Read Lamnso Luk 14 Bible Online

Luk 14 - Lamnso bible

Luk 14

¹Wìy lòo dzə e kishiíy ké bam kímóʼ kí, Jesus dù, a yikír e wìr wùmǒʼ lav. A wìr woo shooy dzə̀ wír wo kuʼùn é mbìv *Farasi. Jesus wáa dzə fo, wíri kú a kiy kinyo ke wù yíi a yiì e kishiíy ké bam.

²A wìr wùmòʼ kì tíy e Jesus si, a wù joyì, shwín sə́ wùn à kóy si kóʼkír.

³Jesus dzə́r e wír veé mbìv Farasi wùn aàŋgàa dùŋrì ve vé‑eè dzəə̀n fóo jii, «Nsər yèsən biímé ji dzə̀ á fèr wír e *kishiíy ké bam a?»

⁴La á yòʼ bìnèr kinyo gheéy. Jesus nèn lì wír və̀y, e fèr. Wù bónén, wù suúy, wù wáa dù.

⁵Wù dzə́r e wír vìyi jii, «Aá tùŋ kisə̀m, wan wìr fo vèn wiy é kishiíy ké bam, e gbù sho, kìn gbù nàʼ və, la ŋgaàŋ yòʼ tò fó, e fə̀ə́r à?»

⁶Kí gháʼ áwune, á kfən gòʼ kisə́sə.

⁷Jesus lòo leéy, e yèn mo wíri wiy, sháv antaʼ shávín, e bó a dzə̀ʼə̀m sho, wù nèn a yòv lám aáwune jii,

⁸«Wìr wíy du kiŋkàʼ ke vijin, wù dzə̀ʼə̀m é ntaʼ a dzə̀ woo fó tèr. Lá wù yòʼ a tàʼ ntaʼ wùmòʼ ji woo jeéy. A wù dzə̀ʼə̀m, tam kí kòóy ji vé‑eè bì sá wír wùmòʼ, a wù kùʼ, e shaà wò,

⁹bo woo shooy yíi wiy, é ŋgaà kinyò wo wù kì biin vèn wun wiy, e sùúy e wò jii, ‹Lò, e fò ntaʼ və̀y e wìr wo kuʼùn.› Kí kooy bèy, áà nèn dù, e bèsín a dzə̀ fó tsən, a dzə fo, a woomé.

¹⁰À wíy du kiŋkàʼ ke kinyò, à dzə̀ʼə̀m a dzə̀ é ntaʼ woo fó tèr. Wìr wo wù kì biin wò yií wiy, yén wò fo, é wù nèn lì jii, ‹Ŋkar yèm, ku lò fo fèn, e dù, e dzə̀ʼə̀m e kirə̀ʼ ke juŋ ki.› Wù yii bèy, bo wù kòʼór ne viŋgày vé e wìr dzə̀m si.

¹¹Kù dzə̀ mo Nyùy wíy a sèn wír wo wù yén kitú kfə́ kikuʼùn, a koʼór wo wù yén kitú kfə́ shishàr.»

¹²Jesus nèn kfə̀n sùúy sa e ŋgaà lav wo wù‑uù biin wun və̀y jii, «À wíy lóo jàŋ wíri é vifa ve yi, lá à yòʼ jàŋ a dzə̀ ŋkar sé, kìn afə́r vé wùn à kfə́ə yée. Lá à yòʼ bì sá aŋgàa mbàm vee wò ntèʼ, bìʼ fo dzə̀ wír vee shooyi wìy bì sá wò kév kee kinyo, e siìr kiwó ké.

¹³À wíy kaʼ kinyo, à bì a dzə̀ aŋgàa kitàn, e kfə̀n bì andzə́m, wùn aàŋkivkìri, aàmfìri.

¹⁴À yii bèy, áà nèn a ker kishéʼrì, bìʼ fo bó yòʼ dzə̀ wír vee béne siìr kifá e wò, é wìy laàmé Nyùy wò e ghan se wír vəə́ wíy fəə fo kpu.»

¹⁵Mo Jesus suuyin kinyo kìn, wìr wo wùn áwune kì yíkir wùmòʼ nèn bìnsí jii, «Bòŋ ké wìr wo wù wíy a yi kiŋkàʼ ke Nyùy e wòŋ woó yuv.»

¹⁶Jesus nèn a fèr sho jii, «Yì‑iì dzə̀ é ghan símóʼ sí, wìr wùmòʼ wáa ker kiŋkàʼ ke kuʼùn kí, e bì wíri anín.

¹⁷Ghán sí gheén, wù túm wán və lìm ji wù ghán, e sùúy e wír ve wù‑uù biiné jii, ‹Vèn wiy, vifá vidzə̀m vi sì vibáʼtín.›

¹⁸Wù nèn dù, yén wír, ŋgaàŋ kù kòóy kinyo kée suúy. Wù yén wo mbìy, wù bìnèr jii, ‹M sìíy, e yùn súm wúmóʼó, a m kér fó dù, e leéy. Kii wò, lá vèn yòʼ a saʼ mo.›

¹⁹Wù kfən yèn wùmòʼ, wù bìnèr jii, ‹M sìíy, e yùn anàʼ vém lìm e ghvə̀m, a m sí du, e mùm. Kii wò, lá vèn yòʼ a saʼ mo.›

²⁰Wù yén wùmòʼ, wù bìnèr kfə́ jii, ‹M sìíy, e kòóy wiíy, a bó yòʼ dzə̀ m wàa ker ghán sée wìy.›

²¹«Wàn lìm və̀y nèn kfə̀n, e bìnèr e tàr wov. Ŋgaà kiŋkàʼ və̀y yú, kilòŋ kfə́ kí shwiíy. Wù nèn kfə̀n tùm wán və̀y jii, ‹Fəə́ cér, e dù e mvə̀mlaʼ, e ghàn mentàrnín medzə̀m, e kfə̀n ghàn medzə́ə medzə̀m, e bàʼtí aŋgàa kitàn wùn aàndzə́mé, aàmfìri, aàŋkivkìri, e wìy sho.›

²²Wù dù, e wìy, e yòŋ jii, ‹Tàr, m yiì ne mo à kì suuyin, a bó lav yoʼ rùn.›

²³Tàr wov suúy shó jii, ‹Fəə́ lèn, e dù, e ghàn vishwáŋ vidzə̀m, e kfə̀n ghàn medzə́ə meé kwaʼ medzə̀m, e ghàr wíri, aá wiy, é lav yem rún.

²⁴Kú a kiíy ji bó yòʼ dzə̀ wír fo ve mò‑oò biin fó mbìy vìyi yiì lùʼ kifá kém ké yi e wùn shuù.› »

²⁵Jesus kfən lòo dù ghán rə́, màŋgòŋ shém fó bàm nyanyày. Wù yiì lò, e bìnkìr, e sùúy aáwune jii,

²⁶«Bó yòʼ dzə̀ wìr wìy nə̀ə́ e mǒ ŋgoo, a bó wù yòʼ koŋ mo, e shaà tàr wov wùn yè wov, kfə̀n koŋ mo, e shaà wiíy və wùn à wóné, aàfə́r vəə́. A wù kfə̀n kér fó a kòŋ sa mo, e shaà mo wù koŋ kitú kfə́.

²⁷A bó yòʼ dzə̀ sá wìr wàa dzə ŋgaà ŋgoo wom, a bó wù biímé kpú, e lì moo kintam, a ghan sho e mǒ bàm.

²⁸«A wìr fo vèn lò ji wun wíy bom lav ye kuʼùn, la wù yòʼ tòmbìy dzə̀ʼə̀m, e kàʼày mbàm se wù yíi jivír, e bóo kiíy ji wun sà kù yòʼ kér mbàm se dzə̀ sí bóm lav yee shooy, e màysì à?

²⁹A wù dzə̀ là fó yiì bèy, tam wù wìy wày a dzə̀ kinsə̀ŋ, lav ghàʼ. Kí kooy bèy, é wír ve á shaa, yén kinsə̀ŋ kee shooyi wáa sheʼ wun jii,

³⁰‹Wìr və̀n kèʼ kibaʼrì, kí gháʼ.›

³¹«Kìn jii, a tàm fòn wùmòʼ fəə̀ ji wùn wùmòʼ maʼ rə́r. Wù lòo fəə, e yèn a woo shooy wiy, kér wír nsə̀kì mbaà, a wù kì kér kfə́ wír nsə̀kì e ghvə̀m cáʼcáʼ, wù yèe le? La wùn à wír vəə́ yòʼ tòmbìy dzə̀ʼə̀m, e lèéy ji sà kù yòʼ dzə̀ wùn à wír vee shooyi tàm a?

³²Wù yén, a kí gháʼ ne, é wù nèn tùm wír ámóʼó, aá du, e yèn fon woo shooy, a wù dzə̀ə́ kwaʼda, a lon ji wù ku sùúy kifá ke á shwí wun sho, é wù maʼti wun nyaáŋ.

³³Kù dzə̀ sá mo vèn kér fó baʼtí réŋréŋ, a bó yòʼ dzə̀ wìr wàa dzə ŋgaà wom ŋgoo, a bó wù máʼtí vifá və́ vidzə̀m.

³⁴«Shiŋgwáŋ shi dzə̀ kifá ke juŋ ki. Yii bèy, a shí lò, e səə̀rí, á kfə̀n yèe shó, bo shí nyom?

³⁵Bo shí lày ne kisáŋ, a bó yòʼ fə̀m dzə̀ á wày é sum, a bó yòʼ dzə̀ sá, á tàtí wùn à viŋgà ve á wáy e sum ví. A dzə̀ á kù màʼày màʼàyìn. Vituʼùr ví dzə̀ vibaà. Kímóʼ kí tén fó yu, kímóʼ kí yù.»