Read Lamnso Maak 13 Bible Online

Maak 13 - Lamnso bible

Maak 13

¹Jesus wùn à wón və́ lìme yiì fəə̀ fó lav cù fèy, e lòo shaà, wùmòʼ wáa bi sho jii, «Tàr, ku lèéy lav cù rə̀n, yì dzə̀ e gháʼán. Vilán ve vé‑eè bomen shó vi dzə̀ féyì.»

²Jesus bìnèr jii, «À búri kimbom kìn ji kí ghàʼ ben, a ghán sí wíy gheén, é la tíy yímóʼó yòʼ gòʼ e yímóʼó kitu là ker gheéy.»

³Wù nèn kòʼ é Gwan Vicì vé Oliv, e dzə̀ʼə̀m e mbìv yé a yen lav cù fo ròŋ. Pita wùn à Jeem, à Joon, à Andru bàr wún fo wón və́ lìm ámóʼó, e wìy, e dzə̀r shó jii,

⁴«Ku sùúy ver ghán se kinyo ke à kì suuyin kiy ki wíy koóy, e kfə̀n sùúy kisəəm ke kí wíy dìn ghán see shooy.»

⁵Jesus nèn a naàrì jii, «Vèn wáa yen fo wìr wìy bòʼtí ven, é vèn jáy dzə́ə.

⁶Wíri wíy a fəə anín, a teʼ mo é si, a suúy ji áwune dzə̀ *Mfə̀ə́r woo shó, e boʼtí wír anín, aá jáy dzə́ə.

⁷Vèn wíy yú léŋ rər, á sí maʼ fèn, maʼ fèsə, lá vèn yòʼ a yaŋyáŋ. Vinyo vìn vi kù kér fó wìy koóy, a bó yòʼ dzə̀ ji ghèén ne ghán se ndzə rə̀n mayì.

⁸Kitúm kímóʼ kí wíy lò, a màʼ kímóʼ kí e rə́r sí, é woŋ wúmóʼó ŋáʼáy, a màʼ wúmóʼó sá e rə́r sí. Nsay wíy a sə̀ʼ e virə̌ʼ virə̀ʼ, é virə́ʼ ví wáa kèrkìr, é jìŋ kfən koò. A vinyo vìn vi kù dzə̀ə́ shúu fù réŋréŋ mo wàn yii sov wiíy.

⁹«Vèn wáa kiíy ji á wíy a nyàvrì e vèn, a koorí, a dù sho e lav se nsaʼ, e kfə̀n a dzə̀v ven é ŋgày se bùnrì, bìʼ fo vèn dzəə̀n wír vém. Á wíy a lì nsaʼ yen fó mbìy, a dù sho fo afone, kfə̀n a dù sho fo vitú ve saʼ ve bàràʼ vi. A vèn wíy a tiím e wír vee shooyí si, a fìʼtì a dzə̀ sáʼka Nyùy wo juŋ, aá wáa yu sa.

¹⁰Aá kù kér fó wìy fìʼtì sáʼka Nyùy wo juŋ və̀n vitúm vidzə̀m, é bo ndzə rə̀n wáa mày.

¹¹«Kí nén a dzə jii, á wíy koó ven, lóo dù sho e lav nsaʼ, lá wìr yòʼ a rə̀m ji wun sà yíi dù, e bìnèr ji ka á? Vèn wíy du, vèn wàa suúy a dzə̀ kinyo ke kí wìyìn e věn shuù e ghan see shó, bìʼ fo bó yòʼ wíy a bìnèr ven fo věn vifii, wíy a fo Kiyoy ke Ranén kí jí ye dzə̀ vèn bìnèr.

¹²Wíy lòo dzə e ghan see shooy, é fə̀r wáa kar menàŋ e wùmǒʼ bàm, aá wáa yuyrí, é tàr à wàn wáa kar menàŋ e wǎn bàm, aá wáa yuyrí. A wóné kfə̀n wíy a kar sa menàŋ e vitàr wùn à viyìy ví bàm, aá wáa yuyrí.

¹³Wìr dzə̀m wíy a bàn ven, bìʼ fo vèn dzəə̀n wír vém. Yii bèy, a wìr wo wù wíy lùŋ dzə̀ wo bó wù yòʼ wíy bìn ndzə̀m e mò.»

¹⁴Jesus nèn kfə̀n a suúy jii, «Vèn wíy lóo yen, a kifá ke vé‑eè yoŋ ji kí wíy a koʼóy, a bivír kirə́ʼ, kí fəə́sín, aá tiír fo bó yòʼ dzə̀ kí wàa tiy, wír ve á dzəə̀n é mbìv wòŋ yee Judàa wàa sam, a koʼ aàgwan.[5] Wìr wo wù yoŋ kinyo kìn fo ŋwàʼ fèn, ŋgaàŋ səəm.»

¹⁵Jesus suuy jii, «Wìr wíy yú, a wù dzə̀ é kitu ke lav, sə́ʼəy ji wun sí nyéŋé, lá wù yòʼ dzəə nə̀ə́ e lav ji wun li kifá.

¹⁶Wìr yú, a wù sì é sum, lá wù yòʼ dzə́ə a kfən fo laʼ ji wun li kikúm, e bó a nyeŋ.

¹⁷Éè mò, wíy lòo dzə e vishiíy fóo fèy, é ké vikìy ve á juur bvəm wùn à ve á nyoor wón kí wáa dzə e le?

¹⁸Á kú a lon a dzə̀ fo Nyùy ji lá kinyo kee shooy ki yòʼ wìy kòóy e ghan sé kintòn.

¹⁹Wíri wíy yen ŋgeʼ ye tavín é ghan fóo fèy, a bó á yòʼ‑oò yiì ne yèn kfə́ə yìwun, e kèʼ mo Nyùy‑iì bomen nsay, e wìy meé lèn. A bó yìmòʼ yòʼ dzəə́ wìy koóy yee shooy.

²⁰A là fo Nyùy far vishiíy vé ŋgeʼ yee shooy, bìʼ wír ve wù‑uù shoʼtin ji və́, bo bó wìr yòʼ kì wíy lùŋ.»

²¹Jesus kfə́n a suúy jii, «A wìr wìy sùúy e vèn é ghan fóo fèy jii, ‹Vèn leéy, *Mfə̀ə́r və̀ne›, kìn jii, ‹Və̀sə›, lá vèn yòʼ biìmé.

²²Vèn wáa kiíy jii, wíri wíy fəə anín, a boʼtí ji áwune dzə̀ Mfə̀ə́r, kìn ji *ŋgaà ntum Nyùy wùmòʼ, a yiì vinyo ji ví fíʼ a dìn vitaáví vé Nyùy, e kfə̀n a yiì viŋgaʼnìn ve vinyò vímóʼ ví ji á fíʼ boʼtí wíri, bo taaka ve Nyùy‑iì shoʼtin ne ji və́, aá jáy dzə́ə.

²³Mo m sí suuy vinyo vìn vidzə̀m e vèn lèn, é bo ví wìy a koóy, vèn wáa yen rì fo wìr wìy jày dzə́ə.

²⁴«Wíy lòo dzə e ghan see shooy, a ŋgeʼ ye kuʼùn rə̀y shaá ne, é shùy ndzə́mén, é la ŋwee yòʼ dzə́ə a ban.

²⁵Mejiy mè wíy a gbùkìr fo yuv, é vifá ve ví sə́ŋnin e yuv ví wáa nyeŋnín vidzə̀m.

²⁶ A wíri wíy yen mo ŋgaà wo yírí dzəə̀n Wanwìr bvəysin é mvə̀m mbàʼ, a wù sí kér vitaáví wùn à vikuʼùy ve ghaʼán ví.

²⁷Wù wíy lòo wìy, é wù tsə́nsí nshèelav sə́ é buu se ndzə see sikweè, aá báʼtí wír ve Nyùy‑iì shoʼtin ji və́, aá wáa wìy vitóŋtóŋ vidzə̀m, à fó nsay, à fó yuv.

²⁸«Vèn li mfìʼ fo kicí ké *fig ki. Kí yii sooyì, keʼ lóo tokír, á nèn kìíy ji wuú sí yiì a gbù.

²⁹Kù dzə̀ sá réŋréŋ mo vèn wíy yén vinyo vìn, a ví sí kooyì, vèn nèn a kiíy ji Wanwìr sí wiyì, a wù sì é shweesí.

³⁰Vèn wáa kiíy rú ji ŋgwàʼ ye yì dzəə̀n lèn yòʼ wíy shaà e dzə̀m, a bó vinyo vìn vi koóy vidzə̀m.

³¹Yúv wùn à nsay wíy mày, a jí sém sí kù wíy a tiy fo.

³²«Yii bèy, bó yòʼ dzə̀ wìr kìíy kishiíy ke kinyo kìn ki wíy koóy. A bó yòʼ dzə̀ sá wìr kìíy ghán seé kishiíy, a fə̀m dzə̀ nshèelav se Nyùy seé yuv, kìn Wan Nyùy, bo bó yòʼ dzə̀ wìr kìíy. Kù kì Nyùy Tàr wùn mòʼón.

³³Kí nén a dzə jii, mo bó vèn yòʼ kiìn ghán se kinyo kee shooy ki wíy koóy, vèn wáa yen fó jay dzə́ə. Vèn kú a dzə, a shìy, a yu kinyo ji bunrì.

³⁴Kinyo keé ghan see shooy ki wíy koóy moo ké wìr wo wù‑uù lóo dù ghán, e jàv lim e və́ vé lìme, wír e rəə́, wír e rəə́, e kfə̀n sùúy e wìr wo wù‑uù shiy lav ji wù siiy, wù wàa shìy a kijuŋ.

³⁵«Vèn wáa shìy rì bèy, bìʼ fo bó á yòʼ kiìn ghán se ŋgaà lav wíy wìy. A tàm wàa dzə e ŋkuùr, kìn e ntìntìn vitsə̀ʼ, kìn é kiyuú ke mbìy ki, kìn é kintoshùy.

³⁶Lá ŋgaà lav yòʼ wìy sàsìn, e bvə̀y, e yèn, a vèn buúne.

³⁷Kinyo ke m suuy e vèn kin ki dzə̀ sá ke m suuy e wìr dzə̀m ji á wáa dzə, a shìy.»