Read Lamnso Remrí 11 Bible Online

Remrí 11 - Lamnso bible

Remrí 11

¹Mooser ku nèn a suúy e wír veé Israyi jii, «Vèn wáa kòŋ rì NYÙY TÀR woo Nyùy won, a yiì kinyo kfə́, a yu sáʼ rə́, a tiy e wun kinyò, a lèm nsər sə́ ghán sidzə̀m.

²Lán və̀n, vèn kuúmé ji NYÙY TÀR woo Nyùy won‑eè dìn lim sə́ a dzə̀ e vèn ji vèn fiʼ kìíy mo wù dzəə̀n. Bó wù yòʼ‑oò lo dìn a dzə̀ e wón véné. Yì‑iì yèn ven vikuʼùy vé NYÙY TÀR, e yèn vitaáví və́, e kfə̀n yù mo wù ghaʼan.

³Wù‑uù dìn visəəm vé vitaaví və́, e yiì viŋgaʼnìn ve vinyò e Farao woo fon woó Ejiv, e kfə̀n yiì e woŋ vəə́ e dzə̀m.

⁴Yì‑iì yèn ven kinyo ke wù‑uù yiìn e shúu rər woó Ejiv wo wú‑uù jum vené, e yiì e nyám sév sé ŋkoʼ si, à *viténtén vé rər ví. Vèn‑eè yèn mo wù‑uù bìnèrìn Rìbà Ndzə̀v wo Baar, wù sùm áwune, á léŋ é ndzəv. Á nèn kù lày bèy, e wìy shem lán.

⁵Kù‑uù yèn ven mo NYÙY TÀR‑iì keerin ven é woʼ, e mèé mo vèn‑eè wìyìn, e bàʼ fèn.

⁶Vèn kì sá kinyo ke wù‑uù yiìn e Datan wùn Abiram[25] vee wón Eliav woo wan Ruben. Nsay‑iì mvə̀ʼ shuu, e tàtí kfə́ə sév wùn à táv sév sí, à vifá vév ví vidzə̀m, e mèy, a vèn yéné.

⁷Kí nén a dzə jii, kù dzə̀ ven vin ve vèn‑eè yenen e sí yéné vinyo ve tavkín ví vidzə̀m ve NYÙY TÀR‑iì yiìn.

⁸«Bo dzə̀ jii, vèn sí lo, e liysín ndzə́v, e nəə́ e nsay ye vèn yíi sə. M yoŋ e vèn lán jii, a vèn lèm nsər sidzə̀m se m fó, bo kí yíi sə, é vèn távkír, e yòv nsay.

⁹Kí dzə̀ jii, vèn wíy bonén, e dzə̀ʼtì e nsay ye NYÙY TÀR‑iì kàʼàn atàr vén ji wun wíy fo aáwune wùn à wón véví. Dzə̀ nsay, a vín nàʼ wùn à vilu vi tsəətìn sho.

¹⁰Nsay ye vèn du, e yòv yòʼ dzə̀ moo yeé Ejiv fo vèn wiyì. Yee shooy‑iì dzə̀, a vèn wáy kifá, á wàa wayrí mendzə́v moo meé súm vifoorií.

¹¹Yii bèy, nsay ye vèn du, e yòv dzə̀, a yì kér agwan wùn à viwoóy ví, a yì yii keéri mendzə́v, a wuú ló fo kijuŋ.

¹²Dzə̀ nsay, a NYÙY TÀR woo Nyùy won géʼ sho. Wù kíyri ghán sidzə̀m mo kiyá ki keʼè, e dù, e meé mo kí ndzəyì.

¹³«Vèn wáa lèm nsər se m fó e vèn lán, a dzə̀ ji vèn wáa kòŋ NYÙY TÀR woo Nyùy won, a lìm fo wun shilív shén shidzə̀m, e fò kitú kén shó kidzə̀m.

¹⁴A vèn yiì bèy, bo wù wíy a tsənsí wuú é ghan se yí dzəə̀n ji yí wáa dzə, yé mbìyi, à yé bàmé, é vèn fíʼ a ker vifá ve yi, a ker meluʼ, a ker meŋgvə́r.

¹⁵Wù kfə̀n wíy yiì, é jíyí wáa tèʼ e kwaʼ, é nyám sén sí wáa yi, é vèn wáa yikír, a kur.

¹⁶«Kí nén a dzə jii, vèn wáa yen fo melív men mè bóʼtí ven, e lèvtí, é vèn bin ndzə̀m e NYÙY TÀR, a ghvəm anyùy kisaŋe, a lìm fo fo.

¹⁷A vèn wìy mùm bèy, bo dòʼshwiiy NYÙY TÀR wíy koʼ bìʼ ven. Kí kooy bèy, é wù fin shúu yuv, é vèn búŋ wuú, é nsay yúm, é viyíkìr vi búŋ, bo vèn sí lo, e rèŋ cércér fo nsay ye juŋ ye wù fó e vèn.

¹⁸Vèn ku lèm jí se m fó e vèn sin si e věn meliv, a ker e věn vifii. Vèn sáŋ, e sə̀ŋrí e koy ji kisəəm, e kfə̀n kùr e věn yírvishi, e fíʼ a kuumé.

¹⁹Vèn kù wíy a yeʼéy wón vén shó, a ruvtí e ghan se vèn dzə̀kìn e věn melav, a ruvtí e ghan se á ghán e yuv, a ruvtí e ghan se á dzə́ e nsay, a ruvtí e ghan se á lo e yuv.

²⁰Vèn kù wíy a saŋ jí sìn e věn vikùr ve shuù se lav, e kfə̀n a saŋ e věn shuù se kày seé ŋkà se laʼ.

²¹Vèn ku wìy a yiì bèy, ji vishiíy vé vèn à wón vén ví fiʼ wìy dàr e nsay ye NYÙY TÀR‑iì kàʼàn atàr vén shó, é vèn wìy dzə̀ʼə̀m fo, e wìy dù, e meé mo yúv wùn à nsay wíy dù, e jòʼsì.

²²«Bo dzə̀ ji vèn ku wìy a way ŋàŋ, a lèm nsər se m fó e vèn lán ji vèn wáa yiì, a kòŋ NYÙY TÀR woo Nyùy won, a tiír kiwuú kén, a fìʼ, a tàŋèn cáʼ a dzə̀ é wùn wó.

²³Á lóo yiì bèy, é NYÙY TÀR nèn wìy jùm vitúm vidzə̀m fo věn mbìy. Vèn wíy sòr vitúm ve ví dzə̀kìn viwíy, a ví tàvkír, e shaà ven.

²⁴Kirə́ʼ kidzə̀m ke vèn tiirin kiwuú shó ki wíy a dzə kén. Woŋ wóné wíy kèʼ fo woʼ, fo mbìv yee tsə́n, e dù, e bàʼ aàgwan veé Lebanon, e mbìv yee kuy, e kfə̀n kèʼ fo ndzəv yee Yufret, e mbìv yee fo shùy yii tó, e dù, e bàʼ e Rìbà Ndzə̀v woo Mediteranean, e mbìv yee fo shùy yii nəə.

²⁵Bó wìr yòʼ dzə̀ shó, wo wù wíy yu fó tam vèn áwune. NYÙY TÀR woo Nyùy won wíy way fan wùn à kindzə́m kí e wìr dzə̀m shiliv, e kirə̀ʼ kidzə̀m fo vèn wíy a shaà mo wù‑uù kàʼàn ven.

²⁶«E kishiíy ké lán ki, m neer vinyo e věn si vibaà, a dzə̀ kisəəvì wùn à lòné.

²⁷Kisəəvì kí dzə̀, a vèn fen wìy a lèm nsər se NYÙY TÀR se m fó e vèn lán.

²⁸Lòné dzə̀ sá, a vèn fen tèn fó lèm nsər se NYÙY TÀR woo Nyùy won, e bìn ndzə̀m é vinyò ve m fó e vèn lán, a jùmrì anyùy ámóʼó ve vèn yòʼ fə̀m kiìn.

²⁹NYÙY TÀR wíy li ven, du sho e nsay ye vèn wíy yòv, vèn wàa fuŋ kisəəvì é Gwan Gerisim, a saarí lòn fó Gwan Ebal.

³⁰Agwan vee abaà víne dzə̀ é mbìv Jordan yee fo shùy yii nəə, e wír veé Kanané nsay, ve á dzə́ e mbuŋ Jordan. A dzə̀ é ŋkìʼnìn Gilgal, a meʼ fo kicí kee *oak ke á yoŋ ji ké More ki dzəə̀n.

³¹Vèn sí yìi liysín Jordan, e nəə́ e nsay ye vèn yíi yòv, nsay ye NYÙY TÀR woo Nyùy won fó e vèn. Vèn yií sə́, lóo ker,

³²vèn kù wày ŋàŋ ji á wáa lèm a nsər sidzə̀m se m neer e věn si lán və̀n, à ntò se vinyò si, a yiì mo sí dzəə̀n.»