Read Lamnso Luk 23 Bible Online

Luk 23 - Lamnso bible

Luk 23

¹Mo vé dzə̀ʼə̀m vìyi suŋnin bey, e nèn nànèn adzə̀m, e lì Jesus, a dù sho fo Payler.

²Á dù, e nèn a toy vinyo e bàm wó, a suúy jii, «Wìr və̀n dzə̀ ben, a wù ghán, bvəər woŋ wór, sháʼnin fo wíri wáa màʼ mbàm, a shwi Fon woó Rom sho. A wù kfə̀n suuy ji dzə̀ wun *Mfə̀ə́r wo Nyùy‑iì kàʼàn, a wun dzə̀ fon wùmòʼ.»

³Payler dzə́r e Jesus jii, «À dzə̀ rú Fon wìr veé Juda à?» Wù bìnèr jii, «À sùúy ne.»

⁴Payler nèn sùúy e vitú ve atàá cù wùn à màŋgòŋ wo wù‑uù dzəə̀n fó jii, «Bó m yoʼ yèn kinyo ke wìr və̀n jayin.»

⁵Áwune ku nèn a tavtí tavtín jii, «Wù‑uù ghán, yéʼey wíri woŋ woo Juda e dzə̀m, bívir vifií vév, aá taʼ melaà. Wù‑uù kèʼ ghán fo mbìv wòŋ yee Galeli, a wù nə̀ə́ ne lèn e ŋkàlaʼ fèn.»

⁶Payler yú bey, e dzə̀r jii, «Wìr və̀n dzə̀ wír woó Galeli à?»

⁷Á biímé, wù nèn tsə̀nsí Jesus fo Fòn Heror, bìʼ fo yiì sáʼ wun mbìv wòŋ yee shooy, a wù‑uù dzə̀ é Jerusalem e ghan fóo fèy.

⁸Heror dù, e yèn Jesus, wúné bòŋ wun, bìʼ fo wù‑uù sí yú léŋ və́ fó ŋgùʼ, nèn kér shií fó yen wun e sí rəə́. A wù‑uù kwaʼtì jii, ghanmóʼ wun yén, wù yiì á kiŋgaʼnìn ke kinyò kímóʼ kí.

⁹Wù nèn rə̀sí, a dzətí vinyo e Jesus vinín, la wù yòʼ a ghay gheéy.

¹⁰Wù wáa dzətí, a vitú ve atàá cù wùn à wír ve á yii duŋrì nsər Nyùyi dzə́ fo ghaŋ, lór vinyo ve ghaʼtín ví e Jesus wùn vinín.

¹¹Fòn Heror wùn à və́ vé rərí nèn lò, e kèʼ, a kèŋ Jesus kéŋen, a shoór. Á màʼ kikúm ké vifòn e wùn wó, e nèn siìr, á wáa kfən sho fo Payler.

¹²Kinyo kìn ki wáa koóy, a Payler wùn Heror‑iì kèmnìn ne, á nèn kfə̀n bòŋnìn e kishiíy fóo fèy.

¹³Á siìr Jesus, Payler nèn kùm vitú ve atàá cù wùn aàtǎr wòŋe, e kfə̀n kùm wíri.

¹⁴Á wìykìr, wù suúy jii, «Vèn kì kòʼór wír və̀n fèn ji wù ghán, bvəər wíri, m lóo tàr kinyo kfə́ e věn si, e làa yòʼ yen njò ye vèn suuy ji wù gbù.

¹⁵A bó Fòn Heror yoʼ lò yèn sá, bìʼ fo wù siìrìn wír və̀n, là sáʼ. Vèn yén ri sa, wìr və̀n yoʼ jày kinyo ke dzə̀ á yùyrí.

¹⁶M yíi suúy, aá tám tamén, e màʼtì, é wù wáa dù.» [

¹⁷Yii lóo dzə e ghan sé Ŋkǎʼ Yáʼayshaà sìn, bo Payler kù kér fó fəə́r wír wo wír veé Judàa lonen fó sháŋ.]

¹⁸Wíri nèn tàtí adzə̀m, a waamé jii, «Á laar wír və̀n láarin, e fə̀ə́r a dzə̀ Barabar fo sháŋ, e fò e vèr.»

¹⁹A vé‑eè wày Barabar və̀n e sháŋ, bìʼ fo wù‑uù kèʼèn melaà e ŋkàlaʼ foo fèy, a wù kfə̀n‑eè yúyri wíri.

²⁰Payler yú bey, e nèn kfə̀n a suŋnín aáwune, a tàʼ ji bo wun kì màʼtì á Jesus.

²¹Á kú a waamé waamén jii, «Á tá taán é kintam. Á tá taán é kintam.»

²²Wù kfən sùŋnín fo akàŋ vee ataár, e dzə̀r jii, «Á kum e kintam fo gha? Wù jày ka? Bó m yoʼ yèn njò ye wù gbuùn ye dzə̀ á yùyrí wun. M yíi suúy, aá tám tamén, e màʼtì, é wù wáa dù.»

²³Á ku nèn màysì, a waamé waamén ji á wàá tá taán é kintam. Kí gháʼ Payler,

²⁴wù màʼtì, e tìnén nsaʼ ji á yii ri sho a mo wír vìne taʼà.

²⁵Wù nèn fə̀ə́r a dzə̀ wír wo áwune kì lón və̀y, wo vé‑eè wayin é sháŋ, bìʼ fo wù‑uù màʼàn melaà, a yuyrí wíri. Wù fəə́r, e nèn fò Jesus aáwune ji á yii ri sho a mo á taʼà.

²⁶Á nèn lì Jesus, a dù sho. Á lòo dù, e tàrnín wùn à wìr wùmòʼ, a wù wiy fo kwaʼ, aá yoŋ ji Simon, a dzə̀ wír wo wù‑uù loòn fó Serina. Á bám, e neèr kicí ké kintam ke Jesus e mbèʼ wo, wù bèʼèy, a wìy sho e Jesus bàm.

²⁷Wùn à Jesus ku nèn a dù, màŋgòŋ shém fó bàm e gháʼán. Aámóʼó dzə̀ vikìy, á wáa toŋnín, a taŋ ŋgeʼ sə́.

²⁸Jesus lò, e bìnkìr, e sùúy aáwune jii, «Vikìy veé Jerusalem, lá vèn yòʼ a dìy mo. Vèn wáa dìy a dzə̀ vitú vén, e kfə̀n a dìy fo wón véné.

²⁹Vèn wáa kiíy ji ghán sí sí wiyì, se á wíy a suúy jii, bòŋ ké vikìy ve dzəə̀n akár, a bó á yòʼ‑oò yiì ne dzə̀ə́ wán, a bó á yòʼ‑oo yií ne nyòór.

³⁰ Wíy lòo dzə e ghan see shooy, é wíri wáa jàŋ virùmèn jii, vèn ku keèsì e věr kitu, a jàŋ agwan jii, vèn sə́y, e sə̀tí ver.

³¹Aá wíy a jàŋ bèy, bìʼ fo á nyavrì e mò lèn, a m dzə̀ kicí kibór, bo kév kí wíy fòy fòyìn, áwune ve á koŋrin ne.»

³²Á wáa dù e Jesus bèy, aá kì lì sá aŋgàa njò ámóʼó abaà ji á du, e yuyrí wùn áwune.

³³Á meé é kirə̀ʼ ke á yoŋ ji ŋgéreʼ kitu ke wìr, e nèn tà Jesus fo e kintam, e kfə̀n tàm sá aŋgàa njò vee abaà viy e vintam, wùmòʼ e Jesus koy yìyí, wùmòʼ é koy ŋkoòvìi.

³⁴Jesus lò, e yòŋ jii, «Tàr wor, ku làysìn jay wìr vìn, bìʼ fo bó á yòʼ kiìn kinyo ke áwune yii.» Wír vìyi yiì lò, e lì ndzə̀y sé Jesus, a tsəm kàŋ sho ji á fiʼ jàv.

³⁵Wíri wáa tiy fo, a leéy mo á taan Jesus e kintam, a vé wòŋe jaʼ kév jáʼan, suuy jii, wù‑uù ghán, luŋèr wíri, a wù bèn dzə̀ rú Mfə̀ə́r wo Nyùy‑iì shoʼon, wù lùŋèr ri kitú kfə́ lèn.

³⁶Vé rərí wáa sheʼ sa Jesus, a fo kiŋkway ke melùʼ sho,

³⁷a suúy jii, «Aà dzə̀ rú Fon wìr veé Juda, à lùŋèr kitú ké.»

³⁸Á sáŋ ŋwàʼ, e bàrír e kintam, e Jesus kitu jii, «Və̀n dzə̀ Fon wìr veé Juda.»

³⁹Ŋgaà njò wùmòʼ fo ve vé‑eè kér foo, wáa kuùrì sa Jesus, a suúy jii, «Bó yòʼ dzə̀ wò woo Mfə̀ə́r a? Lùŋèr ri kitú ké ki, e lùŋèr sa ver.»

⁴⁰Wùmòʼ woo ŋgaà njò wám woo shooy wámén, e dzə̀r shó jii, «Bó à yòʼ fan Nyùy à, wò wo á wayin é ŋgeʼ réŋréŋ moo wír və̀n.

⁴¹Wòsò kpù kesò a dzə̀ fó lǒn vinyò ve wòsò‑oò jayin, a bó wìr və̀n yoʼ jày kinyo gheéy.»

⁴²Wù nèn yòŋ jii, «Jesus, lóo wìy dzə e ghan se à sí sáʼ vifon vé, à kù kuùmé mo.»

⁴³Jesus suúy shó jii, «Kú a kiíy rú ji wòsò yíi a dzə e Nyùy kirə̀ʼ ké vijùŋ lán.»

⁴⁴Yiì lòo dzə e ntìntìn shùy, shùy sàsìn, e ndzə̀mén, woŋe sə́n e dzə̀m, e meé shúy sitaár.

⁴⁵Ndzə̀y se vé‑eè tinmen lav cù sho e mvə̀mlaʼ si ku nèn tòʼnín e ntìntìn.

⁴⁶ Jesus kú a ker e kintam, e yiì lò, e tòŋ kitávín jii, «Tàr wor, m wày kiyoy kém a dzə̀ e wò kiwo.» Wù suúy bey, e nèn shèm.

⁴⁷Kitú ke vé rər ke kí‑iì tíy fo ki yén kinyo ke kí kooyin, a sùyrì Nyùy, a suúy jii, «Dzə̀ rú, wìr və̀n‑eè dzə̀ là njò.»

⁴⁸Màŋgòŋ wo wù‑uù baʼtin fó, a leéy wáa kfən fo laʼ, a way a dzə̀ wóm, a shèŋ kitú bìʼ kinyo ke á yenen.

⁴⁹Ŋkar se Jesus sidzə̀m si wáa tiy kév kwaʼda, a leéy vinyo vee shooy, aámóʼó dzə̀ vikìy ve vé‑eè loòn e wùn bàm fó Galeli.

⁵⁰Wìr wùmòʼ wáa dzə e Jerusalem e ghan see shooy, aá yoŋ ji Joosev, a dzə̀ wír woó ntèʼ yee Arimatia e wòŋ woo Juda foo fèy. Wù‑uù dzə̀ wír wo juŋ, yii mo Nyùy taʼà, kfə̀n shiy ghán se Nyùy wíy a saʼ vifon və́. Wù kfə́n a dzə sa wír fo vé wòŋ vìyí mvəm, a bó wù yòʼ‑oò ló a tiy e kinyò ke vé‑eè sìysìn, e yiì e Jesus.

⁵¹

⁵²Wù dù, e yèn Payler, e lòn dzə́n Jesus fo fo.

⁵³Payler biímé, wù nèn dù, e sə̀ʼə́r, e boò e kintsə̀m ké ndzə̀y kí, e dù, e wày é sày ye vé‑eè bùʼùn é wǔn kilan, a bó á yòʼ‑oò yiì ne wày wír e sày foo fèy.

⁵⁴Wù wáa way, a kishiíy kév ké bam ki kì sí yìi kèʼ e ŋkuùr foo fèy.

⁵⁵A vikìy ve vé‑eè loòn e Jesus bàm fó Galeli vìyi kì jumrì Joosev, á nèn yèn say rə̀y, e yèn mo wù wáy dzə́n Jesus sho.

⁵⁶Áwune yiì kfə̀n fó laʼ, e bàʼtí biʼ ye rəʼtìné wùn à meŋgvə́r memoʼ mè, a dzə̀ vifá ve á yóʼ dzə́n wìr sho. Kishiíy kév ké bam ki gheén, áwune meèmè mo nsər yev dzəə̀n.