Read Lamnso Luk 7 Bible Online

Luk 7 - Lamnso bible

Luk 7

¹Jesus yéʼéy wíri vinyo vee shooy, e màysì, e nèn lò, a dù e ntèʼ yee Kapeenahum.

²Mfòóme wìr veé Rom wùmòʼ wáa dzə e ntèʼ fóo fèy, a wù kér wánlè və wùmòʼ, a wù‑uù kòŋ é ŋàŋ. Wan woo shooy nèn gbù yàsí, a tàʼ ké kpu.

³Mfòómé və̀y yú léŋ Jesus, e nèn shòŋrì wír veé Juda ve yì‑iì dzəə̀n atǎr ntèʼ, e tùm jii, á ku dù, e yèn Jesus, a lon a jii, kii wun, wù ku wìy, e tàŋ wánlè və fó kpu.

⁴Áwune dù, e yèn Jesus, a buʼ wó jii, «Kii wò, ku dù, e sə̀ mfòómé və̀sə. Dzə̀ wír wo dzə̀ à kù sə̀.

⁵Wù kòŋ vèsən vee wír veé Juda feyì, a yì‑iì bàʼrì wun ŋgày yer bùnrì.»

⁶Jesus nèn lò, wùn áwune wáa dù. Á dù, e lòo meʼ láʼ mfòómé və̀y, wù nèn tùm ŋkar sə́ símóʼ sí. Á dù, wùn à Jesus tárnín, á tiísí shó jii, mfòómé suuy a jii, Tàr, lá à yòʼ a ghìtìr, a wìy e wùn laʼ. Bó wun yoʼ waà ghèén a e wìr wo dzə̀ à nə̀ə́ e wùn lav.

⁷Á kinyo ke kí yiìn sáa, la wun yòʼ wìy, e yèn wò e kiwuú kfə́ kí. À ku sùúy a dzə̀ á jí fo shuù, é wánlè və bónén.

⁸A wun suuy bèn, bìʼ á fo wun dzəə̀n sá, a dzə̀ wun kù a yu jí wìr wo wù kér wun. Wun sáʼ saa və́ woo shúu rər. Wun túm wír, wù kù nèn dù, jaŋ wo jaŋèn, wù kù nèn wìy. Wun suuy e kwàn vəə́ ji wú yii kin, wú kù nèn a yiì a yiìn.

⁹Jesus yuúrí, a ker gháʼ, e bìnkìr, e sùúy e màŋgòŋ wo wù‑uù jumrì fo bàm jii, «Vèn wáa kiíy rú jii, m yòʼ‑oo yií ne yèn wír woó Isray wùmòʼ wo wù wayin shilív e mǒ wùn moo kiŋgwìy kìn.»

¹⁰Ŋkar se mfòómé se wù kì tumen siy si kfə́n, e lòo nəə́ e lav, e yèn, a wánlè və̀y bónén ne.

¹¹Kee shooy ki shaà, Jesus wùn à wón və́ lìme ku nèn lò, a dù e ntèʼ ye á yoŋ ji Nayin. Màŋgòŋ wáa jùmrì fo bàm e gháʼán.

¹²Áwune dù, e lòo meʼ shúu kày wo wú‑uù nəə e ntèʼ fóo fèy, e yèn, aá béʼéy dzə́n wìr, a fəə sho ji á du, e dzəə̀mè. Wìr woo shooy‑iì dzə̀ lumèn, a yè wov sì wiíy ŋkfə, a wù kù‑uù dzə̀ə́ a dzə̀ wán və̀n e mòʼón. Á wáa dù bèy, màŋgòŋ woó ntèʼ fóo fèy báʼtí, wùn à yìy à wan və̀y wáa dù.

¹³Taàtá Jesus yén wiíy və̀y, mendzən mè rə́r wun, wù suúy shó jii, «Lá à dzəə dìy.»

¹⁴Wù suúy bey, e shaà, e làʼ kiwó e kibàʼ ke vé‑eè béʼ ŋkfə və̀y sho. Á nèn tìím. Wù yòŋ ŋkfə və̀y jii, «Wánlè nsùm, m suuy e wò jii, nànèn é yuv.»

¹⁵Wù ku nèn nànèn, e kèʼ a suŋnín. Jesus ghár, e fò e yè wov.

¹⁶Wìr dzə̀m yén bey, wún wóví beémé. Á wáa sùyrì Nyùy, a suúy jii, «*Ŋgaà ntum Nyùy wo gháʼán fəə̀ ne e vèsə́n mvəm. Nyùy wìy ne fó sə wír və́.»

¹⁷Wíri ku nèn sàmèr kinyo kee shooy woŋ wóv e dzə̀m, a dù, a mày sa e wòŋ símóʼ sí fó ghaŋ.

¹⁸Wón lìm Jooné nèn yù sá vinyo vee shooy vidzə̀m, e fèr e Joon.

¹⁹Wù jàŋ ámóʼó abaà, e tùm fo Taàtá Jesus ji á du, e dzə̀r shó a jii, sà sì wun woo *Mfə̀ə́r wo wù‑uù wíy wìy mo áwune wáa shìy wír wo sən á?

²⁰Áwune dù, e yèn Jesus, e sùúy sho jii, Joon woo Ŋgaà Wáyndzəv tùm ver ji vèr wiy, e dzə̀r e wò a jii, sà sì wò Mfə̀ə́r wo wù‑uù wíy wìy, mo á kú a shìy wír wo sən á?

²¹Áwune wáa tiisí bèy, a Jesus kì sə́ wír ve vé‑eè joykìrì, fer ayàsí anín, kfə̀n jum *anyùy ve vé‑eè jívir wíri, mvəʼtì sí se amfìr anín.

²²Wù yiì lò, e bìnèr jii, «Vèn ku kfə̀n é bàm, e fèr e Joon a dzə̀ vinyo ve vèn yenen, e kfə̀n fèr ve vèn yuun. Amfìri sí yén virə́ʼ, aàntèŋe gháné, a vé shìvnsayi bónenè. Ansəərìi yú vinyo, a wíri kóʼor fo kpu, aá kfə̀n fiʼtì sáʼka Nyùy wo juŋ e vé ŋgeʼe.

²³A kishéʼrì ki dzə̀ ké wìr wo bó wù yòʼ méŋnin mo.»

²⁴Aŋgàa ntum Joon víyi lò, Jesus siíy, a suŋnín e màŋgòŋ kùm Joon, a dzətí jii, «Vèn kuúmé mo vèn‑eè fəən, e dù, e yèn Joon é kwaʼ. Vèn‑eè yèn a dzə̀ wír woó le? Wù‑uù dzə̀ moo kikaʼày ke shwéri shaa, a kí səʼsì à?

²⁵Wù yòʼ‑oò dzə̀ bey. Bo vèn‑eè fəə̀ ji á du, e yen a dzə̀ wír woó le, wír wo wù rə́si wáyri wún a? Vèn kì sá jii, wír ve á yii wáyri wún, yí vitú véví yii rə́si kév a dzə̀ é ntoʼ.

²⁶Bo vèn‑eè du lèn ji á du, e yen la é kwaʼ, *ŋgaà ntum Nyùy à? Bo vèn‑eè lo yèn. A m suuy e vèn jii, kinyo ke Joon kí kùʼ, e shaà ké aŋgàa ntum Nyùy ámóʼó adzə̀m.

²⁷ Dzə̀ Joon və̀n wo vé‑eè saŋen ji Nyùy suuy a jii, ‹Yuúrí, e yù, m wíy tsənsí ŋgaà wom ntum fo wò mbìy, é wù wiy, e nàŋsín dzə́ə yè, é bo à wáa wìy.›

²⁸Vèn wáa kiíy jii, Joon kùʼ, e shaà wír ve vé‑eè kèʼèn ne, a dzəə́, e wìy, e meé lèn adzə̀m. Yii bèy, mo wù fə̀m kùʼùn ben, shiwír she shí sí yú vijuŋ ve saʼ Nyùy ye yí sí keʼ rə̀n shi shaà ne wun.»

²⁹Wíri yú kinyo ke Jesus suuyin kin, e nèn a binsí sáʼ Nyùy ye wù‑uù sìysìn. Wír aníne‑eè dzə̀ ve vé‑eè báʼti mbàm se *bàràʼ. Á wáa binsí bèy, bìʼ fo vé‑eè biimen sá kinyo ke Joon, wù wáy áwune é ndzəv.

³⁰Yii bèy, wír veé mbìv *Farasi wùn à wír ve á yii duŋrì nsər Nyùyi nèn tèn kév kinyo ke Nyùy sìysìn kin ténén, bìʼ fo vé‑eè tenen sá fo Joon wáy áwune é ndzəv.

³¹Jesus lò, e ghày wún jii, kifá ke dzə̀ m fìʼsìn wír veé ndzə yee lèn sho ki dzə̀ ka? Áwune dzə̀ kév é le?

³²Wù gháy bey, e sùúy jii, «Áwune dzə̀ moo wónlè ve á rə́si e virə̀ʼ vé way, jaŋnìn jii: « ‹Vèr fér loŋ, la vèn yòʼ a dzən à? Vèr maʼ lúŋ kpu, la vèn yòʼ a koóy à?›

³³A kù dzə̀ mo vèn‑eè tuʼùr Joon woo Ŋgaà Wáyndzəv. Wù‑uù wìy, a lèm jíŋ, e làa yòʼ a no meluʼ, vèn wáa kuù ji ŋgaà ŋgoo Satan.

³⁴Ŋgaà wo yírí dzəə̀n *Wanwìr və̀n wíy lèn, a yinín, a nonín, vèn kfə́n a kuù wun ji yíbuùkpú, a yòŋ ji mfoòkìnó, a nyàysì ji ŋkar wìr ve á báʼti mbàm se *bàràʼ wùn à ŋkar wìr ve bií ámóʼó.

³⁵Yii bèy, a wír ve á bínsi kinyo kìn adzə̀me kù yòʼ din ji dzə̀ rú vifií ve dzəə̀n vé Nyùy.»

³⁶Kí nèn lò, e kòóy, wìr woó mbìv Farasi wùmòʼ jàŋ Jesus ji wù wiy, e yìkír e wùn lav. Jesus biímé, e dù, wùn wun wáa yikír.

³⁷Wiíy wùmòʼ wáa dzə̀ e ntèʼ fóo fèy, aá nyaysì ji wiíy viŋkar. Wù yú ji Jesus yíkir e wìr Farasi woo shooy lav, e nèn lì kiyóʼóy ké bìʼ ye rəʼtìn yímóʼó, a dù sho fo.

³⁸Wù nəə́, e tìím e Jesus ghaŋ, kitú kfə́ kí lùm, wù wáa dìy, mensíy mè wáa shemshém e Jesus wuù. Wù nèn gvə̀ʼə́r kitú, a səʼsí wuú Jesus e nə́ŋ sə́ sí, a nyòʼtì, a sòr e biʼ rə̀yi.

³⁹Wìr Farasi wo wù kì jàŋèn Jesus və̀y yén bey, e rə̀m fo wùn bvə̀m jii, a Jesus kì dzə̀ rú ŋgaà ntum Nyùy, bo wù ku lò kìíy a kfə́ə wiíy wo wù kum wun və̀n. Dzə̀ á ŋgaà viŋkar.

⁴⁰Jesus ku nèn yòŋ wir Farasi və̀y jii, «Simon, wòsò kér kisúŋnìn.» Wù bìnèr jii, «Ŋgaà Yèʼey, m yuúri.»

⁴¹Jesus nèn a fèr jii, «Yì‑iì dzə̀ é ghan símóʼ sí, wìr wùmòʼ foòr wíri mbàm abaà. Wù‑uù foòr wùmòʼ *danari ghii tàn, e foòr wùmòʼ danari mtàn.

⁴²Wù wìy kaà ntéŋ, e yèn ji sí ghàʼ ne fo á laʼ, wù nèn fò áwune mbàm see shooy. Fo wír vee abaà víne, à yén ké ji wo dzə̀ wù wàa kòŋ ŋgaà wov kaa e ŋàŋ dzə̀ vəné?»

⁴³Simon bìnèr jii, «Kì dzə̀ wàa dzə wo wù kér kaá ye kuʼùné.» Jesus biímé jii, «À shù réŋ»,

⁴⁴e bìnkìr, e lèéy wiíy və̀y, e kfə̀n yòŋ Simon jii, «Leéy wiíy və̀n, e yèn. Kèʼ mo m kì nəən e wò lav fèn, bó à yoʼ lò tàʼ mendzə́v mée sù wúu yém shó. Yii bèy, a wiíy və̀n kì sù ne wúu yém e mensíy mvə mè, e sə̀ʼsí e nə́ŋ sə́ sí.

⁴⁵Bó à yoʼ fə̀m baàmé mo, e shàʼtì. Yii bèy, mo m kì nəən, kù dzə̀ mo wiíy və̀n nyoʼtì wuú yém ben.

⁴⁶A bó à yoʼ lò sòr kitú kém, a fə̀m dzə̀ e meŋgvə́r mè. Yii bèy, a wiíy və̀n kì sòr ne wúu yém a dzə̀ e biʼi.

⁴⁷Kú a kiíy jii, wiíy və̀n dìn koŋ rə́ é ŋàŋ ben, bìʼ fo Nyùy kì làysìn ne nyanyày və vinyò ve wù‑uù buʼtì. Yii bèy, wìr wo wù yén ji ajay və́ ve dzə̀ Nyùy làysìné dzə̀ ashàr, kù dzə̀ sá mo wù koŋ Nyùy shishàr.»

⁴⁸Jesus nèn sùúy e wiíy və̀y jii, «Á làysìn ne vinyo vé ve bi ví.»

⁴⁹Wír ve vé‑eè yíkir wùn áwuneé nèn kèʼ, a kfə̀ynìn jii, wìr və̀n sà dzə̀ la, e bó a suúy ji dzə̀ wun làysìn vinyo ve wìr ve bi ví á?

⁵⁰Jesus nèn kfə̀n màysì, e sùúy e wiíy və̀y jii, «Ku dù rì kijuŋ. À bòy ne fo wò lòn, e lùŋ, bìʼ fo à wayin shilív e mǒ wùn.»