Read Lamnso Remrí 12 Bible Online

Remrí 12 - Lamnso bible

Remrí 12

¹Mooser kú a shaà fo mbìy, a fo sáʼ e wír veé Israyi, a suúy jii, «NYÙY TÀR, Nyùy atàr vén fò nsər si, e fò ntò se vinyò se vèn wìy a lèm e nsay ye wù fó ji yéen. Vèn kù wíy a way ŋàŋ ji á wáa lèm kishiíy ké ndzə kidzə̀m ke vèn wíy a dzə e kitu ke nsay.

²Kí dzə̀ jii, vèn ku laàr virə́ʼ vidzə̀m vi, vee vé vitum ve vèn du, e tòn, e yòv woŋ wóv, virə́ʼ vidzə̀m ve áwune yii cu anyùy vév fó, e laàr bèn ŋkuuŋkùŋ. Á cu anyùy e vitu ve agwan ve dáa, cu e vitu ve aŋkoŋ, cu e sar se vici ve rəŋsìn ví vidzə̀m.

³Vèn wíy tsəy kíy sév sé cù, e kètì, e bvəʼtí sə́y sév sé anyùy, e tòn wúr sé *Ashera woo nyùy wov e və́yí. Vèn gwati mebvə̀m me áwune fèrìn ji anyùy mè, e laàr yír sí fó kirə̀ʼ fóo fèy ŋkuuŋkùŋ.

⁴«Lá vèn yòʼ wìy a ghvəm NYÙY TÀR woo Nyùy won é dzəə ye vitúm vìn vi yii ghvə́m anyùy vév shó.

⁵Vèn kù wíy a tàʼ a dzə̀ kirə́ʼ kee shó ke NYÙY TÀR woo Nyùy won wíy shoʼ fo rám sén sí nsay, e lèm ji kfə́ ke á wáa cù wun fo. Ghán se vèn wiy e wun si, a cù wun, vèn kù dù a dzə̀ fó.

⁶Dzə̀ fó, fo vèn wíy a wìy e cu yén ye tonèné, à ye seeríné, e kfə̀n a wìy e nsùʼ woo kintóʼ ke kifa kee kimòʼón ki fo vee ghvə̀m vi,[26] a wìy e kfəə́ se cù si jeéy jeéy, a wìy e cu ŋkàʼmée, à yé kimbòŋwùné, e kfə̀n a wìy e kifá kee dzə́ə mbìy ki fó mvə̀m nyàm si, kìn fo věn bvəy si.

⁷Kù dzə̀ fó, fo vèn à kfə́ə sén sí wíy a kaarí e NYÙY TÀR woo Nyùy wón si, a yi vifá ve cù, a sàvnìn bìʼ séʼ wo vèn kooyin fo věn lìm mo NYÙY TÀR səə̀vìn ven.

⁸«Ghán see shooy si wíy gheenè, lá vèn yòʼ kfə̀n a yiì mo vèsən yii fèn. E to lèn, wìr kù yii kinyo a dzə̀ ke wù kòŋèn.

⁹Kí dzə̀ bey, bìʼ fo bó vèn yóʼ ne nə̀ə́ e wòŋ wo NYÙY TÀR woo Nyùy won fó e vèn. Kirə́ʼ, a dzə̀ fo vèn wíy a dzə nyaáŋ.

¹⁰Vèn wíy liysín ndzə́v yee Jordan, wíy lóo dzə e nsay ye NYÙY TÀR woo Nyùy won fó ji vitsə́ʼ vén, é wù yii, é vèn meeme fo aŋgaà vén vibàné wo, áwune adzə̀m ve á kaarin ven, e tàr, é vèn nèn a dzə nyaáŋ.

¹¹NYÙY TÀR woo Nyùy won wíy shóʼ kirə́ʼ ke wù shoʼon ji á wáa ghvəm wun fo, bo dzə̀ fo vèn wíy a wìy e kifá ke m yòŋèn e vèn kí kidzə̀m, a dzə̀ ji cu yén ye tonèné wùn à ye seeríné, à nsùʼ woo kintóʼ ke kifa kimòʼón fo vee ghvə̀m vi, à cu seé dzəə sí dzəə sí, à yé ŋkàʼmée.

¹²Vèn wíy a sàvnìn e NYÙY TÀR woo Nyùy wón si, vèn à wón vén vee vilume, à vee vikìyí, à wír veé ram Levi ve á dzə̀kìn e věn ŋkà se laʼa. Vèn kú a kuumé ji rám Levìi yòʼ wíy a ker a vitsə́ʼ e věn mvəm.

¹³Vèn wáa yen fó wìy a yiì cu ye tonèné a dzə̀ é kirə̀ʼ ke kòŋèn ven.

¹⁴Bo dzə̀ ji vèn kù wíy a yiì cu a dzə̀ é kirə̀ʼ kee shó ke NYÙY TÀR wíy shoʼ fo rám sén sí nsay. Dzə̀ fóo fèy, fo vèn wíy a yiì cu si, a kù dzə̀ fó, fo vèn wíy a yiì kinyo kidzə̀m ke m yòŋèn e vèn.

¹⁵«Yii bèy, a dzə̀ vèn wìy a seerí nyám sén, a kfər e virə̀ʼ vee fo vèn dzə̀kìn, a kfər mo vèn koŋè, a kfər bèn e mbòŋén, mo NYÙY TÀR woo Nyùy won wíy səə̀vì ven shó. A dzə̀ wìr dzə̀m kfə̀r, kìn wù dzə̀ e ránén, kìn wù dzə̀ e *kifàn kí wùn, a dzə̀ á kù kfə̀r réŋréŋ mo vèn yii kfə́r ŋgav kìn njà.

¹⁶Kù dzə̀ cáʼ ji lá vèn yòʼ wìy a yi mensə́ mev. Vèn kù wíy a sə̀r mensə́ e nsay moo mendzə́v bey.

¹⁷Ké kifa kidzə̀m ke á fó e NYÙY TÀR moo nsùʼ woo kintóʼ ke kifa kee kimòʼón ki fo vee ghvə̀m vi, kìn dzə̀ ke vèn shoʼon fó vifa ve yi, kìn dzə̀ fó melùʼ, kìn dzə̀ fó meŋgvə̀r, lá vèn yòʼ yì kifá fo fo e věn virə̀ʼ. Lá vèn yòʼ yì sá nyám yee dzə́ə mbìyi, kìn dzə̀ nàʼ, kìn dzə̀ bvə́y. Lá á yòʼ yì sá cu ye dzəə̀n yé ŋkàʼmé, à yé kimbòŋwùné, kìn dzə̀ cu símóʼ sí.

¹⁸Vèn kù wíy a yi vifá vee shooy a dzə̀ e NYÙY TÀR woo Nyùy wón si, e kirə̀ʼ ke NYÙY TÀR woo Nyùy won wíy shoʼ ji á wáa cù wun fo. Wíy a yi vèn à wón vén vee vilume, à vee vikìyí, aàkwàn vén vee vilume, à vee vikìyí, à wír veé ram Levi ve á dzə́ e věn ŋkà se laʼa. Vèn kù wíy a yi fo, a sàvnìn e NYÙY TÀR woo Nyùy wón si bìʼ séʼ wo vèn kooyin fo věn lìm si.

¹⁹Vèn wáa yen fó wìy làysìn fó a tom wír veé ram Levi, e wìy dù, e meé mo vèn wíy a dzə e věn nsay.

²⁰«NYÙY TÀR woo Nyùy won wíy dzəsì nsay yen mo wù‑uù kàʼàn ven, vèn wàa yi nyám mo vèn kér shií shó, a yi, e meé mo vèn koŋè.

²¹A kirə́ʼ ke NYÙY TÀR woo Nyùy won wíy shoʼ ji á wáa ghvəm wun fo ki wìy a dzə kwaʼda fo vèn ámóʼó, áwune wàa see nàʼ, kìn bvə́y ye NYÙY TÀR foon, é virə̀ʼ ve á dzə̀kìn shó, mo mò‑oò yòŋèn e vèn. A dzə̀ áwune yì é virə̀ʼ vé dzə mo á kòŋèn.

²²Mo vèn yii kfə́r ŋgav, kfə́r njà, bo dzə̀ réŋréŋ mo vèn wíy a kfər. A fə̀m dzə̀ wír wo wù yòʼ dzəə̀n e ránén mo nsər dinè, kìn wo wù dzəə̀n e ránén, bo dzə̀ wù kfə̀r.

²³Kù dzə̀ cáʼ ji lá vèn yòʼ yì mensə́, bìʼ fo mensə́ mè dzəə̀n dzəʼə̀m, a bó yòʼ dzə̀ vèn yì mensə́ me nyàm, a dzə̀ ji dzəʼə̀m rə́, e kfə̀n kfə̀r jav nyàm.

²⁴Lá vèn yòʼ wìy mùm, e yì mensə́ ji viyíkìr. Vèn kù wíy a sə̀r sə̀rìn é nsay moo mendzə́v bey.

²⁵Lá vèn yòʼ wìy a yi. Vèn kú a yiì kén a dzə̀ vinyo vee tìítiy e NYÙY TǍR si, é vishí vén ví nèn wìy a bòŋ, à vé won vén ve á dzəə́ wìy a dzəə́.

²⁶«Yii bèy, ké vifa ve vèn lem jeéy ji vé Nyùy, à ké cù yén ŋkàʼmée, vèn wíy a lì, a dù sho e kirə̀ʼ ke NYÙY TÀR wíy shoʼ.

²⁷Lóo dzə cu yén ye tonèné, vèn wìy e jav wùn à mensə́ mè e Nyùy woo Nyùy wón kiy cù. Ké mensə me cù yén, aá leér e NYÙY TÀR woo Nyùy wón kiy cù. Fo ké jav nyàm ki, a dzə̀ vèn yì.

²⁸Vèn ku wày ŋàŋ, a lèm nsər se m yòŋèn e vèn sin si sidzə̀m, é vishí vi wìy a bòŋ ven, a bòŋ wón vén ve á dzəə́ wìy a dzəə́, e wìy dù, e mày. Bìʼ fo, a vèn yii bèy, bo vèn sí yii a dzə̀ vinyo ve juŋ vi, à vee tìítiy vi e NYÙY TÀR woo Nyùy wón si.

²⁹«NYÙY TÀR woo Nyùy won wíy tòn vitúm ve vèn nəə fo, e jùm áwune, é vèn yov nsay yev.

³⁰Wíy lóo dzə, a NYÙY TÀR laár ne vitúm vee shooy, vèn wàa yen fóo to e kitam, a tàʼ dzə́ə ye áwune‑eè cu anyùy vév shó, a dzər ji sà dzə̀ vèn wàa cù sa bèy a?

³¹Lá vèn yòʼ wìy mùm, a ghvəm NYÙY TÀR woo Nyùy won é dzəə ye áwune ghvə́m anyùy vév shó. NYÙY TÀR ban dzə́ə yee bey, a dzə̀ bìʼ vinyo ve koʼoyín ví ve áwune cu anyùy vév, yii. Kífoy kí dzə̀ ji á lo, á wàa tòn wón vév vee vilum, à vee vikìyí, a cù anyùy vév shó.

³²«Kinyo kidzə̀m ke m yòŋèn e vèn, vèn ku wìy wày ŋàŋ, a lèm. Lá vèn yòʼ wìy dzə̀sì kifá sho, lá á yòʼ shòʼór.