Read Lamnso Remrí 2 Bible Online

Remrí 2 - Lamnso bible

Remrí 2

¹Mooser kú a shaà fo mbìy, a suúy jii, «Vèsən wìy lò, e bìnkìr, a kfən e woʼ e dzəə ye yì du e Rìbà Ndzə̀v wo Baar mo NYÙY TÀR‑iì yòŋèn e mò. Vèsən kú a ghan, a jan vishiíy vishiíy é wòŋ Seir, a wú dzə̀ agwan agwan.

²«NYÙY TÀR nèn lò, e yòŋ e mò jii,

³‹Vèn rə̀sí ne, e jàn é wòŋ agwan fèn e ŋàŋ. Vèn binkir lèn, e kìʼ mbìv yee kuy.›

⁴Wù kfən yòŋ ji m suúy á e vèn jii, ‹Vèn sí lo, a tosín woŋ Seir wo dzəə̀n nsay afə̀r vén vee rám Esav. Áwune yíi a fàn ven. Yii bèy, vèn wáa yen

⁵fó sə̀ʼ áwune e rə́r sí, bìʼ fo bó m yòʼ yíi fo kimbàr ke nsay yev e vèn, a fə̀m dzə̀ ke a dzə̀ tìím kiwuú shó. Kí dzə̀ bey, bìʼ fo mò‑oò foon ne woŋ agwan woo Seir e Esav ji vitsə́ʼ və́.

⁶A vèn taʼ vifá ve yi, kìn mendzə́v mé a no, bo vèn yíi a yun yunén fo áwune, a làʼ e mbàm si.

⁷A dzə̀ vèn kù yiì bèy, bìʼ fo NYÙY TÀR woo Nyùy won‑eè səə̀vìn vinyo vidzə̀m ve vèn‑eè yii. Wù‑uù leey fo vèn, a vèn ghán, tósin nsay wòʼ ye wiy rə̀n. E viya vee mkweè vìn ve NYÙY TÀR woo Nyùy won‑eè dzəə̀n vèn áwune, vèn yòʼ‑oò tan kifá.›

⁸«Nyùy‑iì yòŋ bey, vèsən nèn dù, e tèém, e bàʼàr afə́r vesən vee rám Esav ve vé‑eè dzə́ e Seir, e bàʼàr dzə́ə yeé mbuŋ Araba ye yì du e Elat, du e Etsiyon‑Geber. Á lò fo fo, e nèn a dù e dzəə̀ wòʼ yeé Moav.

⁹NYÙY TÀR kfən yòŋ e mò jii, ‹Lá vèn yòʼ tìnsín wír veé Moav, lá vèn yòʼ sə̀ʼ áwune é rər. Yòʼ dzə̀ m yiì fò kibar kév ké nsay ji vitsə́ʼ vén, bìʼ fo mò‑oò foon ne Ar wùn à nsay yee fó e rám Loti ji vév vee vitsə́ʼ.› »

¹⁰«Wír ve vé‑eè dzə́ e Ar fo mbìyi‑iì dzə̀ wír veé Emim. Áwune‑eè dzə̀ antav, aá dzə̀ nyanyày, a kfə̀n dzə̀ viŋgáʼ ve wíri moo wír veé Anak bèy.

¹¹Á kfə̀n‑eè yoŋ áwune ji wír veé Refayim, kù mo vé‑eè yoŋ sa veé Anak, yii bèy, a wír veé Moavi yoŋ kév áwune ji wír veé Emim.

¹²Wír veé Hori‑iì dzə́ fo mbìy e Seir, yii bèy, rám Esavi jùm áwune fó fo, e laàr kitúm kév, e yòv nsay yev, kù réŋréŋ mo wír veé Israyi‑iì duùn, e jùm wír veé Kanan, e yòv nsay yev ye NYÙY TÀR‑iì foon aáwune.»

¹³Mooser kú a shaà fo mbìy jii, «NYÙY TÀR‑iì yòŋ e vèsən jii, ‹Vèn ŋáʼáy lèn, e tùmsín kiwoóy ké ndzəv yee Sered ki.›[6] Vèsən ku nèn ŋàʼáy, e tùmsín.

¹⁴Yì‑iì sì kiyá nshòv waamé e mtaár, e kèʼ mo vèsən‑eè loòn fó Kadesh‑Barnea, e wìy a tum kiwoóy kin. Wáa dzə e ghan sin, a ŋgwàʼ yee ye mbìy dzə̀, a wìr wo dzə̀ wù dù rə́r réŋ ne, e mày fo kibeèy, kù mo NYÙY TÀR‑iì lìʼìn aáwune.

¹⁵Rúrú, kiwó ke NYÙY TÀR kí‑iì roomè áwune, aá kpúkirì, e dù, e meé mo vé‑eè màyìn fó kibeèy.

¹⁶«Mo vé rər ve yì‑iì dzəə̀n wír vee ŋgwàʼ mbìy rə̀yi‑iì kpukin, e mày fo wírí mvəm bey,

¹⁷NYÙY TÀR nèn yòŋ e mò jii,

¹⁸‹E kishiíy ké lán ki, vèn yíi ghan, e tosín nsay Moav dzə́ə fó Ar.

¹⁹Vèn du, méʼ nsay wìr veé Ammon, lá vèn yòʼ tìnsín áwune, kìn ji vèn səʼ áwune é rər. M yòʼ wíy fo kirə́ʼ kév ké nsay kímóʼ kí e vèn ji vitsə́ʼ vén, bìʼ fo mò‑oò foon ne fó e rám Loti ji vitsə́ʼ vév.› »

²⁰Á yoŋ sa kirə́ʼ kee shooy ji nsay wìr veé Refayim, a dzə̀ fo wír veé Refayime‑eè dzə́ fo mbìy. Yii bèy, wír veé Ammone yoŋ kév áwune ji Samsummim.

²¹Wír vìne‑eè dzə̀ antav, a vé‑eè dzə̀ nyanyày, a kfə̀n‑eè dzə̀ viŋgáʼ ve wíri moo wír veé Anak. Yii bèy, NYÙY TÀR laàr áwune, é bo wír veé Ammone dzəʼəm fó.

²²Kù dzə̀ sá réŋréŋ mo NYÙY TÀR‑iì səən rám Esav ye yí dzə́ e Seir. Wù‑uù laàr a dzə̀ wír veé Hor ve vé‑eè dzə́ fo, fo mbìy. Rám Esavi kù dzəə́ dzə́ fo e shem lán.

²³Wír veé Kaftor ve vé‑eè loòn fó Kaftori‑iì wìy, e laàr wír veé Avvim, a wír veé Avvim vìne dzə́ e ntèʼ sí ntèʼ sí, e dù, e meé e Gasa. Á laàr áwune bey, e nèn a dzə fo.

²⁴Mooser kú a shaà fo mbìy jii, «Vèsən‑eè tòsín Moav, NYÙY TÀR yòŋ e vèsən jii, ‹Vèn ŋáʼáy, e bàʼtí vifá vén ví, e dù, e tùm kiwoóy ké ndzəv yee Arnon ki. Ké ru kí, m wày ne Sihon woo wír woó Amor wo dzəə̀n fon woó Heshbon wùn à nsay rə e věn kiwo. Vèn keʼ, a màʼ wun e rə́r sí, a faàsì nsay rə.

²⁵E kishiíy ké lán ki, m sí yii, é wíri keʼ, a ker kindzə́m kee bìʼ ven, wìr dzə̀m woó kitu ke nsay lóo yu leŋ wón, é wù wáa fàn, a yàʼ.›

²⁶«Á bèy, mo woo Mooser nèn tsə̀nsí aŋgàa ntum fo woʼ yeé Kedemot, á dù, e bùn Sihon woo fon woó Heshbon e jí see weè si, a suúy sho jii,

²⁷‹Á ku màʼtì, é vèr shaa á e wun nsay dzə́ə dzə́ə, e làa yòʼ bìn a e kirə̀ʼ, kìn dzə̀ é mbìv koy yìyí, kìn dzə̀ é mbìv koy ŋkoòvìi.

²⁸Vèr kù yíi a yun a vifá ve yi yúnén fo fòn, e bó a yi, a yun a mendzə́v yúnén, e bó a no. Kù dzə̀ cáʼ a ji fòn ku màʼtì, é vèr shaa á dzə́ə dzə́ə,

²⁹kù mo wír vee rám Esav ve á dzə́ e Seir wùn à wír veé Moav ve á dzə́ e Arìi‑iì yiìn e vèr. Vèr shaa, é vèr túmsín á Jordan, e nə̀ə́ e nsay ye NYÙY TÀR woo Nyùy wor foon á e vèr.›

³⁰«Yii bèy, Fòn Sihon woó Heshbon yòʼ‑oò lo màʼtì ji vèr wàá shaa á e wun nsay. A kí dzə̀ jii, NYÙY TÀR woo Nyùy wòsən‑eè tàvír ne shilív sə́, e fíʼ way wun wùn à wír vəə́ e vèsə́n kiwo, mo wù yiìn ne kí koóy ben.

³¹«NYÙY TÀR nèn yòŋ e mò jii, ‹Ké ru kí, m sí wáy Fòn Sihon wùn à woŋ vəə́ e věn kiwo. Vèn keʼ, a faàsì nsay rə, e fíʼ yìi yòv.›

³²Á bèy, Sihon wùn à vé rər və́ adzə̀me fəə́, e taàmé ver e rə́r sí é Jahas.

³³Sí màʼ, NYÙY TÀR woo Nyùy wòsən wáy áwune e vèsə́n kiwo, vèsən tòn wun, e tòn wón və́, à wír vəə́ adzə̀m.

³⁴Vèsən‑eè sùm fó, e tòn ŋkà se laʼ sə́ sidzə̀m e ghan fóo fèy, e laàr vilum wùn à vikìy, à wóné, la kintiʼ ke wìr ki yòʼ bèr.

³⁵Vèr nèn lì nyám si, e kùúy vifá fo ŋkà se laʼ.

³⁶E kèʼ fo Aror, e ŋguùŋè mboʼ ndzə̀v yeé Arnon, à fó ŋkàlaʼ ye yì dzəə̀n é mboʼ, e dù bèn, e bàʼ e Gilead, bó ŋkàlaʼ yòʼ‑oò ló a dzə ye yì‑iì kér kikum ke kày ke kí gháʼ vèsən. NYÙY TÀR woo Nyùy wòsən kù‑uù wày sidzə̀m e vèsə́n kiwo.

³⁷Kù‑uù jòʼsì nsay wìr veé Ammon, a dzə̀ ji nsay e dzə̀m yeé ghaŋ se ndzəv yee Jabbok wùn à ŋkà se laʼ seé wòŋ agwan si, à kirə́ʼ kidzə̀m ke NYÙY TÀR woo Nyùy wòsən‑eè shaʼnin kí, ke á yòʼ‑oò lo kùm.»