Read Lamnso Remrí 24 Bible Online

Remrí 24 - Lamnso bible

Remrí 24

¹A tàm kí kòóy ji wìr wáy wiíy e lav, e yiì lò, e tàn shíi və, bìʼ kinyo kímóʼ kí ke kí kor shilív sə́. Wù nèn lò, e sàŋ ŋwàʼ njàvsìn, e fò shó, e fə̀ə́r fo wun lav.

²A kí ben kòóy ji wiíy və̀n yiì lò, e dù, e nə̀ə́ e wìr wùmǒʼ lav ji wiíy,

³wìr woo shooy du, e kfə̀n tàn shií fo wun, e siì sàŋ ŋwàʼ njàvsìn, e fò shó, e fə̀ə́r fo wun lav, kìn dzə̀ ji woo shooy lò, e kpù kpuún,

⁴bo a dzə̀ lúm woo wo mbìy wo wù‑uù fəərin wun, la wù yòʼ kfə̀n lì ji wiíy, bìʼ fo wù siìn lèn ji kifá ke nsəə̀laʼ ki fo wun. A wù kfə̀n lì ji wíiy və, bo sì kinyo ke bi kí e NYÙY TǍR si. Lá vèn yòʼ wìy sə̀ŋ lòn, e bìvír nsay ye NYÙY TÀR woo Nyùy won fó e vèn ji vitsə́ʼ vén.

⁵A wìr kòóy wiíy e fíy, bo bó yòʼ dzə̀ á tsə̀nsí wun e shùu rər wùn à kibér ke vé rər kí, kìn ji wù du lim yímóʼó. A dzə̀ wù kù dzə̀ʼtì wùn wiíy kiyá kifur, é wùn wiiy və wo wù liìn bónén, e yiì viŋgér.

⁶Wìr foor wír kifá, lá wù yòʼ sə̀ ŋgòʼ kiban fo fo ji ŋgaàŋ tìír e wun. Kee shooy ki sen dzəʼə̀m wìr veé lav foo fèy.

⁷A kí kòóy ji wìr Isray koó fə́r və ji kifá ke way, a lì ji kwàn, bo ŋgaà koo woo shooy yíi kpu. Vèn ku yùyrí bèy, e fíʼ tuŋ liì kisaŋ, e fəə́r fo věn mvəm.

⁸Wìr lóo ker yàsí woó jùv wùn,[39] wù kù mùm, e yiì réŋréŋ mo atàá cù, áwune vee ram Levìi naàrìn, a kù dzə̀ mo mò‑oò yòŋèn aáwune. Á mo vèn kú a yiì.

⁹Vèn kuúmé kinyo ke NYÙY TÀR woo Nyùy won‑eè yiìn e Miriam, e ghan se vèn‑eè wiy fo Ejiv ki.[40]

¹⁰A wìr foòr wír kifá, kìn dzə̀ kee ka, ŋgaàŋ tiír kikfə́vsì kfə́ shó, lá wù yòʼ nə̀ə́ e wun lav ji wun sə́.

¹¹Wù ku shìy e shùu lav, é fəə́ wun woo ŋgaà lav, e fò e wun.

¹²A ŋgaàŋ lò a dzə ghéʼncey, la wìr yòʼ lèm kikfə́vsì kfə́ kin, é kí shiíy.

¹³Lóo dzə e meraaràŋ, à dù, e siìr sho, é wù wáa ker kifá kée kfəvsí. Wù lóo sheʼrí wò, é wáa dzə kinyo kee tìítiy ke à yiìn e NYÙY TǍR si.

¹⁴Lá wìr yòʼ wìy bòʼ wir kilàʼ, wù dzə̀ ŋgaà kitàn. Lá wù yòʼ mùm, kìn ŋgaà lìm woo shooy dzə̀ fə́r won wùmòʼ, kìn dzə̀ beèshaà wo wù dzə́ e věn nsay e mvə̀mlaʼ yìmòʼ.

¹⁵Ku làʼ ŋgaàŋ e si kishiíy, é bo shùy wáa nəə́, bìʼ fo wù dzəə̀n ŋgaà kitàn, a wù yoy, kù tiir a dzə̀ shó. Là bey, wù tóŋ, e tàŋ wò, e kàn NYÙY TÀR shó, bo à kù yíi bìnèr fo jay.

¹⁶A wìr bùʼ kinyo ke dzə̀ á kù yùyrí, bo á kù‑úù yúyrí a dzə̀ ŋwèrín. Kitàr kí yòʼ wíy a kpu yé wan, a wàn yòʼ wíy a kpu yé kitàr. Á kù wíy a yuyrí wír a dzə̀ bìʼ kinyo ke ŋgaàŋ bùʼùn.

¹⁷Lá wìr yòʼ lòʼ kiŋgwìy, e bìn kinyo kév kintéŋ. Kìn dzə̀ wír woo là tàr. Lá á yòʼ koò ndzə̀y sé wiíy ŋkfə e kaa.

¹⁸Vèn kuúmé ji vèn‑eè dzə̀ akwàn é wòŋ Ejiv, é bo NYÙY TÀR woo Nyùy won tín ven fó fo. Á nsàv ye m yoŋ ji vèn wáa yiì vinyo vìn.

¹⁹Vèn wíy káv vifá fo kwaʼ, laysìn mbeʼ yìmòʼ fó, lá á yòʼ kfə̀n ji á du, e lì. Vèn maʼti fó, é wáa dzə ye beèshaà, kìn ye wàn tsə̀, kìn wiíy ŋkfə. Vèn lóo yiì bèy, é NYÙY TÀR wáa səə̀vì lim sén sidzə̀m.

²⁰Vèn wíy lóo kòy báŋ se vici vé *oliv, báŋ símóʼ sí bér sho, lá vèn yòʼ kfə̀n ji á síyri. See shooy si dzə̀ sé abeèshaà wùn à wón tsə̀ə́, à vikǐy ŋkfəə.

²¹Vèn wíy káv báŋ si fó súm vitiír vé vayin, lá vèn yòʼ kfə̀nrí wuú. Ke kí bér ki yíi a dzə ké abeèshaà wùn à wón tsə̀ə́, à vikǐy ŋkfəə.

²²Vèn kuúmé ji vèn‑eè dzə̀ akwàn é wòŋ Ejiv. Á nsàv ye m yoŋ ji vèn wáa yiì vinyo vìn.