Read Lamnso Remrí 6 Bible Online

Remrí 6 - Lamnso bible

Remrí 6

¹Mooser shaà fo mbìy, a suúy jii, «Nsər se NYÙY TÀR sí síne wùn à sáʼ rəə́, à vinyo ve wù tínen vi, a wù yoŋ ji m yéʼéy á ven shó, é vèn wáa lèm e nsay ye vèn lo, e liysín Jordan, e yòv.

²Á bèy, é vèn à wón véné, à wón won véné nèn a ghvəm NYÙY TÀR woo Nyùy won, a lèm nsər sə́, a yu sáʼ rə́ ye m fó e vèn. Vèn kú a lèm, e dù, e meé mo vèn dzəə̀n shó, e fíʼ wìy bonén, e shiíy.

³Ven vee Isray, vèn yú, e wày ŋàŋ ji á wáa lèm a nsər sìn. Vèn lóo lèm, aá wáa ker vishí ve juŋ vi, é vèn wìy a dzə nyanyày e nsay ye vín nàʼ wùn à vilu vi tsəətìn sho, ye NYÙY TÀR woo Nyùy atàr vén‑eè kàʼàn ji wun fó e vèn.

⁴«Éè Isray, vèn yú, NYÙY TÀR woo Nyùy wòsən, kù dzə̀ wun NYÙY TÀR wùn mòʼón.[14]

⁵Wìr wáa kòŋ NYÙY TÀR woo Nyùy və shilív shidzə̀m, e fò kitú kfə́ shó kidzə̀m, a lìm fo fo vitaáví və́ vidzə̀m.

⁶Nsər se m fó e vèn lán sìn si kú a dzə e věn meliv.

⁷Vèn bónén, e yèʼéy wóné shó, a ruvtí e ghan se vèn dzə̀kìn e věn melav, a ruvtí e ghan se á ghán e yuv, kìn é ghan se á neèmèn, ǎ ghan se á loòn é yuv.

⁸Vèn sáŋ, e sə̀ŋrí e koy ji kisəəm, e kfə̀n kùr e věn yírvishi, e fíʼ a kuumé.

⁹Vèn sáŋ e věn mboòmè se shùu lav, e kfə̀n sàŋ e věn shuù se kày seé ŋkà se laʼ.

¹⁰«NYÙY TÀR woo Nyùy won‑eè kàʼ atàr vén vee Abraham wùn à Aysi, à Jakov ji wun wíy fo a ven nsay rə̀n, nsay ye wù li ven, e dù sho. A nsay yee shoon kér ŋkà se laʼ, a sí dzə̀ siwíy, e kfə̀n a dzə se juujùŋ si, a yòʼ‑oò bàʼrì ven.

¹¹A lav see fó si dzə̀, a vifá ve juŋ vidzə̀m vi rúnkír shó, a yòʼ‑oò wày ven. Ndzə́v se tuŋén sí dzə̀kìr fó, a yòʼ‑oò tùŋ ven. Súm sé vitiír vé *vayin, à sé vici vé *oliv si dzə̀ fó, a yòʼ‑oò bìy ven. Vèn wiy fo, lóo yikír, lóo kur mo vèn koŋè,

¹²vèn nèn a yen a fóo bìn ndzə̀m e NYÙY TÀR. Dzə̀ wun wo wù‑uù fəərin ven fó wòŋ Ejiv fo vèn‑eè reŋ vikwàn.

¹³Vèn wáa ghvəm NYÙY TÀR woo Nyùy won, a yu a dzə̀ fó fo, lóo yiì kilìʼ, vèn wàa kàn a dzə̀ yír rə́.

¹⁴Lá vèn yòʼ wìy a ghvəm anyùy kisaŋe, anyùy vitum ve ví kaarin ven, e tàr,

¹⁵bìʼ fo NYÙY TÀR woo Nyùy won wo wù dzəə̀n e věn mvəm dzə́, kíyri ven. A vèn mùm, e ghvə̀m anyùy ámóʼó, bo dòʼshwiiy NYÙY TÀR yíi koʼ, é wù laar ven fó kitu ke nsay.

¹⁶«Lá vèn yòʼ wìy a ghiʼ NYÙY TÀR woo Nyùy won ghíʼín mo vé‑eè ghíʼ wun e Massaa.[15]

¹⁷Vèn ku wìy wày ŋàŋ, a lèm nsər se NYÙY TÀR woo Nyùy won, a yiì kinyo kfə́ mo wù dìnèn, e kfə̀n a yunín sáʼ rə́ ye wù foon e vèn.

¹⁸Vèn ku wìy a yiì kinyo kee tìítiy wùn à ke juŋ ki mo NYÙY TÀR taʼà, ji vinyo vén ví wáa ghan kijuŋ, é vèn kfən dù, e yòv nsay ye juŋ ye NYÙY TÀR‑iì kàʼàn atàr vén ji wun wíy fo,

¹⁹é vèn yú fóo jùm aŋgaà vén vibàn adzə̀m mo NYÙY TÀR‑iì kàʼàn.

²⁰«Vèn wíy yòv nsay, ghán sí lóo koʼtí, a tàm é wón véné wáa dzər ji nsər wùn à ntò se vinyò se NYÙY TÀR yòŋèn sin, nsàv sà dzə̀ ka á?

²¹Vèn kù nèn naàrì e wón véné jii, ‹Vèr‑iì dzə̀ akwǎn Farao[16] e Ejiv, NYÙY TÀR nèn wìy, e fə̀ə́r ver fó fo e vitaáví və́ ve ghaʼán ví.

²²Wù‑uù dìn visəəm ve ghaʼtín ví, e yiì viŋgaʼnìn ve vinyò, e lòvtí e wír veé Ejivi wùn à fòn wov, à wír vee wun ntoʼo shó adzə̀m. Vinyo vìn vi‑iì beèmé é ŋàŋ, a ví tíŋ, e kfə̀n a dzə kinsətìshuù, a vèr‑iì lo yèn e sí yérí.

²³NYÙY TÀR‑iì yiì bey, e nèn fə̀ə́r ver fó fo ji wun fiʼ lì ver, e wìy sho e nsay ye wù‑uù kàʼàn, e lìʼ ji wun wíy fo aàtàr vérí.

²⁴Á bèy, NYÙY TÀR nèn yòŋ ji vèsən wáa lèm nsər sìn sidzə̀m, a ghvəm wun woo NYÙY TÀR woo Nyùy wòsən, é vinyo vesən ví wáa ghan kijuŋ ghán sidzə̀m, é wù wìy a lèm vèsən atin mo wù lèmèn ne, e wìy to lán bèn.

²⁵Kí nén a dzə jii, a vèsən wày ŋàŋ, a lèm nsər se NYÙY TÀR woo Nyùy wòsən sidzə̀m, a yiì mo wù yòŋèn, é vèsən nèn ghèén NYÙY TÀR ji wír vee tìítiy.› »