Read Lamnso Remrí 31 Bible Online

Remrí 31 - Lamnso bible

Remrí 31

¹Mooser shaà fo mbìy, a suŋnín e wír veé Israyi adzə̀m.

²Wù wáa suŋnín, a suúy aáwune jii, «M sì lèn kiyá kishóv mbaà e wiì, bó yòʼ dzə̀ m kfə̀n yù fó a tsəəné ven. Á ku nàʼ kee shooy, NYÙY TÀR kù‑uù yòŋ ne e mò ji bó m yòʼ wíy liysín a ndzə́v yee Jordan rə̀n.

³NYÙY TÀR woo Nyùy won, wúnwun yíi liysín Jordan e věn mbìy. Wù kù wíy a dù e věn mbìy, a tòn vitúm ve ví dzə́ fo, é vèn fiʼ yòv nsay yev. Joshua wíy a tsəəné ven mo NYÙY TÀR‑iì yòŋèn.

⁴NYÙY TÀR wíy lovtí e vitúm vìn vi mo wù‑uù lovtin e Sihon wùn Og ve yì‑iì dzəə̀n afon veé Amor. Wù‑uù laàr áwune wùn à woŋ wóví.

⁵NYÙY TÀR wíy way vitúm vìn e věn kiwo, é vèn yii aáwune, kù mo m yòŋèn e vèn.

⁶Kù dzə̀ ji vèn kúr tímé, e wày ŋàŋ. Lá vèn yòʼ a yàʼ. Lá vèn yòʼ fàn áwune, bìʼ fo NYÙY TÀR woo Nyùy won kitú kfə́ wíy a tsəəné ven, a bó wù yòʼ wíy màʼtì ven, a bó wù yòʼ wíy màʼày ven.»

⁷Á bèy, Mooser nèn jàŋ Joshua, e yòŋ sho e wìr dzə̀m woó Isray si jii, «Kúr tímé, e wày ŋàŋ, bìʼ fo kù yíi tsəəné wò wír vìn, e dù sho e nsay ye NYÙY TÀR‑iì lìʼìn ji wun wíy fo aàtàr véví. À kù wíy toʼtí fó, e jàv, aáwune yov ji vitsə́ʼ vév.

⁸Dzə̀ NYÙY TÀR wo wù du e wò mbìy. Wù kù wíy a dzə vèn wun. Wù yòʼ wíy màʼtì wò, a bó wù yòʼ wíy màʼày wò. Lá à yòʼ fàn. Á yen fó weèy.»

⁹Mooser‑iì sàŋ yéʼéy Nyùy rə̀n wùn à nsər si é ŋwàʼ, e wày áàtàá cù wùn à vilìmbìy veé Isray ví kiwo. Kù‑uù dzə̀ atàá cù, áwune vee rám Levi, a dzə̀ áwune ve vé‑eè béʼ ŋkùv mensàŋ NYÙY TÀR.

¹⁰Wù fó bey, e sùúy jii, «Lóo dzə, a saàmbà kiya sí dù, a mày, a sì kiyá ke á tiíne kaá,[47] vèn yòŋ ŋwàʼ və̀n, aá sí yii Ŋkǎʼ Tàv sé Ghan.[48]

¹¹Kù dzə̀ ghán se wìr dzə̀m woó Isray kóʼti e NYÙY TÀR woo Nyùy wón si, e kirə̀ʼ ke wù wíy shoʼ. Ku nèn a dzə e ghan sin se vèn kù wíy a yòŋ Ŋwàʼ Nsər və̀n e wír veé Israyí si adzə̀m, aá wáa yu.

¹²A vèn kù wíy a banén wir dzə̀m, vilum wùn à vikìy, à wóné, à viŋgwìy ve ví wíy a dzə e věn ŋkà se laʼ vi, aá fiʼ yù adzə̀m, e yèʼéy mo dzə̀ á wàa ghvəm NYÙY TÀR woo Nyùy won, a ŋeèvì nsər se sí dzəə̀n é ŋwàʼ fèn sidzə̀m, a lèm.

¹³Vèn kù wíy a yiì bèy, e dù, e meé mo vèn wíy a dzə e nsay ye vèn líysin ndzə́v yee Jordan ji á yov, e kù a yiì bèy, ji ŋgwàʼ sidzə̀m se sí dzəə́ wìy a koʼ fo bàm, a bó á yóʼ ne kìíy nsər sìn si fíʼ a yu, a yeʼéy sa mo dzə̀ á wàa ghvəm NYÙY TÀR woo Nyùy won.»

¹⁴NYÙY TÀR lò, e yòŋ e Mooser jii, «Yén ri mbà, ghán sé se kpu si sì fó mentsə̀m. Lì Joshua, é vèn wun wiy é shùu *kibàn ké ntàsín, é m fiʼ lèm wun ji kilìmbìy keé Isray.» Mooser wùn Joshua ku nèn dù e kibàn ké ntàsín, e tìím fo.

¹⁵NYÙY TÀR nèn lò, e wìy e mbàʼ yeé njà kitom, e tìím e shùu kibàn ké ntàsín.

¹⁶Wù tiím, e yòŋ e Mooser jii, «Yén ri mbà, à sí lo, e dù, e yen atàr vé aàŋkfəə́ wòŋ. À kpú, bo wír vìne sí lo, a jùmrì anyùy vitum veé nsay yee fo á du, e nəə́. Áwune wíy bìn ndzə̀m e mò, e shoʼór *mensaŋ me mò‑oò gwàrìn vèr áwune.

¹⁷Kí lóo dzə bèy, bo dòʼshwíiy wom lo, e koʼ, é m maʼay áwune, e rə̀ʼ sí fo áwuné wùn é kishiíy fóo fèy. Kí lóo dzə bèy, aáwune saʼkir, é lòn wùn à ŋgeʼ si nəə́ áwune, ye á wáa kànkìr. Á wíy a kànkìr, a yòŋ jii, ‹Bó lòn və́ne yòʼ gbù e vèsə́n kitu bèn, bìʼ fo Nyùy wòsən yòʼ kfə̀n dzə̀ə́ e vèsə́n mvəm a?›

¹⁸Bo m kù sí wìy rəʼ sí fo áwuné wùn é kishiíy fóo fèy bèy, bìʼ fo áwune bìnèn ndzə̀m e mò, a yiì vinyo ve bi ví, a ghvəm anyùy ámóʼó.

¹⁹«Kí nén a dzə lèn jii, m lo, e fo luŋ e vèn. M fó, vèn sàŋ, e yèʼéy wír veé Isray sho. Á wíy lóo yòv, lóo màʼtì dzə́ə yem, é luŋ və̀ne wáa dzə kisəəm ke kí din jay wov.

²⁰M wíy lì áwune, e dù sho e wòŋ wo mò‑oò kàʼàn atàr vév shó. Woŋ, a vín nàʼ wùn à vilu vi tsəətìn fo. Áwune du, e yikír, kúrí, lóo dzə kijuŋ, aá nèn bìn ndzə̀m e mò, e ŋwày mensaŋ mem, e dù, a ghvəm anyùy ámóʼó.

²¹Vinyo ve bi ví wùn à ŋgeʼ si wíy lóo gbù aáwuné kitu, é luŋ və̀ne kú a yìmrì áwune moo njen, bìʼ fo wú wíy gòʼ e ŋgwàʼ sév sí shuù. M kì kinyo ke áwune taáme, é bo m fəm lì áwune, a dù sho e nsay ye mò‑oò kàʼàn ji m fó aáwune.»

²²Mooser ku nèn sàŋ luŋ və̀n e si kishiíy, e yèʼéy wír veé Isray sho.

²³NYÙY TÀR nèn lèm Joshua woo wan Nun ji kilìmbìy, e yòŋ sho jii, «Kúr tímé, e wày ŋàŋ, bìʼ fo à yíi lì wír veé Isray vìn, e dù sho e wòŋ wo mò‑oò kàʼàn áwune shó. M kù wíy a dzə wòsò.»

²⁴Mooser ku nèn sàŋ yéʼéy Nyùy rə̀n wùn à nsər si sidzə̀m e ŋwàʼ fèn, e màysì.

²⁵Wù màysì bèy, e yòŋ aàtàá cùu, áwune vee rám Levi ve á yii béʼ ŋkùv mensàŋ NYÙY TÀR, e sùúy jii,

²⁶«Vèn li Ŋwàʼ Nsər və̀ne, e neèr e NYÙY TÀR woo Nyùy wón ghaa ŋkùv mensàŋ, é wú fíʼ wìy a dzə fo, a dzə bèy ji njen kinyò ke wír vìne lo, a yiì.

²⁷M kì mo vinyo vév ve buʼtìn wùn à kitú kév ke tavín kí dzəə̀n. M dzə́, a m dzə̀ə́ sho aáwuné mvəm lán, aá kù lóvti e NYÙY TÀR ben, bo m yíi kpu, a m kpú ne, é kí wáa kìʼ e le?

²⁸Vèn báʼtí atǎr ram sén wùn à ntom se saʼ si, é m yoŋ jí sìn, aáwune yú. M nén a bi yúv wùn à nsay ji á tiím á vinjen ve vinyò ve wír vìne rə́si mumè.

²⁹M sì é shùu kpu, a m kì jii, yì yíi ran kibvəə́shí, é la á yòʼ dzə́ə a ci kinyo ké a yiì, kìn dzə̀ ke juŋ ki, kìn ke bi kí. Áwune yíi a yiì bèy, a tav kitú fo NYÙY TÀR, e ten fó a dzə mo mò‑oò yòŋèn ji á wáa dzə. NYÙY TÀR wíy shwiíy kilòŋ, é vinyo ve biibí ví wáa koóy áwune.»

³⁰Mooser nèn jàŋrì wír veé Isray adzə̀m, e yòŋ jí se lùŋ və̀n sidzə̀m, a wíri tíy, yuúri.