Read Lamnso Maak 5 Bible Online

Maak 5 - Lamnso bible

Maak 5

¹Jesus wùn à wón və́ lìme túmsín kibáŋ, e mèé e ndzən və̀y, a sì é mbìv wòŋ yeé Gerasin.

²Wù lòo fəə fo kikoŋ, wùn wìr wùmòʼ tárnín, a wù meé fo mbvə̀ʼ se vé‑eè dzəəmè wíri shó, a dzə̀ wír wo anyùyi jívir vifií və́.

³Wù‑uù shiiy a dzə̀ é mbvə̀ʼ si fóo fèy, a bó wìr yòʼ‑oò dzə̀ shó wo dzə̀ wù kùr wun, a fə̀m dzə̀ e sháŋ.

⁴Vé‑eè sí wáy e kibuʼ, kúr e sháŋ, a wù tiíne sháŋ, bvə́ʼti kibúʼ, a bó wìr wo dzə̀ wù sə̀r wun yòʼ kfə̀n‑eè dzə̀ shó.

⁵Wù kù‑uù sí kár a dzə̀ é mbvə̀ʼ foo fèy wùn ǎ agwan, kár e shùy, kár vitsə́ʼ, rəə́me, jaʼtì virə́ʼ və́ e tíyí.

⁶Mo wù yenen Jesus, a wù dzə̀ə́ ntàmda, e nèn nyèŋ, e dù, e tsə̀m é si wo.

⁷Wù yiì lò, a rəəmé jii, «Jesus woo Wan Nyùy woo Taà Vitu, à taʼ ji à yée le e mò? Ku lìʼ e Nyùy yir ji bó à yòʼ yíi fo mo ŋgeʼ.»

⁸A wù suuy bèy, bìʼ fo Jesus kì wamen nyùy wo wù jívir wun jii, «Wò woo nyùy wo à jívir wír və̀n, màʼtì wun.»

⁹Jesus lò, e dzə̀r e wìr və̀y jii, «Yír yée dzə̀ la?» Nèn bìnèr nyùy woo shooy jii, «Yír yémé dzə̀ Mànjòŋ, bìʼ fo vèr dzəə̀n é ŋgoo.»

¹⁰Wìr və̀y nèn a boòrì Jesus jii, la wù yòʼ jùm anyùy vìy a fo wòŋ foo fèy.

¹¹Wáa dzə e ghan see shooy, a ŋgoo kǔnnyàm kì yíkir e bvə̀m gwan fèy.

¹²Anyùy vìyi nèn a lon Jesus jii, «Ku tsə̀nsí ver a dzə̀ fo akǔnnyàm vìsəə, é vèr nəə́ aáwuné wùn.»

¹³Wù nèn biìmé. Á fəə́ fo wìr və̀y wùn, e nə̀ə́ aàkǔnnyàmé wùn. Ŋgoo kǔnnyàm rə̀y bvəə́rí, e lèʼ, e dù, e dzə̀ŋrí kóŋ, e gbùkìr e kibaŋ, e làykìr. A kǔnnyàm və̀n‑eè dzə̀ moo ansə̀kì abaà bey.

¹⁴Wír ve vé‑eè shiy kǔnnyàme yén kinyo kìn, e nèn lèʼ, e dù, a fèr e mvə̀mlaʼ, e kfə̀n a fèr e ntèʼ see fó ghaŋ, wíri wáa yu, a wìy ji á yén a kinyo ke kí kooyin.

¹⁵Áwune wìy, e bàʼtí fo Jesus‑eè dzəə̀n, e yèn wír wo anyùyi‑iì jívir və̀y, a wù sí dzə́ e ndzə̀y sə́ sí wùn, a vifií və́ ví kfə́n ne fo. Á kiíy ji dzə̀ rú á wír wo ŋgoo anyùyi‑iì jívir və̀y, a fàn feyì.

¹⁶Wír ve vé‑eè yenen kinyo ke kí kooyin wír və̀y wùn à ŋgoo kǔnnyàme wáa fèr e wír ve vé‑eè jum, wiy fo bàmé mo kí kooyin.

¹⁷Wíri yú, e nèn lò, a boòrì Jesus bóorin jii, kii wun, wù kú a lò a fo áwuné wòŋ.

¹⁸Jesus lò e wún vəə́, e lòo nəə́ e kikoŋ, ŋgaà anyùy və̀y wáa lon ji bo wun kì du a wùn wun.

¹⁹Jesus sháʼnín, e sùúy sho jii, «Kú a kfən a dzə̀ fó laʼ. À du, à fèr e kfə́ə yée mo Nyùy rərin mendzən mè, e mùm kinyo ke ghaʼán kí e wò.»

²⁰Wìr və̀y nèn lò, e dù, a ghan woŋ woo shooy e dzə̀m, aá yoŋ ji Ntèʼghvə̀m, a fèr mo Jesus yiìn e wun, wíri wáa yu, a ker gháʼ.

²¹Jesus túmsín kibáŋ, e kfə̀n é mbìv fésə, màŋgòŋ kfən bàʼtí fo, wùn áwune wáa dzə e ghaa kibaŋ.

²²Wìr wùmòʼ nèn wìy fo, a yír rəə́ dzə̀ ji Jayur, a dzə̀ taà ŋgày bùnrì yee fó. Wù wìy, e yèn Jesus, e tsə̀m é si wo,

²³a buʼ wó feyì jii, «Wan wom woo wiíy sí kpú. Kii wò, ku wìy, e neèr wó yée é kitu wo, é wù bónén, e lùŋ.»

²⁴Jesus nèn lò, wùn wun wáa dù. Màŋgòŋ lò e wùn bàm nyanyày, a far wun.

²⁵A wiíy wùmòʼ kì shèm é mvə̀m ŋgoo, a wù joyì, a sì kiyá nshòv sibaà e ghvə̀m mo wù‑uù kèʼèn, a shaà.

²⁶Wù‑uù yèn ne ŋgeʼ e vé shìví wo anín, e jìvír mbàm sə́ sidzə̀m, e làa yòʼ bonén gheéy. Yàsí və kú a bir, a shaà mo wù‑uù dzəə̀n fó mbìy.

²⁷Mo wù‑uù yuun ne léŋ Jesus, wù nèn shèm é mvə̀m ŋgoo fèy, e nyàʼtí, e tìím e Jesus bàm, e kùm ndzə̀y sə́,

²⁸bìʼ fo wù‑uù sí suuy fo wùn shiliv jii, «A m fə̀m dù, e kùm a dzə̀ ndzə̀y sə́, m kù bònén.»

²⁹Mo wù kùmèn, yàsí və ku nèn tìnén. Wù yú sá e wun wùn ji wun bònén a ne.

³⁰Jesus yú fo wun wùn ji vitaáví və́ ví yiì ne a lim, wù bìnkìr, e dzə̀r e wíri jii, «Kùm la ndzə̀y sém?»

³¹Wón və́ lìme bìnèr jii, «À yén mo màŋgòŋ nəʼnìn e wò ghaŋ bèn, kfə̀n dzə́r wír wo wù kùmèn wò à?»

³²Jesus kú a tàʼ wír woo shó wo wù kùmèn wun, a leéy wíri, a kaarí, a tar.

³³Wiíy və̀y nèn a fàn. Mo wù kiiyin ji yàsí və kù bònén ne bèn, wù nèn lò, a yàʼ yàʼàn, e dù, e tsə̀m e Jesus si, e fèr kinyo ke kí kooyin kidzə̀m e naáy naáy.

³⁴Jesus lò, e yòŋ jii, «Yaà, à bònén bèn, bìʼ fo à wayin shilív e mǒ wùn. Dù ri kijuŋ, yàsí wò yòʼ dzəə́ wìy kfən.»

³⁵Mo Jesus wùn Jayur loòn, a dù, wù wáa suŋnín wùn wiíy və̀y bèy, wír ámóʼó nèn kfə̀n wìy fo Jayur lav, e sùúy sho jii, «Wan wò kpù ne. Bó shií yòʼ dzə̀ wo à kfə́n a jivír Ŋgaà Yèʼéy və̀n.»

³⁶Jesus yú, e bùʼúr, e sùúy e Jayur jii, «Lá à yòʼ a fàn. Ku wày a dzə̀ shilív shí e mǒ wùn.»

³⁷Wùn Jayur ku nèn a dù, la Jesus yòʼ biìmé ji wír ámóʼó shém e wùn bàm, e shaà Pita wùn à Jeem, à fər və Joon.

³⁸Á meé e Jayur laʼ, Jesus yén wír anín, aá tóŋnin, bvəər virə́ʼ.

³⁹Wù nəə́ é lav, e dzə̀r jii, «Vèn tóŋnin, bvəər virə́ʼ ben bìʼ ka? Wan və̀n yoʼ kpù, wù buúne buùnén.»

⁴⁰Áwune nèn lò, a kèŋ Jesus kéŋen. Wù jùm wir dzə̀m fo lav, e lì taà wàn wùn à yeè wàn, à wón və́ lìm vee ataár vìyi, wùn áwune nəə́ fo wàn kì néŋé.

⁴¹Wù ghár kiwó ke wan, e sùúy sho aáwuné làm jii, «Talita kum,» a dzə̀ jii, «Wánlè wiíy, lò é yuv.»

⁴²Wù ku nèn nànèn, a kaarí, áwune yén, a ker gháʼ. Kí wáa koóy bèy, a wàn sì kiyá nshòv sibaà e ghvə̀m.

⁴³Jesus kàntì áwune jii, á wáa yen fó yiì, é wìr kiíy á kinyo ke wun yiìn kin. Wù kfən sùúy jii, á taʼ á kifá, e fò e wàn, é wù yí.