Read Lamnso Joon 1 Bible Online

Joon 1 - Lamnso bible

Joon 1

¹Yì‑iì dzə̀, é bo ndzə wìy a kèʼ, a Jínyùy‑iì sì. Wù‑uù dzə̀ wùn Nyùy, a wù dzə̀ sá ji Nyùy.

²Wù wáa dzə wùn Nyùy, é bo ndzə wìy a kèʼ bèy,

³a Nyùy‑iì wày vitaáví a dzə̀ e wùn kiwo, wù yiì, vifá vidzə̀m vi wáa dzə. A bó kifá kímóʼ kí yòʼ dzə̀ shó ke kí dzəə̀n, a bó yòʼ‑oò yiì wun, é bo kí keʼ, a dzə.

⁴Dzə̀ wun wo wù‑uù foon dzəʼə̀m yee dzəʼə̀m e wíri, á nèn a ker sa rán ye dzə̀ á kìíy Nyùy.

⁵Rán yee shooyi ku nèn a ban, a kàʼày ndzə vitsə̀ʼ, a bó ndzə vitsə̀ʼ yòʼ‑oò lo ndzə̀mér gheéy.

⁶Nyùy nèn wìy tùm wír wùmòʼ, aá yoŋ ji Joon.

⁷Wù wìy ji wun fiʼti Ŋgaà Ran woo shooy e wíri, aá kiíy, e fíʼ way shilív é wùn wó.

⁸A bó wun woo Joon yòʼ‑oò dzə̀ Ŋgaà Ran woo shooy. Wù‑uù wìy kfə́ cáʼ ji wun fiʼti Ŋgaà Ran və̀n e wíri.

⁹A dzə̀ ŋgaàŋ wo wù fó rán yee rán e wìr dzə̀m, a wù‑uù sí wiy e ndzə fèn.

¹⁰Wun woo Jínyùy wáa dzə e ndzə fèn, la wír veé ndzəə yòʼ fə̀m kìíy wun, a kù dzə̀ wun wo wù‑uù fèrìn ndzə rə̀n.

¹¹Wù‑uù wìy, e dù a dzə̀ e wír ve wù‑uù shoʼon ji vəə́ wòŋ, la áwune yòʼ a yen wun gheéy.

¹²Yii bèy, a wír ámóʼó‑oò ló a yen wun feyì, a way shilív é wùn wó. Wù nèn lì vee shooy adzə̀m, e bùʼ ji wáa dzə wón Nyùy.

¹³A bó á yòʼ dzə̀ wón Nyùy ji vé‑eè dzə̀ə́ áwune bey mo wíri yii lóo dzə, á dzə̀ə́ wán. A bó yòʼ dzə̀ sá ji yì‑iì sìysì wír. Á dzə̀, bìʼ fo wúnwun woo Nyùy siìn Tàr wov.

¹⁴Á mo Jínyùy‑iì wìyìn, e lì mbom wìr, a dzə wùn à wíri, a kòŋ áwune féyì, a dìn rú mo Nyùy dzəə̀n, vèr wáa yen vikuʼùy və́. A kù dzə̀ vikuʼùy vé Tàr wov, bìʼ fo kù jòʼsìn wun wo dzəə̀n Wan Nyùy.

¹⁵A Joon‑eè ló a fìʼtì wír və̀n e wíri. Wù‑uù sùúy jii, «Dzə̀ wun woo shó wo mò‑oò suuy jii, ‹Wìr wùmòʼ wíy wìy fo mǒ bàm, a wù kùʼ, e shaà mo, bìʼ fo vé‑eè dzəə mo, a ŋgaàŋ‑eè sì.› »

¹⁶Mo ŋgaàŋ wìyìn, vèsən adzə̀m nén a yu vijuŋ, bìʼ fo wù kòŋèn vèsən, e bùʼ e vijuŋ vi, e tòm e mbùʼmé.

¹⁷Kinyo ke vé‑eè jumrì fo mbìy ki kù mày nsər se Nyùy‑iì foon e Mooser. Jesus Kristu nèn wìy kfə́, a kòŋ wíri, e yiì, á kiíy rúrú mo Nyùy dzəə̀n.

¹⁸A bó wìr yòʼ‑oò yiì ne yèn sí Nyùy. Kù jòʼsì màyshó Wàn Nyùy və̀n wo wù dzə́ e Tàr wóv ghaŋ, wo wù dìnèn e wíri mo Nyùy dzəə̀n.

¹⁹A Joon‑eè lo fìʼtì wír wo dzəə̀n Jesus Kristu və̀n. Yì‑iì dzə̀ é ghan símóʼ sí, atǎr wòŋ veé Judàa túm atàá cù ámóʼó fó Jerusalem wùn à wír veé ram Levìi[1] ji á du, e yèn Joon, e dzə̀r shó a jii, sà dzə̀ wun la á?

²⁰Joon dù, e làa yòʼ mèʼmèʼ lám. Wù ku nèn bàʼ fo shuù jii, «Bó m yòʼ dzə̀ *Mfə̀ə́r wo Nyùy‑iì kàʼàn.»

²¹Á nèn dzə̀r jii, «Bo dzə̀ wò la lèn? À dzə̀ Elija à?» Wù sháʼnín. Á kfən dzə̀r jii, «À dzə̀ *Ŋgaà Ntum Nyùy wo á shiy və̀y à?» Wù nèn kfə̀n shàʼnín.

²²Á nèn sùúy sho jii, «Suúy ri wír wo dzəə̀n wò, é vèr fíʼ a ker kinyo ke dzə̀ vèr dù, e bìnèr e wír ve á kì tumen verí. Naàrì ri mo kinyo ké ki dzəə̀n.»

²³ Wù bìnèr jii, «M dzə̀ wír wo Aysaya woo ŋgaà ntum Nyùy‑iì saŋen jii, ‹Jì wìr fúŋ fo kwaʼ jii, á naari dzə́ə Tàr, é bo wù wáa wìy.› »

²⁴Wù bìnèr bèy, a vé ntum vìy ámóʼó kì dzə̀ wír veé mbìv *Farasi,

²⁵á nèn kfə̀n dzə̀r jii, «Mo à buŋen fó Mfə̀ə́r, e bùŋ fó Elija, e kfə̀n bùŋ fó Ŋgaà Ntum Nyùy wo á shiyì, yiì ka, bo à wáa way wíri é ndzəv?»

²⁶Wù bìnèr jii, «M wáy kém wíri lèn e ndzəv, a kù dzə̀ ji mendzə́v cáʼcáʼ. A wìr wùmòʼ sì e věn mvəm lèn, a bó vèn yóʼ ne kìíy.

²⁷Wù wíy kèʼ kfə́ kee kinyo fo mǒ bàm, a bó m yoʼ fə̀m mèé e wìr wo dzə̀ wù bvə̀tì akfəə̀ və́ lábáʼ.»

²⁸Á wáa dzətí e Joon bey, aá dzə̀ é ntèʼ yee Betani ye yì dzəə̀n é ndzə̀n ndzə̀v yee Jordan, a dzə̀ fó, fo Joon‑eè wáy wíri é ndzəv.

²⁹Yì rán kibvəə́shí, Joon yén Jesus, a wù wiyì, e nèn a dìn e wíri jii, «Vèn yén wír wo wù mán vinyo ve wír veé ndzə adzə̀me jáyí. Wù dzə̀ moo wan njiì wo Nyùy seé, e taŋrí wíri shó.

³⁰Dzə̀ wun woo shó wo mò‑oò suuy jii, ‹Wìr wùmòʼ wíy wìy fo mǒ bàm, a wù kùʼ, e shaà mo, bìʼ fo vé‑eè dzəə mo, a wù‑uù sì.›

³¹Mò‑oò fiʼtì bèy, a bó m yóʼ ne kìíy sa ŋgaàŋ. A mò‑oò wìy, a fìʼtì ntum yem, a way wíri é ndzəv cáʼ ji wír veé Isray adzə̀me kiíy wír woo shooy.»

³²Joon kfən dìn kímóʼ kí e Jesus kitu jii, «Mò‑oò yèn, a Kiyoy ke Nyùy ki sə́ʼə́y fó yuv é njà kibìŋ, e dzə̀ʼə̀m e wìr və̀n kitu.

³³Mómò, m yòʼ‑oò ló ne kìíy sa mo ŋgaàŋ dzəə̀n, a Nyùy wo wù tumen mo, bo m wáa way wíri é ndzəv‑iì sùúy ne e mò jii, m wíy yén, a Kiyoy kfə́ kí sə́ʼə́y, e dzə̀ʼə̀m e wìr kitu, bo dzə̀ á wír wo wù wíy a way kfə́ wíri a dzə̀ e Kiyoy ke Ranén kí kiwo.

³⁴Mo m yenen, m nén a fìʼtì wír və̀n ji dzə̀ á wùwun wo dzəə̀n Wan Nyùy.»

³⁵Kfən wìy lòo dzə kibvəə́shí kímóʼ kí, a Joon tíy e kirə̀ʼ wùn à wón və́ lìme abaà,

³⁶Jesus nèn a shaà, wù kfən sùúy jii, «Vèn yén wír wo wù dzəə̀n moo wan njiì wo Nyùy seé, e taŋrí wíri shó.»

³⁷Wón lìm Joon víyi yú bey, e nèn a dù e Jesus bàm.

³⁸Jesus bìnkìr, e yèn, aáwune wiy e wùn bàm, wù dzə́r jii, «Vèn du fèé e mǒ bàm?» Á yòŋ jii, «Rabbi, vèr taʼ, e yen fo à shiiyì.» Á wáa yòŋ bèy, a Rabbi dzə̀ ji Ŋgaà Yèʼéy.

³⁹Jesus bìnèr jii, «Vèn wiy ri, e yèn fó.» Á nèn dù fo, a sì shúy sikweè e ŋkuùr. Wùn áwune màysì kishiíy, e jìír.

⁴⁰A wìr wùmòʼ fo vee abaà ve vé‑eè yuun kinyo ke Joon‑eè suuyin, a jùmrì Jesus vìne‑eè dzə̀ Andru woo wan yìy à Simon Pita.

⁴¹Mo Andru yenen Jesus, e kù nèn dù, e tàʼ fə́r və woo Simon və̀y, e sùúy sho jii, «Vèr yèn ne *Mfə̀ə́r wo Nyùy‑iì kàʼàn.» Wù wáa yòŋ yír yee Mfə̀ə́r, a dzə̀ sá ji Kristu.

⁴²Andru nèn lì fə́r və, wùn wun dù, e yèn Jesus. Jesus leéy, e sùúy sho jii, «Kí yír yée dzə̀ Simon, aà dzə̀ wan wìr wo á yoŋ ji Joon. Yii bèy, aá sí wìy a yòŋ wò ji Sefar.» Jesus wáa yòŋ bèy, a Sefar dzə̀ sá ji Pita.

⁴³Ndzə kfən bvəə̀shí, e ràn é kishiíy kímóʼ kí, Jesus nèn wày ji wun du a e mbìv wòŋ yee Galeli. Wù lòo dù, e yèn wír wùmòʼ, aá yoŋ ji Filiv, e sùúy sho jii, «Wìyi, é wòsò wáa ghan.»

⁴⁴A Filiv və̀n‑eè dzə̀ wír woó mvə̀mlaʼ yee Besayda, a dzə̀ fo láʼ Andru wùn Pitàa‑aà dzəə̀n.

⁴⁵Filiv nèn dù, e yèn wír wo á yoŋ ji Nataniar, e sùúy sho jii, «Vèr yèn ne wír wo Mooser‑iì saŋen e wùn Ŋwàʼ Nsər, *aŋgàa ntum Nyùy ámóʼó kfən sàŋ sá ji wù wíy wìy. Ŋgaàŋ dzə̀ Jesus, a dzə̀ wír woó Naasarer, aá yoŋ tàr wov ji Joosev.»

⁴⁶Nataniar yú, e nèn sèʼér seʼerín jii, «A dzə̀ lùŋfófo wùmòʼ fəə̀ fó Naasarer à?» Filiv bìnèr jii, «Wìy ri, e dù yèn.»

⁴⁷Jesus yén Nataniar, a wù wiyì, e sàsìn jii, «Á wír woó Isray woo rú. Bó wù yòʼ yii lem kinyo e bvə̀m.»

⁴⁸Nataniar dzə́r jii, «À ghàn é le, e bóo kiíy mo m dzəə̀n?» Jesus bìnèr jii, «Kú a kiíy jii, bo Filiv wiy, a jàŋ wò fo sar kici ké *fig, a m kì kì ji à dzə̀ á fo.»

⁴⁹Nataniar nèn yòŋ ji «Ŋgaà Yèʼey, à dzə̀ rú Wan Nyùy. À dzə̀ Fon woó Isray.»

⁵⁰Jesus bìnèr jii, «À biìmé lèn bìʼ fo m toʼon cáʼcáʼ ji m kì kì ji à dzə́ é sar kici a? À wíy yen vinyo ve ghaʼán ví, e shaà kin.»

⁵¹Wù nèn kfə̀n sùúy sho jii, «Vèn wáa kiíy rúrú ji vèn wíy yen, a yúví mvə́ʼə́m, a nshèelav se Nyùy si sə́y, kfə̀n kóʼó, aá wiy, e yen a dzə̀ ŋgaà wo yírí dzəə̀n Wanwìr.»