Read Lamnso Remrí 19 Bible Online

Remrí 19 - Lamnso bible

Remrí 19

¹«NYÙY TÀR woo Nyùy won wíy tòn vitúm ve wù fó nsay yev e vèn, vèn lóo dzə, aá sə́ ne ŋkà se laʼ sév wùn à lav si, a dzə sho,

²vèn jàv woŋ woo shooy vibar vitaár, e shòʼ ŋkàlaʼ e mòʼón e kee shó ki. Shóʼ bèy, bo dzə̀ ŋkàlaʼ ye dzə̀ wír wo wù kì yuyrin wír là kiíy lèʼ, e dù, e lìr sho, e bòy. Vèn túŋ dzə́ə sí, é sí dukir é ŋkà se laʼ fèn se dzə̀ sí sə̀ wír, wù lèʼ, e tò fó cér. Vèn yii bèy, bo dzə̀ wìr wo wù yuyrin wír lo, wù yù fó leʼ, e to e yìmòʼ yee ŋkàlaʼ, e bòy.

⁴«Kee shoon ki wíy sə ŋgaà kinjuyrìwìr ji wù léʼ, e tò fó, e bòy. Kù dzə̀ wír wo wù yuyrin wùmòʼ é kimbùmmbúm, a bó wùn wun yòʼ‑oò sí kér ŋkfəə́mé.

⁵Á ku lì ji wìr wùn ŋkar rə kì dù é kòv ji á gwar á kicí, wù lóo màʼ njàm, yì meé fó nshwin, e koò fə́r, ye wù kpú, bo dzə̀ wù lèʼ, e dù e yìmòʼ yee ŋkàlaʼ, e bòy.

⁶A ŋkàlaʼ kì dzə̀ e mòʼón cáʼ, bo yì lóo dàrnìn, é ŋgaà ŋkfə́tír nyoori ŋgaà kinjuyrìwìr, e kòóy, e yùyrí bìʼ ntàm ye da. Yii bèy, yòʼ fə̀m kì dzə̀ á yùyrí wun, bìʼ fo wùn ŋkar rə yòʼ‑oò kér ŋkfəə́mé.

⁷Á kinyo ke kí yiìn, é bo m wáa yòŋ ji vèn wíy lèm a ŋkà se laʼ símóʼ sí sitaár bèy.

⁸«Wíy lóo dzə, a NYÙY TÀR woo Nyùy won dzə́sí ne nsay yen mo wù‑uù kàʼàn atǎr ram vén, e fò ven nsay e dzə̀m ye wù‑uù kàʼàn áwune shó,

⁹vèn tàr ŋkà se laʼ símóʼ sí sitaár, e dzə̀sì siy sho. Nyùy kù wíy fo ven nsay rə̀n. Kù dzə̀ cáʼ ji vèn ku wìy a lèm a nsər sidzə̀m se m fó e vèn lán və̀n ji á wáa kòŋ NYÙY TÀR woo Nyùy wòsən, a ghan e wun mbòv ghán sidzə̀m.

¹⁰A vèn dzə̀ là fóo dzə̀sì ŋkà se laʼ sìy bèy, bo wìr wo wù sàsìn, e yùyrí wùmòʼ é kimbùmmbúm yíi lò, e boŋ kpú e věn nsay ye NYÙY TÀR woo Nyùy won fó e vèn ji vitsə́ʼ. Kí kooy bèy, bo vèn gbù ne njò mensə.

¹¹«Yii bèy, a dzə̀ wìr wàa bàn wír, e dù, e làáy, a teʼ, e yiì koò, e lèmér e dzəə ye wù kpú, é wù léʼ, e lìr e ŋkàlaʼ yìmòʼ fo sin si.

¹²Kí koóy bey, bo atǎr ntèʼ yee fo wù kì loòné tsə́nsi ntum e ŋkàlaʼ foo fèy, aá shaʼ wun fo fo, e siìr e bàm, aá fó, é ŋgaà ŋkfə́tír yúyrí.

¹³Lá vèn yòʼ wìy rə̀r mendzən mvə. Vèn ku wìy tùŋ kinyo ke kinjuyrìwìr kee kúmé kí, e fə̀ə́r fo Isray, é vishí vi nèn wìy a bòŋ ven.

¹⁴«Vèn wíy lóo dzə e nsay ye NYÙY TÀR woo Nyùy won fó e vèn ji vèn yov ji vitsə́ʼ, lá vèn yòʼ kùvsín bìíy se vèn aàfə́r véné, se wìr ŋgùʼ‑uù toʼtin, e wày tíy fó.»

¹⁵Mooser kfə́n a suúy e wír veé Israyi jii, «Bó njen e mòʼón yoʼ gheén ji wù gov wír bìʼ jay wo ŋgaàŋ kì jayin, a fə̀m dzə̀ woo ka. A dzə̀ anjene kù a dzə abaà, kìn ataár, é bo á wáa ròn jay wìr.

¹⁶A njen kimboʼtì wùmòʼ wìy lò, e sàyín ji fər və jày á kinyo,

¹⁷bo á li wír vee abaà ve á kér melaà, e wìy, e tiír e NYÙY TǍR si, áàtàá cù wùn aàkwàŋnsaʼ ve á sáʼ e ghan fóo fèyi tar.

¹⁸Akwàŋnsaʼa wíy bonén, e tàr, kí koóy ji njen kì dzə̀ á wo kimboʼtì, a wù tóy fə́r və kisáŋ,

¹⁹bo á lóvti sho réŋréŋ mo wù kì taʼ, e lovtí e fər və. Á ku yiì bèy, e fíʼ tuŋ liì kisaŋ və̀n, e fəə́r fo věn mvəm.

²⁰Kibér ki yií yú kinyo ke kí kooyin, aá fan, é la wìr yòʼ kfə̀n dzəə wìy bùʼ kfə́ə kinyò kee ben e věn mvəm.

²¹Lá vèn yòʼ wìy rə̀r mendzən me wìr. Ŋkfə́tir dzə̀ʼə̀m kù wíy a dzə dzəʼə̀m, é wo si wáa dzə sí, é wo sòŋ wáa dzə sóŋ, é wo kiwo wáa dzə kiwó, é wo kiwuù wáa dzə kiwuú.»