Read Lamnso Remrí 13 Bible Online

Remrí 13 - Lamnso bible

Remrí 13

¹«A tàm wìr lò, e fəə̀ e věn mvəm ji wun lò a ntum Nyùy, kìn fəə̀ wír ji wun tóʼti njèm, e yòŋ ji wun‑éè yii á kiŋgaʼnìn ke kinyò, kìn ji wun‑éè shóʼ á virom vímóʼ ví,

²é kí nèn kòóy rú mo wù yòŋèn. Yii bèy, a ŋgaàŋ lò lèn, e yòŋ ji vèn áwune wáa ghvəm a anyùy ámóʼó ve vèn yòʼ kiìn, e kfə̀n a lìm fo fo,

³lá vèn yòʼ yuùrí kinyo ke ŋgaà ntum woo shooy, kìn ké ŋgaà wo wù tóʼti njèm. Kí kooy bèy, a dzə̀ ji NYÙY TÀR woo Nyùy won taásin ven taásín, e fíʼ kiíy ji vèn sà koŋ wun shilív shidzə̀m, e fò kitú kén e wun kidzə̀m a.

⁴Vèn ku wìy shèm a dzə̀ e NYÙY TÀR woo Nyùy wón bàm, a ghvəm wun, a lèm nsər sə́, a yunín wun, a lìm fo wun, e kù a tàŋèn a dzə̀ é wùn wó.

⁵Yii bèy, ké wìr wo wù fiʼ ji wun dzə̀ ŋgaà ntum Nyùy və̀y, kìn ŋgaà njèm, vèn ku yùyrí ŋwèrín yúyrín, bìʼ fo wù kì bayirin ne wíri ji á wáa tav kitú e NYÙY TÀR woo Nyùy won, a kù dzə̀ wun woo NYÙY TÀR wo wù‑uù fəərin ven fó wòŋ Ejiv, e tìn fó lav vikwàn. Ké wìr vee bey ki dzə̀ ji á ku bìnèr ven fo á wáa jùmrì NYÙY TÀR woo Nyùy won, a ghan e wun mbòv mo wù‑uù yòŋèn e vèn. Kí nén a dzə jii, vèn ku tùŋ liì kisaŋ, e fə̀ə́r fo věn mvəm.

⁶«A tàm wìy lò fər wò woo wan yè won, kìn wan wò woo lumèn, kìn woo wiíy, kìn wiiy wò woó mbuùy kikùn, kìn ŋkar yè tìm, a levtí wò bámbám, a suúy ji vèn wun du, a ghvəm anyùy ámóʼó ve bó vèn aàtàr véné yòʼ‑oò ló ne kìíy.

⁷Kìn wù yoŋ a dzə̀ anyùy vitum ve ví kaarin ven, kìn dzə̀ vee věn mentsə̀m, kìn dzə̀ vee kwaʼda,

⁸lá à yòʼ wìy fò kintóʼ sho. Lá à yòʼ yuùrí kinyo kfə́. Á ku yùyrí ŋgaàŋ yúyrín. Lá à yòʼ wìy rə̀r mendzən fo wun, lá à yòʼ bavtí wun, lá à yòʼ lìtì wun. Á lóo yuyrí, kù tòmbìy tsə̀m wò ŋgaàŋ e tíyí, é màŋgòŋ nèn tsə̀mrí, e yùyrí.

¹⁰Á ku tsə̀mrí ŋgaàŋ e tíy sí, e yùyrí, bìʼ fo wù kì taʼ, e sə̀ŋ ven fo NYÙY TÀR woo Nyùy wón wùn, wun wo wù‑uù fəərin ven fó wòŋ Ejiv fo lav vikwàn.

¹¹Kí kooy bèy, é wìr dzə̀m woó Isray yú leŋ, a fàn, é la wìr yòʼ dzəə wìy mùm, e yiì kfə́ə kinyò ke bi kí moo kee shooy e věn mvəm gheéy.

¹²«Wíy lóo dzə, a vèn sì e věn ŋkà se laʼ se NYÙY TÀR woo Nyùy won fó e vèn, vèn yú ji

¹³wír tàkìŋàʼ ámóʼó lò ne, e fəə̀, a bìnèr vifií vé wíri aáwuné ŋkàlaʼ, a levtí ji á du, a ghvəm a anyùy ve bó vèn yòʼ‑oò yiìn ne, a ghvəm,

¹⁴vèn kù sòvìr, e tàr ji weè weè. Kí koóy ji vèn yén, a kí dzə̀ rú ji kinyo ke virìm kee ben ki kòóy a e věn mvəm,

¹⁵vèn kù laàr wir dzə̀m woó ŋkàlaʼ foo fèy láarin. Vèn sə́ʼsí wír woo fó e dzə̀m sə́ʼsín wùn à nyám sév sí.

¹⁶Vèn yii bèy, á kùúy kéŋ yee fó e dzə̀m, e dù sho e màwày, e tòn ŋkàlaʼ wùn à kéŋ yee fóo e dzə̀m e və́yí. Vèn ku tòn ji cu NYÙY TÀR woo Nyùy won yee tòn e fur. Fóo kù sí wìy gòʼ e vifə̀m, a bó yòʼ dzə̀ á kfə̀n bàʼrì.

¹⁷Lá vèn yòʼ wìy lèm kifá fo vifa ve nshwǐ NYÙY TÀR ji kén, é NYÙY TÀR nèn wìy bìn ndzə̀m e wun dòʼshwiíy, e rə̀r mendzən men, a sham ven, a yiì, é vèn wìy a kùʼ, a dzə wír nyanyày mo wù‑uù kàʼàn atàr vén.

¹⁸Kí nén a dzə jii, vèn ku wìy a yunín NYÙY TÀR woo Nyùy won, a lèm nsər sə́ sidzə̀m se m fó e vèn lán, a yiì kinyo ke kí dzəə̀n tìítiy e NYÙY TÀR woo Nyùy wón si.»