Read Lamnso Joon 19 Bible Online

Joon 19 - Lamnso bible

Joon 19

¹Payler nèn fò Jesus, á shóʼ e ŋgwàne.

²Vé rərí kfən kaàrí kár e kicí ké njoŋ ki, e səə̀nè e kitu wo ji ntáráʼ, e màʼ kikúm ké vifòn e wùn wó,

³e nèn a wìy e si wo, a bùn, a kwa jii, «Caamfoò, Fon wìr veé Juda.» Wìr bun bèy, wù dzə̀v e kiwó ki.

⁴Payler nèn siì yiì fəə̀, e sùúy e wíri jii, «Vèn yuúrí, m sí fəər wír və̀y lèn, e koʼór e věn si fó dìn ji bó m yoʼ yèn njò ye wù gbuùn.»

⁵Á nèn a wìy e Jesus, aá sóv ne ntáraʼ njoŋ və̀y e kitu wo, e màʼ kikúm ké vifòn e wùn wó. Payler suúy e wír vìyi jii, «Vèn yén ri wír və̀y.»

⁶Vitú ve atàá cù wùn à vitú ve wìr ve vé‑eè shiy lav cùu yén Jesus, e nèn a waamé waamén jii, «Á ku tà taán é kintam. Á tá taán é kintam.» Payler nèn sùúy jii, «Bo kù li ven, e dù, e ta e kintam. Bó m yoʼ yèn kinyo ke wù jayin.»

⁷Wír veé Juda vìyi bìnèr jii, «A dzə̀ mo yéer yee nsər suuyì, bo wìr və̀n kù kér fó kpu, bìʼ fo wù yoŋ kitú kfə́ ji Wan Nyùy.»

⁸Payler yú kee shooy, e màysì, e fàn,

⁹e lì Jesus, e kfə̀n shó e mvə̀m ntoʼ, e dzə̀r shó jii, «À lò fo feé?» La Jesus yòʼ ghày.

¹⁰Payler nèn dzə̀r shó jii, «À tén fó bìnèr kinyo e mò a? À yòʼ kì ji kér mo vitaáví fó suúy, aá maʼti wò, a m kér fó suúy, aá tá wò e kintam à?»

¹¹Jesus bìnèr jii, «Bó yòʼ dzə̀ à wàa ker vitaáví ve dzə̀ à yiì kinyo e mò, a bó Nyùy biímé gheéy. Jay wo kuʼùn ku nèn a dzə wo wìr wo wù wayin mo e wò kiwo, bó yòʼ dzə̀ wo.»

¹²Payler yú bey, a tàʼ ji wun maʼti á Jesus. Wír veé Judàa nèn a waamé jii, «Aà màʼtì wír və̀n, bo bó à yòʼ dzə̀ ŋkar Fòn woó *Rom. Wìr wo yoŋ wun kitú kfə́ ji fon, ŋgaàŋ táŋ a dzə̀ kóy wùn Fòn woó Rom.»

¹³Payler yú kee shooy, e nèn fə̀ə́r Jesus, e dzə̀ʼə̀m e kirəsí fo wù yii tínen nsaʼ, aá yoŋ fó ji nsaàlav mfiì, a dzə̀ é Lǎm Hibru ji Gabata.

¹⁴Wù wáa dzə̀ʼə̀m fo e ghan sin, a shùy sì é ntìntìn, a dzə̀ kishiíy ke wír veé Judàa kì sí báʼti fó bvəəshí, e rəsí Ŋkǎʼ Yáʼayshaà. Wù nèn sùúy e wír veé Juda vìyi jii, «Vèn yén ri fon won və̀y.»

¹⁵Áwune nèn kfə̀n a waamé jii, «Á yúyrí wír woo shooy yúyrín. Á ku yùyrí yuyrín. Á tá taán é kintam.» Payler dzə́r aáwune jii, «Bo dzə̀ ji m tá fon won é kintam à?» Vitú ve atàá cù vi bìnèr jii, «Vèr kù kér fon e mòʼón, a dzə̀ Fon woó Rom.»

¹⁶Payler nèn màʼtì, e fò Jesus aáwune ji á du, e tà é kintam. Vé rərí nèn lì Jesus,

¹⁷wùn áwune fəə́, wù wáa beʼ kintam kfə́, á wáa dù e kirə̀ʼ ke á yoŋ ji ŋgéreʼ kitu ke wìr, a dzə̀ é Lǎm Hibru ji Gorgota.

¹⁸Á meé fó, e nèn tà wun e kintam. Á kfən tàm sá wír ámóʼó é vintam e wùn ghaŋ abaà, wù wáa dzə fo ntìntìn.

¹⁹Payler sáŋ kinyo kímóʼ kí, e fò, á bárír é kintam ke vé‑eè taan Jesus sho, a kí dzə̀ jii, «Jesus woó Naasarer, Fon wìr veé Juda.»

²⁰Kirə́ʼ ke vé‑eè tamen Jesus sho kìn ki‑iì dzə̀ é ghaa ŋkàlaʼ Jerusalem. Wír veé Judàa wáa shaà fo anín, a yòŋ kinyo kee shooy, a vé‑eè sàŋ aáwuné Lǎm Hibru, e kfə̀n sàŋ e wír veé Romé làm, e sàŋ sá e wír veé Grikí làm.

²¹Vitú ve atàá cù vi nèn dù, e yèn Payler, e sùúy sho jii, «Bó à yòʼ kì yíi saŋ ji wìr və̀n dzə̀ Fon wìr veé Juda. Ku sàŋ jii, suuy wun woo Jesus ji wun dzə̀ á Fon wìr veé Juda.»

²²Payler bìnèr jii, «Kinyo ke m saŋen kí kù sì ke m saŋen.»

²³Mo vé rərí taan Jesus e kintam, e nèn lì ndzə̀y sə́, e jàv virə́ʼ vikweè mo áwune‑eè dzəə̀n. Kikúm kee fó yuv kí bér, a vé‑eè bà kee shooy kilàŋsìn, là sə́ʼ, e kèʼ fo yuv, e mèé fo ròŋ.

²⁴ Á nèn sùŋnín jii, «Lá vèsən yòʼ sàr. Vèsən wáa tsəm a dzə̀ kàŋ sho, a yen wír wo wù yíi yòv.» A kí‑iì kòóy bey ji kinyo ke vé‑eè saŋen é Ŋwàʼ Nyùy ki fiʼ ghèén. Vé‑eè sàŋ jii, «Vé‑eè lì ndzə̀y sém, e jàv, e lì kikúm kém, a tsəm kàŋ sho.» Ku nèn a dzə kíwun ke vé rər víyi‑iì yiìn.

²⁵Jesus wáa ker e kintam bèy, a yè wov wùn fə̀r yè wov woo wiíy tíy fo ghaŋ, à vikìy ámóʼó sá abaà. Wùmòʼ‑oò dzə̀ Maria woo wiíy Kiliopar, wùmòʼ Maria wo yír rə́ yímóʼó dzəə̀n ji Magdalen.

²⁶Wan lìm Jesus wo wù‑uù kòŋèn é ŋàŋ wáa tiy sa fo. Jesus yén, a wùn yè wov tíy fo ghaŋ, e yòŋ yè wov jii, «Yìy, wan wò sì və̀n»,

²⁷e kfə̀n sùúy e wan və lìm və̀y jii, «Yè won və̀ne.» Kèʼ fo ghan see shooy, wàn lìm və̀y nèn lì yìy à Jesus, wù wáa dzə e wùn laʼ.

²⁸ Jesus suúy vinyo vìn, e màysì, a wù kiíy ne ji wun màysì ne vinyo və́ lèn a vidzə̀m, wù nèn lò, e sùúy jii, «Kilòŋ kí yúm mo.» A wù suuy bèy ji kinyo kee shooy ke vé‑eè saŋen é Ŋwàʼ Nyùy ki fiʼ ghèén.

²⁹Mo kiŋkway ke melùʼ ki‑iì tíy fo ghaŋ, wìr nèn wày kùshá é melùʼ fèy, e sòv e kikàʼày, e tsə̀nsí, e neèr e shuù wo.

³⁰Jesus nyoóŋé, e sùúy jii, «Vinyo vém vidzə̀m vi mày ne», e nèn màʼ kitú kfə́, e shèm.

³¹Mo yì‑iì siìn kishiíy ke vé‑eè sí báʼti fó bvəəshí, e rəsí kishiíy ké bam, a bó kí yoʼ ghèén ji dzə́n wìri goʼ é kintam e kishiíy ké bam, bo taaka mo kishiíy ké bam ke vé‑eè báʼti kìn ki‑iì dzəə̀n ke kuʼùn kí, vé wòŋe nèn dù, e yèn Payler, e lòn ji wù ku sùúy, aá bvə́ʼtí á shwín sé wìr vìy, aá fíʼ kpùkír cér, aá shaʼar dzə́n sí.

³²Wù biímé, vé rərí nèn dù, e bvə̀ʼtí shwín sé wìr vee abaà ve vé‑eè tamen e Jesus ghaŋ vìy.

³³Á lò ji á bvə́ʼti sa wó Jesus, e yèn, a wù kì kpù ne, á nèn màʼtì.

³⁴Yii bèy, wùmòʼ woo ŋgaà rə̀r tsə́nsí kòŋ, e sòv nsaŋ Jesus sho, fəə́ mensə́ wùn à mendzə́v mè.

³⁵Vinyo vìn vi nén a dzə ve fèrìn wír wo wù‑uù yenen mo ví kooyì. Wù suuy a dzə̀ kinyo ke ru kí, kiiy rú ji dzə̀ á kinyo ke ru kí, e nèn a fèr ji vèn fiʼ wày sá shilív e Jesus wùn.

³⁶ A vinyo vee shooy vi‑iì kooy bèy ji vinyo ve vé‑eè saŋen é Ŋwàʼ Nyùy vi fiʼ ghèén. Vé‑eè sàŋ jii, «Bó á yòʼ wíy beʼ kighvə́r kfə́ kimòʼón gheéy.»

³⁷ Á kfən sàŋ jii, «Wíri wíy a leéy wír woo shó, wo á sòvìn.»

³⁸Mo Jesus kpuun, wìr wo á yoŋ ji Joosev wùmòʼ, a dzə̀ wír woó ntèʼ yee Arimatia, nèn dù, e yèn Payler, a lon ji wù ku màʼtì, é wun shaʼar á dzə́n Jesus. A wun woo Joosev‑iì dzə̀ ŋgaà ŋgoo Jesus wùmòʼ, lir lìrìn, bìʼ fo wù‑uù fan vé wòŋe. Payler biímé, wù nèn dù ji wun shaʼàr dzə́n Jesus.

³⁹Nikudemon wo wù‑uù loòn é ghan símóʼ sí vitsə́ʼ, e dù, e ghàn Jesus, nèn wìy sa fo, a wù kér kifú ke rəʼtìn kímóʼ kí, ke á yoŋ ji *mer wùn à ke á yoŋ ji *alo ki moo kilu mtaár bèy.

⁴⁰Wùn Joosev nèn lì dzə́n Jesus, e ndzə̀m e wón ndzə̀yí wùn à kifú kiy ki, mo wír veé Judàa yii náŋsin dzə́n wìr, e bó a way e sày.

⁴¹Kiboó kímóʼ kí wáa dzə e ghaa kirə̀ʼ fo vé‑eè taan Jesus e kintam fèy, a vé‑eè bùʼ ne say yímóʼó é kilan e mvə̀m kiboò fóo fèy, a bó á yòʼ‑oò yiì ne wày wír sho.

⁴²Mo vé‑eè sí báʼti kishiíy kév ké bam, a ghán sí báŋrín ne, á nèn dù, e wày dzə́n Jesus e sày foo fèy, bìʼ fo yí‑iì dzəə̀n fó mentsə̀m.