Read Lamnso Luk 9 Bible Online

Luk 9 - Lamnso bible

Luk 9

¹Jesus wìy lò, e yòŋrì wón və́ lìm vee nshòv sibaà e ghvə̀m adzə̀m. Á báʼtí, wù fó vitaáví ve dzə̀ á wàa jùm *anyùy ve á jívir wíri, e kfə̀n a fèr ayàsí.

²Wù nèn tùm áwune ji á du, a fìʼtì e wíri mo sáʼ Nyùyi dzəə̀n, e kfə̀n a fèr aŋgàa yàsí.

³Wù kfən sùúy aáwune jii, «Vèn lóo ghan, lá vèn yòʼ lì kifá. Lá vèn yòʼ lì mbàŋ, kìn vifá ve yi, kìn kibam, kìn mbàm. Lá wìr yòʼ lì vikúm vibaà.

⁴Vèn du, mee e ntèʼ, á wáy ven é lav ye á wayin shó, vèn gòʼ fó, e meé e ghan se vèn wíy lò.

⁵A ntèʼ yìmòʼ tèn fó səəsí ven, vèn wàa lò. Vèn lóo lò, vèn tèr nsay fo bàm, é wáa dzə kisəəm ké kinyò ke wír vee shooyi yiìn.»

⁶Áwune nèn lò, a dù, a ghan e ntèʼ sí, a fìʼtì sáʼka Nyùy wo juŋ, e kfə̀n a fèr aŋgàa yàsí virə́ʼ vidzə̀m.

⁷Fòn Heror wo wù‑uù sáʼ mbìv wòŋ yee Galeli yú sá vinyo ve aŋgàa ntum Jesus vìyi yii vidzə̀m. Kí wáa jivír wun, bìʼ fo wír ámóʼó‑oò suuy jii, Jesus və̀n dzə̀ á ŋkfə Joon woo Ŋgaà Wáyndzəv mo wù fəən fó kpu.

⁸Aámóʼó suuy kév jii, dzə̀ á ŋkfə Elija mo wù kfənen ne, ámóʼó ji dzə̀ á *ŋgaà ntum Nyùy woo fó ŋgùʼ wùmòʼ mo wù fəən fó kpu.

⁹Heror nèn a ghay jii, «Mò‑oò shòʼ ne kitú ke Joon, və̀n woo wír kfə̀n dzə̀ la lèn, wo m yú virom ve wù shóʼ vìn?» Wù ku nèn a tàʼ ji bo wun kì yèn á Jesus woo shó.

¹⁰Aŋgàa ntum Jesus vìyi ghán, e kfə̀n é bàm, e fèr vinyo ve áwune‑eè yiìn vidzə̀m e Jesus. Wù yuúrí, e lò, e lì, wùn áwune bàr wún, a dù e mvə̀mlaʼ yee Besayda.

¹¹Wíri ku yù, a jùmrì wun, wù ku yòʼ səə̀sí áwune, e nèn kèʼ, a fìʼtì aáwune mo sáʼ Nyùyi dzəə̀n, e kfə̀n a fèr aŋgàa yàsí.

¹²Ndzə yiì lòo ji, wón və́ lìm vee nshòv sibaà e ghvə̀me kóʼtí, e sùúy sho jii, «Vèsən dzə̀ fen a dzə̀ é kwaʼ. Ku sùúy, é wír vìne du é melaʼ wùn ǎ ntèʼ see fó ghaŋ, a tàʼ vifá vév vé yi, e kfə̀n a tàʼ fo á yíi shiíy.»

¹³Jesus bìnèr kfə́ jii, «Kù yíi yiír ven wír vee shoon.» Á nèn sùúy jii, «Kifá ke vèr kér ki jòʼsì ntuʼ se kiban sitàn wùn à sə́ si sibaà, mo à kì yén ké ji dzə̀ vèr yùn vifá ve yi ve dzə̀ á yìír màŋgòŋ və̀n sho à?»

¹⁴A vé‑eè suuy bèy, bìʼ fo màŋgòŋ‑eè dzəə̀n e gháʼán, mbìv vilum cáʼcáʼ wáa dzə wír ansə̀kì atàn. Jesus nèn sùúy e wón və́ lìme jii, «Vèn suúy, é wíri dzəʼəm é nsay e viliŋ viliŋ, wír mtàn mtàn.»

¹⁵Á suúy, á dzə̀ʼə̀m.

¹⁶Jesus lì ntuʼ se kiban see sitàn wùn à sə́ see sibaà sí, e lèéy yúv, e beèrì Nyùy, e bèʼtí, e fò e wón və́ lìme ji á jav, é wíri wàá yí.

¹⁷Á jàv, wìr dzə̀m yí, e kùrkír. Á kfən bàʼtí vimbéʼ ve ví‑iì berin, ví rún ŋkaà nshòv sibaà e ghvə̀m.

¹⁸Wìy lòo dzə e kishiíy kímóʼ kí, Jesus wáa bùnrì Nyùy wùn mòʼón, a wón və́ lìme dzə́ fo ghaŋ. Wù yiì lò, e dzə̀r aáwune jii, «Màŋgòŋ wo wù rə́si wiy fo mò yii yoŋ mo ji la?»

¹⁹Á bìnèr jii, «Wír ámóʼó yoŋ ji à dzə̀ ŋkfə Joon woo Ŋgaà Wáyndzəv, aámóʼó yoŋ ji ŋkfə Elija. Ámóʼó ji *ŋgaà ntum Nyùy wùmòʼ fo vé ŋgùʼú mo wù kfənen fó kpu.»

²⁰Wù nèn dzə̀r jii, «Vèn wáa yòŋ kén ji m dzə̀ la?» Pita bìnèr jii, «À dzə̀ Mfə̀ə́r wo Nyùy‑iì kàʼàn.»

²¹Jesus nèn kàntì áwune fo á wáa suúy e wìr ji wun dzə̀ Mfə̀ə́r.

²²Wù wáa suúy jii, «Ŋgaà wo yírí dzəə̀n *Wanwìr və̀n kér fó wìy yen ŋgeʼ sinín. Vé wòŋe wùn à vitú ve atàá cùu, à wír ve á duŋrì nsəri wíy kay wun, e yuyrí, vishiíy ví mee vitaár, é Nyùy fəə́r wun fo kpu.»

²³Wù kfə́n a suúy e wìr dzə̀m jii, «A wìr koŋ ji wun wáa dzə ŋgaà wom ŋgoo, ŋgaàŋ kù màʼày kitú kfə́, e toòmé kpú, a lì moo kintam vishiíy vidzə̀m, a ghan sho e mǒ bàm.

²⁴Wìr wo wù bávti kitú kfə́ ji fo wun kpú, kù wíy kpu. Yii bèy, wìr maʼay kitú kfə́, bìʼ mo, bo ŋgaàŋ wíy shaàrì.»

²⁵Wù nèn kfə̀n dzə̀r jii, «A wìr yì ndzə, yì may, wù bívír kitú kfə́, bo séʼ dzə̀ ka?

²⁶Vèn wáa kiíy jii, a wìr woóme fó a dzə ŋgaà wom ŋgoo, kfə̀n woóme fó a jùmrì kinyo kém, bo ŋgaà wo yírí dzəə̀n Wanwìr və̀n wíy a woomé sa fó lì ŋgaàŋ ji və́ə woo wír e ghan se wù wíy a kfən e wùn mvə̀m vikùʼùy ve dzəə̀n vé Tàr wov wùn à nshèelav sə́ sí.

²⁷Vèn wáa kiíy rú ji wír ámóʼó tíy fèn lèn, a bó á yòʼ wíy kpukír, a bó á yén sáʼ Nyùy yee shooy.»

²⁸Kishiíy kí lòo meé waamé mo Jesus‑eè suuyin vinyo vìn, wù lì Pita wùn à Joon, à Jeem, wùn áwune wáa koʼ e gwan wùmòʼ ji wun du, e bùnrì a fo.

²⁹Wù dù, e lòo bùnrì, vishí və́ ví nèn bìnkìr, a kìʼ jeéy. Ndzə̀y sə́ sí kfən kùvsín, a fər, a njàʼkìr.

³⁰Á lòo sìn, wír ámóʼó bvə́y fó abaà, a suŋnín wùn à Jesus, a dzə̀ Mooser wùn Elija,

³¹a rán Nyùyi bán sa fo áwuné wùn. Wùn áwune wáa suŋnín mo Jesus wíy dù e Jerusalem, e kpu, é vinyo və́ vidzə̀m vi gheén.

³²Á wáa suŋnín, a Pita wùn à Jeem, à Joon kì sí buúne. Á lòo sàsìn, e yèn mo rán Nyùyi bán fo Jesus wùn, e kfə̀n yèn, a wír vee shooyi tíy e wùn ghaŋ abaà.

³³Wír vìyi lòo bàʼ kiwuú, Pita tùʼtìn, e sùúy e Jesus jii, «Tàr à wíri, kí bòŋ mo vèsən à wír vìne dzəə̀n fen. Ku sùúy, é vèr túy táv fen e taár, wúmóʼó ji wó, wúmóʼó wó Mooser, wúmóʼó wó Elija. Pita wáa tùʼtìn, a suúy bèy, a bó wù yòʼ fə̀m kì kinyo ke wù suuyì.»

³⁴Kù mo wù suuy bèy, mbàʼ yìmòʼ nèn wìy, a shaà aáwuné kitu, e lò, e sə̀tí áwune, á nəə́ shó, a fàn.

³⁵Jì wìr súŋnín fó mvə̀m mbàʼ foo fèy jii, «Wan wom wo m shoʼon və̀ne. Vèn wáa yuurí a dzə̀ kfə́.»

³⁶Jì yee shooy súŋnín, e sə̀sín, á nèn yèn, a Jesus kfə̀n sí tíy fo wùn mòʼón. Mo áwune yenen kinyo ke kí kooyin é gwan foo fèy, e yiì lòo dù, e làa yòʼ fèr kinyo kimòʼón e wìr gheéy e ghan fóo fèy.

³⁷Yì rán kibvəə́shí, wùn à Jesus lòo səy fo gwan fèy, màŋgòŋ wìy e gháʼán, wùn áwune tárnín.

³⁸Wìr wùmòʼ nèn lò, a waamé fo wírí mvəm jii, «Ŋgaà Yèʼey, kii wò, ku lèéy wán wom. M kér wán woo shoon e mòʼón cáʼcáʼ, a dzə̀ lumèn.

³⁹A nyùy wùmòʼ lo, wù wàa jivír. Wù lo, wù wàa rəəmé fo wǎn bvə̀m, a màʼ wán fó nsay, wù wàa buʼ, a cu vifə́yfə́y. A bó wù yòʼ yii bèy, wù tàv màʼtì wán gheéy. Wù lóo màʼtì, a wàn ló ne, e wèvrì wèvrìn.

⁴⁰M kì lòn ne ji wón vé lìme jum nyùy woo shooy, á múm ntéŋ.»

⁴¹Jesus yú, e sùúy e wón vəə́ jii, «Vèn dzə́ bèn, a vèn dzə̀ wír kisaŋe. Vèn yòʼ lo, vèn wày shilív e Nyùy wùn gheéy. M kér fó wìy tsəmrí vinyo vén é le? Vèn taʼ ji m dzəʼəm vèsən e mèé e le?» Wù nèn sùúy e tàr à wan və̀y jii, «Wìy e wan wò fèn.»

⁴²Wù lì, e lòo dù sho, nyùy və̀y kfən màʼ wán, wù wáa buʼ, a ŋàyìr. Jesus kàntì nyùy woo shooy, wù màʼtì wán, wù bónén, Jesus siìr e tàr wov.

⁴³Wìr dzə̀m yén vitaáví ve dzəə̀n vé Nyùy, shúu yúm áwune. Wíri kú a leéy Jesus, a ker gháʼ fo vinyò ve wù‑uù yii vidzə̀m. Wù nèn lò, e bìnkìr, e sùúy e wón və́ lìme jii,

⁴⁴«Vèn fó vituʼùr ví é kinyo ke m suuy kìn kijuŋ. Á wíy way ŋgaà wo yírí dzəə̀n Wanwìr və̀n e wírí wo, aá yii shó mo á koŋè.»

⁴⁵Wù suúy bey, la áwune yòʼ kìíy. Kifá ki‑iì sə̀tí vifií vév fo á kiíy, á nèn kfə̀n a fàn fó dzər sho.

⁴⁶Áwune nèn yiì lò, e kèʼ, a bìʼ jii, áwune sà dzə́ bèn, a dzə̀ la wír wo kuʼùn fo áwune á?

⁴⁷Jesus ku nèn kìíy kinyo ke vé‑eè biʼ, kwaʼtì aáwuné meliv. Wù lì wán wo terí, e tìír e wùn ghaŋ,

⁴⁸e sùúy aáwune jii, «A wìr yén wán və̀n ji wír bìʼ mo, bo ŋgaàŋ yén a dzə̀ mo. Wù wáa yen mo, bo wù yén a dzə̀ ŋgaà wo wù tumen mo. Vèn wáa kiíy jii, wìr wo wù li kitú kfə́ fó tèr e věn mvəm, dzə̀ wo dzəə̀n wír wo kuʼùn.»

⁴⁹Joon nèn lò, e yòŋ Jesus jii, «Tàr à wíri,» a bi sho jii, «Vèr‑iì yèn wír wùmòʼ, a bó wù yòʼ dzə̀ e vèsə́n ŋgoo, a wù yoŋ yír yé, e bó a jùm anyùy ve á jívir wíri, vèr nèn a shèm.»

⁵⁰Jesus bìnèr jii, «Lá vèn yòʼ wìy a shèm wír woo bey. A wìr dzə̀ là fó a kìnèn kinyo kén, bo wù tómri tòmrín.»

⁵¹Ghán se Nyùy‑iì wíy lì Jesus, é wù kóʼ é yuv sí lòo gheén, Jesus wáy ji wun kù du e Jerusalem, e nèn lò, a dù.

⁵²Wù lòo dù, e tùm wír ámóʼó fó mbìy. Áwune nèn dù e ntèʼ yeé Samaria yìmòʼ, a tàʼ fo wù yií shiíy.

⁵³Wír vee fóo yén ji Jesus kì shaa shaàn, du a dzə̀ á é Jerusalem, e nèn ŋwèy kirə́ʼ.[3]

⁵⁴Jeem wùn Joon vee wón lìm Jesuse yiì yù, e dzə̀r e Jesus jii, «Tàr, dzə̀ ji vèr túm və́y, é wú sə́y a dzə̀ fó yuv, e laàr wír vìn à?»

⁵⁵Jesus leéy áwune, e wàm wámén,

⁵⁶e nèn lò, wùn áwune wáa dù e ntèʼ ye sən.

⁵⁷Wùn áwune lòo dù e dzəə, wìr wùmòʼ wìy, e sùúy e Jesus jii, «Aà fə̀m du fèé, bo wòsò kù yíi a ghan.»

⁵⁸Jesus bìnèr sho jii, «Nyám símóʼ sí kér bií sév, a menə́n medzə̀m mè kér láʼ sév. Yii bèy, a bó ŋgaà wo yírí dzəə̀n Wanwìr və̀n yòʼ kér fó teʼ kfə́ kee kitú.»

⁵⁹Jesus lò, e sùúy a dzə̀ e wùmòʼ woo wír jii, «Wìyi, é wòsò wáa ghan.» Wìr və̀y suúy jii, «Ku màʼtì, é m du, wíy dzəəmè tàr wor ŋkuŋ, é bo m wiy.»

⁶⁰Jesus bìnèr jii, «Màʼtì kee shooy ki, é wír ve á siìn ji aŋkfəə wìy a dzəə̀mè aŋkfə vév. Ku dù ké ki, a fìʼtì a dzə̀ mo sáʼ Nyùyi dzəə̀n.»

⁶¹Wùmòʼ woo wír nèn kfə̀n yòŋ jii, «Taàtá, mo‑óò wáa ghan wòsò. Ku màʼtì, é m tómbìy lòn dzə́ə fo kfə́ə yémé, e bó a wìy.»

⁶²Jesus bìnèr e woo shooy jii, «A wìr ghàr lá kisoo ji wun sí lim lim, e kfə̀n a leéy bám, bo bó ŋgaàŋ yoʼ ghèén fó a lìm e kinyò ke saʼ Nyùy.»