Read Lamnso Remrí 29 Bible Online

Remrí 29 - Lamnso bible

Remrí 29

¹NYÙY TÀR‑iì yòŋ e Mooser e nsay Moav fèy ji wù gwar á *mensaŋ wùn à wír veé Israyi e wun yir, é mè dzəsi á wún é kitu ke mensàŋ me wù‑uù gwàrìn wùn à wír veé Israyi é Gwan Sinay. Ntò se mensàŋ mee shooy si síne.

²Mooser bánén wir dzə̀m woó Isray, e yòŋ aáwune jii, «Vèn‑eè lo yèn vinyo vidzə̀m ve NYÙY TÀR‑iì yiìn é Ejiv. Wù‑uù lòvtí e Farao, e lòvtí aàtǎr ntoʼ vəə́, à wìr dzə̀m woo wun wòŋ, a vèn yén e sí yéné.

³Vèn‑eè yèn ŋgeʼ se tavín sí se wù‑uù màʼàn é Ejiv, e yèn viŋgaʼnìn ve vinyò, e yèn vitaáví və́ ve ghaʼán ví.

⁴Yii bèy, e wìy to lán, bó NYÙY TÀR yoʼ fò ven shilív she dzə̀ vèn kìíy shó, kìn sí ye dzə̀ á yèn shó, kìn vituʼùr ve dzə̀ á yù kinyo sho.

⁵NYÙY TÀR suuy jii, ‹Mò‑oò tsəə̀né ven kiyá mkweè, e tòsín wóʼ shó, a bó ndzə̀y sén wùn aàlábáʼ véné yòʼ‑oò lo sàʼkìr.

⁶Vèn yòʼ‑oò ló a ker kibán kée yi, aá yòʼ‑oò ló a ker meluʼ mée no, kìn kifá ke tavín kímóʼ kí ké a no. Kù‑uù yìír mo ven ji vèn fiʼ kìíy ji m dzə̀ á NYÙY TÀR woo Nyùy won.› »

⁷Mooser shaà fo mbìy jii, «Vèsən wìy, e bàʼ e kirə̀ʼ fen, Sihon woo fon woó Heshbon wùn Og woo fon woó Bashan fəə́, e taàmé vèsən e rə́r sí. Yii bèy, vèsən tón áwune,

⁸e tòn bèy, e faàsì nsay yev, e jàv e rám Ruben wùn à yé Gadi, à kintoʼnìn ke yé Manassèe ji vitsə́ʼ vév.

⁹Kí nén a dzə jii, vèn wáy ŋàŋ ji á kú a lèm ntò se mensàŋ sìn sidzə̀m, é vinyo ve vèn yii vidzə̀m vi wìy a dù kijuŋ.

¹⁰«Vèn sí tíy fèn e kishiíy ké lán ki, e NYÙY TÀR woo Nyùy wón si. Vèn tíy wir dzə̀m, a dzə̀ ji atǎr ram sí wùn à vilìmbìy vi, à ntom se saʼ si, e lì wir dzə̀m woó Isray.

¹¹Vèn kù dzə̀ vèn à wóné, à vikìy véné, e lì viŋgwìy ve ví dzə́ vèn áwune, sív meŋkaʼ men, kfə̀n tú mendzə́v.

¹²Vèn nén a tiy fèn lèn ji NYÙY TÀR woo Nyùy won kfən gwàr a mensaŋ vèn áwune lán, é vèn liʼ ji vèn wíy a lèm a ntò se mensàŋ mee shooy.

¹³A wù yii bèy ji wun sənti. Kí nén a dzə jii, e kishiíy ké lán ki, wun woo NYÙY TÀR sə̀ntì ne ji vèn sì wír və́, a wun sì á Nyùy won réŋréŋ mo wù‑uù kàʼàn atàr vén vee fó mbìy, vee Abraham wùn à Aysi, à Jakov.

¹⁴Bó yòʼ jòʼsì ven vin ve NYÙY TÀR yii kilìʼ kin vèn áwune.

¹⁵Wù yii kilìʼ kin vèsən áwune, vèsən ve á tíy fèn e kishiíy ké lán ki e wun si, kfə̀n yii wùn à ŋgwàʼ sesən se sí dzəə́ wìy a koʼ fo bàm sí.»

¹⁶Mooser nèn kfə̀n a yìmrì wír veé Isray, a suúy jii, «Vèn kuúmé mo dzəʼə̀me‑eè dzəə̀n é Ejiv, e kfə̀n kuùmé mo vèsən‑eè ghanen, e tòsín nsay vitum vímóʼ ví, e bóo meé fèn.

¹⁷Vèn‑eè lo yèn vifá vév vé joònè ve áwune kérí, vee mebvə̀m, kìn á sèm sémén, kìn á fèr e tíyí, kìn á fèr e *kisha ke mbàm ke fəvír kí, à ke baar kí.

¹⁸Vèn wáa yen fo wìr fo věn mvəm ve á tíy fèn lán, bin ndzə̀m e NYÙY TÀR woo Nyùy won, e dù, a ghvəm anyùy vitum vee shooy. Bo dzə̀ ji a fə̀m dzə̀ lumèn, a fə̀m dzə̀ wiíy, kìn dzə̀ kfəə́, kìn rám yee shó, lá á yòʼ mùm, fo kinyo ke bi kí nəə́, a ghanén e věn mvəm moo ndzəʼ.

¹⁹Vèn wáa yen fo wìr wáa dzə fèn e kishiíy ké lán ki, wo wù yuun jí se kilìʼ sin, e kfə̀n lò, e tàv kitú, a dzə̀v nsaŋ, a sevtí jii, ‹Vinyo vém ví yíi a ghan kijuŋ, fə̀m mo m tavin kitú, a mùm a dzə̀ yéem yee dzə́ə.› A kí kòóy bèy, bo kí yíi laàr ven adzə̀m, à ŋgaà jay, à ŋgaà woo là jay.

²⁰NYÙY TÀR yòʼ wíy làysìn jay wìr woo bey. Yii bèy, tímé wíy ndzəʼ wun, é lǒn vinyò ve á saŋen é ŋwàʼ fène gbu e ŋwèrín kitu, é NYÙY TÀR laar ŋgaàŋ láarin fó kitu ke nsay, à yírí shó.

²¹NYÙY TÀR wíy soòsì kfə́ə woo bey woo wír, e fəə́r fo ram seé Isray sidzə̀m, e màʼ ŋgeʼ e kitu wo mo lòn wo á saŋen é Ŋwàʼ Nsər fène dzəə̀n e dzə̀m.

²²«Ghán símóʼ sí wíy fəə, é ŋgwàʼ sén se sí wíy a koʼ si wáa ghay wún, aá yén a dzə̀ mo NYÙY TÀR màʼàn ŋgeʼ wùn à yàsí e věn nsay, é viŋgwìy vidzə̀m ve ví loòn fó vitum vi wáa ghay sa.

²³Və́y wo wú shwí, baári moo mekàŋ wùn à shiŋgwáŋ shií wíy tòn nsay yen é dzəə ye bó yòʼ dzə̀ kifá ki kùy shó. Kifá ki yòʼ wíy tèʼ fo, a fə̀m dzə̀ kikwiíy, bo kí yòʼ wíy a dzə fo. Nsay yen wíy a dzə moo ŋkà se laʼ see Sodom wùn Gomorra,[45] a dzə moo Admaa wùn Tsəboyiim, fo dòʼshwiiy NYÙY TÀR‑iì koʼon, e shaàsìn, wù laàr.

²⁴Á bèy, é vitúm vidzə̀m vi nèn a ghay ji sà kòóy ka, é bo NYÙY TÀR lóvtí e nsay wír vìn bèn a? Kee ben kee kilòŋ ke kí shwiiyin NYÙY TÀR kí sà dzə̀ keé le á?

²⁵Á lóo ghay bèy, é binèri wáa dzə jii, kù yiì ŋwáy ye áwune ŋwayin mensaŋ me NYÙY TÀR woo Nyùy atàr vév. Mensaŋ me wù‑uù gwàrìn wùn áwune é ghan se wù‑uù fəərin áwune fó wòŋ Ejiv.

²⁶Áwune‑eè lò, a ghvəm anyùy ámóʼó, a lìm fo fo. Dzə̀ anyùy, aáwune yòʼ‑oò lò ghàn sìíy kìíy, kfə́n a dzə ve Nyùy shaʼnin ne fo áwune wìy a ghvəm.

²⁷Kee shooy ki nèn yiì, dòʼshwiiy NYÙY TÀR kóʼ, bìʼ wír və́, wù ghéʼ nsay yev, e yìm lòn wo á saŋen é ŋwàʼ fèn e dzə̀m.

²⁸Á bèy, NYÙY TÀR nèn shwìíy kilòŋ é ŋàŋ, tímé ndzə́ʼ wun, wù túŋ áwune fo áwuné nsay, e rə̀ŋ e wòŋ wo səné, á wáa dzə fo, e wìy to lán.

²⁹«Vinyo vímóʼ ví dzə̀ ve NYÙY TÀR woo Nyùy wòsən lèmèn é kilìtì. Yii bèy, wù fò ne nsər sə́ e vèsən à ŋgwàʼ sesən sí. Vèsən ku nèn a lèm sidzə̀m, e wìy dù, e mày.»