Read Lamnso Luk 15 Bible Online

Luk 15 - Lamnso bible

Luk 15

¹Wír ve wír veé Judàa yii nyáŋsi ji ve bií wáa dzə, a vé‑eè rə́si báʼti e Jesus ghaŋ, yuúri kinyo kfə́, a wír aníne dzə̀ ve vé‑eè báʼti mbàm se *bàràʼ.

²Wír veé mbìv *Farasi wùn à wír ve á yii duŋrì nsər Nyùyi nèn lò, a ghvə̀vrì Jesus jii, «Wìr və̀n ghánen wùn à wír ve bií, kfə̀n maysì, yíkir wùn áwune.»

³Jesus nèn a yòv ŋgàn yìmòʼ aáwune jii,

⁴«A wìr fo vèn kér njiì wií, wo mòʼón lay, wù yèe le? A dzə̀ la wù yòʼ màʼtì woo nshòv bvə̀ʼə̀ e mbvə̀ʼə̀ e kwaʼ, e dù, a tàʼ wo mòʼón wo wù kì làyìn və̀y, e meé e ghan se wù yíi yen à?

⁵Wù taʼ, yéné, é wù nèn a sheʼrí, e bèʼèy, a dù sho fo laʼ.

⁶Wù mee fo laʼ, é wù nèn jàŋrì ŋkar sə́ wùn à wír vee wùn gwaaneé jii, ‹Vèn wiy, é vèsən wáa sheʼrí njiì wom wo wù‑uù làyìn, m kfən yèn.›

⁷Vèn wáa kiíy jii, kù dzə̀ sá réŋréŋ mo á wíy a sheʼrí e Nyùy wòŋ woó yuv, bìʼ ŋgaà vinyò ve bi ví e mòʼón wo wù bìnèrìn shilív sə́. Aá wíy a sheʼrí woo shooy, e shaà wír vee nshòv bvə̀ʼə̀ e mbvə̀ʼə̀ ve á yén ji áwune dzə̀ ajuŋ, a bó á yòʼ dzəə́ kér shií fó bìnèr melív mev.

⁸«Kìn lò wiíy, a ker mbàm e ghvə̀m, sí mbàme lay, wù yèe le? A dzə̀ la wù yòʼ sə̀ʼ lam, e yèr nsaàlav, a tàr, e meé e ghan se wù yíi yen à?

⁹Wù yéné, é wù nèn jàŋrì ŋkar sə́ wùn à wír vee wùn gwaaneé jii, ‹Vèn wiy, é vèsən wáa sheʼrí. Mbàm sém sí‑iì lày, m kfən bòŋ.›

¹⁰Vèn wáa kiíy jii, kù dzə̀ sá réŋréŋ mo nshèelav se Nyùy si shéʼri ŋgaà vinyò ve bi ví e mòʼón wo wù bìnèrìn shilív sə́.»

¹¹Jesus kfə́n a fèr jii, «Wìr wùmòʼ‑oò kér wón abaà.

¹²Wo bàm nèn wìy lò, e sùúy sho jii, ‹Tàr, jàv kéŋ yée lèn, e fò mbìv ye yì‑iì wíy a dzə yéem.› Tàr wov ku yòʼ biìmé, e jàv kéŋ rə́ e wan və̀y wùn fər və.

¹³Wù sə́ rə́ə yee mbìv, e làa yòʼ keerí vishiíy vinín, e nèn fiìnè, e lì mbàm, e lò sho. Wù lò, e dù e wòŋ wúmóʼó kwaʼda, a dzə fo, a sèv, a bvəʼ mbàm sìy.

¹⁴Wù kfə́r, sí mày, jìŋ ye tavín nèn lò, e koò é wòŋ foo fèy, a bó wù yòʼ dzəə́ kér kifá.

¹⁵Kí gháʼ, wù dù, e yèn wír woó wòŋ foo fèy wùmòʼ, e nə̀ə́ e sar shwin wó. Wù nèn tsə̀nsí a dzə̀ é kwaʼ ji wù du, a shìy a kǔnnyàm və.

¹⁶Wù nèn dù, a shìy, la wìr yòʼ fə̀m a fo kifá ke yi sho. Wù lo, wù nèn a leéy ji bo wun kì yí sa vighuv ve vifa ve kǔnnyàm kì yí.

¹⁷Wù nèn wìy lò, e rə̀m kitú kfə́ jii, ‹Ke m yii bèn ki dzə̀ ka? Wíri lim fo tàr wor anín, yí vifá, a ví gháʼ áwune gháʼán, a m dzə́ fèn, kpú jíŋ.

¹⁸Mo‑óò wáa dù, e yèn tàr wor, e sùúy sho jii, tàr, mò‑oò jày ne, e yiì kinyo ke bi kí e Nyùy, e kfə̀n yiì sa e wò,

¹⁹a bó m yoʼ dzəə ghèén lèn ji à wáa yòŋ mo ji wan wò. Ku lì mo moo ŋgaà lìm wò wùmòʼ.›

²⁰«Wù nèn lò, a kfən fo tàr wóv wùn. Wù dù, e lòo meʼ láʼ, tàr wov yén, a wù dzə̀ə́ ntàmda, e kìíy. Mendzən me wan və mè rə́r wun, wù nyéŋ, e dù, e baàmé, a nyòʼtì.

²¹Wàn nèn a suúy jii, ‹Tàr, mò‑oò jày ne, e yiì kinyo ke bi kí e Nyùy, e kfə̀n yiì fo wò. A bó m yoʼ dzəə ghèén lèn ji à wáa yòŋ mo ji wan wò.›

²²Wù suúy bey, tàr wov nèn jàŋ a dzə̀ vé lìme, e sùúy jii, ‹Vèn ku dù cér, e lèéy kikúm ke juujùŋ ki, e wìy sho, e màʼ e wan və̀n wùn. Vèn kfən wày ndzə̀ŋgwáŋ é kiwo wo, e wày sá alábáʼ é wuù wó.

²³Vèn kfən dù, e koò wan nàʼ wo faŋèn, e gwàr, é vèsən wáa kfər, a sheʼrí wán və̀n.

²⁴Mò‑oò kí ji wan və̀n kpù ne, wù kfə́n lèn, a wù dzə̀ e tin. Wù‑uù lày ne, bo m kfən yèn.› Wù suúy bey, á nèn kèʼ vinyo, a yikír, a dzən kidzə́n.

²⁵«Kinyo kìn ki wáa koóy, a wan woo ŋgàywìr kì dzə̀ é kwaʼ. Wù yiì lòo wìy, e yù, a kidzə́n ki biŋrì bìŋrìn é laʼ,

²⁶wù nèn tìím e shweesí, e jàŋ ŋgaà lìm wùmòʼ, e dzə̀r shó jii, ‹Á dzə́n a dzə̀ ka?›

²⁷Wù bìnèr jii, ‹Fər wò sìíy ne, e kfə̀n é bàm. Mo tàr won yenen, a wù dzə̀ e tin, e kfə̀n a dzə kitávín, wù nén a sheʼrí, e sùúy ji á gwar á wan nàʼ wo faŋèn, aá wáa yi.›

²⁸Wù yú bey, kilòŋ kfə́ kí shwiíy, wù nèn a ten fó nəə́ e laʼ. Tàr wov yú, e fəə̀, e dù, a boòrì jii, ‹Ku wìy e lav.›

²⁹Wù bìnèr e tàr wov jii, ‹À kì sá ji m lìm ne fo wò viyá vinín, a bó m yòʼ‑oo tén ne fó yu kinyo ké e ghan símóʼ sí gheéy, a bó à yòʼ‑oò yiì ne fò kifá e mò, a fə̀m dzə̀ shiwán shé bvəy ji vèr à ŋkar sém sí wáa kfər, a sheʼrí.

³⁰Wan wò və̀n‑eè bvə̀ʼ ne kéŋ yé wùn aàsàkìi, wù kfə́n lèn fo laʼ, à nen gwàr a dzə̀ kimfàŋ ke wàn nàʼ, e fò shó.›

³¹Tàr wov yòŋ jii, ‹Wàn, wòsò dzə́ ghán sidzə̀m, a kifá kidzə̀m ke m kér ki dzə̀ ké.

³²Yii bèy, a dzə̀ wòsò kù a sheʼrí ké fər wò kìn. Vé‑eè kí ji wù kpù ne, wù wíy, a wù dzə̀ e tin. Wù‑uù lày ne, wòsò kfən yèn lèn.› »