Read Lamnso Luk 10 Bible Online

Luk 10 - Lamnso bible

Luk 10

¹Kee shooy ki shaà, Taàtá Jesus shóʼtí wír nshòv sibaà e msaàmbà,[4] e shèmér fo mbìy abaà abaà ji á du é ntèʼ sí, a ghan virə́ʼ ve wun yíi a shaà sho vidzə̀m.

²Wù lòo tum, e sùúy aáwune jii, «Vifá ve á wáa kav vi kùʼ ne e ŋàŋ, a vé kavi dórninè. Vèn ku nèn a lon fo taà sùm ji wù tsə́nsí vé lìme, aá káv vifá və́ vee shooy.

³Vèn wáa dù rì. Lóo dù, vèn wàa kiíy ji m tùm ven, a vèn du moo wón njiì ve á du, e nəə́ e nyám se bi sí wo.

⁴Vèn lóo dù, lá á yòʼ lì mbàm, kìn kibam, kìn alábáʼ ámóʼó. Vèn fəə́ e dzəə, lá á yòʼ a tiím ji á shaʼtì wír.

⁵Vèn du, nəə e lav ye á nəən shó, vèn tòmbìy shàʼtì jii, ‹Nyaáŋ wáa dzə e lav fèn.›

⁶A wìr wo wù koŋ nyaáŋ dzə̀ é lav, é Nyùy ku nèn yiì, é wù wáa ker nyaáŋ. A bó wù yòʼ dzə̀, é Nyùy nèn siìr shaʼtì yee shooy e vèn.

⁷Mo vèn nəən, vèn gòʼ, a shiíy a dzə̀ é lav foo fèy, e làa yòʼ a tumsín melav. Kifá kidzə̀m ke á yíi a fo e vèn, vèn kù a yi yiín, a no, e làa yòʼ a woomé, bìʼ fo ŋgaà lìm kù dzəə̀n wùn à vilaʼày və́ ví.

⁸Vèn nəə e ntèʼ, á səə́si ven, wáy e lav, lá vèn yòʼ a nyàʼ kifá ke yi ke á foon e vèn.

⁹Vèn wáa fèr vé yàsíi é ntèʼ fóo fèy, e kfə̀n a fìʼtì ji ghán se Nyùy sí wìy a saʼ vifon və́ e wír vee shooyí mvəm sí sì á fo mentsə̀m.

¹⁰Vèn nəə e ntèʼ, á tén fó səəsí ven, vèn ghàn, e jàŋ dzə́ə sidzə̀m jii,

¹¹‹Kibvər ke vèr liìn fo věn ntèʼ fen ki kìne mo vèr sí kfətì fo věr wuù. Kí ku kfə̀n e věn vitu. Yii bèy, vèn ku yòʼ a kiíy ji ghán se Nyùy sí wìy a saʼ vifon və́ sí sì á fo mentsə̀m.›

¹²A m suuy e vèn jii, wíy lòo dzə e kishiíy ke Nyùy wíy a tinén nsaʼ, é ké ntèʼ yee shooy ki foy, e shaà ké Sodom.»

¹³Jesus lò, e yòŋ jii, «Éè wìr veé Korasin, éè wìr veé Besayda, ŋgeʼ dzə̀ yéen. A mò‑oò yii viŋgaʼnìn ve vinyò ve mò‑oò rə́si yii e věn ntèʼ vin, a dzə̀ é ntèʼ see Taya wùn Sidon, bo vé‑eè yiì ne bìnèr melív mev fó ŋgùʼ, e màʼ ndzə̀y sé kpu, a ser e kibvə̀r.

¹⁴Vèn wáa kiíy jii, wíy lòo dzə e kishiíy ke Nyùy tínen nsaʼ, é ké wìr veé Taya wùn à veé Sidon vìn ki boŋ, e shaà kén.

¹⁵Aà, ké ven vee wír veé Kapeenahum, vèn kwaʼtì ji Nyùy wíy koʼór ven, aá kúy, e mèé e yuv a? Àáy, wù wíy sèn sènèn, é vèn sə́y áàŋkfəə́ wòŋ.»

¹⁶Jesus lòo màysì, e sùúy e vé ntum vìyi jii, «Wìr wo wù yuúri kinyo kén, ŋgaàŋ yuúri a dzə̀ kém. Wìr wáa káy ven, bo ŋgaàŋ káy a dzə̀ mo. A wìr káy mo, bo wù káy a dzə̀ ŋgaà wo wù tumen mo.»

¹⁷Wír vee nshòv sibaà e msaàmbà vìyi ghán, e kfə̀n é bàm, a ker kishéʼrì ke ghaʼán kí, e yòŋ Jesus ji Tàr, a bi sho jii, «Vèr dzə́ bèn, aá yoŋ yír yé, a fə̀m dzə̀ *anyùy, á kù a yu ver.»

¹⁸Jesus bìnèr jii, «Dzə̀ rú, mò‑oò lo yèn, a Satan njáʼám fó yuv, e gbù e nsay moo kishèv.

¹⁹Vèn yén ri lèn, m fò ne ven vitaáví, vèn wáa nyèŋrì abúv wùn aàŋgámé, e kfə̀n fò ven vitaáví, vèn gháʼ dzə́ə sé Satan woo ŋgaà menàŋ sidzə̀m, a bó yòʼ dzə̀ kinyo ki sə̀ʼ ven gheéy.

²⁰Yii bèy, lá vèn yòʼ a sheʼrí a dzə̀ anyùy ve á yú ven. Vèn wáa sheʼrí a dzə̀ ji Nyùy sàŋ ne yír sén é ŋwàʼ woó yuv.»

²¹Mo Jesus suuyin vinyo vìn, Kiyoy ke Ranén kí nèn ŋàʼár shilív sə́, wù wáa sheʼrí, e yòŋ Nyùy jii, «Éè Tàr wor, sáʼ wò yúv wùn à nsay. M beerì wò, bìʼ fo wò‑oò lìtìn vinyo vìn fo wír ve á din vifií, e lìtì fo akiíyí, e dìn a dzə̀ áàmbúʼú. Tàr wor, dzə̀ rú, kù‑uù sìysì wò kinyo kee shooy mo wò‑oò kòŋèn.»

²²Jesus kfə́n a suúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bo yòʼ dzə̀ sá wìr kìíy Tàr wor və̀n, kù jòʼsì mo woo Wán wùn à wír ve Wàn shoʼtin ji wun din Tàr wov shóo.»

²³Wù lò, e bìnkìr, a sə̀mrì e wón və́ lìme jii, «Vishí vén vi bòŋ feyì, vèn wáa yen vinyo vìn e sí yéné.

²⁴Vèn wáa kiíy jii, *aŋgàa ntum Nyùy anín wùn aàfone‑eè sí diy feyì ji á yén vinyo ve vèn yén vìn, e kfə̀n yù ve vèn yú, e làa yòʼ a ker dzə́ə.»

²⁵Wìr wo wù kiìn nsər wùmòʼ nèn wìy wìy, a woór kinyo, a dzər e Jesus jii, «Ŋgaà Yèʼey, kinyo ke dzə̀ m kù yiì, e bóo nəə́ e dzə̀ʼə̀m yee là may ki dzə̀ ka?»

²⁶Jesus dzə́r shó jii, «Á sàŋ é Ŋwàʼ Nyùy ji wìr wáa yiì ka? À yoŋ ké yú ji ka?»

²⁷ Wù bìnèr jii, «Á sàŋ jii, ‹Wìr wáa kòŋ Nyùy Tàr woo Nyùy və shilív shidzə̀m, e fò kitú kfə́ shó kidzə̀m, a lìm fo fo vitaáví və́ vidzə̀m, e tìír vifií a dzə̀ é wùn wó.› A kímóʼ kí dzə̀ sá jii, ‹Wìr wáa kòŋ fə́r və mo wù koŋ kitú kfə́.› »

²⁸Jesus koóy jii, «À bìnèr rú. Kú a yiì rì bèy, áà wìy lùŋ.»

²⁹Wìr və̀y nèn lò, a wovrí, a dzər e Jesus jii, «A dzə̀ m kìíy wír wo dzəə̀n fə́r wom é le?»

³⁰Jesus bìnèr a dzə̀ é kimfèr jii, «Wìr wùmòʼ‑oò lò fó Jerusalem, a səy e Jeriko. Wù lòo dù e dzəə, ashóŋé koó, e sòr vifá və́ vidzə̀m, e bùʼ, e màʼ fo, e nyèŋ. Wù nèn a neŋ fo, a wù sí kpú.

³¹«A wìr wùmòʼ kì ghán sa e dzəə fóo fèy, a dzə̀ taà cù. Wù yén wír və̀y, e bàr dzə́ə, e nyèŋ nyéŋén.

³²Wìr wùmòʼ nèn kfə̀n wìy, a dzə̀ wír woó ram Levi ye yí yii leey fo lav cù. Wù meé fó, e yèn wír və̀y, e bàr sa dzə́ə, e nyèŋ nyéŋén.

³³Wùmòʼ woo wír nèn dù, a wìy, a dzə̀ wír woó wòŋ woo *Samaria, a wùn à wír veé Judàa yii bannìnè. Wù bvə́y fó, e yèn wír və̀y, mendzən mè ku yòʼ rə̀r wun.

³⁴Wù dù fo, e wày meluʼ wùn à meŋgvə́r[5] mè e wìr və̀y vileemé, e kùr, e dzə̀ʼə̀r e wùn kitu ke nyàm, e dù sho e lav ye vé ghane yii laʼ, shiiy sho, a leéy fo fo.

³⁵Wùn wun shiíy, yì rán, wù yén ŋgaà lav, e fə̀ə́r mbàm, e fò shó, e sùúy jii, à siiyì, à wàa leéy fo wìr və̀n. Aà sìíy, e kfə̀n jìvír mbàm símóʼ sí, e shaà sin, m lóo kfən, é m siir.»

³⁶Jesus fèr bèy, e dzə̀r e wìr və̀y jii, «Fo wìr vee ataár vìn, à yén ké ji wìr wo wù dìnèn ji wun dzə̀ fər wìr wo ashóŋé‑eè gharin və̀y dzə̀ la?»

³⁷Wù bìnèr jii, «Dzə̀ wo wù‑uù shamen mendzən me wìr woo shooy.» Jesus nèn sùúy sho jii, «Dù ri, a yiì sa bèy.»

³⁸Jesus wùn à wón və́ lìme yiì lò, e lòo dù, e mèé e ntèʼ yìmòʼ, a wiíy wùmòʼ dzə̀ fó, aá yoŋ ji Maata. Wù nèn lòn ji Jesus wiy á kiŋgàn e wùn lav.

³⁹Wù‑uù kér fə́r və woo wiíy wùmòʼ, aá yoŋ ji Maria. Mo Jesus duùn, e nə̀ə́, Maria ku nèn dzə̀ʼə̀m a dzə̀ e Jesus ghaŋ, a yuurí kinyo ke wù‑uù yéʼeyì,

⁴⁰a Maata kù kaŋkàŋ kfə́ a dzə̀ ké ntar. Wù yiì lò, e sàyín, e dzə̀r e Jesus jii, «À yèn, a fər wom máʼtí ne, m wáa tàʼtìn vèr mòʼón, la à yòʼ a ghay à? Ku sùúy, é wù wáa sə mo.»

⁴¹Taàtá Jesus yòŋ jii, «Maata, Maata, à kaŋkàŋ, tuʼtìn e mvə̀m vinyò vinín,

⁴²a kinyo ke kí dzəə̀n é shií kí dzə̀ kimòʼón. Maria shòʼ ne kee shooy, a bó á yòʼ dzəə́ wìy sə fo fo.»