Read Lamnso Remrí 16 Bible Online

Remrí 16 - Lamnso bible

Remrí 16

¹Mooser suúy e wír veé Israyi jii, «Vèn ku wìy a yiì *Ŋkǎʼ Yáʼayshàa é ŋwee *Abiv, e fíʼ a ghvəm NYÙY TÀR woo Nyùy won shó, bìʼ fo yì‑iì dzəə̀n vitsə́ʼ vímóʼ ví é ŋwee foo fèy, wù fəə́r ven fó wòŋ Ejiv.

²Nyàm cù ye vèn wíy a lì, a yiì Ŋkǎʼ Yáʼayshaà sho kù wíy a dzə nàʼ, kìn njiì fo věn mvə̀m nyàm, a wìr kù wíy a dù a dzə̀ é kirə̀ʼ ke NYÙY TÀR wíy shoʼ ji á wáa ghvəm wun fo.

³Lá vèn yòʼ wìy a yi nyam cù rə̀n e kibán ke nyaà kí. Vèn kù wíy a yi a dzə̀ e kibán kee là nyaà kí, a yi bèn kishiíy saàmbà. Vèn kù wíy a yi kibán kìn ke kfə̀n dzəə̀n kibán ke ŋgeʼ ki, é kí fíʼ a yiì, é vèn wáa kuumé mo vé‑eè fəən fó Ejiv e kigir ki, a kuumé bèn kishiíy ké ndzə kidzə̀m ke vèn wíy a beʼrí e nsay fèn.

⁴Lá wìr yòʼ wìy lèm nyaà e wun lav. Lá nyaà yòʼ wìy a dzə woŋ wón e dzə̀m e vishiíy vee saàmbà vìn. Lá vèn yòʼ wìy bèr kifá fo nyàm ye á seé e ŋkuùr kishìíy ké mbìy ki, é kí meé kijàvndzə.

⁵«Lá vèn yòʼ wìy a seerí nyám si, a yiì cu Ŋkǎʼ Yáʼayshaà sho, a dzə̀ e věn ŋkà se laʼ se NYÙY TÀR woo Nyùy won wíy fo e vèn.

⁶Vèn kù wíy a yiì a dzə̀ é kirə̀ʼ ke NYÙY TÀR woo Nyùy won wíy shoʼ ji á wáa ghvəm wun fo, aá kù wíy a yiì e ŋkuùr, a shùy sí nəə, kù é ghan se vèn‑eè fəə́ fo Ejiv.

⁷Kù dzə̀ jii, vèn kù wíy a tòn, a kfər, a kù dzə̀ é kirə̀ʼ ke NYÙY TÀR woo Nyùy won wíy shoʼ. Ndzə javì, é vèn nèn lò, a kfənkír e věn tàv sí.

⁸Vèn kù wíy yi kibán kee là nyaà kishiíy ntuùfú, lóo dzə e kee saàmbà ki, é vèn báʼtí, a bùnrì NYÙY TÀR woo Nyùy won, e làa yòʼ yiì lim e kishiíy fóo fèy.»

⁹Mooser kfə́n a suúy e wír veé Israyi jii, «Vèn wíy táŋ ŋgàm saàmbà, e kèʼ fo ghan se vèn kèʼèn, a kav vifá,

¹⁰á nèn yiì cu *Ŋkǎʼ Vifa ve Kavín ví,[30] e ghvə̀m NYÙY TÀR woo Nyùy won shó. Vèn lóo yiì, é wìr wáa wìy e cu kimbòŋwùné mo shilív shé ŋgaàŋ shi yòŋèn, e kfə̀n a yiì mo NYÙY TÀR səə̀vìn wun.

¹¹Vèn wiy e NYÙY TÀR woo Nyùy wón si, e kirə̀ʼ ke wù wíy shoʼ ji á wáa ghvəm yír rə́ fó, aá wáa yinín, a sàvnìn vèn à wón vén vee vilume, à vee vikìyí, e kù a sàvnìn sa vèn aàkwàn vén vee vilume, à vee vikìyí, à wír veé ram Levi ve á dzə̀kìn e věn ŋkà se laʼa. A sàvnìn vèn à viŋgwìy vi, à wón tsə̀ə́, à vikǐy ŋkfə ve á dzə́ e věn mvəmé.

¹²Vèn ku wìy a lèm nsər sìn si, a kuumé ji vèn‑eè dzə̀ akwàn é wòŋ Ejiv.»

¹³Mooser kfən sùúy e wír veé Israyi jii, «Vèn wíy a yiì *Ŋkǎʼ Tàv sé Ghan, a wú wíy a dzə kishiíy saàmbà, a vèn báʼtí ne vifá fo riimé ve á kavin, e bàʼtí meluʼ me á nyèŋèn.

¹⁴Vèn wíy lóo yi ŋkàʼ vən, á wàa sàvnìn vèn à wón vén vee vilume, à vee vikìyí, aàkwàn vén vee vilume, à vee vikìyí, à wír veé ram Levìi, à kiŋgwìy ki, aàlàtàrí, à vikǐy ŋkfə ve á dzə́ e věn ŋkà se laʼa.

¹⁵Vèn wíy a yi ŋkàʼ vən kishiíy saàmbà, a ghvəm NYÙY TÀR shó e kirə̀ʼ ke wù wíy shoʼ. Vèn wíy lóo yi ŋkàʼ vən, á wàa sàvnìn, bìʼ fo vèn wíy a kuumé mo NYÙY TÀR woo Nyùy won səə̀vìn kéŋ yén wùn à lim sén sí.

¹⁶«Lùmèn e dzə̀m kù wíy a dù, a yi ŋkàʼ akàŋ ataár kiyá kidzə̀m, e kirə̀ʼ ke wúnwun woo NYÙY TÀR woo Nyùy won wíy shoʼ ji á wáa ghvəm wun fo. A ŋkàʼ see shooy si dzə̀ jii, *Ŋkǎʼ Kiban kee là Nyaà, wùn à *Ŋkàʼ woó bǎm Ŋgàm si, à *Ŋkǎʼ Tàv sé Ghane.

¹⁷Lá wìr yòʼ wìy a dù e NYÙY TǍR si wó wó. Wìr kù wíy a fo mo mentàsìn mvə mè dzəə̀n, a dzə̀ mo NYÙY TÀR woo Nyùy won səə̀vìn ŋgaàŋ.»

¹⁸Mooser kfə́n a suúy e wír veé Israyi jii, «Vèn wíy lóo dzə e ŋkà se laʼ se NYÙY TÀR woo Nyùy won wíy fo e vèn, vèn wàa shoʼtí vilìmbìy wùn aàkwàŋnsaʼa mo rám sén sí dzə̀kìn, a lèm e ŋkà se laʼ sidzə̀m, a lèm sa wír ve á wáa tom áwune. Áwune kù wíy a kwàŋrì nsaʼ sén, a tinén tìítiy, là kiloʼ.

¹⁹Lá áwune yòʼ wìy tìnén nsaʼ e kiloʼ ki. Lá á yòʼ wìy a sə kòyàr, bìʼ fo kí yíi yiì, é wìr tínén nsaʼ kintéŋ, a ŋgaàŋ fə̀m dzə̀ fií, kìn wír wo wù lo, wù yiì kinyo tìítiy.

²⁰Kù dzə̀ yii yee tìítiy, a kù mày yee shooy bèy, ye NYÙY TÀR woo Nyùy won taʼà, é bo vèn wìy gòʼ, e yòv nsay ye wù fó e vèn.

²¹«Vèn wíy lóo bom kíy cù NYÙY TÀR woo Nyùy won, lá vèn yòʼ tùúy wúr nyùy woo *Ashera fo ghaŋ.

²²Lá vèn yòʼ wìy tùúy sa sə́y, a ghvəm ji nyùy. NYÙY TÀR woo Nyùy won ban kee shooy.»