Read Lamnso Luk 19 Bible Online

Luk 19 - Lamnso bible

Luk 19

¹Jesus nèn dù, e nə̀ə́ e mvə̀mlaʼ Jeriko fèy, a tosín.

²A wìr wùmòʼ dzə̀ fó, aá yoŋ ji Sakiyor, a dzə̀ kitú ke wìr ve vé‑eè báʼti mbàm se bàràʼ. Wù‑uù kér sa mbàm e ŋàŋ.

³Wù yú ji Jesus waà shaa, e nèn dù ji wun yén a ji sà dzə̀ wír woó le á, e làa yòʼ koóy fó yen, bìʼ fo wù dzəə̀n wír wo tsəm, a màŋgòŋ dzə̀ e gháʼán.

⁴Wù nèn nyèŋ fó mbìy, e dù, e kòʼ é kici ké *sikamor ji Jesus lóo shaà, é wun fiʼ yèn.

⁵Jesus dù, e mèé e sar kici fey, e lèéy yúv, e yòŋ jii, «Sakiyor, sə́ʼə́y cér, m yíi shiíy e wò lav lán.»

⁶Wù ku nèn sòn fó kici fey, e səə̀sí Jesus e kishéʼrì ki.

⁷Wíri yén mo Jesus du wùn Sakiyor, e nèn kèʼ, a ghvə̀vrì jii, wìr və̀n sí du, e shiíy a wùn wìr wo bi.

⁸Wùn áwune dù, e lòo dzə, Sakiyor yiì lò, e nànèn, e yòŋ Jesus jii, «Tàr, ku yuùrí, m yíi toʼnín vifá vém é ntìntìn, e jàv mbìv yìmòʼ e vé ŋgeʼe. A m kfə̀n yíi leéy, yén, a mò‑oò ló ne bòʼ wír, é m siir kifá kee shooy e ŋgaàŋ akàŋ akweè.»

⁹Jesus yú bey, e sùúy jii, «Wír veé lav fène lùŋ ne lán, bìʼ fo wìr və̀n dzəə̀n sá wán woo Abraham ram,

¹⁰a ŋgaà wo yírí dzəə̀n *Wanwìr wìy fó tàʼ wír ve vé‑eè làykìn ne, e lùŋèr.»

¹¹Wíri wáa yuurí vinyo ve Jesus suuy vìn, wù nèn kfə̀n yòv ŋgàn yìmòʼ aáwune, bìʼ fo wù‑uù sí méʼ ŋkàlaʼ Jerusalem, a wíri kwaʼtì ji a tàm bo sáʼ Nyùyi kù sí lo, e kèʼ e nsay.

¹²Wù wáa fèr jii, «Yì‑iì dzə̀ é ghan símóʼ sí, wàn ntoʼ wùmòʼ lò fo áwuné wòŋ, a dù e wòŋ wúmóʼó kwaʼda ji á fó vifon sho, é bo wù kfə́n, a saʼ woŋ və́.

¹³Wù lòo lò, e jàŋrì wónlè və́ e ghvə̀m. Á wìykìr, wù jàv mbàm aáwune kibam kimòʼón kimòʼón, e sùúy jii, ‹Vèn siiyì, vèn wàa kavnín wáy shó, fo m wiyì.›

¹⁴«Wù nèn lò, a wír vee wùn wòŋe‑eè ban wun e ŋàŋ, á nèn sìíy, e tsə̀nsí aŋgàa ntum fo bàm jii, bó á yòʼ koŋ a ji wìr və̀n wáa saʼ áwune.

¹⁵Wù ku dù, á fó sáʼ sho. Wù wìy kfə̀n, e jàŋrì wónlè və́ ve wù‑uù jàvìn mbàm sìy sho ji wun yén á séʼ wo vé‑eè siiyin, e kàvnín wáy, e kòóy.

¹⁶Ŋgaà mbìy wìy, e sùúy jii, ‹Tàr, mò‑oò sìíy, e kòóy séʼ fo kibàm ke mbàm fèy kibam sa e ghvə̀m.›

¹⁷Wù shéʼrí jii, ‹Beerì feyì, à dzə̀ wánlè wo juŋ. Mo à siiyin, a leéy fo shishàr fèn kijuŋ, m yíi fo wò ntèʼ e ghvə̀m, áà wáa saʼ.›

¹⁸Wo wù‑uù batin wìy, e sùúy jii, ‹Tàr, mò‑oò sìíy, e kòóy séʼ fo kibàm ke mbàm fèy sa vibam vitàn.›

¹⁹Wù suúy e woo shooy jii, ‹M yíi fo wò ntèʼ sitàn, áà wáa saʼ.›

²⁰«Wùmòʼ woo wánlè nèn wìy, e sùúy kfə́ jii, ‹Tàr, kibam ké ke mbàm ki kìne mo mò‑oò kurin é kinsàr ke ndzə̀y, e lèm.

²¹Mò‑oò lèm lémen, bìʼ fo liì wò tavin é ŋàŋ, a m fan wò. À lo, à kòóy kifá kisáŋ, a bó à yoʼ kàtìr. À káv vifá fo wò sum, a bó à yòʼ kì ghán sé way.›

²²Tàr wov nèn sùúy sho jii, ‹À dzə̀ wánlè wo bi. Kinyo ke kí fəən fo wò shuù ki kù dzə̀ ke m yíi lì, e saʼ wò sho. Wò‑oò kì ji liì wom tàv é ŋàŋ, a m yí vifá kisáŋ, káv ve kavín ví, a bó m yòʼ kì ghán sé way.

²³Wò‑oò kìíy bey, yiì ka fo à lem mbàm sém é kitàv ké mbàm, m wíy kfə́n, é m sə́ wùn à visókì vi?›

²⁴«Wù nèn sùúy e wír ve vé‑eè tíy fo ghaŋe jii, ‹Vèn sə́ kibam ke mbàm kee shooy ki fó fo, e fò e wánlè wo wù kér kibam e ghvə̀m.›

²⁵Á sháʼnín jii, ‹Tàr, wù kì sí kér kibam e ghvə̀m.›

²⁶Wù suúy jii, ‹Vèn wáa kiíy jii, wìr wo wù kér séʼ e kitu ke kifa, á yíi dzə̀sì. Wír wo wù buŋen, aá maysi shishàr wo wù kérí, e gèr gérín.

²⁷Á bèy lèn, fo aŋgaà vém vibàn ve vé‑eè tén fo m wáa saʼ áwune, vèn wiy shó lèn, e yùyrí e mǒ si.› »

²⁸Jesus suúy vinyo vìn bèy, e nèn tòsín, a dù e Jerusalem fo wù‑uù du.

²⁹Wù dù, e lòo meʼ ntèʼ see Befage wùn Betani, a sí dzə̀ é ghaa gwan wo á yoŋ ji Gwan Vicì vé Oliv, e nèn tùm wón və́ lìm ámóʼó fó mbìy abaà,

³⁰e sùúy jii, «Vèn du é ntèʼ yee fó mbìy rə̀sə. Vèn lóo nəə́, é vèn yén wan kimbèʼbìy, a wù tsə́ŋ fo, a bó wìr yòʼ‑oo yií ne kòʼ é kitu wo, é vèn bvəti, e wìy sho.

³¹A wìr dù, a dzər ji vèn sà bvətì, e yiì ka shó a, vèn bìnèr jii, ‹Tàr won kér a shií shó.› »

³²Wón lìm vìyi nèn dù, e yèn vinyo vidzə̀m réŋréŋ mo wù suuyin.

³³Á lòo bvə̀tì wan kimbèʼbìy və̀y, aŋgàa kimbèʼbìyí dzə́r jii, «Vèn bvətì ji ka?»

³⁴Á bìnèr jii, «Tàr wor kér shií shó.»

³⁵Á nèn lì, e dù, e mèé sho fo Jesus wùn, e sàŋrì vikúm vév é kitu wo, e dzə̀ʼə̀r Jesus sho.

³⁶Wù lòo dù, wíri wáa sàŋrì vikúm vév fo wù shaa.

³⁷Wù dù, e bìʼtí ji wun sí sə́y Gwan Vicì vé Oliv və̀y, aŋgaà və́ ŋgoo ve vé‑eè nyornìn fo bàm adzə̀me nèn sàsìn, a ndzəʼ, a burí Nyùy kitávín bìʼ viŋgaʼnìn ve vinyò ve vé‑eè rə́si yéné.

³⁸ Aá kwá jii, «Nyùy Tàr ku səə̀vì Fon wo wù wiy e wùn yir və̀n. Nyùy woó yuv dzə̀ Ŋgaà Nyaáŋ. Á wáa burí Nyùy woó ntoò yùv.»

³⁹A wír veé mbìv *Farasi ámóʼó kì shèm sá e màŋgòŋ və̀y mvəm, á nèn lò, e sàyín fo wírí mvəm jii, «Ŋgaà Yèʼey, ku shèm aŋgaà vé ŋgoo vìne.»

⁴⁰Jesus bìnèr jii, «M suuy e vèn jii, aá fə̀m yàr, bo dzə̀ tíyí kù a ndzəʼ.»

⁴¹Jesus lòo meé e ghaa Jerusalem, e lèéy, mendzən mè rə́r wun, wù wáa dìy,

⁴²a taŋ jii, «Wír veé Jerusalem, e kishiíy ké lán ki, bo vèn ku lò kìíy kinyo ke dzə̀ kí fò ven nyaáŋ. Yii bèy, bó yòʼ dzə̀ vèn dzəə kìíy lèn.

⁴³Ghán sí wíy gheén, áàŋgaà vén vibàné wiy, e bòm kay, e gìm láʼ yén, e tàr, e sə̀tí ven.

⁴⁴Á wíy nəə́, e bvəʼə́y vèn à wón véné adzə̀m, e kfə̀n kèr láʼ, é la tíy yímóʼó yòʼ gòʼ e yímóʼó kitu. A kí wíy koóy bèy, bìʼ fo vèn‑eè meŋen Nyùy e ghan se wù‑uù wìyìn ji wun luŋèr ven.»

⁴⁵Jesus lò fo fo, e dù, e nə̀ə́ e lav cù, a jùm wír ve vé‑eè kávnin wáy fó fo.

⁴⁶ Wù wáa jùm, a suúy aáwune jii, «Vé‑eè sàŋ é Ŋwàʼ Nyùy ji Nyùy suuy jii, ‹Á wíy a yòŋ lav yem ji lav bùnrì.› Vèn nen bìnèr kén ji mbvə̀ʼ ashòŋ.»

⁴⁷Jesus ku nèn a yeʼéy wíri é lav cù fèy vishiíy vidzə̀m. Vitú ve atàá cù wùn à wír ve vé‑eè duŋrì nsər Nyùy, à vé wòŋe wáa woóy ji á yúyrí á wun.

⁴⁸Yii bèy, e làa yòʼ a ker dzə́ə, bìʼ fo wìr dzə̀m kù‑uù rə́si a dzə̀ e Jesus ghaŋ, yuúri vinyo və́, e làa yòʼ a tàʼ ji kinyo kimòʼón ki túm á fo nsay.