Read Lamnso Remrí 15 Bible Online

Remrí 15 - Lamnso bible

Remrí 15

¹Mooser kfən sùúy e wír veé Israyi jii, «Wíy lóo dzə e kinjòʼsìbàm ké kiya ke kí wíy a meé ji saàmbà kidzə̀m, vèn wàa tiiné kaá si.

²A kí wíy a dzə jii, wìr Isray e dzə̀m wo wù‑uù foòrìn wir Isray wùmòʼ mbàm kù wíy tiiné kaá ye ŋgaàŋ kér wùn wun. Lá wù yòʼ ghìʼ ji wù ku làʼ, bìʼ fo á foon ne ji sì á ghán se NYÙY TÀR‑iì lèmèn ji á ku tiìné kaá si.

³A dzə̀ yé kiŋgwìy yee kaá, bo a dzə̀ vèn kù sə̀. Wáa dzə yé fər won, bo vèn kù kér fó tiiné.

⁴«Yii bèy, bó vé kitàne yòʼ fə̀m kì wíy a dzə e věn mvəm, bìʼ fo NYÙY TÀR woo Nyùy won wíy səə̀vì ven é wòŋ wo wù fó e vèn ji vitsə́ʼ vén.

⁵Kù dzə̀ ji vèn wáa yunín a wun, a mùm rúrú ji á wáa lèm nsər se m fó e vèn é kishiíy ké lán ki,

⁶é NYÙY TÀR woo Nyùy won wìy a səə̀vì ven mo wù‑uù kàʼàn. Vitúm vineénín vi wíy a foò mbàm fo vèn, yii bèy, vèn yòʼ wíy a foò mbàm fo kímóʼ kí. Vèn wíy a saʼ vitúm vinín, a bó kímóʼ kí yòʼ wíy saʼ ven.

⁷«A wìr fèn dzə̀ e věn mvəm wo dzəə̀n ŋgaà kitàn, a dzə̀ fə́r won, kìn wù dzə̀ é ŋkàlaʼ rəné, lá vèn yòʼ wìy a kàm, a gimtí kiwó fo wun.

⁸Vèn keérí kiwó kén kí tèéter, e foòr wun kifá mo kíghàʼ və dzəə̀n, a fə̀m dzə̀ kee ka.

⁹Vèn wáa yen fó a kuʼ vinyo ve kisaŋ vi e věn meliv, e ten fó foòr wír kifá ji kiyá ke ntiinè kaa ki sí méʼ a fo mentsə̀m, a bó yòʼ dzə̀ wìr kfə̀n sə̀ mbàm e bàm. Lá vèn yòʼ màʼtì, é kwaʼtì kisaŋ yee béyi nəə́ e věn meliv. A vèn tèn fó foòr, wù yiì tòŋ, e kàn NYÙY TÀR bìʼ ven, bo vèn lì ne njò, a NYÙY TÀR yíi saʼ ven fó njò fóo fèy.

¹⁰Vèn kú a foòr áwune kicaárín bey, e làa yòʼ a ghvə̀ʼ bìʼ kee shoon, é NYÙY TÀR woo Nyùy won wìy a səə̀vì ven é vinyò vidzə̀m ve vèn yii.

¹¹Mo vé kitàne yòʼ wíy buú fo věn mvəm é ghan símóʼ sí, m nén a fo sáʼ ji vèn ku wìy a ker a wó yén tèéter fo aghéʼnceyí wùn à vé kitàne e věn wòŋ.»

¹²Mooser kfən sùúy jii, «A wìr Hibru fiìnè kitú kfə́, kìn dzə̀ woo lumèn, kìn dzə̀ woo wiíy ji kwàn, wìr Hibru wùmòʼ yún, bo ŋgaàŋ wíy lìm fo wun ji kwàn kiyá ntuùfú, lóo dzə e kee saàmbà ki, wù màʼtì wun.

¹³Vèn lóo màʼtì, lá á yòʼ tsəə̀né wun e ndzə e wóo e yúmér.

¹⁴Vèn fó wun vifá kijuujùŋ fo věn ŋgoo se njiì, à fo věn riimé sí, à fo věn melùʼ me vèn nyèŋèn. Kí dzə̀ jii, mo NYÙY TÀR woo Nyùy won səə̀vìn wír, bo dzə̀ sá mo ŋgaàŋ ku fò e kwàné.

¹⁵Vèn ku wìy a kuumé ji vèn‑eè dzə̀ á akwàn é wòŋ Ejiv, NYÙY TÀR woo Nyùy won nèn tìn ven fó vikwàn. Á kinyo ke kí yiìn, é bo m wáa fo sáʼ rə̀n e vèn lán bèn.

¹⁶«Yii bèy, a kwàné kì sí koŋ wò, kfə̀n koŋ kfə́ə yé ji à leey a fo wun kijuŋ, wú lo, e sùúy e wò jii, ‹M yòʼ koŋ, e jàvsìn wòsò gheéy,›

¹⁷à nèn lì kinto, e tòʼ kituʼùr kfə́ shó e wǔn nshìy. Toʼò, bo wú sì lèn ji wir wò kibàm ŋkuuŋkùŋ. A dzə̀ woo wiíyi, à kù yiì sho réŋréŋ bey.

¹⁸Lá vèn yòʼ wìy a rə̀m ntéŋ é ghan se vèn maʼtì akwàn. Vèn kú a kuumé ji wú‑uù ló a lìm a fo vèn é bǎm kiya ntuùfú, a wú‑uù lim a dzə̀ é shùu kintoʼnìn ke vilàʼày ve á yii fó e wìr wo á liìn líin. Vèn lóo yiì bèy, é NYÙY TÀR woo Nyùy won nèn wìy a səə̀vì ven é kinyò kidzə̀m ke vèn yii.

¹⁹«Vèn wíy a fəə́r wón nyàm adzə̀m vee vilum ve dzəə̀n mfùmèn, a lèm jeéy ji vé NYÙY TÀR woo Nyùy won. Lá vèn yòʼ wìy lì wón nàʼ fo nyàm see dzə́ə mbìyi vin, a lìm lim sho. Lá á yòʼ wìy a kom wuy fo vé njìi.

²⁰Lóo dzə e kitu ke kiya, é wìr wùn à lav rə kú a kfər nyám sìn e NYÙY TÀR woo Nyùy wón si, e kirə̀ʼ ke wù wíy shoʼ ji á wìy a cù wun fo.

²¹A nyàm yee shooy ndzə̀m, kìn dzə̀ ji dzə̀ yee ntèŋ, kìn yì fìr, kìn yì kér a dzə̀ njò yìmòʼ, a fə̀m dzə̀ rəné, lá vèn yòʼ kfə̀n lì, a cù NYÙY TÀR woo Nyùy won shó.

²²Vèn wíy a kfər nyám see bey a dzə̀ e věn laʼ si. A dzə̀ wìr dzə̀m kfə̀r, a fə̀m dzə̀ wír wo wù yòʼ dzəə̀n e ránén mo nsər dinè, kìn wo wù dzəə̀n e ránén, a kfər réŋréŋ mo á yii kfə́r njà, kìn ŋgav bèy.

²³Kù dzə̀ cáʼ ji lá vèn yòʼ wìy a yi a mensə́ mev. Vèn ku wìy a sə̀r e nsay mo á sə̀r mendzə́v, é mè wáa leŋ.»