Read Lamnso Maak 8 Bible Online

Maak 8 - Lamnso bible

Maak 8

¹Wáa dzə e ghan see shooy, màŋgòŋ kfən wìy, e bàʼtí e Jesus ghaŋ, wùn áwune wáa dzə. Vifá vév vé yi vi nèn mày, Jesus yòŋ wón və́ lìm, e sùúy aáwune jii,

²«M kér mendzən fo wír vìne, bìʼ fo áwune siìn e mǒ ghaŋ fèn vishiíy vitaár, a bó á yòʼ dzəə́ kér kifá kée yi.

³A m màʼtì, áwune wáa kfənkír fo laʼ là yíkír, bo á yíi kpukír jíŋ e dzəə, bìʼ fo ámóʼó wìyìn ntàmda.»

⁴Wón və́ lìme bìnèr jii, «Vèsən dzə̀ fen a dzə̀ é kwaʼ. A dzə̀ á lì kibán fo feé, e bóo yiír wír vìn sho?»

⁵Jesus dzə́r jii, «Vèn kér ntuʼ se kiban sìsìʼ?» Áwune bìnèr jii, «Sí dzə̀ saàmbà.»

⁶Wù nèn sùúy, màŋgòŋ və̀y dzə̀ʼə̀m fo nsay. Wù lì ntuʼ se kiban see saàmbà sìy, e beèrì Nyùy, e bèʼtí, e fò ji wón və́ lìme wàá jav e wír vìyi. Áwune nèn a jàv.

⁷Aáwune kì kér sa wón sə ashàr. Jesus kfən lì, e beèrì Nyùy, e fò ji á jav sáa e wír vìyi.

⁸Wíri yí, e kùrkír, a vé‑eè dzə̀ fó moo wír ansə̀kì akweè bèy. Á kfən bànén vimbéʼ, ví rún ŋkaà saàmbà.

¹⁰Á màysì, Jesus nèn shàʼtì wíri, á wáa kfən fo laʼ. Wùn à wón və́ lìme ku nèn nə̀ə́ e kikoŋ, e lìysín e mbìv Damanuta.

¹¹Wír ve vé‑eè dzəə̀n é mbìv *Farasi ámóʼó nèn wìy, a woóy Jesus, a yùtì ji wù ku yiì a kiŋgaʼnìn ke kinyò ke kí din ji wù sə́ rú vitaáví a dzə̀ fo Nyùy.

¹²Jesus ndzəə́, e sùúy aáwune jii, «Wìr woo lèn kfə̀n taʼ kisəəm a dzə̀ ké gha? Vèn wáa kiíy rú ji bó vèn yòʼ wíy yen kisəəm gheéy.»

¹³Wù nèn màʼtì áwune, wùn à wón və́ lìme kfə́n, e nə̀ə́ e kikoŋ, a tumsín e ndzə̀n kibàŋ və̀sə.

¹⁴Á lòo dù, wù wáa tir áwune jii, «Vèn wáa baàmè nyaà wìr veé mbìv Farasi, e kfə̀n a baàmè wo Fòn Heror.» Wón vəə́ yú, a wù yóŋ *nyaà, a dzə̀ kifá ke áwune yii wáy e kiban, aáwune kì làysìn fó lì kibán kigheénén, a ker a dzə̀ ntuʼ e mòʼón e kikoŋ cáʼcáʼ,

¹⁶á nèn a ghaynín ji kìn Jesus suuy bèn, bìʼ á fo áwune yòʼ kér kibán.

¹⁷Jesus kiíy kinyo ke áwune gháyninè, e dzə̀r jii, «Vèn lò, a ghaynín a dzə̀ kinyo ke kiban bìʼ ka? Vèn yòʼ sí yén vinyo, səəmè à? Vifií vén ví kù dzə̀ə́ vitsə́m a?

¹⁸Vèn kér sí, e làa yòʼ a yen vinyo à? Vèn kér vituʼùr, e làa yòʼ a yu vinyo à? Vèn yòʼ dzəə́ kuúme kinyo ke mò‑oò yiìn a?

¹⁹Mò‑oò lì ntuʼ se kiban sitàn, e bèʼtí, màŋgòŋ yí, a vilum dzə̀ ansə̀kì atàn. Vèn‑eè bàʼtí vimbéʼ ŋkaà sìsìʼ?» Á bìnèr jii, «Sí‑iì dzə̀ nshòv sibaà e ghvə̀m.»

²⁰Wù kfən dzə̀r jii, «Kee ntuʼ saàmbà fo wíri ansə̀kì akweè, vèn bàʼtí vimbéʼ ŋkaà sìsìʼ?» Á bìnèr jii, «Sí‑iì dzə̀ saàmbà.»

²¹Wù nèn dzə̀r jii, «Vèn‑eè yén vinyo vìn, e làa yòʼ a səə̀m à?»

²²Jesus wùn à wón və́ lìme túmsín kibáŋ, e meèsín e ntèʼ ye á yoŋ ji Besayda. Wír ámóʼó nèn wìy e mfìr, a lon ji Jesus wàá kum, é sí rəə́ mvəʼəm.

²³Jesus ghár kiwó ke mfìr və̀y, wùn wun fəə́sín láʼ. Wù cúrí mentíy e mvə̀m si wo, e neèr wó rə́ shó, e dzə̀r jii, «À yén kirə́ʼ á?»

²⁴Wù leéy virə́ʼ, e sùúy jii, «M yén wíri ji làʼrì làʼrì, aá ghán, shwínin vicí.»

²⁵Jesus kfən neèr wó e wìr və̀y si, wù gheémé, yí mvə̀ʼə̀m, wù yén virə́ʼ lèn kiránén.

²⁶Jesus suúy shó jii, «Kú a kfən fo laʼ. À lóo dù, lá à yòʼ dzəə shaà fo ntèʼ fóo fèy.»

²⁷Jesus wùn à wón və́ lìme lò fo fo, a dù e ntèʼ seé mbìv Sisaria Filipi. Á lòo dù, wù dzə́r aáwune jii, «Wíri yoŋ mo ji la?»

²⁸Á bìnèr jii, «Wír ámóʼó yoŋ jii, à dzə̀ á ŋkfə Joon woo Ŋgaà Wáyndzəv, aámóʼó yoŋ ji ŋkfə Elija, ámóʼó jii, *ŋgaà ntum Nyùy wùmòʼ fo vee fó ŋgùʼú.»

²⁹Wù nèn dzə̀r aáwune jii, «Vèn yoŋ kén ji m dzə̀ la?» Pita bìnèr jii, «À dzə̀ Mfə̀ə́r wo Nyùy‑iì kàʼàn.»

³⁰Jesus kàntì jii, «Vèn wáa yen rì fó wìy yiì, é wìr kiíy.»

³¹Jesus nèn kèʼ, a yeʼéy wón və́ lìm mo dzəʼə̀m rəə́ dzəə̀n, a suúy jii, «Ŋgaà wo yírí dzəə̀n *Wanwìr və̀n kér fó wìy yen ŋgeʼ sinín. Atǎr wòŋ wùn à vitú ve atàá cùu, à wír ve á duŋrì nsər Nyùyi wíy kay wun, e yuyrí. Yii bèy, vishiíy ví mee vitaár, é wù fəə́ fó kpu.»

³²Jesus suúy vinyo vìn tèéter bèy, Pita nèn lì, wùn wun bàr wún, wù wáa saʼ fo wù wáa shi njèm yee bey.

³³Jesus bìnkìr, e lèéy wón və́ lìm ámóʼó, e lò, e wàm Pita jii, «Kóʼtí fo mǒ si, à dzə̀ Satan. À kwaʼtì ké kinyo moo wír, bó à yòʼ kwaʼtì moo Nyùy.»

³⁴Wù nèn jàŋ màŋgòŋ, á wìy, wù wáa suúy e wùn à wón və́ lìme jii, «A wìr koŋ ji wun wáa dzə ŋgaà wom ŋgoo, ŋgaàŋ kù màʼày kitú kfə́, e toòmé kpú, e lì moo kintam, a ghan sho e mǒ bàm.

³⁵Wìr wo wù bávti kitú kfə́ ji fo wun kpú, kù wíy kpu, a wìr wo wù maʼày kitú kfə́ bìʼ mo wùn à kinyo ke Nyùy ki, ŋgaàŋ wíy shaàrì.

³⁶A wìr yì ndzə, yì may, wù bívír kitú kfə́, bo séʼ və dzə̀ ka?

³⁷A wìr màʼày dzəʼə̀m rə́, wù wìy tìn, e fò ka?

³⁸Vèn wáa kiíy jii, a wìr woóme fó a dzə ŋgaà wom ŋgoo, kfə̀n woóme fó a jùmrì kinyo kém é ndzə yee lèn, ye wíri sí méŋ Nyùy, yii vinyo ve bi ví, bo ŋgaà wo yírí dzəə̀n Wanwìr və̀n wíy woomé sa fó lì ŋgaàŋ ji və́ə woo wír e ghan se wù wíy a kfən wùn à nshèelav se Nyùy si, a ker vikuʼùy a dzə̀ vé Tàr wov Nyùy.»