Read Lamnso Luk 13 Bible Online

Luk 13 - Lamnso bible

Luk 13

¹Wáa dzə e ghan see shooy, wír ámóʼó wìy, a bi Jesus kinyo ke wìr veé Galeli ámóʼó ve vé‑eè lóo cù Nyùy, Payler woo ŋgaà saʼ woó Rom túm wíri, á gwàtì áwune, mensə́ mev mè tátí wùn à me nyàm se áwune‑eè cu Nyùy sho mè.

²Wù yuúrí, e lò dzə̀r jii, «Vèn kwaʼtì ji wír vìne‑eè kpù kpú yee bey, bìʼ fo yì‑iì dzəə̀n aŋgàa vinyò ve bi ví, e shaà wír veé Galeli ámóʼó a?

³Bó yòʼ dzə̀ bey. A m suuy e vèn jii, a vèn dzə̀ là fó bìnèr melív men, bo vèn kù wíy lày sa bèy adzə̀m.

⁴Vèn kuúmé kinyo ke kí‑iì kooyin é Siloam ki. Lav‑iì keèsì, e yùyrí wír nshòv waamé e ghvə̀m. Vèn kwaʼtì ji wír vee shooyi‑iì kpù bey, bìʼ fo yì‑iì dzəə̀n aŋgàa njò, e shaà wír ámóʼó é Jerusalem foo fèy à?

⁵Bó yòʼ dzə̀ bey. A m suuy e vèn jii, a vèn dzə̀ là fóo bìnèr melív men, bo vèn kù wíy lày sa bèy adzə̀m.»

⁶Wù nèn yòv ŋgàn yìmòʼ jii, «Yì‑iì dzə̀ é ghan símóʼ sí, wìr bìy kicí ké *fig e wùn súm vitiír vé *vayin. Ghán sí gheén, wù wìy ji wun koy kicí kee shooy, e làa yòʼ yen kifá sho.

⁷Wù nèn wìy lò, e sùúy e ŋgaà və lìm jii, ‹Sì lèn viyá vitaár mo m wìyìn ji m koy kicí kin, e làa yòʼ yen kifá sho. Gwàr gwárin, kí səər kirə́ʼ kisáŋ.›

⁸Wù bìnèr jii, ‹Tàr, ku kfə̀n màʼtì e kiya fèn, é m yiì tùŋ sár, e bòrír.

⁹Lóo wìy dzə e kiya ke kí wiyì, a kí koóm, é kí boŋ. Kí tén fó koóm, é bo à suúy, é m gwar.› »

¹⁰Wìy lòo dzə e kishiíy ké bam kímóʼ kí, Jesus wáa yeʼéy wíri é ŋgày bùnrì yìmòʼ.

¹¹Wiíy wùmòʼ wáa dzə fo, a nyùy wùmòʼ‑oò yiì ne, lùŋ kív, wù gòn kiyá nshòv waamé e ghvə̀m, a bó yòʼ dzə̀ wù dzəə ghàn tìítiy.

¹²Jesus yén wiíy və̀y, e yòŋ. Wù wìy, wù suúy shó jii, «Yè wor, à dzə́ bèn, aà bòy ne fo wò yàsí fèn.»

¹³Wù wáa suúy bèy, a neèr wó rə́ é wùn wó, wù ku nèn nànèn, e tìím tìítiy, a sùyrì Nyùy.

¹⁴Taà ŋgày bùnrì rə̀y yén mo Jesus fèrìn wiíy və̀y e kishiíy ké bam, wún vəə́ kìn. Wù nèn a saʼ wíri jii, «Vishiíy ve dzə̀ á wàa yiì lim vi dzə̀ ntuùfú. Vèn wáa wìy, aá wáa fèr ven a dzə̀ é vishiíy fóo fèy. Lá wìr yòʼ dzəə mùm wìy e kishiíy ké bam.»

¹⁵Taàtá Jesus suúy shó jii, «Vèn dzə̀ abìnbìnteʼnsə́m. Yii lóo dzə e kishiíy ké bam, la wìr fo vèn yòʼ shòʼ nàʼ və, kìn kimbèʼbìy kfə́, e dù nòór à?

¹⁶Wiíy və̀n wáa dzə kfə́ rám Abraham, a Satan kúr ne e sháŋ, wù yén ŋgeʼ kiyá nshòv waamé e ghvə̀m, bó kí yoʼ ghèén ji á fəə́r sá wun fo ŋgeʼ foo fèy e kishiíy ké bam à?»

¹⁷Jesus suúy bey, aŋgaà və́ vibàné nèn a woomé, a kùʼùn wìr shéʼri kév a dzə̀ viŋgaʼnìn ve vinyò ve Jesus yii vidzə̀m.

¹⁸Jesus lò, e ghay jii, «Sáʼ Nyùyi dzə̀ moó le? Kifá ke dzə̀ m fìʼsìn shó ki dzə̀ ka?

¹⁹Yí dzə̀ moo ŋgoòy shishùr shímóʼ shí she wìr‑iì liìn, e màʼ e wùn sum.[6] Yì fəə́, tíŋe kúy, e rə̀ŋsìn, a dzə lèn ji kicí, menə́n mè wáa bàʼrì sho.»

²⁰Wù kfən lò, e ghày jii, «A dzə̀ m kfə̀n fìʼsìn sáʼ Nyùy e ka kí?

²¹Yí dzə̀ sá moo *nyaà wo wiíy fìʼìn meŋkfəŋ vighín vitaár, e wày shó, e tòv, e tìír. Nyaà və̀y nen sìíy, e ghànén e mvə̀m meŋkfə̀ŋ fèy medzə̀m.»

²²Jesus nèn kfə̀n a shaà, a ghan ghán rə́, a dù e ŋkàlaʼ Jerusalem. Wù wáa dù, a ghan e mvə̀m sé laʼ wùn á ntèʼ sí, a yeʼéy wíri.

²³Wìr wùmòʼ lò, e wìy yòŋ jii, «Tàr, wír ve á wíy lùŋe wíy a dzə ashàr cáʼ à?» Jesus nèn a suúy e wìr dzə̀m jii,

²⁴«Vèn wáa mùm kitávín fó tosín a dzə̀ fó shùu lav wo wú fárninè, e lùŋ. Vèn wáa kiíy ji wír aníne wíy a mùm fó tosín, a bó á yòʼ wíy a ker dzə́ə.

²⁵Ghán sí wíy gheén, é ŋgaà lav nanen fó ntaʼ, e sə̀tí shúu lav. Wù lóo sətí, a vèn dzə̀ə́ fo ndzə, aá nèn a kùmrì shúu lav, a yòŋ jii, ‹Tàr, ku mvə̀ʼ shúu lavi, é vèr nəə́,› é wù nèn bìnèr jii, ‹Bó m yòʼ kì fo vèn loòn.›

²⁶Vèn lo, aá nèn kèʼ, a toyrí kitú jii, ‹Bó vèsən yòʼ‑oò ló a dzə̀ʼə̀m kirə́ʼ kimòʼón, a yikír, a nonín à? Bó à yòʼ‑oò ló a ghan e věr ntèʼ, a yeʼéy wíri é dzəə sí a?›

²⁷A wù kù wíy bìnèr kfə́ jii, ‹M suuy ji bó m yòʼ kì á fo vèn loòn. Vèn lo fo mǒ shùu lav. Vèn ghán, buʼtì vinyo ve bi ví.›

²⁸A vèn wíy a yen Abraham wùn à Aysi, à Jakov, wùn aàŋgàa ntum Nyùyi adzə̀m, aá dzə́ e Nyùy mvə̀m saʼ foo fèy, aá sə́tí ne ven fó ndzə, é vèn nèn a dìy, a ŋeytí sóŋ.

²⁹A wíy lòo dzə e ghan see shooy, é wír ámóʼó wiy fó buu se ndzə see sikweè, e nə̀ə́ e Nyùy mvə̀m saʼ fèy, a yikír fo.

³⁰Vèn wáa kiíy jii, wír ámóʼó ve á dzəə̀n lèn ji vé bàmé wíy a dzə vé mbìyi, aámóʼó ve á dzəə̀n lèn ji vé mbìyi kfə́n ji vé bàmé.»

³¹Kú a dzə e ghan see shooy, wír veé mbìv *Farasi ámóʼó wìy, e sùúy e Jesus jii, «Ku lò fo fèn, e dù fo səné, bìʼ fo Fòn Heror sí taʼ ji wun yúyrí á wò.»

³²Jesus bìnèr jii, «Vèn du, e tiìsí e ŋgaà viwoŋ woo shooy jii, wù wáa kiíy a ji m jum *anyùy ve á jívir wíri lán kfə̀n fer vé yàsí, a kù dzə̀ á mo m bvəə́shi, a yiì. Vishiíy ví mee vitaár, é bo m maysi lim yém.

³³Yii bèy, a m kù yòʼ kér fó lò lán, a dù ghán yém yeé Jerusalem, e ghan kibvəə́shí, e meé e bǎm kibvəəshí. Kí yoʼ ghèén ji á yúyrí *ŋgaà ntum Nyùy a dzə̀ é kirə̀ʼ ke sən kí, e shaà Jerusalem.»

³⁴Wù nèn yòŋ jii, «Éè Jerusalem, éè Jerusalem, à yúyri aŋgàa ntum Nyùy, yúyri wír ve Nyùy túm fo wò adzə̀m e tíyí. M mùm ne akàŋ anín ji m báʼti wón vé mo yeè ŋgvəv kùʼtí wón é sar vàv, la à yòʼ a biimé.

³⁵ M nén a tiisí fú jii, ‹Láʼ yéné sí tíy kisáŋ, a sì á kifə̀m. A m suuy e vèn jii, bó vèn yòʼ dzəə́ wìy yen mo, e dù meé e ghan se vèn wíy a ndzəʼ jii, Nyùy Tàr ku səə̀vì wír wo wù wiy e wùn yir.› »