Read Lamnso Remrí 27 Bible Online

Remrí 27 - Lamnso bible

Remrí 27

¹Mooser wùn à vilìmbìy veé Isray vi nèn lò, e yòŋ wíri, e sùúy jii, «Vèn wáa lèm nsər sidzə̀m se m fó e vèn lán si.

²Lóo dzə e kishiíy ke vèn liysin ndzə́v yee Jordan, e nə̀ə́ e nsay ye NYÙY TÀR woo Nyùy won fó e vèn, vèn tùúy lúm se tiy, e yòʼ e fém si.

³Yóʼó, vèn sàŋ nsər sìn wùn à ntir sìn si shó sidzə̀m. Vèn ku sàŋ, aá líysín ne ndzə́v yee Jordan, e nə̀ə́ e nsay, a vín nàʼ wùn à vilu vi tsəətìn sho tsə́ətin. Nsay ye NYÙY TÀR woo Nyùy atàr vén‑eè kàʼàn ven shó.

⁴Vèn du, mee fo, á tùúy tíy sin e Gwan Ebal, e yòʼ e fém si, kù mo m yòŋèn e vèn é kishiíy ké lán ki.

⁵Vèn bóm kíy cù NYÙY TÀR woo Nyùy woné fó. Kíy cù və̀ne dzə̀, aá bóm e tíy ye bó kisha ki yoʼ kùme.

⁶Á ku bòm kíy cù NYÙY TÀR woo Nyùy won vən a dzə̀ e tíy yee là séme. Dzə̀ fo vèn wíy a yiì cu NYÙY TÀR woo Nyùy won ye tonèné,

⁷a yiì yé kikòŋnìn,[43] a yinín fo, a sàvnìn e NYÙY TÀR woo Nyùy wón si.

⁸Lá vèn yòʼ làysìn fóo saŋ nsər se Nyùy sìn sidzə̀m e tiy se vèn du, e tuúy. Vèn mum ji nsáŋtí ku ràn á kijuŋ.»

⁹Mooser wùn aàtàá cù, áwune vee rám Levìi nèn yòŋ e wír veé Israyi adzə̀m jii, «Vèn sə́sín, e yuùrí, e yù. Éè Isray, vèn yú. E kishiíy ké lán ki, vèn sì wír NYÙY TÀR woo Nyùy won.

¹⁰Vèn wíy siiy, á wàa yunín jí NYÙY TÀR woo Nyùy won, a lèm nsər sə́ wùn à sáʼ rə́ ye m fó e vèn é kishiíy ké lán ki.»

¹¹Mooser nèn a yòŋ wír veé Isray e kishiíy fóo fèy, a suúy jii,

¹²«Vèn líysin ndzə́v yee Jordan, é rám sin si tiím é Gwan Gerisim[44], a səə̀vì wíri. Rám sin si dzə̀ jii, yé Simeon, yé Levi, yé Juda, yé Issakar, yé Joosev, à yé Benjamine.

¹³Rám se sí wíy koʼ e Gwan Ebal fo á wíy a yòŋ mo NYÙY TÀR lo, wù shòv wíri sí dzə̀ jii, yé Ruben, yé Gad, yé Asher, yé Sebulun, yé Dan, e lì yé Navtali.

¹⁴Á bèy, é wír veé ram Levìi nèn nàn jí kitávín, e yòŋ e wìr dzə̀m woó Isray jii,

¹⁵« ‹Lǒn Nyùyi ku koò wír wo wù fèrìn shibvə̀m, a wooné, a ghvəm, kìn dzə̀ shibvə̀m she semén shí, kìn shé kishà shi. Kifá, a fér wír e wóo ji nyùy, a dzə̀ joonè e NYÙY TǍR si.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

¹⁶« ‹Lǒn Nyùyi ku koò wír wo wù tenen fó a ghvəm tàr wov, kìn yè wov.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

¹⁷« ‹Lǒn Nyùyi ku koò wír wo wù kúvsin bìíy njàvìn.› «Á yoŋ bèy, é wìr dzə̀m ku bìnsí jii, ‹Kí kú a dzə bèy.

¹⁸« ‹Lǒn Nyùyi ku koò wír wo wù tsəənen mfìr, e yiì, wù jáy dzə́ə.› «Á yoŋ bèy, é wìr dzə̀m ku bìnsí jii, ‹Kí kú a dzə bèy.

¹⁹« ‹Lǒn Nyùyi ku koò wír wo wù nyavrì e gháy kiŋgwìyi, kìn wó wàn tsə̀ə́, kìn e wó wiiy ŋkfəə.› «Á yoŋ bèy, é wìr dzə̀m ku bìnsí jii, ‹Kí kú a dzə bèy.

²⁰« ‹Lǒn Nyùyi ku koò wír wo wù liìn wiiy tàr wov, bìʼ fo wù yenen kinshóʼ ke wiiy tàr wov.› «Á yoŋ bèy, é wìr dzə̀m ku bìnsí jii, ‹Kí kú a dzə bèy.

²¹« ‹Lǒn Nyùyi ku koò wír wo wù neèmèn e nyàm, a fə̀m dzə̀ rəné.› «Á yoŋ bèy, é wìr dzə̀m ku bìnsí jii, ‹Kí kú a dzə bèy.

²²« ‹Lǒn Nyùyi ku koò wír wo wù neèmèn e jèmèr rə, kìn dzə̀ ye dzəə̀n wan tàr wov, kìn yee wan yè wov.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

²³« ‹Lǒn Nyùyi ku koò wír wo wù liìn yìy à wiiy və.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

²⁴« ‹Lǒn Nyùyi ku koò wír wo wù woonen, e yùyrí fə́r və, e lày.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

²⁵« ‹Lǒn Nyùyi ku koò wír wo wù sə́ mbàm ji wun yúyrí wír woo là njò.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.

²⁶« ‹Lǒn Nyùyi ku koò wír wo bó wù yòʼ yúnin nsər se Nyùy sìn wùn à ntir sə́ sí sidzə̀m, yii mo sí dzəə̀n.› «Á yoŋ bèy, é wìr dzə̀m ku nèn bìnsí jii, ‹Kí kú a dzə bèy.› »