Read Lamnso Luk 11 Bible Online

Luk 11 - Lamnso bible

Luk 11

¹Wáa dzə e ghan símóʼ sí, a Jesus bunrì e kirə̀ʼ kímóʼ kí. Wù yiì màysì, wan və lìm wùmòʼ wìy, e sùúy sho jii, «Tàr, ku yèʼéy ver mo dzə̀ á wàa bùnrì Nyùy, réŋréŋ mo Joon‑eè yeʼeyin və́ vee wón lìm.»

²Jesus nèn sùúy e wón vəə́ adzə̀m jii, «Vèn lóo bùnrì, vèn wàa yòŋ jii: « ‹Tàr, ku yiì, é wíri wáa ghvəm yír yé, e kfə̀n yiì, é sáʼ yée wiy.

³Kú a fo ver vifá ve yi veé kishiíy vishiíy vidzə̀m.

⁴Ku làysìn ajay vérí, bìʼ fo vèr laysìn vé wìr ve á jayin e vèr. Lá à yòʼ màʼtì, é vinyo ve ví mum ver ví gháʼ ver.› »

⁵Wù suúy bey, e nèn a fìʼsìn jii, «A tàm kí kòóy ji wìr fo vèn du, e kùmrì lav e ŋkar rə yìmǒʼ kitu e tím vitsəʼə́, e sùúy sho jii, ‹Ŋkar yèm, ku foòr mo meŋkfəŋ meé shùu ntuʼ se kiban sitaár.

⁶Ŋkar yem yìmòʼ lò, e sàsìn, e wìy fo kwaʼ ghan lèn, a bó m yòʼ kér kifá ke wù yí.›

⁷A tàm e ghan símóʼ sí, wìr woo shooy nèn bìnèr fo mvə̀m lav jii, ‹Lá à yòʼ dzə́ə a jivír mo. Shúu lavi sì e finèn, a vèr à wón vémé neèmkìr ne. Bó yòʼ dzə̀ m kfə̀n a lò e yuv ji m taʼ kifá, e fò e wò.› »

⁸Jesus fèr bèy, e sùúy jii, «Vèn wáa kiíy jii, a wù fə̀m dzə̀ là fó nànèn, e fo kibán ke wìr və̀y lóné ji bìʼ fo dzəə̀n ŋkar rə, bo wù kù yíi nànèn, e fo vifá ve wù kér shií shó vidzə̀m, bìʼ fo wìr və̀y kù yíi a tiy, a kùmrì shúu lav.

⁹«M nén a suúy e vèn jii, vèn wáa lon, é Nyùy wàá fó. Vèn wáa tàʼ, é Nyùy yii, é vèn bóŋ. Vèn wáa kùmrì shúu lav, é Nyùy mvəʼ.

¹⁰Vèn wáa kiíy ji wìr wo wù kooy kifá dzə̀ wo wù lóné. A wìr wo wù taʼ kifá waà yíi yen, aá mvəʼ shúu lav, é wìr wo wù kumrì nəə́.

¹¹Wìr fo vèn vee atǎr won wo dzə̀ wàn lón sə́ fo fo, wù lì a dzə̀ yó, e fò shó dzə̀ la?

¹²A wàn lòn wúm, wù lì a dzə̀ ŋgám, e fò shó a?

¹³Mo vèn dzəə̀n wír ve á kù yii vinyo ve bi ví, kù yòʼ kiiy mo dzə̀ á fò vifá ve juŋ vi e wón véné, bo dzə̀ Tàr won wo wù dzəə̀n é yuv fò sá Kiyoy ke Ranén kí e wír ve á lón fo wune.»

¹⁴Wáa dzə e ghan símóʼ sí, Jesus wáa jùm nyùy wùmòʼ wo wù‑uù jívir wír, ŋgaàŋ kfə́n ji kindzə̀mer. Mo wù màʼtìn, ŋgaàŋ ku nèn kèʼ, a suŋnín. Màŋgòŋ wáa yu, a ker gháʼ.

¹⁵Ámóʼó nèn a suúy kév jii, «Wù jum anyùy bèn, a fó *Beseber wo dzəə̀n fon anyùy vitaáví shó, bo wù wáa jùm.»

¹⁶Aámóʼó ghíʼ Jesus ghíʼín ji wù yii ri a kiŋgaʼnìn ke kinyò ke kí wáa dìn rú ji vitaáví və́ ví lo fo Nyùy.

¹⁷Jesus kiíy ji á kù yíi a kìnèn, e sùúy jii, «A woŋe lò, e jàvsìn, a taŋ kóy, bo bó yòʼ dzə̀ wú wìy tìím. A kfə́ə lò, e jàvsìn, a taŋ kóy, bo yí bvəə̀rí ne.

¹⁸Dzə̀ sá réŋréŋ mo ké Satan ki dzəə̀n. A wír vəə́ lò, e jàvsìn, a taŋ kóy, sáʼ rəə́ wìy tìím e le? A m suuy bèn, bìʼ fo vèn suuy ji m sə́ vitaáví a dzə̀ á fo Beseber, e bó a jùm anyùy.

¹⁹Mo vén vee wíri kù jum sa, a dzə̀ ji m sə́ vitaáví fo Beseber, e bó a jùm, bo áwune sə́ kév fo la? A vèn yèn ji á sə́ fo Nyùy, bo dzə̀ sá fo m sə́.

²⁰Wáa dzə, a m jum rú anyùy a dzə̀ é vitaaví vé Nyùy, bo dzə̀ ji sáʼ Nyùyi kèʼ ne lèn e nsay e sén see ghán sí.

²¹«Vèn kì sá jii, a ntav bàʼtí vifá və́ vé rər, a shìy láʼ rə́, bo bó yòʼ dzə̀ kifá, kí sə̀ʼ kifá kfə́.

²²Yii bèy, a wìr wo wù tavin, e shaà wun wìy, bo wù yíi ghaʼ wun, e faàsì vifá və́ vé rər ve wù wáy shilív shó vìy, e kuúy vifá, é wùn à ŋkar sə́ sí jav.

²³Vèn wáa kiíy jii, a wìr tèn fó a tiy e mǒ kinyò, bo ŋgaàŋ bívir bìvìrín. Wìr tén fó sə mo, aá wáa lì wíri e Nyùy wùn, bo ŋgaàŋ táʼar kfə́ tàʼàrín.

²⁴«Kù dzə̀ moo ké wìr wo *nyùy wùmòʼ jívirì, á júm fo wùn wó, wù dú é kwaʼ, a tàʼ fó beè. Wù taʼ ntéŋ, wù nèn rə̀m jii, wun‑éè wáa kfən fo wun‑eè fəən.

²⁵Wù lóo kfən, yén, a lav tíy kisáŋ, aá siíy ne, e yèr, e nàŋsín,

²⁶wù nèn dù, e bàʼtí anyùy ámóʼó saàmbà ve á birin, e shaà wun, wùn áwune nèn nə̀ə́, e sìysì wún é lav fèy. Kinyo ki nèn màysì, e fòy e wìr və̀y kitu, e shaà mo kí‑iì dzəə̀n fó mbìy.»

²⁷Jesus suúy kinyo kìn, wiíy wùmòʼ shúsín fo màŋgòŋ mvəm, e sùúy sho jii, «Kishéʼrì ki dzə̀ ké wiíy wo wù‑uù dzəən wò, e kfə̀n nyòór.»

²⁸Jesus bìnèr jii, «Wír ve á kér kishéʼrì ke kuʼùn kií dzə̀ ve á yú kinyo ke Nyùy, yii mo kí dzəə̀n.»

²⁹Wù wáa fèr vinyo vìn, màŋgòŋ wáa baʼtí e wùn ghaŋ, wù nèn lò, a suúy jii, «Ŋgwàʼ yee lèn rə̀n dzə̀ ŋgwàʼ ye bi. Á taʼ kisəəm ké vitaaví vé Nyùy e ŋgeʼ, a bó yòʼ dzə̀ féyì, m dìn. Á ku lì kisəəm a dzə̀ ké Jona.

³⁰Mo Nyùy‑iì yiìn, Jona wáa dzə kisəəm ke kí‑iì dìnèn vitaáví və́ e wír veé Ninevèe, kù dzə̀ mo wù wíy yiì sa, é ŋgaà wo yírí dzəə̀n *Wanwìr wáa dzə kisəəm fo ŋgwàʼ yee lèn.

³¹Wíy lòo dzə e kishiíy ke Nyùy wíy a tinén nsaʼ, é Yaà wo wù sáʼ woŋ Sheba wáa roòmè ŋgwàʼ yee lèn rə̀n ji vé‑eè lo jày á feyì. Wù‑uù yù ji Solomon kér vifií ve gháʼán ví, e nèn lò fo ndzəywoŋ, a wìy ji wun yén e sí rəə́. Wùmòʼ woo wír wíy lèn, a və́ vee vifií ví shaá vé Solomon, la á yòʼ a yen.

³²A wír veé Ninevèe kfə̀n wíy a roòmè sa ŋgwàʼ yee lèn rə̀n e kishiíy fóo fèy, bìʼ fo áwune‑eè yuun kinyo ke Jona fiʼtì, e bìnèr melív mev. Wìr wùmòʼ wáa dzə fèn lèn, a kfə́ kee kinyo ki shaà ké Jona, a bó á yòʼ yuúri.

³³«A bó wìr yòʼ yii səʼ lam, wù wày a dzə̀ é buu, a bó yòʼ dzə̀ wù kfə̀n lì mbìʼ, e sùm sho. Wù kù yii tiir a dzə̀ é kitu ke kifa ji wíri lóo nəə́ e lav, á wàa yen fó.

³⁴Sí wìri nén a dzə kifá ke wìr yén rán yee shooy sho. Sí wìri lóo dzə, a yí rán e mbòŋ, bo dzəʼə̀m rəə́ rán ránén e dzə̀m. Yí lóo səəné, bo dzə̀ mo dzəʼə̀m rəə́ sə́n sənén e dzə̀m.

³⁵Wìr ku nèn a leéy ji wun sà kù yòʼ ghán rú é mvə̀m ran, mo wun ghán a dzə̀ é ndzə ye sənér á?

³⁶A wù ghán rú é mvə̀m ran, léʼ ndzə ye sənér léʼén, wù nèn a yen virə́ʼ ghán sidzə̀m réŋréŋ moo lam wo wú lóo ban, wú wàa fo rán e wíri.»

³⁷Jesus yiì màysì kisúŋnìn kfə́, wìr woó mbìv *Farasi wùmòʼ jàŋ ji wù ku wìy, e yìkír e wùn lav. Wù nèn dù, wùn wun wáa yikír,

³⁸a bó Jesus yoʼ lò sù virə́ʼ mo áwune yii yii. Wìr Farasi və̀y leéy, kí tárír wun.

³⁹Taàtá Jesus suúy shó jii, «Ven vee wír vee Farasi, vinyo ve bi ví wùn à bvə̀mkúʼ rùn e věn meliv moo bàr wùn à kighín ke á suùn ndzə ndzə, a mvə̀m kóʼoyì.

⁴⁰Vèn dzə̀ viyúŋ. Bó Nyùy wo wù bomen kifá yòʼ‑oò bòm mvə́m, e bòm wún kifa kee shooy à?

⁴¹Ke vèn kì yíi a yiì ki dzə̀ jii, vèn wáa jàv vifá ve vèn kérí e vé ŋgeʼe, é melív men mè nèn a ran ranén vinyo vidzə̀m.

⁴²«Yìiy, ven vee Afarasi, ŋgeʼ dzə̀ yéen. Vèn li mefarìn me á kéŋ, náŋsin nyóo shó, á kfə̀n ŋèvtì kirə́ʼ e ghvə̀m, e bóo fo kee kimòʼón ji ké Nyùy. Vèn yii bèy, nèn laysìn fó a yiì kinyo ke ru kí e wíri, kfə̀n laysìn fó a kòŋ Nyùy. A dzə̀ vèn kù a ŋèvtì mefarìn mee shoon bèn, yii bèy, e làa yòʼ a làysìn vinyo ve ví dzəə̀n é shií.

⁴³«Yìiy, ven vee Afarasi, ŋgeʼ dzə̀ yéen. Vèn kù yii koŋ a dzə̀ vitú ve antaʼ e ŋgày se bùnrì, kfə̀n koŋ ji wíri wáa shàʼtì ven é virə̀ʼ vé way, a bèsìn.

⁴⁴Yìiy, ŋgeʼ dzə̀ yéen. Vèn dzə̀ moo say se bó sí yòʼ yénsinè, wìr lóo shaà e kitu wo, la wù yòʼ a kiíy.»

⁴⁵Jesus suúy vinyo vìn bèy, wìr wo wù‑uù duŋrì nsər Nyùy wùmòʼ nèn sàyín jii, «Ŋgaà Yèʼey, à suuy bèy, aà shoor sa a dzə̀ ver.»

⁴⁶Jesus bìnèr jii, «Yìiy, ven ve á duŋrì nsər Nyùy vìn, ŋgeʼ dzə̀ sá yéen. Vèn fó kibeʼèy, a kí gháʼ wíri, a bó yòʼ dzə̀ vèn wàa mùm ji á tóm, a fə̀m dzə̀ e wàn kiwo.

⁴⁷Ŋgeʼ wíy a dzə rú yéen. Atàr véné‑eè yúyri *aŋgàa ntum Nyùy, vèn siíy, a naŋsín say si, a bom, a meŋ vinyo vév.

⁴⁸Vèn yii bèy, tómri a dzə̀ kinyo ke atàr véné‑eè yii. Vé‑eè yùyrí aŋgaà ntum Nyùy, vèn siíy, a bom a dzə̀ say si.

⁴⁹Á kinyo ke kí‑iì yiìn, bo Nyùy woo Taà Vifiì suúy jii, ‹M wíy tum aŋgàa ntum vém fo áwune, aá yúyrí ámóʼó, a nə̀ʼsì ámóʼó.›

⁵⁰A Nyùy wíy a dzər dzə́n sé aŋgaà və́ ntum ve vé‑eè yúyri, e kèʼ mo ndzə‑əə̀ kèʼèn, a dzə̀ fo ŋgwàʼ yee lèn.

⁵¹Wù wíy kèʼ dzə́tí a dzə̀ fo dzə́n Abeli, e dù meé e yé Sekariya wo vé‑eè yuyrin é shùu lav cùu, e bǎm kiy wo á cu Nyùy sho, e bó a nəə́ e lav cù. A m suuy e vèn féyì jii, Nyùy kù wíy a dzətí dzə́n sé wìr vee shooy a dzə̀ e ŋgwàʼ yee lèn.

⁵²«Yìiy, ven ve á duŋrì nsər Nyùy, ŋgeʼ dzə̀ rú yéen. Vèn lìtì ne kimbàʼ ke kí mvəʼ shúu lav wo dzə̀ wìr shaà shó, e bóo kiíy kinyo ke dzəə̀n ké ru kí. Vèn tèn e wún wóné fó shaà sho, e nèn a shèm wír ve á taʼ ji á shaa shó.»

⁵³Jesus lò, e lòo dù, wír ve á duŋrì nsər Nyùy wùn à veé mbìv Farasii ŋáʼáy é wùn wó, a dzətí vinyo sho vinín, a yùtì shúu və́.

⁵⁴A vé‑eè wooy wun woóyín ji wù yíi lòo bìnèr, aá koó kinyo fo shuù wo.