Read Lamnso Maak 16 Bible Online

Maak 16 - Lamnso bible

Maak 16

¹Kishiíy kév ké bam kee shooy ki bvəə́shí, e mày e ŋkuùr, Maria Magdalen wùn à Salome, à Maria woo yìy à Jeem nèn dù, e yùn biʼ ye rəʼtìné ji á bvəə́shi, e dù, e yoʼ a dzə́n Jesus sho.

²Wáa dzə kijàvndzə kijàvndzə, a dzə̀ kishiíy ké mbìy ki fó ŋgàm, áwune nèn a dù e shùu sày fèy.

³Á wáa dù, a ghaynín ji sà bèn yíi dù, e tsə̀ʼ la kilán fo shùu sày a?

⁴Áwune dù, e lòo meé fo, e yèn, aá tsə́ʼ ne lúm kilan woo shooy fo fo.

⁵Á nèn nə̀ə́ e sày, e yèn, a wánlè nsùm wùmòʼ dzə́ e koy yìyí, a wù máʼ kikúm ke fəvír kí, wún wóví beémé.

⁶Wù suúy jii, «Lá vèn yòʼ a fàn. M kì ji vèn taʼ a dzə̀ Jesus woó Naasarer wo vé‑eè yuyrin é kintam. Vèn leéy ri lèmé fo vé‑eè neèrìn wun. Wù yòʼ dzə̀ə́ fo. Wù fəə̀ ne fo kpu.

⁷Vèn du ri, e tiìsí e Pita wùn à wón lìm Jesuse adzə̀m jii, wù sí du fo áwuné mbìy e wòŋ Galeli, aá wíy yen wun a dzə̀ fó mo wù‑uù suuyin.»

⁸Vikìy víyi nèn meè fó sày foo fèy, a wún wóví kù beéme beèmén, aá yaʼà, e làa yòʼ dzə́ə dù, e tiisí kinyo e wìr gheéy, bìʼ fo vé‑eè fan kinyo ke kí‑iì kooyin. [

⁹[8]Jesus‑eè fəə̀ fó kpu e kishiíy ké mbìy ki fó ŋgàm kijàvndzə kijàvndzə, e tòmbìy dìn kitú kfə́ e Maria Magdalen wo *anyùyi‑iì jívir wun saàmbà, bo Jesus jum.

¹⁰Wù nèn dù, e fìʼtì aàŋgàa ŋgoo Jesuse, aá diy, sov vitú.

¹¹Áwune yú, a wiíy və̀y suuy ji wun kì yèn á Jesus, a wù dzə̀ e tin, la á yòʼ a biimé gheéy.

¹²Jesus nèn kfə̀n dìn kitú kfə́ e wír ámóʼó abaà, a sə́nín rəə́ kúvsín ne. Áwune yén wun, aá kì du ghán yév é ntèʼ yìmòʼ.

¹³Áwune nèn bìnkìr, e kfə̀n é Jerusalem, e fìʼtì kinyo kee shooy aàŋgàa ŋgoo Jesus ámóʼó. Áwune yú sá, e làa yòʼ biimé gheéy.

¹⁴Kí wìy lòo jòʼsì, Jesus dìn kitú kfə́ e wón və́ lìm vee nshòv mòʼón e ghvə̀me adzə̀m, aá dzə́, yíkirì. Wù wáa saʼ áwune, bìʼ fo bó á yòʼ‑oò ló a biimé ji dzə̀ wù fəə̀ á fo kpu, e kfə̀n tèn fó biimé kinyo ke wìr ve vé‑eè yenen, a wù fəə́ ne fo kpu.

¹⁵Wù nèn sùúy aáwune jii, «Vèn du virə́ʼ vidzə̀m, a fìʼtì sáʼka Nyùy wo juŋ e wír veé kitu ke nsayi adzə̀m.

¹⁶Wìr wo wù biimen, á kfən wày wun e ndzəv wíy lùŋ. Wìr wo wù tenen fó biimé wíy gbù nsaʼ.

¹⁷A wír ve á biimené wíy a yiì vinyo ve ví wáa dìn vitaaví vé Nyùy. Á wíy a jùm *anyùy ve á jívir wíri e mǒ yir, e kfə̀n a suŋnín lám símóʼ sí là yéʼéy.

¹⁸A wìr fə̀m wìy ghàr yó e kiwó ki, kìn wù nò a dzə̀ ndzəʼ, é la wù yòʼ lèm. Wìr láʼ kiwó e ŋgaà yàsí wùn, é wù bónén.»

¹⁹Mo Taàtá Jesus suŋnin wùn à wón və́ lìme, e màysì, Nyùy nèn lì wun e yuv. Wù kóʼ, e dzə̀ʼə̀m e Nyùy koy yìyí.

²⁰Wón və́ lìme nèn sìíy, e fəə̀, a ghan, a fìʼtì kinyo ke Nyùy virə́ʼ vidzə̀m. Tàr wov Jesus wáa leéy fo áwune, a sə áwune, á wáa yiì viŋgaʼnìn ve vinyò, ví wáa dìn ji vinyo ve áwune fiʼtì vi lò a dzə̀ á fo Nyùy.]