Read Lamnso Joon 21 Bible Online

Joon 21 - Lamnso bible

Joon 21

¹Wìy lòo dzə e ghan símóʼ sí, Jesus kfən dìn kitú kfə́ e wón və́ lìme, aá dzə́ e ghaa kibaŋ keé Tiberia. A kinyo ke kí‑iì kooyin kí dzə̀ jii,

²wón lìm Jesus ámóʼó‑oò dzə́ fo, aá dzə̀ jii, Simon Pita, wùn à Tomar wo vé‑eè yoŋ sa ji Wóné, à Nataniar wo dzəə̀n wír woó Kaana e wòŋ Galeli foo fèy, à wón Sebedi vee abàá, wùn à wón lìm Jesus ámóʼó sá abaà.

³Simon Pita nèn lò, e sùúy jii, «Mo‑óò du, e koò sə́.» Á bìnèr jii, «Bo vèsən du.» Á nèn nə̀ə́ e kikoŋ, e sìíy, e shìíy e ndzəv, e làa yòʼ koo kifá gheéy.

⁴Ndzə yiì kèʼ jav, Jesus wìy, e tìím e ghaa ndzəv, la wón və́ lìme yòʼ a kiíy ji dzə̀ á wun.

⁵Wù nèn jàŋ áwune jii, «Ŋkàr sem, vèn ku koò sə́ à?» Á bìnèr jii, «Vèr yoʼ koò kifá.»

⁶Wù jàŋ jii, «Vèn maʼ lálán e mbìv kikoŋ ye yì dzəə̀n é koy yìyí, aá koó sə́.» Á màʼ, sə́ si rún shó, á wáa sə̀ŋ, a sə̀ŋ ntéŋ.

⁷Wan lìm Jesus wo wù‑uù koŋ e ŋàŋ və̀y nèn sùúy e Pita jii, «Wìr və̀sə dzə̀ Tàr wòsən.» Pita yú ji dzə̀ á Taàtá Jesus, a wù kì tàm ndzə̀y támén, e kù nèn màʼ kikúm, e lìy fó kikoŋ, e tò é ndzəv, a dù fo.

⁸Kibér ke wón lìm Jesus ki wáa jùmrì e kikoŋ, a sə̀ŋ lálán wo sə́ si‑iì runen shó və̀y, a bó á yòʼ dzə̀ə́ kwaʼda fo ghaa kwaʼ, a ntàm bér moo kóy mtàn bèy.

⁹Á dù, e lòo fəəsín e ghaa kwaʼ, e yèn, a və́yí gheʼ fo e vikaysín, a sə́ si néŋ e kitu wo, a kibán ki dzə̀ sá fo.

¹⁰Jesus suúy jii, «Vèn wiy e sə́ se vèn koon símóʼ sí.»

¹¹Simon Pita tó é kikoŋ, e ŋètí lálán və̀y, e sə̀ŋ, e wìy sho, a sə́ se faŋkìn sí rún shó, sə́ wií e sə́ si nshòv taár e mtàn. Mo sə́ si fə̀m‑eè dzəə̀n nyanyày, lálán yòʼ‑oò lo tiìné gheéy.

¹²Jesus nèn sùúy aáwune jii, «Vèn wiy, e yìkír.» Wù kóʼtí, e lì kibán, e jàv aáwune, e kfə̀n jàv sa sə́ sìy, á wáa yi. Wùn áwune wáa dzə bèy, la wìr mòʼón yòʼ fə̀m ghày shó jii, wù sà dzə́ bèn, a dzə̀ wun la á? Á kù‑uù səə̀m sə́əmen ji dzə̀ á Tàr wov.

¹⁴Jesus dìn kitú kfə́ e wón və́ lìme é ghan sin, akàŋe nèn mèé ataár mo wù dìnèn kitú kfə́ aáwune mo wù‑uù fəən fó kpu.

¹⁵Á yiì yìkír, e màysì, Jesus yòŋ Simon Pita jii, «Simon woo wan Joon, à kù yòʼ koŋ mo, e shaà mo wír vìne koŋè a?» Wù bìnèr jii, «Eènó Tàr, à kì ji m koŋ wò.» Jesus nèn sùúy sho jii, «À wàa leéy rì fo wír vémé mo wìr lèéy fo wón njìi.»

¹⁶Wù kfən dzə̀r fó akàŋ vee abaà jii, «Simon woo wan Joon, à koŋ mo á?» Pita sii bìnèr jii, «Eènó Tàr, à kì ji m koŋ wò.» Wù nèn kfə̀n sùúy sho jii, «À wàa leéy rì fo wír vémé mo wìr lèéy fo njiì.»

¹⁷Wù kfən lò, e yòŋ fo akàŋ vee ataár jii, «Simon woo wan Joon, à koŋ mo á?» Pita yú, a wù dzə́r fó akàŋ vee ataár ji wù sà koŋ wun a, kitú ki lùm wun. Wù nèn yòŋ jii, «Tàr, kì wò vinyo vidzə̀m, aà kì ji m koŋ wò.» Jesus kfən sùúy sho jii, «À wàa leéy rì fo wír vémé mo wìr lèéy fo njiì.»

¹⁸A m suuy e wò rúrú jii, «Wò‑oò dzə́ wánlè nsùm, wóvti ndzə̀y sé, à wàa dù fo à kòŋèn. Yii bèy, à wíy dzə̀n, áà wáa ràmsì kóy, é wìr wo sən wáa kur, a lì wò, a dù sho fo bó à yòʼ koŋè.»

¹⁹A Jesus‑eè suuy kinyo kìn ji wun tóʼtí á kfə́ə kpu ye Pita wíy kpu, e nàn a dzə̀ yír Nyùy. Mo wù suuyin bey, e nèn kfə̀n sùúy sho jii, «Kú a jùmrì a dzə̀ mo.»

²⁰Pita lòo bìnkìr, e yèn wan lìm wo Jesus‑eè koŋ e ŋàŋ və̀y, a wù wiy fo bàm. A dzə̀ wun woo shó wo wù‑uù yeʼemen e Jesus wùn é ghan se wùn áwune‑eè yikin, e jòʼsì, a dzər ji «Tàr, ku sùúy wír wo wù yíi kar menàŋ e wò bàm.»

²¹Mo Pita yenen, a wan lìm Jesus və̀y wiyì, e dzə̀r e Jesus jii, «Tàr, ké və̀n woo wír ki dzə̀ ji ka?»

²²Jesus bìnèr sho jii, «A m fə̀m kì taʼ ji wù wìy shaàrì, e mèé e ghan se m wíy kfən, bo bó yòʼ dzə̀ nsaʼ yè. Kú a jùmrì ké ki a dzə̀ mò.»

²³Mo Jesus suuyin bey, léŋe nèn kèʼ, a ghanén e wír vəə́ mvəm ji bó və̀n woo wan lìm yòʼ waà dzəə́ wìy kpu. A bó yòʼ dzə̀ kinyo ke Jesus‑eè suuyin. Wù‑uù sùúy jii, a wun kì taʼ ji wìr və̀n shaari, e mèé e ghan se wun wíy kfən, bo bó yòʼ dzə̀ á nsaʼ Pita.

²⁴A kù dzə̀ wan lìm Jesus woo shooy wo wù‑uù yenen vinyo vìn vidzə̀m, e sàŋ é ŋwàʼ fèn, a vèr kì ji kinyo ke wù fer kìn ki dzə̀ á ke ru kí.

²⁵Yii bèy, vinyo vímóʼ ví dzə̀ shó vinín ve Jesus‑eè yii, a m yén jii, a dzə̀ ji á ŋeevi vinyo vee shooy vidzə̀m, e sàŋ é ŋwàʼ, la kitú ke nsay kidzə̀m ki yòʼ kòóy fó lèm aŋwàʼ vee shooy.