Read Lamnso Remrí 25 Bible Online

Remrí 25 - Lamnso bible

Remrí 25

¹Mooser wáa yòŋ jii, «A kí kòóy ji wíri lo, a taŋnín, e lò, e wìy sho e lav nsaʼ, á sáʼ, wùmòʼ gbu nsaʼ, wùmòʼ woo wír boy,

²kí wáa dzə ji á tám ŋgaà jay támén, bo kitú ke akwàŋnsaʼ ki yoŋ, é wù neem kfə̀ə́kfəv, aá wáa tam e wun si, e tam mo jay və dzəə̀n.

³Lá á yòʼ tàm, e shaà ŋgwàn mkweè, bìʼ fo, aá shaà bèy, bo á shòór ne fə́r won e wírí si.

⁴«Wìr li nyám ji yì wáa nyèŋ sáŋ, aá wáa fetí, lá wù yòʼ sùm shuu ji fo yì bóŋ sí.

⁵«A wíri dù a dzə afə́r afə́r, a dzə e kitu ke keŋ e mòʼón, wùmòʼ lo, e kpù là wán, lá á yòʼ màʼtì, é wíiy ŋkfə du e yèn lúm fo səné. A dzə̀ fə̀r ŋkfə kù lèm wiíy woo shooy, a ker ji və́ə, a leéy fo fo mo a kì dzə̀ woo ŋkfə, wù wàa leéy.

⁶Wán woo lumèn wo wùn wun yíi tòmbìy dzəə́, yíi a dzə njìlaʼ ŋkfə fə̀r, é la yír rəə́ yòʼ dzəə wìy lày fo Isray.

⁷A ŋgaàŋ tèn fóo lèm wiiy ŋkfə fə̀r, bo wun woo wiíy du, e yen atǎr saʼ e shùu kày yeé ŋkàlaʼ, fo á yii sáʼ nsaʼ si, e bi áwune shó. Du, é wù yoŋ jii, ‹Fə̀r lum wom tèn ne fó lèm mo, aá fíʼ dzəə́ njìlaʼ ŋkfə fər və, fo yír rəə́ lay fó Isray. Wù yòʼ leey fo mò mo a kì dzə̀ ŋkfə fər və, wù wàa leéy.›

⁸Á bèy, áàtǎr ntèʼé nèn jàŋ wun, e sùŋnín sho. Á súŋninè, wù tén yú, yoŋ ji bó wun yòʼ koŋ, e lèm a wun,

⁹bo wiiy ŋkfə fə̀r sí kóʼti e si wo, áàtǎr ntèʼé yéné, e shoʼ lábáʼ fo fə̀r lum kiwuù, e cu mentíy e vishi wo, e yòŋ jii, ‹Á mo dzə̀ á yiì e ŋgaà wo wù tenen fóo lìy lav ŋkfə fə̀r ben.›

¹⁰Bo á sí wìy a yòŋ lav rə é Isray ji lav ŋgaà wo vé‑eè shoʼon lábáʼ fó wuù wó.»

¹¹Mooser kfə́n a suúy jii, «A vilum lò abaà, a fùnèn, wiiy wùmòʼ woo wír wiy kiŋkaày, e lò, e tò, e ghàr və̀y woo lumèn fo wǔn vilum,

¹²á kù shèr kiwó kfə́ shérin féyì là mendzən.

¹³«Lá wìr yòʼ wìy a ker mfìʼ se vidzəə̀sì e wun kibàm sibaà, ye yì dzərì wùn à ye yì caarì.

¹⁴Lá wìr yòʼ wìy a ker vifá ve mfìʼ e wun lav vibaà, ke kuʼùn kí wùn à ke terí kí.

¹⁵Wìr kú a ker mfìʼ si, a dzə̀ se sí dzəə̀n rú, e kfə̀n a dzə see tìítiy, kìn dzə̀ ye vidzəə̀sì, kìn dzə̀ ye vifa ve maʼàn ví, é vèn nèn wìy bònen bèʼrí e nsay ye NYÙY TÀR woo Nyùy won fó e vèn.

¹⁶Vèn wáa kiíy jii, wìr wo wù yii vinyo vee bey, shwiv kinshwìv, sì ŋgaà joònè e NYÙY TÀR woo Nyùy wón si.

¹⁷«Vèn kuúmé kinyo ke wír veé Amaleki‑iì yiìn e vèn, a vèn fəə́ fó Ejiv, a wìy.

¹⁸Áwune yòʼ‑oò ló a fàn Nyùy, bìʼ bey, e nèn tèʼ ven é dzəə, a vèn dórkír ne, e mày, e nèn laàr wír vén ámóʼó ve vé‑eè lav fo bàm adzə̀m.

¹⁹Kí nén a dzə jii, NYÙY TÀR woo Nyùy won wíy yii, vèn meemè fo aŋgaà vén vibàné wo adzə̀m, áwune ve á kaarin ven, e tàr é nsay ye NYÙY TÀR woo Nyùy won fó ji vèn yov ji vitsə́ʼ vén, vèn laàr wír veé Amalek adzə̀m fo kitu ke nsay ŋkuuŋkùŋ. Vèn wáa yen fó wìy làysìn.»