Read Lamnso Maak 7 Bible Online

Maak 7 - Lamnso bible

Maak 7

¹Wìy lòo dzə e kishiíy kímóʼ kí, wír ámóʼó wìy, e bànén e Jesus ghaŋ. Aámóʼó dzə̀ wír veé mbìv *Farasi, ámóʼó ve vé‑eè duŋrì nsər se Nyùy, a vé‑eè wìy fó Jerusalem.

²Wùn áwune lòo dzə, á yén, a wón lìm Jesuse yíkir e woo e dzə̀ne, bìʼ fo bó á yòʼ‑oò lo sù wó e dzəə ye nsər yev taʼà.

³A kí dzə̀ jii, wír veé Juda adzə̀m, bo taaka veé mbìv Farasii kù‑uù jumrì a dzə̀ liì atàr vév vee fó mbìy ji lá wìr yòʼ yìkír, a bó wù sú wó réŋréŋ mo vé mbìyi‑iì suuyì.

⁴A bó yòʼ dzə̀ wìr yì sá kifá ke kí wìyìn fó way, a bó á sú é dzəə fóo fèy. Aá kfə̀n jumrì nsər símóʼ sí sinín se sí din mo dzə̀ á wàa sù vifá aáwuné liì, kìn dzə̀ bàr wùn à kitém ki, à kíŋé, kìn kikún.

⁵Wír veé Farasi wùn à ve vé‑eè duŋrì nsər Nyùy vìyi nèn dzə̀r e Jesus jii, «Wón vé lìme yíkir e wóo e dzə̀ne, e làa yòʼ a lèm nsər vé mbìyi bìʼ ka?»

⁶ Jesus bìnèr jii, «Aysaya woo ŋgaà ntum Nyùy‑iì lo sùúy rú ji vèn dzə̀ abìnbìnteʼnsə́m. Vèn kù yii kinyo a dzə̀ ke wù‑uù saŋen ji Nyùy suuy a jii: « ‹Wír vìne ghvə́m mo a dzə̀ fó shuù, a bó melív mev mè yòʼ tíy e mǒ wùn.

⁷Áwune cu mo kisáŋ, bìʼ fo á li vinyo ve bomen wír, yéʼey ji nsər sém.› »

⁸Jesus nèn sùúy e wír vìyi jii, «Kù dzə̀ sá mo vèn maʼtì nsər se Nyùy, jumrì a dzə̀ sé wìr.

⁹Vèn kér dzə́ə yìmòʼ ye vèn tén nsər se Nyùy sho ji á fíʼ a jùmrì a dzə̀ sén.

¹⁰ A kí dzə̀ jii, Mooser‑iì sùúy jii, ‹Wìr ghvə́m tàr wov wùn yè wov›, e kfə̀n sùúy jii, ‹A wìr kuù tàr wov wùn yè wov, á yùyrí ŋgaàŋ a yúyrín.›

¹¹Vèn nén a toyír kén jii, a wìr kér kifá ke dzə̀ wù sə̀ tàr wov wùn yè wov shó, e sùúy ji kifá kee shooy ki sì koban, a dzə̀ ji sì ké Nyùy,

¹²bo bó wù yòʼ dzəə́ kér a fó lì kifá kee shooy, e sə tàr wov wùn yè wov shó.

¹³Vèn yéʼey vinyo vén vee shooy bèy, semèr a dzə̀ kinyo ke Nyùy, kfə̀n yii vímóʼ ví sá vinín moo vee shoon.»

¹⁴Jesus nèn kfə̀n kùm màŋgòŋ, á wìy, wù suúy jii, «Wìr dzə̀m yuúrí kinyo ke m suuy ki, e səə̀m.

¹⁵Kifá ke wìr yí, a kí nəə nə̀ə́n é bvə̀m ki yòʼ dzə̀ kí bìvír ŋgaàŋ. Kù bívir kinyo ke kí fəə́ fo wìr shuù. [

¹⁶Vituʼùr ví dzə̀ vibaà, kímóʼ kí tén fó yu, kímóʼ kí yù.]»

¹⁷Jesus yiì lò, e màʼtì wíri, e nə̀ə́ e lav, wón və́ lìme nèn a dzətí nsàv ŋgàn ye wù kì màʼàn rə̀y sho.

¹⁸Wù dzə́r aáwune jii, «Vifií vén ví kù dzə̀ə́ vitsə́m moo vé wìr vìy à? Bó vèn yòʼ kì ji kifá ke kí nəə nə̀ə́n e wìr bvə̀m ki yòʼ dzə̀ kí bìvír ŋwèrín a?

¹⁹Kí nəə a dzə̀ é kitur, kí tòsín, a bó yòʼ dzə̀ kí kùm shilív.» Mo Jesus suuyin bey, kí nén a dzə jii, kifá kímóʼ kí yòʼ dzəə́ kér a *kifàn ye dzə̀ kí shèm fo wìr yí.

²⁰Wù kfən siì sùúy jii, «Kinyo ke kí yii fəə́ fo wìr shuù ki dzə̀ ke kí bívir ŋgaàŋ.

²¹Vinyo ve bi ve wìr yii vidzə̀m vi kù yii lo a dzə̀ fo ŋgaàŋ shiliv. Wìr lo, wù nèn a kwàʼtì a dzə̀ vinyo ve bi ví, a jàŋ kinjàŋ, a ghan viŋkar, a shoŋ vishóŋ, a yuyrí wír, a lì wiiy wìr.

²²Kfə́n lo, wù wàa siimé kinsiimè, a ker shilív she bi shí, a boʼtí kimboʼtì, a yiì liì kisaŋ, a ghèʼ kighèʼ, a suʼ kinsuʼ, a koʼór wún, a yiì kiyúŋsì.

²³A vinyo vìn vidzə̀m vi kù yii lo a dzə̀ fo wìr mvə̀m shilìv, e bó a bivír ŋgaàŋ.»

²⁴Jesus màʼtì kirə́ʼ kee shooy, a dù e mbìv mvə̀m sé laʼ see Taya wùn Sidon. Wù dù, e nə̀ə́ e lav yìmòʼ, e làa yòʼ a tàʼ ji wíri kiíy á ji wun dzə̀ fó, wíri ku kìíy.

²⁵Wiíy wùmòʼ wáa dzə fo, a nyùy wùmòʼ jívir wán və. Wù yú sá, e wìy, e tsə̀m e Jesus wuù, a lon ji wù ku jùm a nyùy woo shooy, é wù maʼti wán və. A bó wiíy woo shooy yòʼ‑oò dzə̀ wír woó Juda. Wù‑uù dzə̀ wír woó Fənisia, e wòŋ woo Siiria.

²⁷Jesus bìnèr sho jii, «Á yii tómbìy yiir wón, bo á wáa yiír jwí si. Kí yoʼ bòŋ ji á li kur wòn, a teʼ jwí sho.»

²⁸Wiíy və̀y ku wèrìr wún jii, «Dzə̀ rú Tàr, yii bèy, a dzə̀ jwí si wàa boŋrí ŋkfə̀ʼ se kiban se wóné yí, a sí túmkir fo nsay.»

²⁹Jesus yú kee shooy, e sùúy sho jii, «Mo à ghinsin, e kìíy bèy, kú a kfən rì fo laʼ, nyùy woo shooy màʼtì ne wan wò.»

³⁰Wiíy və̀y nèn a kfən, e dù, e lòo nəə́ e wùn lav, e yèn, a wàn néŋ e kikun, a nyùy woo shooy kì màʼtì ne.

³¹Jesus lò fo ghaa Taya foo fèy ji wun kfə́n e ghaa kibaŋ keé Galeli, a shaà dzə́ə a dzə̀ fó Sidon, a kfən e mbìv kibàŋ ye á yoŋ ji Ntèʼghvə̀m.

³²Wù meé fó, wíri wìy e wìr wùmòʼ, a dzə̀ nsəərì, a bó wù yòʼ súŋnin sa kijuŋ. Á wáa lon ji Jesus ku kùm, é wù wàá bónén.

³³Jesus lì wír və̀y, wùn wun bàr wún. Wù wáy wón və́ wo e wìr və̀y vitùʼùr, e kfə̀n cù mentíy e wùn kiwo, e kùm kiliímé ke wìr və̀y sho,

³⁴e lò, e lèéy yúv, e shèŋ kitú, e sùúy sho aáwuné làm jii, «Efata,» a dzə̀ ji mvə̀ʼə̀me.

³⁵Vituʼùr vé wìr və̀y vi nèn mvə̀ʼə̀m, wù wáa yu vinyo. Kiliímé kfə́ kí caár, wù wáa suŋnín kiránén.

³⁶Jesus kfə́n fo wír vìyi, e kàntì fo á fer kinyo kee shooy e wìr. Mo Jesus kàntìn bey, á ku nèn màysì, a fèr kinyo kee shooy férin.

³⁷Wíri wáa yu, a ker gháʼ ye tavíné, a suúy jii, «Vinyo ve Jesus yii vidzə̀m vi dzə̀ vijuŋ feyì. Wù lo, wù yiì, ansəərìi wàa yu vinyo, vindzə̀mer vi wàa suŋnín.»