Read Lamnso Luk 21 Bible Online

Luk 21 - Lamnso bible

Luk 21

¹Mo Jesus dzə́ e lav cù, e lòo shur sí, e yèn mo vé mbàme wáy afómo vév é ŋkùv wo vé‑eè wáy mbàm se Nyùy sho.

²Wù kfən yèn sá wiiy ŋkfə wùmòʼ, a dzə̀ ŋgaà kitàn, a wù wáy mbàm se ŋeerín sí shó sibaà.

³Wù nèn sùúy jii, «Vèn wáa kiíy rú ji wiíy ŋkfə woo ŋgaà kitàn və̀n wày mbàm, sí shaá se wìr dzə̀m kì wáyí.

⁴Wìr dzə̀m kì bay mbàm báyin, a se kuʼùn sí bér aáwuné vibàm. Yii bèy, wiíy və̀n, mo wù fə̀m ghíy ghiyín ben, wù gér kifá ke wù kì kér kidzə̀m, à kùr rə shó.»

⁵Wón və́ lìm ámóʼó nèn lò kèʼ, a burí lav cù rə̀y, a fìʼ vijuŋ ve tiy ye á bomen shó wùn à vifá ve wíri‑iì fóri, aá wáyri sho. Jesus suúy jii,

⁶«Vèn léŋri vifá vìn bèn, a kishiíy kí wíy gheén, aá ker vidzə̀m, é la tíy yímóʼó yòʼ gòʼ e yímóʼó kitu.»

⁷Áwune dzə́r jii, «Ŋgaà Yèʼey, kinyo kee shoon ki wíy koóy e ghàn ka? Kisəəm ke kí wíy dìn ji kinyo kìn ki sí yiì a koóy ki dzə̀ ka?»

⁸Wù bìnèr jii, «Vèn wáa yen fo wìr wìy bòʼtí ven, é vèn jáy dzə́ə. Wíri wíy fəə anín, a teʼ mo é si, a suúy ji áwune dzə̀ Mfə̀ə́r woo shó, a ghán sí ghèén ne. Á wíy lóo suúy bèy, vèn wàa yen fó yuurí kinyo kév.

⁹Vèn wíy yú léŋ rər, kfə́n yú, a wíri táŋ sáʼ e wòŋ símóʼ sí, lá vèn yòʼ a fàn. A dzə̀ kinyo kee shooy ki kù kòóy ŋkuŋén, a bó yòʼ dzə̀ ji sì ghán se ndzə kù sí lo, e mày.»

¹⁰Jesus kfə́n a suúy aáwune jii, «Kitúm kímóʼ kí wíy lò, é kí wáa màʼ kímóʼ kí e rə́r sí, é woŋ wúmóʼó ŋáʼáy sá, a màʼ wúmóʼó e rə́r sí.

¹¹Vinyo ve tavkín ví wíy a koóy e virə̌ʼ virə̀ʼ. Nsay wíy a sə̀ʼ kitávín, jìŋ wíy a koo, é kifə̀ʼ ki kfə́n a teè wíri. Vinyo ve beemen ví wíy a koóy e yuv, a dìn visəəm vé vinyò ve tavkín ví.

¹²Vèn wáa kiíy ji bo vinyo vee shooy vi wáa koóy, á wíy a koorí ven, a nyàvrì sho, bìʼ fo vèn dzəə̀n wír vém. Á wíy a saʼ nsaʼ sén é ŋgày se bùnrì, a way ven é sháŋ. Kfə́n wíy lo, aá wáa tiír ven áàfone wùn à vitú ve bàràʼ ví si.

¹³Vèn wíy tiím fo, é vèn koóy a dzə̀ kintóʼ ke dzə̀ vèn wàa fìʼtì kinyo ke Nyùy aáwune.

¹⁴Vèn ku nèn wày wáyín ji vèn wíy tiim e kibàʼ ke nsaʼ, lá vèn yòʼ a rə̀m a ji á sà suuy ji kaá.

¹⁵Wíy way mo jí si e věn shuù, e fo ven vifií, a bó yòʼ dzə̀ aŋgaà vén gòvi wìy kìíy mó a bìnèr, a kìnèn kinyo kén.

¹⁶A kù wíy a gòvtì wír vén ven, a fə̀m dzə̀ atàr vén, kìn afə́r vén, kìn wír vee věn laʼ, kìn ŋkar sén, bo á kù wíy a lì ven, a dù sho ji á wáa saʼ. Aá wíy a saʼ, a yuyrí ámóʼó.

¹⁷Wìr dzə̀m wíy a bàn ven, bìʼ fo vèn dzəə̀n wír vém.

¹⁸A bó ŋgay nəŋ e mòʼón yòʼ wíy tum fo wìr kitu, e lày.

¹⁹Vèn wáa tiy rì kitávín, e wìy nəə́ e dzə̀ʼə̀m yee là may.

²⁰«Vèn wíy lóo yen, a vé rərí gím ne ŋkàlaʼ Jerusalem, e kaàrí, e tàr, vèn nèn a kiíy ji sì ghán se á sí laar fó.

²¹Kí wíy kooy bèy, wír ve á dzəə̀n é mbìv wòŋ yee Juda adzə̀me wàa sam, a koʼ aàgwan, é wír ve á dzəə̀n é ŋkàlaʼ foo fèyi wáa meekír, é la wìr yòʼ kfə̀n dzə́ə a wìy fo kwaʼ ji wun nəə sho.

²²Vèn wáa kiíy ji ghán see shooy si wíy a dzə vishiíy ve Nyùy wíy màʼ ŋgeʼ e Jerusalem kitu ji vinyo ve vé‑eè saŋen e wùn ŋwàʼ vi fíʼ gheén vidzə̀m.

²³Éè mò, wíy lòo dzə e vishiíy fóo fèy, é ké vikìy ve á juur bvəm wùn à ve á nyoor wón kí wáa dzə e le? Nyùy wíy shwiíy kilòŋ fo woŋ və̀ne, é wìr dzə̀m yén ŋgeʼ ye ghaʼán.

²⁴Á wíy gwàtì ámóʼó gwátin, e tayrí ámóʼó ji akwàn, a jàvtì vitúm vidzə̀m. Á mo vitúm ve bó ví yòʼ kiìn Nyùy vi wíy tòn Jerusalem, a koʼrí e kitu wo, e dù, e meé mo ghán sév sí wíy mày.

²⁵«Wíy lòo dzə e ghan see shooy, aá yén visəəm vé vinyò e si shùy, e kfə̀n yèn é ŋwee, e yèn é mejìy. A keé nsay ki wíy a dzə jii, rìbà ndzə̀v wíy a tsəynín, a yòr kitávín, é woŋ símóʼ sí wáa ghaynín ji sà sì laykìr bèn a.

²⁶Wíri wíy a fàn, a yàʼ, bìʼ fo á wíy səə̀m ji kimbeemè ke kinyò ki sí wìy koóy e nsay. Vifá ve ví sə́ŋnin e yuv ví wíy a nyeŋnín vidzə̀m,

²⁷ aá nèn yèn, a ŋgaà wo yírí dzəə̀n *Wanwìr bvə́y é mvə̀m mbàʼ, a wù sí kér vitaáví wùn à vikuʼùy ve ghaʼán ví.

²⁸Vèn wíy lóo yen, a vinyo vìn vi sí kooyì, á tìím ji nyaáŋ, a leéy a dzə̀ fó mbìy, a kiíy ji sì ghán se Nyùy sí wìy lùŋèr ven.»

²⁹Jesus nèn kfə̀n yòv ŋgàn yìmòʼ aáwune jii, «Vèn səəm kinyo fo kicí ké *fig ki, à vicí ve ví yii sooy vi vidzə̀m.

³⁰Vèn yii yén, a ví kéʼ ne, a tokír, vèn nèn kìíy ji sì á ghán se wuú sí yiì a gbù.

³¹Kù dzə̀ sá mo vèn wíy yén vinyo vìn, a ví kéʼ ne, a koóy, vèn nèn kìíy ji Nyùy sí yiì a saʼ a vifon və́.

³²Vèn wáa kiíy rú jii, ŋgwàʼ ye yì dzəə̀n lèn yòʼ wíy shaà e dzə̀m, a bó vinyo ve m suuy vìn vi koóy vidzə̀m.

³³Yúv wùn à nsay wìy mày, a jí sém sí kù wíy a tiy fo.

³⁴«Vèn wáa leéy fo věn vitu, a yen fó a ghan, a yi a dzə̀ vitú, a nonín, a baa, a way vifií a dzə̀ é dzə̀ʼə̀m yee fen fo melív men mè rəə́y, é kishiíy kee shooy ki wìy sàsìn, e koò ven moo kitám.

³⁵A kinyo keé kishiíy fóo fèy ki wíy sətí wír ve á dzə́ e kitu ke nsay adzə̀m.

³⁶Vèn ku nèn a way vifií, a bùnrì Nyùy ghán sidzə̀m ji wù távír ven, ŋgeʼ see shooy si wíy lóo koóy, é vèn tósín shó, e nèn wìy a tiy e ŋgaà wo yírí dzəə̀n Wanwìr si, là kinyo.»

³⁷Jesus ku nèn a yeʼéy wíri é lav cù vishiíy vidzə̀m bèy. Yií lóo dzə vitsə́ʼ, wù lò, e kòʼ é Gwan Vicì vé Oliv, e shìíy fo.

³⁸Ndzə bvəə́shi, javì, wíri nèn a banén e lav cù fó a yuurí kinyo kfə́.