Read Lamnso Remrí 21 Bible Online

Remrí 21 - Lamnso bible

Remrí 21

¹Mooser suúy e wír veé Israyi jii, «Vèn wíy lóo dzə e nsay ye NYÙY TÀR woo Nyùy won foon ji vèn yov, kí kooy ji á yén wír, aá yúyrí, e màʼ dzə́n é kwaʼ,

²bo atǎr ntèʼ wùn aàkwàŋnsaʼa fəə́kir fo, e fìʼ ntàm yee kèʼ fo á yenen dzə́n, e dù, e mày e ntèʼ se sí dzəə̀n fó mentsə̀m.

³Á bèy, é vilìmbìy ve ví dzəə̀n é ntèʼ yee fó mentsə̀m ví nèn tàʼ wan nàʼ wo bó á yóʼ ne lìm lim sho, aá yóʼ ne kùr fáŋ e kilòŋ wó.

⁴Á taʼà, aá nèn kaày sho e kiwoóy fo ndzə́ví yii léŋ ghán sidzə̀m. Á mee, aá taʼ kirə́ʼ ke á yòʼ‑oò yiì ne lìm ji súm, kìn ji á biy kifá fo, e nèn lì wan nàʼ, e dù sho fo, e kìv kilòŋ fó fo.

⁵Á lóo dù bèy, áàtàá cù, áwune vee rám Levìi ku dù sa fo, bìʼ fo NYÙY TÀR woo Nyùy won‑eè shavin ne áwune shávín ji á wáa yiì lim rə́, e kfə̀n a beè wun, é wù wáa səə̀vì wíri, a tinén nsaʼ sév, bo taaka see kùm kileémé.

⁶Á bèy, é vilìmbìy vidzə̀m ve ví dzəə̀n é ntèʼ ye yì dzəə̀n é mentsə̀m me kirə̀ʼ ke á kì yuyrin wír sho vi nèn sù wó yév é kitu ke kimkpu ke wàn nàʼ fèy.

⁷Á lóo sù bèy, aá wáa ka jii, ‹Bó mensə́ me wìr və̀n mè yoʼ lèém, a dzə̀ e věr kiwo, a bó vèr yòʼ kì ŋgaà yùyrí.

⁸Kii wò, NYÙY TÀR, ku làysìn ajay wìr vé veé Isray ve wò‑oò fəərin fó Ejivi. Lá à yòʼ yiì, é wìr li njò, bìʼ wír wo á yuyrin, a bó vèr yòʼ kì fó fo. Ku làysìn jay wov, é la vèr yòʼ lì njò mensə me wìr və̀n.›

⁹Á bèy, a vèn lò, a yiì bèy, mo NYÙY TÀR taʼà, bo bó njò yee ji á kì yùyrí wír, a bó vèn yòʼ kì fó fo yòʼ dzəə́ yiì a koo ven.»

¹⁰Mooser kfən sùúy e wír veé Israyi jii, «A dzə̀ kí kòóy ji vèn wíy lóo màʼ rə́r vèn aàŋgaà vén vibàné, NYÙY TÀR tòm ven, vèn tòn áwune, e koòrí ámóʼó.

¹¹Á koó bey, lùmèn yén wiíy wo wù toon sí e mvə̀m wìr vìn, wù boŋ wun, wù wáa tàʼ, e lì ji wíiy və,

¹²wù lì, e wày é lav. Wáyí, wù kòm kitú fo fo, e kfə̀n sèyrí vighiy.

¹³Wù wíy shóʼ ndzə̀y se vé‑eè koó e kwaʼ rər, a wù kér e wùn, é wù nèn dzə̀ʼə̀m e lùmèn lav ŋwee e fur, a dìy tàr wov wùn yè wov. Wù maysì, é lùmèn nèn màʼ wó e wùn wó, a ker ji wíiy və.

¹⁴Wù wìy lò, e làa yòʼ dzə́ə a kòŋ wun, wù nèn màʼtì wiíy woo shooy, é wù wáa dù fo wù taʼà. Yii bèy, a bó yòʼ dzə̀ wù fiìnè, e sə̀ mbàm, a bó yòʼ dzə̀ wù wàa nə̀ʼsì moo kwàn, bìʼ fo wù‑uù kànèn wun kánen, e bóo lì ji wíiy və.

¹⁵«A tàm wìr wàa ker vikìy abaà, a kòŋ wùmòʼ, a shaà wùmòʼ, a wù dzəə́ ne wón shó adzə̀m, a wàn mbìy woo lumèn dzə̀ wan wiíy wo bó wù yòʼ koŋè.

¹⁶Kí koóy bey, wù wìy lò, a jàv kéŋ rə́ e wón vikìy vee abaà víne, la wù yòʼ lì vifá ve wo mbìy, e fò e wo wiíy wo wù koŋè ji wun din medzə̀jeéy.

¹⁷Wù kù kér fóo fo vifá e wàn wiíy wo wù ban və̀y, e dzə̀sì, e fíʼ dìn ji dzə̀ á wán və mfùmèn.»

¹⁸Mooser kfən sùúy e wír veé Israyi jii, «A wìr kér wán woo lumèn, a wù táv kitú, tsə́y kóy, tén fó a yunín ji kitàr wùn à ye kiyìy kí, aá sər, a bó wù yòʼ yú,

¹⁹bo dzə̀ tàr wàn wùn à kiyìy kí lì, e dù sho aàtǎr ntèʼé si, aá sáʼ.

²⁰Á du bèy, aá suúy áàtǎr ntèʼ vee fóo jii, ‹Wan wor və̀n táv kitú, tsə́y kóy, tén fó a yunín ver. Dzə̀ yíbuùkpú, a kfə̀n dzə̀ sá mfoòkìnó.›

²¹É vilum adzə̀m veé ŋkàlaʼ foo fèyi nèn tsə̀mrí e tíy sí, e yùyrí. Á ku yiì bèy, e fíʼ tuŋ liì kisaŋ, e fəə́r fo věn mvəm. Wìr dzə̀m woó Isray yú kinyo ke kí kooyin, aá wáa fàn.

²²«A wìr lòo dzə, e bùʼ kinyo ke dzə̀ á yùyrí wun, á keeri wun e kici, wù kpú,

²³lá vèn yòʼ màʼtì dzə́n rə́, é yí shiíy é kici. Á ku dzəə̀mè wun e si kishiíy, bìʼ fo á keerì wír e kici, bo lǒn Nyùyi sì é kitu wo. Lá vèn yòʼ wìy e *kifàn kí é nsay ye NYÙY TÀR woo Nyùy won fó e vèn ji vitsə́ʼ vén.»