Read Lamnso Remrí 9 Bible Online

Remrí 9 - Lamnso bible

Remrí 9

¹«Éè Isray, vèn yuúrí, e yù. Vèn sí lo, a liysín ndzə́v yee Jordan rə̀n e kishiíy ké lán ki. Vèn líysin, e dù, e sə nsay vitum, a ví dzə̀ viwíy, e kfə̀n tàvkír, e shaà ven. Ŋkà se laʼ sév sí kùʼkìr, e kfə̀n a ker vikum ve kày, a ví kóʼ é yuv.

²Wír vee fóo dzə̀ antav, e kfə̀n a dzə viŋgáʼ, a dzə̀ rám Anak ye vèn kiìn. A vèn kù yú, aá yoŋ jii, a dzə̀ tàm la wùn à rám Anaki?

³Yii bèy, vèn kiíy lán ji wìr wo wù du fo mbìy, tee virə́ʼ moo və́y, dzə̀ á NYÙY TÀR woo Nyùy won. Mo NYÙY TÀR‑iì kàʼàn ne ven, bo wù yíi tòn áwune, e laàr e věn mbìy. Bo dzə̀ ji vèn yíi jùm áwune, e laàr áwune cércér.

⁴«Kí nén a dzə jii, wíy lóo dzə, a NYÙY TÀR woo Nyùy won júm ne vitúm vìy fo věn mbìy, lá vèn yòʼ a sevtí e věn meliv ji dzə̀ á bìʼ yii yén ye réŋé, é bo Nyùy li ven, e lèm e nsay fèy. Kù yiì liì kisaŋ vitum vee fó, é bo NYÙY TÀR wáa jùm áwune fo věn mbìy mo vèn du.

⁵Bó yòʼ dzə̀ ji vèn kér a yii ye réŋé, kìn ji melív men mè tíy a tìítiy, é bo NYÙY TÀR yii ji vèn nəə́ aáwuné nsay, e yòv. Kù dzə̀ bìʼ yíi kisaŋ vitum vee fó, é bo NYÙY TÀR woo Nyùy won wáa jùm áwune fo věn mbìy. Kí kfə́n a dzə sa bèy, ji wun fiʼ sə̀ntì kinyo ke wù‑uù lìʼìn wùn aàtàr véné vee Abraham wùn à Aysi, à Jakov.

⁶Vèn kú a kiíy kijuŋ ji bó NYÙY TÀR woo Nyùy won yòʼ fó nsay ye juŋ rə̀n ji yéen bìʼ yii yén ye réŋé. Aày, vèn dzə̀ ben, a dzə̀ antavkìtu.

⁷«Vèn kuúmé, e làa yòʼ wìy làysìn mo vèn‑eè yiìn, NYÙY TÀR woo Nyùy won shwiíy kilòŋ é kirə̀ʼ ké woʼ kí. Kèʼ mo vèn‑eè loòn fó wòŋ Ejiv, e wìy, e mèé fèn, vèn kù táv a dzə̀ kitú fo NYÙY TÀR.

⁸Fə̀m mo vé‑eè dzəə̀n é Gwan Horev, vèn bùʼ kinyo, NYÙY TÀR wáa yu nyár. Dòʼshwíiy və kóʼ, wù yú nyár bèy, e bàʼtí ji wun sí laar a ven.

⁹Yì‑iì dzə̀ é ghan se mò‑oò koʼon é gwan ji m du, e sə̀ viwaŋ ve tiy ve ntò se mensàŋ[20] me NYÙY TÀR‑iì gwàrìn vèn áwune sí‑iì dzəə̀n shó, m dzə̀ʼə̀m fo kishiíy mkweè, à shùy, à vitsə́ʼə́. Bó m yòʼ‑oò lo yì kifá, a bó m yòʼ‑oò lo nò shindzə́v.

¹⁰NYÙY TÀR nèn lò, e fò viwaŋ ve tiy vee vibaà e mò, a sáŋ wun nsər si shó e kiwó kfə́ kí, a kinyo kidzə̀m ke wù‑uù suuyin e vèn é kishiíy ke vèn‑eè banen é sar Gwan Horev, wù súŋnín e vèn fó mvə̀m və̀y kí dzə̀ shó.

¹¹Vishiíy vee mkweè vìy vi shaà bèy, é bo NYÙY TÀR fó viwaŋ ve tiy vee vibaà e mò, a ntò se *mensàŋ si dzə̀ shó.

¹²«Á bèy, NYÙY TÀR suúy e mò jii, ‹Lò é yuv, a səy cér fo fèn, bìʼ fo wír vé ve wò‑oò liìn fó Ejivi bùʼùn ne kinyo. Á bìn ne ndzə̀m, e fəə̀ fó dzəə ye mò‑oò wayin áwune shó. Áwune fèr ne shibvə̀m e kisha ki.›

¹³«NYÙY TÀR kfən lò, e sùúy e mò jii, ‹E ké ru kí, m lèéy ne wír vìn, e yèn a dzə̀ antavkìtu.

¹⁴Lá à yòʼ jìvír mo. Màʼtì mo lèn, é m laar áwune, e màyìr yír yév fó kitu ke nsay. M yii bèy, é m nèn yiì, áà wáa dzə tàr à kitum ke sən kí, a kí wíy kùʼ, e tav, e shaà áwune.›

¹⁵«M ku nèn bìnkìr, a səy fo gwan, a gwan sí shwí, a m kér viwaŋ ve tiy vee vibaà ve ntò se mensàŋ si‑iì dzəə̀n shó e mǒ kiwo.

¹⁶Rúrú, m lòo leéy, a vèn búʼ ne kinyo e NYÙY TÀR woo Nyùy wón si, e fèr shibvə̀m e kisha ki, shí wáa dzə e njà wàn nàʼ. Vèn yòʼ‑oò lo laàtí gheéy fó bìn ndzə̀m é dzəə ye NYÙY TÀR‑iì yòŋèn e vèn.

¹⁷M yén bey, e tàtí viwaŋ ve tiy vee shooy, e sàn é nsay, ví bvə́ʼkír e věn si.

¹⁸«E ghan sin, m kfən siì neèm e NYÙY TǍR si kfə̀ə́kfəv kishiíy mkweè, à shùy, à vitsə́ʼə́. Bó m yòʼ‑oò lo yì kifá, kìn ji m nó shindzə́v. Mò‑oò yiì bey, bìʼ vinyo ve bi ví vidzə̀m ve vèn‑eè yiìn, ví wáa bir NYÙY TÀR, e sə̀ʼsì dòʼshwíiy və shó.

¹⁹Mò‑oò fàn dòʼshwiiy NYÙY TÀR, wo wù‑uù koʼon ne bìʼ ven, a baarí moo və́y. A kí‑iì dzə̀ bey, a NYÙY TÀR báʼtí ne ji wun sí laar a ven. Yii bèy, wù lò, e kfə̀n yù tóŋ yém.

²⁰NYÙY TÀR‑iì shwìíy kilòŋ é ŋàŋ bìʼ Aaron, a wù‑uù sí báʼti ji wun laar a Aaron, m kfən bùnrì sa fo wun e ghan fóo fèy.

²¹M nèn lì kifá ke lòn kiy, kee shibvə̀m sheé njà wàn nàʼ, aá fér e kisha ki, e tòn e və̀y. M tòn bèy, e bvə̀ʼtí, e jò, shí kfə́n moo kibvər bèy. M kuúy, e dù, e shùʼ e ndzəv ye yí‑iì léŋ, sə́y fo gwan.

²²«Vèn kfə̀n‑eè sə̀ʼsì dòʼshwiiy NYÙY TÀR é Tabera[21], e kfə̀n sə̀ʼsì e Massaa[22], e sə̀ʼsì e Kibrot‑Hattaava.[23]

²³Kfə́n a dzə ye NYÙY TÀR‑iì tumen ven fó Kadesh‑Barnea ji vèn du, e yòv nsay ye wù fó e vèn, vèn táv kitú fo NYÙY TÀR woo Nyùy won, e tèn fóo yiì mo wù yòŋèn. Vèn yòʼ‑oò lo wày shilív e NYÙY TÀR wón wùn, e bóo fə̀m a yunén jí rə.

²⁴Rúrú, e kèʼ fo ghan se mò‑oò kiiyin ven, vèn kù‑uù sí táv kitú fo NYÙY TÀR.

²⁵«Á bèy, m neèm kfə̀ə́kfəv e NYÙY TǍR si vishiíy vee mkweè vìn, à shùy, à vitsə́ʼ, bìʼ fo NYÙY TÀR‑iì yòŋèn ne ji wun kù yíi laàr a ven.

²⁶M nèn bùnrì, e tòŋ e NYÙY TÀR jii, ‹Éè NYÙY TÀR woo Taà Ndzə, lá à yòʼ laàr wír ve dzəə̀n ji vé feyì, wír, a wò‑oò tìn fó vikwàn e vitaáví vé ve wiy ví. Dzə̀ wír ve wò‑oò fəərin fó wòŋ Ejiv e kóy wó wo tavíné.

²⁷La à kù si kuùmé rì aŋgàa lìm vé vee Abraham wùn à Aysi, à Jakov, e làa yòʼ a leéy kitú kév ke tavín kí, kìn dzə̀ liì kisaŋ wov, kìn vinyo vév ve bi ví a?

²⁸Á bèy, é la wír veé Ejiv fo wò‑oò liìn verí yòʼ a yòŋ jii, «NYÙY TÀR laàr wír vìn bèn, bìʼ fo wù mùmèn ne ntéŋ fóo lì áwune, e dù sho e wòŋ wo wù‑uù kàʼàn áwune shó, a wù bàn áwune bánen, e bóo lì ji wun du, e laàr e woʼ.»

²⁹A kí fə̀m dzə̀ é le, bo áwune dzə̀ wír vé, wír vé feyì feyì ve wò‑oò fəərin fó vikwàn e vitaáví vé ve wiy ví wùn à kóy wó wo tavíné.›