Read Lamnso Luk 12 Bible Online

Luk 12 - Lamnso bible

Luk 12

¹Jesus wáa fèr vinyo vìy bèy, wíri nèn màysì, e bàʼtí fo ansə̀kì ansə̀kì, a farnín, ámóʼó wáa koʼrí aámóʼó wuù. Jesus nèn lò, a suŋnín a dzə̀ e wón və́ lìme, a suúy jii, «Vèn wáa baàmè liì wìr veé mbìv *Farasi, dzə̀ abìnbìnteʼnsə́m.

²Vèn wáa kiíy ji kinyo ki yòʼ dzə̀ shó ke á sətin, ke bó kí yòʼ wíy yensín, kìn ke á lìtìn, ke bó á yòʼ wíy kiíy.

³Kí nén a dzə jii, vinyo ve vèn súŋnin a dzə̀ vitsə́ʼ vidzə̀m vi kù dzə̀ ve á wíy a yu e shùy. A vinyo ve vèn səŋ lav, bo á wáa sə̀mnìn, vi kù dzə̀ ve á wíy a yu, aá sí sáʼ a dzə̀ é way.

⁴«Ŋkar sem, m nén a suúy e vèn jii, lá vèn yòʼ a fàn wír. A dzə̀ á kù yùyrí ven a dzə̀ fó wùn cáʼcáʼ, a bó yòʼ dzə̀ á kfə̀n yiì kinyo kímóʼ kí.

⁵Vèn yuúrí wír wo dzə̀ á wàa fàn. Vèn wáa fàn a dzə̀ Nyùy. Wù yúyri wír fo wùn, wù kfə̀n a ker vitaáví ve dzə̀ wù màʼ ŋgaàŋ e və̀y. M nén a suúy jii, vèn wáa fàn a dzə̀ á wun woo Nyùy.

⁶«Vèn kì sá jii, á fiinè menə́nə́n metàn là kinyè ké mbàm, yii bèy, a bó Nyùy yòʼ búʼur fo she shimòʼón shi.

⁷Kén kí wáa dzə, a Nyùy tàŋ ne mo ŋgay nəŋ dzəə̀n e věn kitu e dzə̀m. Mo kí dzəə̀n ben, lá vèn yòʼ a fàn. Vèn kér kilíŋ e Nyùy si, e shaà menə́n mèn menín.

⁸«M nén a suúy e vèn jii, a wìr biìmé lèn e wírí si ji wun dzə̀ wír wom, bo ŋgaà wo yírí dzəə̀n *Wanwìr və̀n wíy biimé sa ŋgaàŋ e nshèelav se Nyùy sí si.

⁹Wáa dzə wír wo wù méŋ mo lèn e wírí si, bo m wíy meŋ sa ŋgaàŋ e nshèelav se Nyùy sí si.

¹⁰«Kímóʼ kí wáa dzə jii, a dzə̀ Nyùy wìy làysìn jay wìr wo wù kuu ŋgaà wo yírí dzəə̀n Wanwìr və̀n, a bó yòʼ dzə̀ wù wìy làysìn jay wìr wo wù kuu a dzə̀ Kiyoy ke Ranén kí.

¹¹Vèn wáa kiíy ji ghán sí wíy gheén, aá wáa koorí ven, a dù, a saʼ nsaʼ yen é ŋgày se bùnrì, e kfə̀n a saʼ e vé wòŋe wùn à vitú ve saʼ ví si. Vèn wíy du, lá vèn yòʼ a rə̀m ji vèn sà yíi a tunér kitú kén é le á, vèn sà yíi a suúy ji kaá.

¹²Wíy lòo dzə e ghan see shooy, é Kiyoy ke Ranén kí wáa naàrì ven mo vèn wáa suúy.»

¹³Jesus wáa tir wón və́ bey, wìr wùmòʼ nèn lò, e sàyín fo màŋgòŋ mvəm jii, «Ŋgaà Yèʼey, suúy e fər wom, é vèr wun jav vitsə́ʼ vé tàr wor wun.»

¹⁴Jesus yòŋ jii, «Wìr və̀n, lèm la mo ji m wáa tinén nsaʼ sén, a jàv vifá vén?»

¹⁵Wù nèn a suúy lèn e wìr dzə̀m jii, «Vèn wáa kìm vitú vén, a yen fó a tàʼ kifàʼ e dzəə sí dzəə sí. Dzəʼə̀m wìri yòʼ dzə̀ vifá ve wù kérí, a wù fə̀m kér bùʼ e le.»

¹⁶Wù suúy bey, e nèn a yòv ŋgàn yìmòʼ jii, «Ŋgaà kav wùmòʼ‑oò yiì a dzə, e lìm vifá ve yi, ví bòŋ e ŋàŋ.

¹⁷Wù nèn a ghay jii, m yíi yèe e vifá vìn vi, a bó m yòʼ dzəə́ kér fó lèm?

¹⁸Wù nèn lò, e tàŋ jii, kinyo ke m yíi yiì ki dzə̀ jii, m yíi sàʼ vitáv ve mò‑oò lem sho, e bàʼrì ve kuʼkìn ví, a lèm vifá vém vé yi wùn à bùʼ wom shó e dzə̀m.

¹⁹M yii bèy, é m nèn sùúy e kitú kém kí jii, mo‑óò meeme lèn. M sí kér vifá ve dzə̀ m yì é bǎm viya vinín. A m yíi a yi lèn, a no, a yu vijuŋ.

²⁰Wù sìysì bèy, Nyùy nèn yòŋ jii, ‹Kiŋgà ké kiyuŋ kin, m yíi sə kiyoy ké e bàm vitsə́ʼ vé lán vi, é vifá ve à baʼtin vin vi wìy sìíy a dzə vé la?› »

²¹Jesus nèn màysì jii, «Á mo kí wíy koóy wír wo wù báʼti bùʼ a dzə̀ ji və́ə, e làa yòʼ a baʼtí, ji wun wáa yiì lim Nyùy sho.»

²²Wù nèn a suúy lèn a dzə̀ e wón və́ lìme jii, «M tír ven ji lá vèn yòʼ a dìy wún á ji vèn sà yíi a yi ka, a kur ka moo ndzə̀y á.

²³Vèn wáa kiíy ji dzəʼə̀me shaà vifá ve yi, wúné shaá á ndzə̀y.

²⁴Vèn li mfìʼ fo menə́n mè. Bó mè yòʼ yii lim vifá ve yi, e bó a kav. A bó yòʼ dzə̀ mè wàa ker vitáv wùn à ŋwaʼ si. Kù yii yiir Nyùy áwune, a vèn kùʼkìr fo wùn si feyì, e shaà menə́n.

²⁵Vèn yáŋri vifá vee bìʼ dzəʼə̀m vìn, a bó yòʼ dzə̀ wìr dzə̀sì shifarìn e wùn dzə̀ʼə̀m ji yí dar.

²⁶Mo bó yòʼ dzə̀ vèn yiì bey fə̀m shishàr, yiì ka, bo vèn kfə́n a yaŋrí vifá vee bìʼ dzəʼə̀m?

²⁷Vèn leéy mo vibuushì ví teʼ, boŋkìrì. Bó vikwiíy ví yòʼ yii lim lim, a bó ví yòʼ bá ndzə̀y. A m suuy e vèn jii, mo Fòn Solomon fə̀m‑eè kér bùʼ e gháʼán, bó wù yòʼ‑oò yiì ne màʼ ndzə̀y se sí wáa to, a bòŋkìr moo sé vikwiíy vin.

²⁸Vèn dzə̀ ben, a bó á yòʼ lo, á wày shilív e Nyùy wùn. Mo Nyùy kúr ndzə̀y e vikwiíy ví wùn, a ví teʼ lán, á bvəə́shi, á kaàsì, e tòn, bo bó yòʼ dzə̀ wù màʼ se sí shaàn see shoon e věn wùn a?

²⁹Mo kí dzəə̀n bey, lá vèn yòʼ dzə́ə a yaŋyáŋ, a rə̀m ji á sà yíi a yi ka, a no kaá.

³⁰Yii rə́si rəm wír ve bó á yòʼ kiìn Nyùy vinyo vee ben. Vèn dzə̀ kén, a Tàr won Nyùy kìíy ne ji vèn kér shií é vifa fèn vidzə̀m.

³¹Vèn ku nèn a tiír vifií a dzə̀ e Nyùy saʼ, é Nyùy nèn a fo ven vifá vìn vidzə̀m.

³²«Wónen, mo vèn à ŋgoo yen fə̀m dzəə̀n ashàr, lá vèn yòʼ a fàn, bìʼ fo Tàr won Nyùy shoʼon ne ven ji vèn wìy a dzə e wùn mvə̀m saʼ.

³³Vèn wáa fiìnè vifá vén, a jàv mbàm e vé ŋgeʼe, a tàʼ a dzə̀ vibam ve bó ví yòʼ wíy a sàʼkìr. Vèn lem bùʼ won a dzə̀ é yuv, fo bó yòʼ dzə̀ kifá ki sə̀ʼ. Bó yòʼ dzə̀ shòŋ nə̀ə́ fó, a bó yòʼ dzə̀ séʼ si là.

³⁴Vèn wáa kiíy jii, a vèn lèm lem e kirə̀ʼ, bo dzə̀ fo shilív shén shí kù yíi a tiy.

³⁵«Vèn báʼtí wún, e sə̀ʼ lam sén,

³⁶a dzə, a shìy mo vé lìme yii shiy tàr wov ji wù kfə́n fó kwaʼ kiŋkàʼ ke kinyò. Wù lóo kfən, kumrì shúu lav, aá ku nèn mvə̀ʼ, é wù nəə́.

³⁷A bòŋ ké wón lìm ve tàr wov yíi lòo wìy, aá dzəə́ kiʼì. Vèn wáa kiíy rú jii, wù yíi wovtí ndzə̀y sə́, e suúy, aáwune dzəʼəm, é wù taʼ vifá ve yi, e jàv, aá wàá yí.

³⁸A tàm wù wàa wìy, a sì e tím vitsəʼə́, kìn a kiyuú ki tóŋ ne. A bòŋ ké wón lìm ve wù yíi lòo wìy, aáwune dzəə́ kiʼì.

³⁹«Kímóʼ kí sá jii, a ŋgaà lav wùmòʼ lò, a lò, e kìíy ghán se shòŋ kì yíi siíy, e wìy, e kiv lav, wù kù a dzə, a shìy, e làa yòʼ màʼtì lav rə ji shòŋ kív.

⁴⁰Vèn ku nèn a dzə sa, a shìy, bìʼ fo ŋgaà wo yírí dzəə̀n *Wanwìr wíy sàsìn, e kfən, a bó vèn yòʼ kì.»

⁴¹Pita nèn lò, e yòŋ Jesus jii, «Tàr, à yov ŋgàn rə̀n a dzə̀ e věr wùn mo à yov e wìr dzə̀m a?»

⁴²Taàtá Jesus nèn a fèr jii, «Wánlè wìr woo jwáʼ wo wù kér vifií wo tàr wov yíi lèm láʼ sho ji ghán sí gheenè, wù fò vifá ve yi e vé lìme dzə̀ woó le?

⁴³A dzə̀ wù kù a sheʼrí a dzə̀ wánlè wo wù wíy lòo kfən, e yen, a wù lim réŋréŋ mo wù‑uù suuyin.

⁴⁴Vèn wáa kiíy rú jii, a dzə̀ wánlè woo ben, bo tàr wov wíy lèm kéŋ rə́ shó e dzə̀m.

⁴⁵Yii bèy, wánlè lo, a yen ji tàr wov ndzə̀y ne, a bó wù yòʼ dzəə́ wìy tav, e wìy, wù keʼ, a ndzən wón lìm vee vikìy wùn à vee vilume ndzə́nén, a yikír yikín, a no meluʼ, a baa,

⁴⁶bo tàr wov wíy sàsìn, e bvəy e ghan se wù yòʼ kì kwaʼtì. Wù wiy e kishiíy fó, é wù jum wánlè və woo shooy, é wù du a dzə wùn à wír ve á kér liì kisaŋe.

⁴⁷«Wàn lìm wo wù kiìn kinyo ke tàr wov taʼ ji wù wáa yiì, e làa yòʼ baʼtí, a yiì kinyo kee shooy, bo dzə̀ wo tàr wov yíi suúy, aá neer, é wù bónén, e tàm.

⁴⁸Wáa dzə wan lìm wo wù jayin kinyo ke dzə̀ á bònen tàm, a bó wù yòʼ kì kì kinyo ke tàr wov kì taʼ ji wù yii, bo á yíi wivtí woo shooy wívtín shishàr. Vèn wáa kiíy jii, wír wo á foon kifá sho kikuʼùn dzə̀ wo á wíy a leéy sa fo fo kikuʼùn. Á lem vifá e wìr lémen vikuʼùn, bo dzə̀ wun wo á yii kíyri e ŋàŋ.»

⁴⁹Jesus kfən sùúy e wón və́ lìme jii, «Mò‑oò wìy é nsay fèn ji m səʼti və́y, a wú kì sí shwí, kí ghèén mo féyì.

⁵⁰Á kér fo wìy way mo é ŋgeʼ mo á yii wáy wír e ndzəv. A dzə̀, a bó kinyo kee shooy ki shaá, la shilív shém shí yòʼ rə̀sìn.

⁵¹«Vèn kwaʼtì kén ji m wìy e nsay fèn ji m fiʼ yiì, é wíri wáa dzə nyaáŋ a? Àáy. Vèn wáa kiíy jii, m wìy fó màʼ a dzə̀ ŋkèm.

⁵²Kèʼ fo lèn, wíri wíy lòo dzə e lav atàn, aá bvəə́rí, é vee ataári wáa tiy e mǒ mbìv, é vee abàá wáa kìnèn, kìn kinèn vee ataár ké vee abaà.

⁵³Taà wàn wíy a meŋ kinyo ke wan woo lumèn, é wàn wáa meŋ ké kitàr. Yeè wàn wíy a meŋ ké wan woo wiíy, é wàn wáa meŋ ké kiyìy. Yeè lum wíy a meŋ ké wiiy wàn, é wiiy wàn wáa meŋ ké yeè lum.»

⁵⁴Jesus nèn a suúy lèn e màŋgòŋ jii, «Vèn yii lóo yen, a mbàʼ kóʼkír é yuv, a wìy fo ròŋ, á kù nèn a suúy ji wuú sí yìi gbù. Yí kù nèn gbù.

⁵⁵Vèn kfə́n lóo yen sa, a shwéri bínkír ne, a wìy fo taa, á kù nèn a suúy ji lùm sí fəə́ e ndzə. Lùm kù nèn fəə̀.

⁵⁶Abìnbìnteʼnsə́m vin, mo vèn yii leey yúv wùn à nsay, á səə̀m mo ndzə yíi a dzə, bó yòʼ dzə̀ sá vèn səə̀m vinyo ve Nyùy din e ghan sin à?

⁵⁷«Bó yòʼ dzə̀ vèn kwàʼtì sá kinyo ke kí gheenen ji wìr yii a?

⁵⁸A wìr fo vèn kér kaá wùn wìr, ŋgaàŋ li wun, a dù sho e làv nsaʼ, kí bo dzə̀ wù kù a buʼ wó, é wùn wun tav sìysì kinyo kee shooy, aá dzəə́ du duùn é dzəə, fo wù li wun, e dù sho fo ŋgaà saʼ, é wù tsə́nsí, é wìr nsər fin é sháŋ.

⁵⁹Ŋgaàŋ wáa kiíy jii, a dzə̀ wù kù wìy làʼ kaá yee shooy, e màysì e dzə̀ə́dzəədzə̀m, e bóo fəə fo sháŋ.»