Read Lamnso Luk 17 Bible Online

Luk 17 - Lamnso bible

Luk 17

¹Jesus wáa suúy e wón və́ lìme jii, «Vinyo ve ví lévti wíri, aá jáy dzə́ə ví yòʼ wíy a buŋ e ghan símóʼ sí gheéy. Yii bèy, lòné dzə̀ wó ŋgaàŋ wo wù lévti wír, wù jày dzə́ə.

²Kí bòŋ ji bo á kì sə̀ə́y tíy kiban e ŋgaàŋ kilòŋ, e dòm e ndzəv, e shaà fo wù wáa dzə sho, e yiì, é wìr fo vin ve á biíme Nyùy moo wón ve terií jáy dzə́ə.

³«Vèn wáa yen rì fó a jay vinyo. A fər wìr jày kinyo, wù wàa tir tirín. Wù biíme jay və, wù làysìn kinyo kee shooy.

⁴A wìr fə̀m jày e wò kàŋ saàmbà kishiíy kimòʼón, jáy bèy, wù kù yòʼ wìy, a tunrí jay və, à kù làysìn kinyo kee shooy.»

⁵Aŋgàa ntum Taàtá Jesuse nèn lò, a suúy sho jii, «Ku sə̀ ver, é vèr wáy shilív e Nyùy wùn, e shaà mo á wayin.»

⁶Taàtá Jesus bìnèr jii, «Ŋgoòy shishùr[7] ŋeèrí feyì, a yensín shishàr. A vèn bèn kì wày shilív e Nyùy wùn shishàr bèy, bo dzə̀ vèn kù sùúy e kicí kin ki jii, ‹Mènèn fó fèn, e dù, e tìím a dzə̀ é rìbà ndzə̀v›, kí kù nèn meènè mo vèn suuyin.

⁷«Vèn ku lì jii, wìr fo vèn kì kér ŋgaà və lìm, wù rə́sí, e lìm súm, kìn wù shiy a dzə̀ njiì, wù yiì wìy fo laʼ, wò woo tàr wov kù nèn sùúy sho ji wù shaa ri, e lì vifá və́ vé yi, a yi à?

⁸Àáy, ke dzə̀ tàr wov kù sùúy ki dzə̀ jii, dù, e kùvsín ndzə̀y sí, e fèr vifá vém vé yi, e wìy sho, m lóo yi, áà wáa baʼtí vifá. M maysì, é bo à du, e lì vé, a yi.

⁹Wù yii mo tàr wov suuyin, tàr wov kfə̀n rə̀sí, a beèrì beèrìn a?

¹⁰Kù dzə̀ sá mo kén kí dzəə̀n. Vèn yii lim ye á foon e vèn, yí mayì, vèn kù a suúy cáʼ jii, vèr dzə̀ kér ji aŋgàa lìm, a vèr yiì a dzə̀ lim yér ye yí dzəə̀n ji á wáa yiì.»

¹¹Jesus kfən yiì lòo dù e dzəə̀ Jerusalem, a shaà a dzə̀ fó njàvìn wòŋ woo Samaria wùn à woo Galeli.

¹²Wù dù, e lòo nəə́ e ntèʼ yìmòʼ, a wír ámóʼó ghán fo e ghvə̀m, aá joy shivnsay. Á yén wun, a wù dzə̀ə́ ntàmda, e nèn tìím,

¹³a jàŋ jii, «Jesus, Tàr à wíri, ku shàm mendzən mer mè.»

¹⁴Jesus yén áwune, e jàŋ jii, «Vèn du, e yèn taà cù, é wù leéy ven.» Áwune ku nèn a dù, e lòo dù e dzəə, e nèn bònén.

¹⁵Á yén bey, wo mòʼón nèn a kfən fo Jesus wùn, a yòv, a taŋ, a sùyrì Nyùy kitávín.

¹⁶Wù meé fó, e tsə̀m e Jesus si, a beèrì wun. A wìr və̀n‑eè dzə̀ wír woó *Samaria.

¹⁷Jesus wáa ghay jii, «Bó m yòʼ kì fèr wír e ghvə̀m à? Vee bvə̀ʼə̀ə bèé?

¹⁸Kù wìy wir kitum və̀n cáʼcáʼ ji wun búrí Nyùy à?»

¹⁹Wù nèn sùúy e wìr və̀y jii, «Lò é yuv, a dù du yée. À bònén ne, bìʼ fo à wayin shilív e mǒ wùn.»

²⁰Wír veé mbìv *Farasi ámóʼó nèn wìy lò, e dzə̀r e Jesus jii, «Nyùy wíy kèʼ, a saʼ vifon və́ é nsay e ghàn ka?» Wù bìnèr jii, «Kisəəm ke kí din ghán se Nyùy sí wìy a saʼ vifon və́ kí yòʼ dzə̀.

²¹A bó yòʼ dzə̀ wìr wìy sùúy jii, ‹Nyùy və̀ne, mo wù sí sáʼá.› Kìn jii, ‹Və̀sə, mo wù sáʼá.› Vèn wáa kiíy jii, sáʼ Nyùyi sì lèn a dzə̀ e wírí meliv.»[8]

²²Wù nèn a suŋnín lèn a dzə̀ e wón və́ lìme jii, «Ghán sí wíy gheén se vèn wáa ker shií fó kfə̀n yen ŋgaà wo yírí dzəə̀n *Wanwìr, a fə̀m dzə̀ kishiíy kimòʼón, e làa yòʼ yen.

²³A wíy lòo dzə e ghan see shooy, é wír ámóʼó wáa suúy e vèn jii, ‹Vèn leéy, wù və̀sə›, kìn jii, ‹Wù və̀ne.› Á lóo suúy bèy, lá vèn yòʼ a dù ji á taʼ wun.

²⁴Ŋgaà wo yírí dzəə̀n Wanwìr wíy lòo kfən, aá wáa yen moo wuú ye yí njaʼàm, yí ŋwàŋ, yúví ràn, e kaàrí, e tàr.

²⁵Yii bèy, é bo wù wìy dù, a kfən, wù kér fó tòmbìy yen ŋgeʼ sinín, é ŋgwàʼ yee lèn káy wun.

²⁶A wù wíy lòo wìy, é wíri wáa dzə réŋréŋ mo vé‑eè dzə́ e Noa ghan.

²⁷Á kù‑uù dzə́, yíkirì, nó vifá, juur wón, a vilum wáy e lav, e dù, e meé e kishiíy ke Noa‑aà nəən é kikoŋ. Ndzə́ví nèn wìy, e lèér áwune, á lày adzə̀m.

²⁸A kí kfə̀n wíy koóy sa réŋréŋ mo kí‑iì kooyin wíri e Lot ghan. Vé‑eè dzə́, rə́si yíkirì, nó vifá, kávnin wáy, lim súm, kfə̀n baʼrì lav sév.

²⁹Lot wìy fəə̀ fo áwuné ntèʼ yee Sodom, Nyùy nèn sə̀ʼə́r və́y fó yuv, a wú shwí, baári moo mekàŋ, e laàr wír veé Sodom sho adzə̀m.

³⁰Á mo kinyo ki wíy koóy sa wíri é kishiíy ke ŋgaà wo yírí dzəə̀n Wanwìr wíy sàsìn, e bvəy.

³¹«Wíy lóo dzə e kishiíy fóo fèy, a wìr kì dzə̀ e kitu ke lav, lá wù yòʼ dzə́ə a kfən e lav ji wun li vifá və́, e bó a nyeŋ. Wìr wáa dzə é kwaʼ, lá wù yòʼ dzə́ə a kfən fo laʼ.

³²Vèn wáa kuumé kinyo ke kí‑iì kooyin wiíy Lot.

³³Wìr wo wù bávti kitú kfə́ ji fo wun kpú, kù wíy kpu. Wìr wo wù maʼàyì, ŋgaàŋ wíy shaàrì.

³⁴A m suuy e vèn jii, wíy lòo dzə vitsə́ʼ vee shooy, wíri lóo neŋ, lóo buuné e kikun abaà, aá li wùmòʼ, e lèm wùmòʼ.

³⁵Vikìy lóo jò kibán abaà, lóo sənín, aá li wùmòʼ, e lèm wùmòʼ. [

³⁶Wíri lóo dzə e kwaʼ abaà, aá li wùmòʼ, e lèm wùmòʼ.]»

³⁷Wón lìm Jesuse nèn dzə̀r shó jii, «Tàr, kinyo kìn ki wíy a koóy a dzə̀ feé?» Wù bìnèr a dzə̀ é ŋgàn jii, «Kimkpú ke kifa ki yii lóo neŋ e kirə̀ʼ, vilùŋ vi nèn a baʼtí fo.»