Read Lamnso Joon 15 Bible Online

Joon 15 - Lamnso bible

Joon 15

¹Jesus kfə́n a suúy jii, «Dzə̀ mo kitiír ké *vayin ke ru kí, Tàr wor nén a dzə wír wo wù náŋsin kitiír kee shooy.

²Wù yén tám wo bó wú yòʼ koomè, wù faà woo shooy. Lóo dzə wo wú koomè, wù nèn nàŋsín, e sə̀r ji wú fíʼ a koóm kijuŋ.

³Kù dzə̀ mo vinyo ve m yeʼeyin ven shó vi naŋsin ne ven, vèn wáa dzə ajuŋ.

⁴Vèn kú a tiy a dzə̀ e mǒ wùn, é m nèn a tiy sa vèsən. Mo bó yòʼ dzə̀ tám kifa wú kòóm, a bó wú jáv a dzə̀ fó kitiír, dzə̀ réŋréŋ sá mo bó yòʼ dzə̀ vèn wàa yiì kinyo ke ru kí, a bó vèn yòʼ tíy e mǒ wùn.

⁵Dzə̀ mo kitiír, a vèn dzə̀ kén ji tám si. Wìr wo wù tíy e mǒ wùn, a m tíy vèr ŋgaàŋ, dzə̀ moo tám wo wú koom kijuŋ. A bó yòʼ dzə̀ wìr yiì kinyo ke ru kí gheéy, a bó ŋgaàŋ kù tíy e mǒ wùn.

⁶Wìr wo bó wù yòʼ tíy e mǒ wùn nén a dzə moo tám wo á faàn, e màʼày, wú yúm. Á lo, á bàʼtí, e tòn a dzə̀ é və̀y.

⁷A vèn fèn tíy e mǒ wùn, a jí sém sí tíy e věn meliv, bo dzə̀ vèn lòn kifá ke á lón fo Nyùy, a ker kíwun.

⁸Vèn lóo dzə moo tám wo wú koom kijuŋ, bo vèn kóʼor a dzə̀ yír Tàr wor, din ji vèn dzə̀ rú wír vém.

⁹«Mo Tàr wor koŋ mo, dzə̀ réŋréŋ mo m koŋ sa ven. Vèn ku nèn a yiì vinyo a dzə̀ ve dzə̀ m wàa kòŋ ven.

¹⁰A vèn lò, a lèm nsər sém, bo m kù yíi a kòŋ ven, réŋréŋ sá mo m lem sé Tàr wor, a wù koŋ mo.

¹¹M sùúy ne vinyo vìn e vèn ben, é kishéʼrì ke kí dzəə̀n e mǒ shiliv kí fíʼ a dzə sa e věn meliv, é vèn maysi rú, a ker kishéʼrì.

¹²Yéem yee nsər ye m fó e vèn nén a dzə jii, wìr koŋ wùmòʼ réŋréŋ mo m koŋ ven.

¹³A bó yòʼ dzə̀ wìr kòŋ wíri, e shaà yee ji wù fó kitú kfə́, e kpù fo ŋkar sə́ sí.

¹⁴A vèn yú kinyo kém rú, bo vèn sì ŋkar sém.

¹⁵M yòʼ dzəə́ yoŋ ven ji wónlè vém. Wónlě wìri dzə̀, a bó á yòʼ kì vinyo vidzə̀m ve Tàr wov yii. Vèn sì kén ji ŋkar sém, bìʼ fo m fèrìn ne vinyo ve mò‑oò yuun fo Tàr wor vidzə̀m e vèn.

¹⁶Bó yòʼ‑oò shòʼ ven mo. Yì‑iì shòʼ mo ven, e lèm ji vèn du ntum yem, a yiì vinyo ve dzəə̀n ve ru ví vinín ve bó yòʼ dzə̀ ví lày kisáŋ. Vèn lóo yiì bèy, lóo lon kifá ke vèn lón fo Tàr wor e mǒ yir, é wù ku nèn fò kíwun.

¹⁷Ke m tiir e věn wùn kí kù dzə̀ jii, vèn wáa kòŋnìn.

¹⁸«A wír veé ndzə fène lò, a bàn ven, vèn wàa kuumé ji kù dzə̀ mo vé‑eè sí ban mo, e bó a bàn sa ven.

¹⁹A vèn kì dzə̀ wír veé ndzə fèn, bo wír veé ndzə fène koŋ ven ji vév vee wír. Yii bèy, a bó vèn yòʼ dzə̀ wír veé ndzə fèn. Mò‑oò shòʼ ne ven, e fə̀ə́r fo fo, wír veé ndzə fène nén a bàn ven.

²⁰Vèn kuúmé kinyo ke mò‑oò suuyin ji bó wàn lìm yòʼ yii kuʼ, shaa tàr wov. Mo vé‑eè sí ban mo, bo kù dzə̀ sá, á wàa bàn ven. A dzə̀ ji vé‑eè yú kinyo kém, bo á wáa yu sa kén.

²¹Kù dzə̀ mo wír veé ndzə fèn vìne kù wíy a lovtí e vèn ve á tíy e mǒ kinyò bèy, bìʼ fo bó á yòʼ kiìn wír wo wù‑uù tumen mo é ndzə fèn.

²²«A mò‑oò dzə̀, e làa yòʼ wìy, e fìʼtì ntum rə̀n aáwune, bo bó á yòʼ‑oò lo lì njò. Yii bèy, mo m wìyìn, e fìʼtì, bo bó yòʼ dzə̀ áwune kfə̀n a ker kinyo kée wovrí fo vinyò ve bi ví ve á yii.

²³Wír wo wù ban mo dzə̀ wo wù ban sa Tàr wor.

²⁴A mò‑oò dzə̀, e làa yòʼ a yiì vinyo ve bó wìr yòʼ‑oò yiì ne yiì aáwuné mvəm, ve ví din vitaáví vé Nyùy, bo bó á yòʼ‑oò lo lì njò. Yii bèy, a vé‑eè lo yèn, e kù a bàn mo, e kfə̀n a bàn Tàr wor.

²⁵ A kí kooy bèy ji kinyo ke vé‑eè saŋen é Ŋwàʼ Nyùy jii: ‹Vé‑eè ban mo kisáŋ›, ki fiʼ ghèén.

²⁶«Yii bèy, Ŋgaà Sə wo m suuyì wíy wìy, a wù lò a dzə̀ fo Tàr wor, a dzə̀ Kiyoy kfə́ ke kí yii din kinyo ke dzəə̀n ke ru kí. A wíy lon mo fo Tàr wor, e bóo tum fo vèn. Wù wíy wìy, é wù fiʼti e wíri mo m dzəə̀n,

²⁷a vèn wíy a fìʼtì sa, bìʼ fo kù dzəə̀n ven vin ve vèsən‑eè siìn, e kèʼ fo kèʼ.