Read Lamnso Joon 18 Bible Online

Joon 18 - Lamnso bible

Joon 18

¹Jesus bùnrì, e màysì, wùn à wón və́ lìme nèn lò, e dù, e tùmsín kiwoóy ké ndzəv ye á yoŋ ji Kidron, e nə̀ə́ e kày yímóʼó ye yí‑iì dzəə̀n fó.

²A Judar woo ŋgaà və menàŋ‑eè kìíy ne kay yee shooy, bìʼ fo Jesus wùn à wón və́ lìme‑eè lo, á dù, a dzə fo.

³Wù nèn wìy fo wùn à vé rərí ŋgoo e fur, à wír ámóʼó sá ve á yii shiy lav cù, aá wáyrí vifá ve rər, e sə̀ʼtì vikaʼày, e sə̀ʼtì lam si, a túm vitú ve atàá cù wùn à wír veé mbìv *Farasii wír vée shooy.

⁴Jesus‑eè kìíy ne kinyo ke kí kér fó koóy wun kidzə̀m, wù nèn kòʼtí fo mbìy, e dzə̀r e wír vìyi jii, «Vèn taʼ a dzə̀ la?»

⁵Á bìnèr jii, «Jesus woó Naasarer.» Wù nèn sùúy jii, «Dzə̀ mo woo shó və̀n.» A Judar woo ŋgaà və menàŋ və̀y tíy sa wùn áwune.

⁶Mo Jesus suuyin jii, «Dzə̀ mo woo shó,» á nèn tsə̀ʼtì wún é bàm, e gbùkìr gbùkìn fó nsay.

⁷Wù nèn kfə̀n dzə̀r jii, «Vèn taʼ a dzə̀ la?» Á kfən bìnèr jii, «Jesus woó Naasarer.»

⁸Jesus suúy jii, «M kì sùúy ne ji dzə̀ á mo woo shó. A vèn bèn taʼ a dzə̀ mo, vèn màʼtì, é wír vìne wáa dù.»

⁹A wù suuy bèy ji kinyo ke wù kì suuyin kí fiʼ ghèén. A wù kì sùúy e Nyùy jii, «M yoʼ lày wír e mòʼón fo ve wò‑oò foon e mòó.»

¹⁰A Simon Pita kì kér nyùy, wù nèn dzə̀n ji wun gwar wír wùmòʼ shó, e shaà, e shòʼ a dzə̀ kituʼùr ké yìy kí. A wìr woo shooy dzə̀ kwǎn taà cù wo kuʼùn, aá yoŋ ji Malkur.

¹¹Jesus suúy e Pita jii, «Siìr nyùy yè e kiburúʼ. À taʼ, e shèm fo m nó bàr ŋgeʼ wo Tàr wor fó e mò və̀n à?»

¹²Vé rərí wùn à vilìmbìy vév ví, à wír ve á yii shiy lav cù vìyi nèn bàm Jesus, e kùr.

¹³Á kúr, e nèn lì, e tòmbìy dù sho fo Anar, a dzə̀ tàr à wiiy Kayfar wo yì‑iì dzəə̀n taà cù wo kuʼùn é kiya foo fèy.

¹⁴A Kayfar və̀n dzə̀ wo wù‑uù tirin vé wòŋe jii, kí bòŋ a ji wìr kpú e mòʼón, é woŋe luŋ.

¹⁵Á wáa dù e Jesus bèy, Simon Pita wùn wùmòʼ woo wan lìm Jesus wáa jùmrì fo bàm. Á dù, e nə̀ə́ e taà cù wo kuʼùn və̀y laʼ, e màʼtì və̀y woo wan lìm Jesus nəə́ sá fo bàm, bìʼ fo taà cù wo kuʼùn‑eè kiìn wun kijuŋ.

¹⁶Pita nèn gòʼ kfə́ a dzə̀ é shùu kishem fo ndzə. Wàn lìm Jesus wo taà cù wo kuʼùn‑eè kiìn wun və̀y yiì lò, e dù, e sùŋnín e wánlè wiíy wo wù‑uù shiy shúu kishem woo shooy, e lì Pita, wùn wun nəə́.

¹⁷Wánlè wiíy və̀y yén Pita, e dzə̀r shó jii, «Kí à dzə̀ sá ŋgaà ŋgoo wìr və̀sə wùmòʼ.» Wù sháʼnín jii, «Bó m yòʼ dzə̀ é ŋgoo fo.»

¹⁸A vé lìm wùn à vé rərí kì tòn və́y, a yor, bìʼ fo kidzə́r kí‑iì dzərì. Pita nèn shaà, e dù, e tìím wùn áwune, a yor və́y.

¹⁹A Jesus sì wùn à taà cù wo kuʼùn, a wù tar kinyo kfə́, dzə́ti ké aŋgaà və́ ŋgoo, kfə̀n dzə́ti mo yéʼéy rəə́ dzəə̀n.

²⁰Jesus nèn bìnèr jii, «Mò‑oò fiʼtì kinyo kém e wìr dzə̀m a dzə̀ fó meranén. Mò‑oò rə́si yéʼey wíri é ŋgày se bùnrì, kfə̀n yéʼey e *lav cù fo wír veé Judàa‑aà báʼti adzə̀m. A bó m yòʼ‑oò yéʼey wíri, ghán, woóne woònén.

²¹À kfə̀n dzə́r kinyo kìn a dzə̀ e mò ji ka? Kú a dzər a dzə̀ e wír ve vé‑eè yú kinyo kémé ji m sà‑aà fiʼtì ji ka á? Áwune kì kinyo ke mò‑oò fiʼtì.»

²²Jesus suúy bey, a kitú ke vé rər kímóʼ kí tíy e wùn ghaŋ, kí nèn dzə̀v búbúʼ fó fo, e dzə̀r shó jii, «Á mo à binèr kinyo e taà cù wo kuʼùn ben à?»

²³Jesus bìnèr jii, «A kinyo ke m suuyin kin ki dzə̀, a m jày jáyín, à dìn fo jay dzəə̀n. A dzə̀, a m suuy a dzə̀ kinyo ke ru kí, bo à kfə̀n dzə̀v mo fó gha?»

²⁴Anar yiì lò, e tsə̀nsí Jesus fo Kayfar wo yì‑iì dzəə̀n taà cù wo kuʼùn wùmòʼ, a kóy se Jesus si kù dzə̀ə́ sikúrín.

²⁵A Simon Pita kù dzəə́ tíy fo wù kí yór və́y. Á nèn lò, e dzə̀r shó jii, «Bó à yòʼ dzə̀ sá ŋgaà ŋgoo wìr və̀n wùmòʼ a?» Wù kfən shàʼnín jii, «Bó m yòʼ dzə̀ é ŋgoo foo fèy.»

²⁶Kwǎn taà cù wo kuʼùn wúmóʼó‑oò tíy sa fo, a dzə̀ fər wìr wo Pita kì shoʼon kituʼùr və̀y. Wù nèn lò, e dzə̀r shó jii, «Bó m yoʼ lò yèn wò e mvə̀m kày fèy vèn wìr və̀sə à?»

²⁷Pita kfən shàʼnín. Mo wù shaʼnin é ghan sin, kiyuú ki ku nèn tòŋ.

²⁸Ndzə yiì lòo jàv, á nèn lì Jesus fo Kayfar laʼ, a dù sho e ŋgaà saʼ woo wír woó *Rom ntoʼ. Á dù, e lòo nəə́ e mvə̀m ntoʼ, vé wòŋ vìyi gòʼ fo ndzə, bìʼ fo vé‑eè fan fó ndzəʼ vishí vév e wìr kitum laʼ, e làa yòʼ dzə́ə yi *Ŋkǎʼ Yáʼayshaà woó ghan see shooy.

²⁹Payler nèn fəə̀, e yèn áwune, e dzə̀r jii, «Vèn wiy e wìr və̀n bèn, a wù jày ka?»

³⁰Á bìnèr jii, «A wù kì bùŋ njò, bo bó vèr yoʼ lò a wìy sho ji à sáʼ.»

³¹Wù nèn bìnèr jii, «Kù li ven, e dù, a saʼ mo yéen yee nsər suuyì.» Vé wòŋ vìyi nèn sùúy jii, «Bó vèr yòʼ kér vitaáví ve dzə̀ á tìnén nsaʼ ji á yúy wír.»

³²A kinyo kìn ki‑iì kòóy bey ji kfə́ə kpu ye Jesus‑eè suuyin ji wun wíy kpuu fiʼ ghèén.

³³Payler nèn lò, e kfə̀n é ntoʼ, e kòʼór Jesus, e dzə̀r shó jii, «À dzə̀ Fon wìr veé Juda à?»

³⁴Wù bìnèr jii, «À dzə̀r kin ji dzə̀r wò mo à dzə̀r bìʼ fo suuyin wír e wò a?»

³⁵Payler bìnèr jii, «M dzə̀ wír woó Juda moo? Bó wír ve á wìyìn e wò fèn ji m sáʼ víne yòʼ dzə̀ wír vén wùn à vitú ve atàá cù véné a? Kinyo ke à jayin kí dzə̀ ka?»

³⁶Jesus bìnèr jii, «Bó vifon vém ví yòʼ dzə̀ veé ndzə fèn. A kì dzə̀ veé ndzə fèn, bo wír vémé ló a fùnèn fo vé wòŋe kum mo. Yii bèy, a bó vifon vém ví yòʼ dzə̀ veé ndzə fèn.»

³⁷Payler nèn sùúy sho jii, «Kí bo dzə̀ rú ji à dzə̀ fon wùmòʼ?» Jesus bìnèr jii, «M dzə̀ fon rú mo à suuyì. Dzə̀ kinyo ke vé‑eè dzəən mo shó, a mò‑oò wìy é ndzə fèn ji m fiʼ dìn kinyo ke dzəə̀n ke ru kí e wíri. Wìr dzə̀m wo wù koŋ kinyo ke ru kí, nén a yuurí kinyo kém.»

³⁸Payler nèn sàyín jii, «Kinyo ke dzəə̀n ke ru kí yòʼ fə̀m dzə̀ ka?» Mo wù suuyin bey, e nèn fəə̀, e dù, e yèn vé wòŋ vìy, e sùúy jii, «Bó m yoʼ yèn njò ye wìr və̀n jayin.

³⁹Yii bèy, a vèsən kér nsìysì wùmòʼ ji lóo dzə e ghan sé Ŋkǎʼ Yáʼayshaà və̀n, m fə̀ə́r wir sháŋ wo vèn lonen wùmòʼ. Kí ghèén ven ji m fəə́r a dzə̀ wír və̀n wo á yoŋ ji Fon wìr veé Juda à?»

⁴⁰Áwune nèn lò, a waamé waamén jii, «Vèr yòʼ taʼ wír və̀n. Ku fə̀ə́r a dzə̀ Barabar.» A Barabar wo vé‑eè lón və̀n‑eè dzə̀ kiŋkór ke shòŋ.