Read Lamnso Remrí 20 Bible Online

Remrí 20 - Lamnso bible

Remrí 20

¹Mooser shaà fo mbìy, a yòŋ e wír veé Israyi jii, «Vèn wíy du ji á tám é shùu rər vèn aàŋgaà vén vibàné, yén, aá kér nyám se ŋkoʼ wùn à *viténtén vé rər ví, à shúu rərí nyanyày, e shaà wón, lá vèn yòʼ fàn áwune. NYÙY TÀR woo Nyùy won dzə̀ vèn áwune. Dzə̀ wun wo wù‑uù liìn ven, e kòʼ shó fo Ejiv.

²Vèn lóo meʼ rə́r, taà cù fəə̀sín, e tìím, e kà e wírí si jii,

³‹Haà, wìr veé Isray, vèn yuúrí. Vèn sí du, e tam vèn aàŋgaà vén vibàné e kishiíy ké lán ki. Lá kindzə́m kí yòʼ gwàr wír. Lá wìr yòʼ fàn, kìn ji wù yaʼ. Lá vèn yòʼ biìmé ji áwune bémér ven.

⁴NYÙY TÀR woo Nyùy won dzə̀ vèn áwune. Wù maʼ rə́r sén, yii, a vèn ton aŋgaà vén vibàn.›

⁵«Á bèy, é vilìmbìy vi nèn yòŋ e wíri jii, ‹A lùmèn dzə̀ fen, a wù báʼrí lav e fíy, a wù yóʼ ne mvə̀ʼ, e dìn e Nyùy, wù wàa kfən e bàm e wun lav. Là bey, wù kpú é shùu rər, bo wìr wo sən yíi mvə̀ʼ.

⁶A lùmèn dzə̀ fen, wo wù lìmèn súm vitiír vé *vayin, a bó wù yóʼ ne kòy kóy mbìyi[32], e yì kitú sho, wù wàa kfən e bàm e wun laʼ. Là bey, wù kpú é shùu rər, bo wìr wo sən yíi a yi kitú sho.

⁷A lùmèn dzə̀ fen, wo wù nəən wiíy, a bó wù yóʼ ne wày é lav, wù wàa kfən e wun laʼ. Là bey, wù kpú é shùu rər, bo wìr wo sən‑éè wáy é lav.›

⁸«Á bèy, é vitú ve saʼ vi kú a shaà fo mbìy, a saarí e wírí si jii, ‹Lùmèn dzə̀ shó fèn, wo wù fanè, a dzə̀ mkpushìlìv á? A wù dzə̀, wù wàa kfən e bàm e wun laʼ. Búŋ là bey, bo melív me afə̀r mè lo, e seèm sa moo sə́.›

⁹Vitú ve saʼ vi maysì kiŋka kév, saári e wíri, aá nèn shòʼtí amfòómé, e lèm e vitu ve akáŋ.

¹⁰«Vèn wíy méʼ ŋkàlaʼ ji á funènè, vèn tòmbìy fò kintóʼ ke dzə̀ áwune rə̀tì, e fò shiŋkfəŋ.

¹¹A ŋkàlaʼ rə̀n mvə̀ʼ shúu kày və́, e yòŋ jí see nyaáŋ e vèn, bo vèn sí sor wir dzə̀m woo fó, aá wáa dzə akwàn vén, a tuŋ akwiiròn fo vèn.

¹²Yii bèy, a wír vee fóo tèn ji á yòʼ‑óò fó shiŋkfəŋ, e taàmé ven e rə́r sí, vèn lì shúu rər wón, é wú giŋ ŋkàlaʼ yev, e kaàrí, e tàr.

¹³NYÙY TÀR woo Nyùy won wáy áwune e věn kiwo, vèn laàr lumèn e dzə̀m fo fo e nyùy yen rə̀r.

¹⁴Yii bèy, a vèn wíy lì vikìy wùn à wóné, à nyám si, à kifá ke aŋgaà vén vibàn kí kidzə̀m ji vifá ve á koon fó kwaʼ rər, a yi feyì ji vifá ve NYÙY TÀR woo Nyùy won foon e vèn.

¹⁵Á mo vèn wíy a lovtí e ŋkà se laʼ se sí dzəə̀n kwaʼda fo wòŋ wo vèn wíy a dzə shoo bey.

¹⁶«Yii bèy, ké ŋkà se laʼ se wìr ve NYÙY TÀR woo Nyùy won fó ji vitsə́ʼ vén, vèn wíy laàr kifá kidzə̀m ke kí ŋeʼè fo fo, kìn dzə̀ wír, kìn nyám.

¹⁷Vèn ku wìy laàr wir dzə̀m woó Hit, à woó Amor, à woó Kanan, à woó Peris, à woó Hiv, à woó Jebus réŋréŋ mo NYÙY TÀR won yòŋèn e vèn.

¹⁸A vèn bàvtí áwune, bo áwune lo, e yeʼéy ven jooně liì wo áwune kérí, bìʼ anyùy ve á ghvə́mé, é vèn yii kinyo ke bi kí e NYÙY TÀR woo Nyùy won.

¹⁹«Vèn wíy gim ŋkàlaʼ e rə́r sí, lóo fùnèn ji á yov, ntàm lóo dàr, lá vèn yòʼ teè vicí. A dzə̀ vèn wàa kfər vicí vee shooy, e làa yòʼ bàʼtì. Vicí ví siì kì dzə̀ aŋgàa vibàn vén á, é bo vèn wáa lovtí sho bèy.

²⁰A dzə̀ vèn bàʼtì vicí ve vèn kiìn ji bó á yòʼ yii yí, e fèr viráŋ sho, kìn á fer virə́ʼ vé ŋkiy sho e ŋkàlaʼ ye vèn funènè, e dù, e meé mo vèn yíi tòn.»