Read Lamnso Luk 18 Bible Online

Luk 18 - Lamnso bible

Luk 18

¹Jesus kfə́n a fèr ŋgàn yìmòʼ e wón və́ lìme ji wun fíʼ yeʼéy áwune mo dzə̀ á wàa bùnrì Nyùy ghán sidzə̀m, e làa yòʼ a dor.

²Wù wáa fèr jii, «Ŋgaà saʼ wùmòʼ‑oò dzə̀ é ntèʼ yìmòʼ, a bó wù yòʼ fan Nyùy, a bó wù yòʼ kér dzə̀rkìtu fo wìr.

³Wiíy wùmòʼ wáa dzə sa e ntèʼ fóo fèy, a dzə̀ wiíy ŋkfə. Wù lo, wù kù a dù, a yen ŋgaà saʼ və̀y, a lon jii, ‹Kii wò, ku tìnén nsaʼ yem, e sə̀ mo fo ŋgaà wom gòv.›

⁴Ŋgaà saʼ və̀y tén, wù kú a dù duùn. Kí gháʼ, wù suúy jii, ‹Mo bó m yòʼ fə̀m fan Nyùy, a bó m yòʼ yii kér dzə̀rkìtu fo wìr,

⁵yii bèy, mo wiíy ŋkfə və̀n kù sí jívir mo ben, bo mo‑óò bin nsaʼ rə, e sə̀ wun. A m yàr, bo wù kù yíi a wìy bèn, é m yiì mày e wo wo.› »

⁶Taàtá Jesus fèr bèy, e sùúy jii, «Vèn yù ne sa kinyo ke ŋgaà saʼ və̀n‑eè suuyin, wír, a liì və táv é ŋàŋ.

⁷Mo wù‑uù səən wiíy və̀y, bo bó Nyùy yòʼ wíy sə sa və́ vee wír ve wù‑uù shoʼon, aá tóŋ fo wun e shùy, tóŋ vitsə́ʼ ji wù sə́ áwune a? A dzə̀ wù kfə̀n a siʼsíʼ à?

⁸Vèn wáa kiíy jii, Nyùy kù yíi bìn nsaʼ yev, e sə áwune, a bó yòʼ dzə̀ wù wàa ghvəə. Yii bèy, ŋgaà wo yírí dzəə̀n Wanwìr kù yòʼ wíy lòo kfən, é wù yén wír ve á wáy shilív e wun woo Nyùy wùn á?»

⁹Jesus nèn lò, a yòv ŋgàn yìmòʼ a dzə̀ e wír ve á yén vitú vév ji wír ve juŋe, nèn nyáŋsi ámóʼó ji ve bií.

¹⁰Wù wáa fèr jii, «Yì‑iì dzə̀ é ghan símóʼ sí, wíri kóʼ é lav cù e Jerusalem abaà ji á bunrì Nyùy. Wùmòʼ‑oò dzə̀ wír woó mbìv *Farasi, wùmòʼ wír wo wù‑uù báʼti mbàm se *bàràʼ.

¹¹Á nəə́, wìr woó Farasi nèn kòʼtí, e tìím jeéy, a bùnrì jii, ‹Éè Nyùy, m beerì wò ji bó m yòʼ dzə̀ moo wír ámóʼó, bo taaka moo ŋgaà wo wù báʼti mbàm se bàràʼ və̀sə. Bó m yòʼ yii táŋ kifá ke wìr, bó m yòʼ yii kuvrì kiŋkùvrì, a bó m yòʼ yii li wiiy wìr.

¹²M lem jíŋ bìʼ wò vishiíy vibaà é ŋgàm. M jav vifá vém vidzə̀m kirə́ʼ e ghvə̀m, fó mbìv yee mòʼón e wò.›

¹³Wìr wo wù‑uù báʼti mbàm se bàràʼ və̀y ku tìím kfə́ a dzə̀ fó bàm, e jòór kitú, e wày wóm, a lon jii, ‹Éè Nyùy, ku rə̀r mendzən mem mè, mo woo ŋgaà vinyò ve bi ví.›

¹⁴Vèn wáa kiíy jii, wìr və̀n‑eè fəə̀, e lòo səy e wùn laʼ, a Nyùy lí ne wun ji wír woo là jay, e shaà wir Farasi və̀y. Kù dzə̀ mo Nyùy wíy sèn wír ve á kóʼor vitú vév adzə̀m, e koʼór ve bó á yòʼ yén vitú vév.»

¹⁵Wír ámóʼó nèn wìy lò, e lì wón ve terií, a wìy ji á yén Jesus sho, é wù neer wó rə́ aáwuné vitu, e bùnrì. Á lòo wìy, wón və́ lìme nèn a shèm.

¹⁶Jesus ku jàŋ wír vìy ji á wiy á sho, e sùúy e wón və́ lìme jii, «Vèn maʼti, é wón ve terií wáa wìy, a yen mo. Lá vèn yòʼ a shèm, bìʼ fo wír ve á wíy nəə́ e vijùŋ ve dzəə̀n vé saʼ Nyùyi kù dzə̀ vee moo wón vin.

¹⁷M suuy e vèn rú jii, a wìr dzə̀ là fóo biimé sáʼ Nyùy moo wánlè wo terí, la wù yòʼ wìy nə̀ə́ sho.»

¹⁸Wìr wo kuʼùn wùmòʼ nèn wìy, e yèn Jesus, e yòŋ jii, «Ŋgaà Yèʼey, wò moo wír wo juŋ, a dzə̀ m yèe, e bóo wìy nəə́ e dzə̀ʼə̀m yee là may?»

¹⁹Jesus dzə́r shó jii, «À yoŋ mo ji wír wo juŋ bìʼ ka? Wìr wo juŋ yòʼ dzə̀, kù jòʼsì Nyùy wùn mòʼón.

²⁰ Fo ke à kì dzərin kí, à kì sá nsər see jii, ‹Lá wìr yòʼ lì wiiy wìr, kìn ji wiíy wáa ghan viŋkar. Lá wìr yòʼ yùyrí wír. Lá wìr yòʼ a shoŋ vishóŋ. Lá wìr yòʼ tìím vinjen ve kisaŋ vi, wìr ghvə́m á tàr wov wùn yè wov.› »

²¹Wìr və̀y bìnèr jii, «Mò‑oò sí lem nsər see shooy sidzə̀m, e kèʼ fo meterí.»

²²Jesus yú bey, e sùúy sho jii, «Bo kinyo ki dzəə́ bér kimòʼón ke dzə̀ à yiì. Dù ri, e fiìnè kéŋ yée e dzə̀m, e jàv mbàm e vé ŋgeʼe, e wìy, é wòsò wáa ghan. À yii bèy, áà nèn wìy a ker vikuʼùy a dzə̀ e Nyùy wòŋ woó yuv.»

²³Wù yú kee shooy, e nèn rə̀ə́y, a sòv kitú, bìʼ fo wù‑uù kér káv e ŋàŋ.

²⁴Jesus yén mo wù rəəyin, e sùúy jii, «Kí dzə̀ kigháʼán féyì fo ŋgaà kav nəə́ é vijùŋ ve dzəə̀n vé saʼ Nyùy.

²⁵A fə̀m dzə̀ ji nyàm yee moo *kamer tósín é si ntar, bo bó yòʼ dzə̀ ŋgaà kav tàv nə̀ə́ e vijùŋ ve dzəə̀n vé saʼ Nyùy.»

²⁶Wír ve vé‑eè yuúríi nèn dzə̀r shó jii, «A kí dzə̀ bey, bo dzə̀ wìy nə̀ə́ la é dzə̀ʼə̀m yee là may lèn?»

²⁷Jesus bìnèr jii, «Kinyo ke kí gháʼ wíri kí dzə̀ kù yiì Nyùy.»

²⁸Pita nèn lò, a bi sho jii, «Ku yèn ri mo vèr màʼtìn ne vér vee vifá vidzə̀m, a ghan e wò bàm.»

²⁹Jesus bínér áà Pita jii, «M suuy kinyo ke ru kí e vèn jii, a wìr màʼtì láʼ rə́, kìn wiíy və wùn à wóné, kìn afə́r və́, kìn tàr wov wùn yè wov bìʼ sáʼ Nyùy,

³⁰bo ŋgaàŋ wíy a ker wír wùn à vifá vi nyanyày e ndzə fèn, e shaà ve wù‑uù màʼtìn viy. A wù kfə̀n wíy a ker sa dzəʼə̀m yee là may e ndzə ye yì wíy wìy.»

³¹Jesus lò, e lì wón və́ lìm vee nshòv sibaà e ghvə̀m, wùn áwune bàr wún. Wù wáa suúy jii, «Vèn yuúrí, vèsən sí du e Jerusalem, aá du, e meé fo, é vinyo ve aŋgàa ntum Nyùyi‑iì saŋen bìʼ ŋgaà wo yírí dzəə̀n *Wanwìr və̀n vi nèn wìy ghèén vidzə̀m.

³²A kí dzə̀ jii, á wíy way wun e vitúm ve ví sáʼ woŋ və̀n ví wo, aá wáa kèŋ wun, a shoór wun, a cu mentíy e wùn si.

³³Á wíy tam wun e ŋgwàne, e yuyrí wun, vishiíy ví mee vitaár, é wù fəə́ fó kpu.»

³⁴Jesus suúy bey, la áwune yòʼ fə̀m kìíy. Kí tárír áwune, la á yòʼ yù kinyo ke wù suuyì.

³⁵Jesus lòo meé e mvə̀mlaʼ yee Jeriko, a mfìr wùmòʼ dzə́ e ghaa dzəə, lón vifá.

³⁶Wù nèn yù mo màŋgòŋ shaa, e dzə̀r ji sà kooy ka á?

³⁷Á suúy shó jii, wiy a Jesus woó Naasarer.

³⁸Wù nèn a waamé jii, «Jesus woo Wan Fòn Davir, ku shàm mendzən mem mè.»

³⁹Wír ve á kì wiy fo mbìyi nèn a wamrí wamrín ji wù bér á njèʼèr. Wù ku màysì, a waamé waamén jii, «Wàn Fòn Davir, ku shàm mendzən mem mè.»

⁴⁰Jesus yú, e tìím, e sùúy ji á li, e wìy a sho. Á wìy sho, wù dzə́r shó jii,

⁴¹«À kì taʼ ji m yée le e wò?» Wù bìnèr jii, «Tàr, m taʼ ji sí yémé mvəʼəm.»

⁴²Jesus nèn sùúy sho jii, «Kú a yen virə́ʼ ví. Mo à wayin shilív e mǒ wùn, sí yée mvə̀ʼə̀m ne.»

⁴³Sí wìr və̀yi ku nèn mvə̀ʼə̀m. Wù nèn lò, a dù e Jesus bàm, a dù, a sùyrì Nyùy. Wíri yén kinyo kee shooy, a sùyrì sa Nyùy adzə̀m.