Read Lamnso Joon 14 Bible Online

Joon 14 - Lamnso bible

Joon 14

¹Jesus kfə́n a suúy e wón və́ lìme jii, «Lá vèn yòʼ a rə̀m, é melív men mè wáa buʼ. Vèn kú a way shilív a dzə̀ e Nyùy wùn, e kfə̀n a way sa e mǒ wùn.

²Vèn wáa kiíy jii, lav si dzə̀ e Tàr wór laʼ sinín, a m du bèn a dzə̀ ji m náŋsín mbìv yìmòʼ, e lèm e vèn. A là bey, bo bó m yóʼ lò a suúy e vèn.

³M yíi dù, náŋsin kirə́ʼ kee shoon, é m nèn kfə̀n, e lì ven, é vèn wáa dzə sa fo m dzə́.

⁴A vèn kìíy ne dzə́ə ye yì du fo m du.»

⁵Tomar nèn shùsín jii, «Tàr, vèr yòʼ kì fo à du. A dzə̀ vèr kfə̀n kìíy dzə́ə é le?»

⁶Jesus bìnèr jii, «Dzəə̀ kù dzə̀ mo və̀n, a kinyo ke dzəə̀n ke ru kí kù lo a dzə̀ fo mò, a kù fó mo dzəʼə̀m yee là may. A bó yòʼ dzə̀ wìr shaà, e dù, e yèn Tàr wor, a bó ŋgaàŋ beé a dzə̀ mo.

⁷A vèn kì kì rú mo m dzəə̀n, bo vèn kìíy ne a dzə̀ Tàr wor. Yii bèy, kèʼ fo lèn, vèn yíi kiíy Tàr wor, a vèn‑eè sí yén wun e sí yéné.»

⁸Filiv nèn sùúy sho jii, «Tàr, ku dìn ver Tàr won woo shooy, é bo vèr kiíy, e yàr.»

⁹Jesus yòŋ jii, «Filiv, m rə́si dzə́ vèsən, e kèʼ fo ŋgùʼ, a bó à yòʼ kì mo m dzəə̀n a? Wìr wo wù yenen mo, yèn a dzə̀ Tàr wor. A dzə̀ à kfə̀n a suúy ji m din Tàr wor dínen e vèn é le?

¹⁰Bó à yoʼ biìmé ji kù dzə̀ vèr Tàr wor, a vèr wun dzə̀ ji kitú kimòʼón à? Jí se vèn yú fo mǒ shuù si yòʼ dzə̀ ben ji suuy mo fo mǒ kitu. Yii Tàr wor wo vèr wun dzəə̀n ji kitú kimòʼón, a m lim vinyo a dzə̀ və́.

¹¹A dzə̀ vèn wàa biimé mo m suuy ji kù dzə̀ vèr Tàr wor, a vèr wun dzə̀ ji kitú kimòʼón. Búŋ bèy, vèn wàa leéy rì a dzə̀ vinyo ve m yii, a biimé bìʼ vee shooy.

¹²A m suuy e vèn rúrú jii, wìr wo wù wáy shilív e mǒ wùn, dzə̀ wù wàa yiì sa vinyo ve m yii vìn. A wù kù wíy a yiì, e shaà bèy, bìʼ fo m du fo Tàr wór wùn.

¹³Kí nén a dzə jii, a vèn lón ka fo Nyùy, lón a dzə̀ e mǒ yir, m kù nèn yiì kíwun, é wíri fíʼ a yen kinyo ke mo woo Wan Nyùy yii, a burí a dzə̀ Tàr wor.

¹⁴A vèn bee mo, lón ka fo Nyùy, m kù yiì kíwun.

¹⁵«A vèn koŋ mo, vèn wàa lèm nsər se dzəə̀n sém.

¹⁶A m wíy a lon ji Tàr wor ku fò ven wùmòʼ woo Ŋgaà Sə wo vèn áwune wáa dzə ghán sidzə̀m,

¹⁷a dzə̀ Kiyoy ke Nyùy ke kí din kinyo ke dzəə̀n ke ru kí. A bó wír ve á kiìn vinyo a dzə̀ veé ndzə fène yòʼ dzə̀ á wàa ker Kiyoy kee shooy, bìʼ fo bó á yòʼ yén vinyo ve wù yii, nèn méŋ wun méŋén. Vèn dzə̀ kén, a vèn kì wun, bìʼ fo wù siìn e věn mvəm, a wù wíy a dzə a dzə̀ e věn meliv.

¹⁸«Bó m yòʼ wíy màʼtì ven ji vèn siíy, e jàáy jaayín. M wíy kfən, a dzə vèsən.

¹⁹Bèr shishàr, é la wír veé ndzə fèn vìne yòʼ dzə́ə a yen mo. Yii bèy, a vèn kfə̀n wíy yen. Mo m dzə́ sho ghán sidzə̀m, vèn wíy a dzə sa bìʼ mo.

²⁰Vèn wíy yen mo é kishiíy fóo fèy, é vèn nèn kìíy rú ji dzə̀ vèr Tàr wor, a vèr wun dzə̀ ji kitú kimòʼón, e kfə̀n kiíy jii, kù dzə̀ vèsən, a m dzə̀ e věn meliv.

²¹Wìr wo wù yú nsər sém lemè, dzə̀ wo wù koŋ mo. Mo ŋgaàŋ koŋ mo, Tàr wor nén a kòŋ sa wun, é m kfə́n a kòŋ sa, e yiì, é wù kiíy mo.»

²²Judar wùmòʼ, a bó yòʼ dzə̀ wo á yoŋ ji Iskariyor və̀y, nèn dzə̀r jii, «Tàr, kí ghàn é le, bo à wáa suúy ji à wíy dìn kitú ké a dzə̀ e vèr, e làa yòʼ dìn e wír veé ndzə fène adzə̀m?»

²³Jesus bìnèr jii, «A wìr koŋ mo, wù nèn a lèm kinyo kém, é Tàr wor nèn a kòŋ sa ŋgaàŋ, é vèr Tàr wor wiy, é vèr à ŋgaàŋ wáa dzə.

²⁴Wìr wo wù yòʼ koŋ mo, yòʼ lem kinyo kém. A bó kinyo ke vèn yú fo mò kí yòʼ fə̀m dzə̀ kém. Dzə̀ ké Tàr wor wo wù tumen mo.

²⁵«M fèr ne vinyo vìn e vèn férin lèn, a m dzə̀ə́ vèsən.

²⁶Yii bèy, Tàr wor wíy tum Ŋgaà Sə wo dzəə̀n Kiyoy kfə́ fo vèn e mǒ yir, é wù wáa naàrì ven vinyo vidzə̀m, a yiì, é vèn wáa kuumé vinyo ve mò‑oò suuy e vèn vidzə̀m.

²⁷M sí du, a m wíy yiì, é melív men mè siíy a dzə nyaáŋ. Nyaáŋ və̀n dzə̀ wo fó mo, a bó yòʼ dzə̀ moo wo wù lo a dzə̀ fó ndzə fèn. Kí nén a dzə jii, lá vèn yòʼ sìíy, a rə̀m a ntéŋ, é melív men mè wáa buʼ.

²⁸Vèn lo yù, a m suuy jii, m sí du, a m kfə̀n wíy kfən, a dzə vèsən. A vèn kì koŋ mo rú, bo vèn kì shéʼri shèʼrín mo m kfə́n a dzə̀ fo Tàr wor wo wù kér mó wùn.

²⁹M sùúy ne e vèn lèn, é bo kí wìy a koóy, kí wíy kooyì, é vèn wáy shilív e mǒ wùn.

³⁰A bó m yòʼ dzəə́ yìi rəsí, a suŋnín vèsən, a dù kwaʼda. Fòn wo wù sáʼ ndzə rə̀n sí wiyì. A bó yòʼ dzə̀ ji wù kér vitaáví ve dzə̀ wù yiì kinyo e mò.

³¹Màʼtì mo, bìʼ fo dzəə̀n mo Tàr wor‑iì suuyin ji m yii, é wír veé ndzə adzə̀me fíʼ yen ji m koŋ Tàr wor. Vèsən lo ri lèn, a dù.»