʼ dzə̀ kirə́ʼ kém fó dzə̀ʼə̀r ven vitú ve ntaʼ vee shooy. Nyùy‑iì lèm ne antaʼ vee shooy fo wír ve yì‑iì shoʼtin wun woo Nyùyi ji á wìy a dzə sho.»

⁴¹Kibér ke wón lìm vee ghvə̀me yú kinyo kee shooy, e nèn a shwiíy kilòŋ fo Jeem wùn Joon.

⁴²Jesus yòŋ áwune adzə̀m, e sùúy jii, «Vitúm vímóʼ ví dzə̀, a wír ve á yoŋ ji vé saʼa táy wíri é ŋàŋ. Wír ve á kér ghayi nén a koʼrí aàlàghayí vitu.

⁴³A bó yòʼ dzə̀ kí wàa dzə bèy e věn mvəm. A wìr taʼ ji wun wáa dzə wír wo kuʼùn e věn mvəm, ŋgaàŋ kù neèr kitú kfə́, a lìm fo wìr dzə̀m.

⁴⁴Wìr wáa tàʼ ji wun wáa tiy mbìy, ŋgaàŋ kù lì kitú kfə́ ji kwǎn wìr dzə̀m.

⁴⁵A bó ŋgaà wo yírí dzəə̀n *Wanwìr və̀n yòʼ‑oò lo wìy sa ji wíri wáa lìm fo wun. Wù‑uù wìy ji wun wáa lìm fo wíri, e fo kitú kfə́, e fíʼ tin wír anín fo lòn.»

⁴⁶Jesus wùn à wón və́ lìme ghán, e dù, e mèé e ntèʼ yee Jeriko, e lòo tosín, màŋgòŋ sə́ʼ fó bàm. Á lòo shaà, a mfìr wùmòʼ dzə́ e ghaa dzəə, lón viloòné, aá yoŋ ji Batimayur, a dzə̀ ji wan Timayur.

⁴⁷Wù yú ji dzə̀ á Jesus woó Naasarer mo wù shaa, e nèn kèʼ, a waamé jii, «Jesus woo Wan Fòn Davir, ku shàm mendzən mem mè.»

⁴⁸Wíri nèn lò anín, a wamrí wamrín ji wù bér á njèʼèr. Wù kú a waamé waamén jii, «Wàn Fòn Davir, ku shàm mendzən mem mè.»

⁴⁹Jesus yú, e tìím, e sùúy ji á wàá jaŋ. Á jàŋ, e sùúy sho jii, «Vishí vé vi bòŋ ne, wù jaŋ wò, lò ri e yuv.»

⁵⁰Wù nèn shwèy ndzə̀y se wù‑uù wavin fó nsay, e tùm é yuv, a dù fo Jesus wùn.

⁵¹Wù dù, Jesus dzə́r shó jii, «À taʼ ji m yée le e wò?» Wù bìnèr jii, «Tàr, m taʼ ji sí yémé mvəʼəm.»

⁵²Jesus suúy shó jii, «Mo à wayin shilív e mǒ wùn, sí yée mvə̀ʼə̀m ne. Kú a dù rì du yée.» Wù ku nèn yèn virə́ʼ, e lò, a dù a dzə̀ e Jesus bàm.