Read Lamnso Luk 1 Bible Online

Luk 1 - Lamnso bible

Luk 1

¹Wìr wo kuʼùn woo Teefilor, wír aníne‑eè ló a mùm feyì fó saŋ vinyo ve Jesus mo ví‑iì kooy e vèsə́n mvəm,

²réŋréŋ mo vé‑eè yú fo wír ve vé‑eè yenen vinyo vee shooy e sí yéví mo ví‑iì kèʼèn, a koóy, e dù, e jòʼsì, e bóo siíy, a tiisí ntum kinyò kee shooy.

³Mo mò‑oò sí ron sa vinyo vee shooy vidzə̀m, ŋeevì fo kèʼ, m nen yèn lèn jii, kí bòŋ a ji m báʼtí vinyo vee shooy, e sàŋ fo wò e naáy naáy mo ví dzəə̀n,

⁴áà fíʼ kiíy kijuŋ ji vinyo ve vé‑eè yeʼeyin wò sho vi dzə̀ á rú.

⁵Yì‑iì dzə̀ é ghan se Fòn Heror‑iì sáʼ woŋ woo Juda, taà cù wùmòʼ wáa dzə fo, aá yoŋ ji Sekariya, a wùn à vé cù ámóʼó lim e kiŋkàŋ ke kí‑iì loòn fo Abija ram. Wù‑uù kér wiíy a dzə̀ sá wan taà cù, a yír rəə́ dzə̀ Lisaber.

⁶Wùn wiiy və wáa yiì vinyo réŋréŋ mo Nyùy taʼà, a yu sáʼ Nyùy, e kfə̀n a lèm nsər sə́ sidzə̀m, a dzə là nsem.

⁷Áwune‑eè dzə̀nkìr ne, a bó á yòʼ kér wán, bìʼ fo Lisaber‑iì dzəə̀n kár.

⁸Wìy lòo dzə e ghan símóʼ sí, a kiŋkàŋ ké à Sekariya ki lim e *lav cù, wù nèn a cù Nyùy.

⁹A liì atàá cù vee shooy‑iì dzə̀ jii, á shwéŋ, é Nyùy din wír wo wù nəə́, a tòn kiláy é mvə̀m lav cù. Kishiíy kí wìy ghèén, á shwéŋ, kí koó Sekariya.

¹⁰Ghán sí gheén, wíri báʼtí é shùu lav cù aneénín, a bùnrì, Sekariya nèn nə̀ə́, a tòn kiláy kee shooy.

¹¹Wù lòo sìn, e yèn, a nshìylav Nyùy Tàr tíy *kíy cù kilay fó koy yìyí.

¹²Wù yén bey, kindzə́m kí gwàr wun, wù wáa fàn.

¹³Á bèy, nshìylav Nyùy rə̀y yòŋ jii, Sekariya, lá à yòʼ a fàn. Nyùy yù ne bunrì yé. Wiíy wò Lisaber wíy boŋ bvəm, e dzəə́ wán lumèn, aà kù wíy a yòŋ yír ji Joon.

¹⁴Á wíy dzəə́ wán woo shoon, áà wáa sheʼrí, a sàvnìn, é wír aníne wáa sheʼrí sa.

¹⁵Wan woo shoon wíy a dzə wír wo kuʼùn e Nyùy si. Kiyoy ke Ranén kí wíy run e wùn shiliv, é bo yè wov wìy a dzəə́ wun, a bó yòʼ dzə̀ wù wìy nò kifá ke dzə̀ kí koò wír e njà melùʼ.

¹⁶Wù wíy bìnèr wír veé Isray anín, aá kfə́n fo Nyùy Tàr woo Tàr wov.

¹⁷Nyùy wíy fo wun vitaáví réŋréŋ mo wù‑uù foon e Elija fo ŋgùʼ. Wù wíy shem e wun woo Nyùy Tǎr mbìy ji wù fíʼ bìnèr atǎr won, é wùn à wóné mán vinyo vév. Wù wíy bìnèr wír ve á táv kitú, aá wáa ker vifií, a yu Nyùy moo wír ve juŋe. A wù wíy a yiì vinyo vìn vidzə̀m ji wun fíʼ baʼtí wíri, aá wáa shìy Nyùy Tàr.

¹⁸Sekariya dzə́r e nshìylav Nyùy rə̀y jii, «M wíy kiíy fo ka kí, a vèr yeè lav wom dzə́nkír ne bèn?»

¹⁹Nshìylav Nyùy bìnèr jii, «Dzə̀ mo Gabriel, a m tíy e Nyùy si ghán sidzə̀m, lo ntum sə́. Tùm Nyùy mo ji m wiy, e fìʼtì sáʼka wo juŋ və̀n e wò.

²⁰Yú, mo à kinèn ntum rə̀n, ye ghán sí wíy gheén, é yì koóy, bo shúu wóo wíy sətí, áà kfə́n ji kindzə̀mer, e meé e ghan se kinyo kìn ki wíy gheén.»

²¹Mo Sekariya wùn nshìylav Nyùy rə̀y suŋnin bey, wù nèn ndzə̀y e lav cù, wír ve vé‑eè bunrì e shùu lav vìyi wáa ghaynín ji sà bèn kòóy ka wun fo a?

²²Wù yiì fəə̀, e lò ji wun súŋninè, e mùm ntéŋ, e kù nèn gòʼ kisə́sə, a fìʼ vinyo a dzə̀ e wóo. Á yén bey, e nèn kìíy ji Nyùy yiì ne, wù yén á kinyo ke ghaʼán kí é mvə̀m lav cù.

²³Sekariya wìy màysì ghán sə́ sé lìm e lav cù, e nèn kfə̀n e wùn laʼ.

²⁴Vishiíy ví lòo liysín, wiiy və Lisaber nèn tìím bvəm, e kù nèn a dzə e lav e bǎm ŋwee e tàn, a suúy jii,

²⁵«Á lèn wo Nyùy rərin ne mendzən mem, e sù mo fó liy.»

²⁶Lisaber juùr bvəm rə̀y, yí meé ŋwee ntuùfú, Nyùy kfən tùm nshìylav rə Gabriel e ntèʼ yeé Galeli yìmòʼ, aá yoŋ ji Naasarer.

²⁷Wù‑uù tùm ji wù tiísí ntum e wánlè ŋgòn wùmòʼ wo bó wù yóʼ ne kìíy lumèn, aá yoŋ ji Maria, a vé‑eè juùr ne e Joosev woo wír woo Fòn Davir ram.

²⁸Wù nèn dù, e yèn Maria, e shàʼtì jii, «M waà shaʼtì. Nyùy leey fo wò feyì, a wù bùʼ ne wò.»

²⁹Maria yuúrí, kí tárír wun, wù wáa rə̀m ji kfə́ə shàʼtì yee béne sà dzə̀ yeé le á?

³⁰Nshìylav Nyùy yòŋ jii, «Maria, lá à yòʼ a fàn. Nyùy bùʼ ne wò.

³¹Ku yù, à wíy tiím bvəm, e dzəə́ wán lumèn, aà kù wíy a yòŋ yír ji Jesus.

³²Wù wíy a dzə wír wo kuʼùn, aá wáa yòŋ ji Wan Nyùy woo Taà Vitu. Nyùy Tàr, wun woo Nyùy wíy dzə̀ʼə̀r wun e Fòn Davir woo tàr à ràm yév kàvàʼ,

³³é wù sáʼ wír ve á ràmèn fo Jakov adzə̀m, e dù, e jòʼsì. A bó sáʼ rəə́ yòʼ wíy mày.»

³⁴Maria yú bey, e dzə̀r jii, «A dzə̀ kee shoon ki ghàn é le, e bóo koóy, a bó m yóʼ ne kìíy lumèn?»

³⁵Nshìylav Nyùy bìnèr sho jii, «Kiyoy ke Ranén kí yíi wìy fo wò, é Nyùy woo Taà Vitu yii e vitaáví və́ ví, áà tiím bvəm. Bìʼ bey, aá nèn wìy a yòŋ wán woo shooy ji wo ranén, e kfə̀n a yòŋ ji Wan Nyùy.

³⁶Yén, fər won woo Lisaber, mo wù fə̀m dzə̀nèn ne, a wíri‑iì sí yoŋ ji kár, wù dzə̀ lèn e bvə́me ŋwee ntuùfú, a wù wíy dzəə́ wán lumèn.

³⁷Bó kinyo ki yòʼ dzə̀ shó ke dzə̀ kí ghàʼ Nyùy fo wù yii.»

³⁸Maria nèn bìnèr jii, «M kù dzə̀ ŋgaà lìm Nyùy, wù ku yiì e mò mo à suuyin.» Wù bìnèr bèy, nshìylav Nyùy rə̀y nèn lò.

³⁹Mo kinyo kìn ki kooyin, Maria ku nèn bàʼtí, e tùmnín, a koʼ aàgwan veé mbìv wòŋ yeé Juda, a dù e ntèʼ yee fó yìmòʼ.

⁴⁰Wù dù, e nə̀ə́ e Sekariya lav, e shàʼtì Lisaber.

⁴¹Mo Lisaber yuun shaʼtì rə́, wàn nèn wàʼrì fo wùn bvə̀m, Kiyoy ke Ranén kí kfən wìy, e rùn e wùn shiliv.

⁴²Wù njàʼàm, e sùúy e Maria kitávín jii, «Nyùy shéʼri wò, e shaà vikìy adzə̀m, kfə̀n shéʼri wán wo à wíy dzəə́.

⁴³Nyùy bùʼ mo ben ji ka, é bo yìy à Taàtá wom wiy, e ghàn mo?

⁴⁴À kù nə̀ə́, e shàʼtì mo, wàn nen shèʼrí, e wàʼrì fo mǒ bvə̀m.

⁴⁵A Nyùy Tàr shéʼri wò feyì, bìʼ fo wò‑oò biimen ji wù ku wìy yiì kinyo ke wù kàʼàn wò sho.»

⁴⁶Maria bìnèr jii: «Shilív shém shí wuʼsì yír Nyùy Tàr,

⁴⁷a m yú vijuŋ, shéʼri Nyùy woo Ŋgaà Lùŋèr wom.

⁴⁸Wù kuùmé ne mo, a m dzə̀ wán və lìm fo tèr. Wìr dzə̀m sí wìy a yòŋ mo lèn ji ŋgaà mbùʼme Nyùy,

⁴⁹bìʼ fo Nyùy woo Ŋgaà Vitaàví yiìn ne kinyo ke ghaʼán kí e mò. Yír rəə́ dzə̀ e ránén.

⁵⁰Wù rə́r mendzən me wìr ve á ghvə́m wun. Wù rə́r me atàr, kfə̀n rə́r me wòn vév.

⁵¹Wù nàn ne kóy və́ é yuv, e tàʼár wír ve á din wún, kinyo ke áwune táŋ ki bvəə́rí.

⁵²Wù sù ne afon, e bàʼtì fo kàvàʼ, e kòʼór a dzə̀ wír vee fó tèr.

⁵³Wù yìír ne wír ve jìŋ yár áwune e vifá ve juŋ vi, e jùm vé kavi e wóo e yúmér.

⁵⁴Wù kuùmé ne ŋkàʼmé wo wù‑uù kàʼàn atàr vér shó, e wìy lèn fó sə aŋgàa lìm və́ vee wír veé Isray,

⁵⁵mo wù‑uù kàʼàn ji wun wíy a sham Abraham wùn à rám rəə́, e dù, e jòʼsì.»

⁵⁶Maria súŋnín bey, e shìíy wùn Lisaber ŋwee e taár, e bóo kfən e wùn laʼ.

⁵⁷Ghán sé Lisaber se dzəə́ si nèn wìy ghèén, wù dzəə́ wán lumèn.

⁵⁸Wír vee wùn gwaané wùn à kfə́ə yéví yú mo Nyùy bùʼùn ne wun, wù koóy wán, á wáa sheʼrí.

⁵⁹Kishiíy kí meé waamé, wíri wìykìr ji á náŋsin wán, e shù a yír wan, e nèn a tàʼ ji á yoŋ ji Sekariya mo yé tàr woví‑iì dzəə̀n.

⁶⁰Yè wov sháʼnín, e sùúy jii, á wáa yòŋ a ji Joon.

⁶¹Wíri nèn a kìnèn jii, «Bó wìr yòʼ dzə̀ aáwuné kfəə wo wù kér a yír rən.»

⁶²Á nèn lò, a fìʼ e taà wàn e wóo, a dzər ji wù sà kì taʼ ji á shu yír wan ji la á?

⁶³Wù nèn fìʼ sa jii, á wiy e kifá ki, é wun sáŋ á sho. Á wìy sho, wù sáŋ jii, «Yír wané dzə̀ Joon.» Áwune yén, shuu wóví yúm.

⁶⁴Mo Sekariya saŋen, shúu vəə́ ku nèn mvə̀ʼə̀m, wù kfə́n a suŋnín, e nèn a sùyrì Nyùy.

⁶⁵Wír vee wùn ntèʼé yú, a wù kfə̀n sí súŋninè, a ker gháʼ ye tavíné, e kù nèn lì kinyo kìy e vitu ve sòŋ, a sàmèr aàgwan veé Juda foo fèy adzə̀m.

⁶⁶Wír ve vé‑eè yú adzə̀me wáa səə̀m ji Nyùy Tàr kér kiwó e wan woo shooy kitu, e wày é shiliv ji á kù wíy a yen a mo wan woo shoon wíy a dzə.

⁶⁷Kiyoy ke Ranén kí nèn lò, e rùn e Sekariya woo tàr à wan və̀n shiliv, wù wáa yu vinyo fo Nyùy, a tiisí jii:

⁶⁸«Á wáa burí Nyùy Tàr woo Nyùy wìr veé Isray. Wù wìy ne fó sə wír və́, e tin fo ŋgeʼ.

⁶⁹Wù lèm ne wír wo ghaʼán wo wù wíy lùŋèr vèr, a wù lò fo Fòn Davir woo ŋgaà lìm və́ ram,

⁷⁰réŋréŋ mo aŋgaà və́ ntume‑eè tiísi fo ŋgùʼ jii,

⁷¹Nyùy wíy sə ver fo wír ve á taʼ, e laàr verí, e fəə́r fo aŋgaà vér vibàné wo.

⁷²Wù‑uù kàʼ jii, wun wíy a rər mendzən me atàr vér, a kuumé *mensaŋ me wù gwàrìn wùn áwune.

⁷³Wù‑uù sùúy e tàr wor Abraham, e lìʼ jii,

⁷⁴wun wíy fəə́r ver fo aŋgaà vér vibàné wo, é vèr wáa lìm fo wun là fan,

⁷⁵a dzə ji wír və́, a yu a dzə̀ fo wun vishiíy vidzə̀m ve vèr béʼri e nsay fèn.

⁷⁶Wàn, á wíy a yòŋ wò ji *ŋgaà ntum Nyùy woo Taà Vitu, bìʼ fo à wíy shem e Nyùy Tǎr mbìy, e naŋsín dzə́ə rə.

⁷⁷À wíy a fìʼtì e wír vəə́ jii, Nyùy sí wìy làysìn ajay vév, e lùŋèr áwune,

⁷⁸bìʼ fo wù yii rə́r mendzən fo wíri é ŋàŋ. Wù wíy tum Ŋgaà Lùŋèr wòsən, é wù wiy fó yuv

⁷⁹moo shúy ye yì tó kijàvndzə, yì fò rán e wír ve á kì dzəə̀n é ndzə vitsə̀ʼə́, e nèn lùŋèr vèsən ve á siìn é shùu kpu, e dànèr e dzəə ye yì kér dzəʼə̀m yee nyaáŋ.»

⁸⁰Wan Sekariya və̀n ku nèn a kuy, a way shilív e Nyùy wùn kitávín. Wù wìy kùy, e nèn lò, e dù, a shiíy a dzə̀ é kwaʼ. Ghán sí wìy ghèén, wù dìn kitú kfə́ e wír veé Israyi.