Read Lamnso Luk 5 Bible Online

Luk 5 - Lamnso bible

Luk 5

¹Wìy lòo dzə e kishiíy kímóʼ kí, Jesus wáa tiy e ghaa kibaŋ ke á yoŋ ji Genesarer. Wíri wìy, e kaàrí e wùn ghaŋ, a farnín, a yuurí kinyo ke Nyùy.

²Wù yén vikóŋ vibaà, a ví tíy e ghaa kwaʼ, a vé kikoŋe fəə́kír ne, a sù alálán vév.

³Wù nèn dù, e nə̀ə́ e kímóʼ kí, a dzə̀ ké Simon, e sùúy sho ji wù tsəʼ, é kí kóʼtí á fo ghaa kwaʼ shishàr. Wù tsə̀ʼ, Jesus nèn a dzə sho, wíri wáa dzə fo kwaʼ, wù wáa yeʼéy áwune.

⁴Wù yiì yèʼéy, e màysì, e nèn sùúy e Simon jii, «Tsə̀ʼ kikóŋ ki, e dù sho fo ndzə́ví shoon, é vèn maʼ alálán vén, e koò sə́.»

⁵Simon nèn bìnèr jii, «Tàr à wíri, vèr sìíy, e màʼ lálán, ndzə rán ranén, a bó á yoʼ koò kifá gheéy. Yii bèy, mo suuyin wò, mo‑óò du, e màʼ.»

⁶Wùn à wír vəə́ nèn dù, e màʼ, e koò sə́ sigháʼán, e lòo sə̀ŋ, aláláne nèn a tiiné.

⁷Kí gháʼ, á kwàr aŋgaà vév ŋgoo ve vé‑eè dzəə̀n é kikoŋ kímóʼ kí ji á wiy, e sə̀ á áwune. Á wìy, wùn áwune fəə́r sə́ sigháʼán, vikóŋ vév ví rúnkír, a tàʼ, e lày e ndzəv.

⁸Simon Pita yén kinyo ke kí kooyin, e nèn dù, e tsə̀m e Jesus si, e yòŋ jii, «Kii Tàr, ku lò, e màʼtì mo. M dzə̀ kém ŋgaà vinyò ve bi ví.»

⁹A wù‑uù suuy bèy, bìʼ fo wùn à wír vəə́‑əə̀ yenen sə́ se á koon, wúné beémé áwune.

¹⁰Aŋgaà və́ ŋgoo ve yì‑iì dzəə̀n Jeem wùn Joon vee wón Sebedíi wáa ker sa gháʼ. Jesus suúy e Simon jii, «Lá à yòʼ a fàn. Kèʼ fo lèn, à yíi a baʼtí a dzə̀ wíri.»

¹¹Áwune yú bey, e nèn fə̀ə́r vikóŋ e ghaa kwaʼ, e màʼtì vifá vév fó vidzə̀m, a ghan wùn à Jesus.

¹²Wìy lòo dzə e ghan símóʼ sí, Jesus wáa dzə e mvə̀mlaʼ yìmòʼ, a wìr wùmòʼ dzə̀ fó, a shìvnsay shímrí ne wún e dzə̀m. Wù yén Jesus, e dù, e tsə̀m é si wo, a buʼ wó, a suúy jii, «Taàtá, m kì jii, aà kòŋ, à fèr mo.»

¹³Jesus nèn ràmsì kiwó, e kùm sho, e sùúy jii, «M kòŋ ne, bónén ri.» Wìr və̀y ku nèn bònén fo shìvnsay fèy.

¹⁴Jesus kàntì jii, «Á yen fó suúy e wìr. Ku dù duùn tìítiy, e dìn wún wóo e taà cù, e kfə̀n fò kifá ke cù ke Mooser‑iì suuyin ji wìr bónen fo shìvnsay fèn, wù fò kí. Aà yii bèy, é wíri fíʼ kiíy ji à bònén ne.»

¹⁵Mo Jesus kàntìn wír və̀y bèy, kù dzə̀ mo kinyo kee shooy ki‑iì samèr, du. Màŋgòŋ nèn a keèmè, a wìy, a kaarí e Jesus ghaŋ ji á wáa yuurí kisúŋnìn kfə́, é wù kfə́n a fèr a wír ve á joykìrì.

¹⁶Yii bèy, Jesus lo, wù kù màʼtì áwune, e dù, e bùnrì e kwaʼ.

¹⁷Wìy lòo dzə e kishiíy kímóʼ kí, Jesus wáa yeʼéy wíri, a Nyùy Tàr fó wun vitaáví, a wù fer aŋgàa yàsí. Wír veé mbìv *Farasi wùn à wír ve á yii duŋrì nsər Nyùyi wáa dzə fo, a vé‑eè wìy fó ntèʼ seé Galeli wùn à seé mbìv Juda sidzə̀m, à fó ŋkàlaʼ Jerusalem sho.

¹⁸Wír ámóʼó nèn tòór wír, a shwín sí ndzə́m ne, a wìy ji á nəə sho e lav, e neèr e Jesus si,

¹⁹e làa yòʼ koóy fó nəə́, bìʼ fo wíri‑iì fárnin e ŋàŋ. Á nèn kòʼ dzə́ə a dzə̀ fó yuv, e nànrì tíy ye vé‑eè sətin kikfə́v[1] sho, e sə̀yír wír və̀y e Jesus si e kifa ke wù‑uù néŋ sho.

²⁰Jesus yén mo wír vìyi wayin shilív e wun wùn, e sùúy e ndzə́m və̀y jii, «Ŋkar yèm, á làysìn ne vinyo vé ve bi ví.»

²¹Wír ve á yii duŋrì nsər Nyùy wùn à veé mbìv Farasi vìyi nèn a ghvə̀vrì fo bvə̀m jii, «Wìr və̀n dzə̀ kfə́ la? Wù táŋ kilíŋ ke Nyùy. Kù jòʼsì Nyùy cáʼcáʼ wo dzə̀ wù làysìn ajay wìr.»

²²Jesus ku nèn kìíy kinyo ke á ghvəvrì, e dzə̀r jii, «Vèn kér lám woo bey e bvə̀m bìʼ ka?

²³Vèn yén kén ji m mèér a dzə̀ ké cér ki fó shuù ji Nyùy làysìn ne jay wìr və̀n, a bó yòʼ dzə̀ m sùúy ji wù lo é yuv, a ghan à?

²⁴A m kù suuy lèn, e dìn e vèn ji ŋgaà wo yírí dzəə̀n *Wanwìr və̀n kér vitaáví é nsay fèn fó làysìn ajay wìr.» Wù nèn yòŋ e ndzə́m və̀y jii, «Lò é yuv, e lì kifá ke à néŋ sho kìy, a dù e wò laʼ.»

²⁵Wù ku nèn nànèn e wírí si, e lì kifá kfə́, a dù fo laʼ, a sùyrì Nyùy.

²⁶Wíri yén kinyo kee shooy, wúné beémé áwune, á wáa ker gháʼ, a burí Nyùy, a suúy jii, «Vèr yèn kinyo ke ghaʼán kí lán.»

²⁷Jesus nèn lò, e fəə̀, a ghan. Wù lòo dù, e yèn wír wùmòʼ, aá yoŋ ji Levi, a dzə̀ wír wo wù‑uù báʼti mbàm se *bàràʼ, a wù dzə́ e wùn kirə̀ʼ ké lìm. Jesus suúy shó jii, «Wìyi, é wòsò wáa ghan.»

²⁸Levi nèn màʼtì vifá vidzə̀m, a ghan wùn à Jesus.

²⁹Levi wìy lò, e kàʼ kinyo e wùn laʼ kigháʼán ji á shéʼri a Jesus. Wír ve á yii báʼti mbàm se bàràʼa wáa ŋèʼ fo ŋéʼen wùn à wír ámóʼó ve wír veé Judàa yii nyaysì sa ji wír ve bií, wùn à Jesus wáa yikír.

³⁰Wír veé mbìv Farasi wùn a wír ve á yii duŋrì nsər Nyùy ámóʼó yén, e nèn a ghvə̀vrì, a dzər e wón lìm Jesuse jii, «Bìʼ ka mo vèn yíkir vèn à wír ve á báʼti mbàm se bàràʼ, à wír ve bi ámóʼó?»

³¹Jesus nèn yòv lám aáwune jii, «Wír ve tavkíné yòʼ yii taʼ ŋgaà shìv, kù yii taʼ vé yàsíi.

³²M yòʼ wìy e nsay fèn ji m kfə́n a bi e wír ve á yén vitú vév ji vé Nyùyi ji á biner melív mev. M wìy fó bi a dzə̀ vé jayi.»

³³Áwune nèn kfə̀n a ghay e Jesus jii, «Wón lìm Jooné lo, á wàa lèm jíŋ, a bùnrì, a kù dzə̀ sá mo wón lìm wìr veé mbìv Farasii yii yii, a bó vé vee wóné yòʼ yii bèy. Á kù ghán kév, yíkir yìkín, nóninè.»

³⁴Jesus nèn yòv lám aáwune jii, «A dzə̀ wíri du vijín, wùn à lum jìn wáa dzə, á kfə̀n a leʼ vifá ve yi à?

³⁵Yii bèy, ghán símóʼ sí wíy gheén, á faasì lum jìn woo shoon fo áwune, aáwune nèn a dìy, a lèm jíŋ e ghan see shooy.»

³⁶Wù nèn kfə̀n yòv yìmòʼ yee ŋgàn jii, «Bó yòʼ dzə̀ wìr sàr ndzə̀y se fíy si, e tsə̀mrí se mvə sí shó. A wìr yiì bèy, bo wù bívir ndzə̀y se fíy si, a bó yòʼ fə̀m dzə̀ kinsàr ke ndzə̀y kee shooy ki ghèén wùn à ndzə̀y se mvə sí.

³⁷«A bó yòʼ dzə̀ sá wìr lì meluʼ me fíy mè, e wày é vitem vee júv ve mvə ví.[2] A wù yiì bèy, bo meluʼ me fíy mè yíi fə̀ʼ, e waarí vindzə̀n ve jùv vìy, é meluʼ mè lay kisáŋ, é vitém vi kfən bìrkír.

³⁸Á kù yii wáy meluʼ me fíy mè a dzə̀ é vitem ve fíy vi.

³⁹A bó yòʼ dzə̀ sá wìr wo wù sí nó a dzə̀ *meluʼ me shiiyín mè kfə̀n a kòŋ me fíy mè. Wù ku yii bínsi kfə́ a dzə̀ me mvə mè.»