Read Lamnso Joon 4 Bible Online

Joon 4 - Lamnso bible

Joon 4

¹Wír veé mbìv *Farasii nèn yù sá ji Jesus sí kooy aŋgaà və́ ŋgoo, wáy e ndzəv, aá kuʼ shaa a vé Joon.

²A bó yòʼ fə̀m‑eè wáy Jesus wíri é ndzəv, kù‑uù wáy wón və́ lìm cáʼcáʼ.

³Jesus yú ji leŋ woo shooyi dù ne, e mèé a fo wír vìyi, wù nèn lò fo wír veé Judàá mbìv wòŋ foo fèy, a kfən e mbìv Galeli.

⁴A wù kù‑uù yíi shaà dzə́ə fó mbìv wòŋ yee *Samaria.

⁵Wù lòo dù, e mèé e mvə̀mlaʼ yeé Samaria yìmòʼ, aá yoŋ ji Sikar, a yì dzə̀ é ghaa sum wo Jakov woo tàr à ràm yeé Isray‑iì foon e wan və woo Joosev.

⁶Jesus wáa meé fo, a sì e ntìntìn shùy, a ndzə́v ye Jakov‑iì tuŋené dzə̀ fó, wù nèn dzə̀ʼə̀m e ghaŋ wo, bìʼ fo wù‑uù ghanen ne, e dòr.

⁷Wiíy woó Samaria foo fèy wùmòʼ nèn wìy ji wun tú mendzə́v, Jesus lón jii, «Ku fò mo mendzə́v, é m nó.»

⁸A wù kì dzə́ fo bèy, a wón və́ lìme dú ne ji á yún a vifá ve yi fo mvə̀mlaʼ.

⁹Wiíy və̀y dzə́r e Jesus jii, «À dzə́ wír woó Juda, a m dzə̀ kém woó *Samaria, aà kfə̀n lón mendzə́v fo mò móo le?» A wù suuy bèy, bìʼ fo wír veé Judàa kù‑uù nyáŋsi veé Samaria nyáŋsín.

¹⁰Jesus bìnèr jii, «Aà bèn kì fómo wo Nyùy taʼ, e fo wò, e kfə̀n kìíy mo wìr wo wù lón mendzə́v fo wò və̀n dzəə̀n, bo kì yíi lon wò fo ŋgaàŋ, é wù fó wò mendzə́v me mè léŋ ghán sidzə̀m.»

¹¹Wiíy woo shooy nèn lò kfə́, a dzər jii, «Taàtá, à yíi lì mendzə́v me mè léŋ mee shooy fo feé, a bó à yòʼ kér kifá kée ser sho, a bií kfə̀n shoò é ŋàŋ?

¹²À shaà tàr wor Jakov wo wù‑uù tuŋen rən yee ndzə́v, e lèm e vèr a? Bó wun woo tàr wor yòʼ‑oò ló a no ndzə́v rən, kfə́ə rə́ wùn à nyám sév sí kfə́n a no sa à?»

¹³Jesus bìnèr jii, «Kilòŋ kí kù dzəə́ wìy a yum wír wo wù nó mèn mee mendzə́v.

¹⁴Yii bèy, a bó kilòŋ kí yòʼ dzəə́ wìy yum wír wo wù nó mendzə́v a dzə̀ me foon mo. Mee shooy mè wíy a dzə e ŋgaàŋ wùn ji ntoò ndzə̀v ye yì fəə́ ghán sidzə̀m, fó wun dzəʼə̀m yee là may.»

¹⁵Wiíy və̀y nèn yòŋ jii, «Taàtá, ku fò mo mendzə́v mee shooy, é la kilòŋ kí yòʼ dzəə wìy a yum mo, é m wáa wìy fèn ji m tú mendzə́v.»

¹⁶Jesus suúy shó jii, «Dù ri, e jàŋ lum wò, é vèn wun wiy.»

¹⁷Wù bìnèr jii, «Bó m yòʼ kér lúm.» Jesus suúy shó jii, «Mo à suuyin bey, à suuy a dzə̀ kinyo ke ru kí.

¹⁸Wò‑oò sí kér alúm atàn, a wo vèn wun dzə́ lèn yòʼ fə̀m dzə̀ lum wò. À suuy rú féyì.»

¹⁹Wiíy və̀y yú kee shooy, e yòŋ jii, «Taàtá, m kìíy ne lèn ji à dzə̀ *ŋgaà ntum Nyùy.

²⁰Atàr vérí‑iì rə́si bunrì Nyùy a dzə̀ é gwan fèn, yiì ka, bo ven vee wír veé Judàa wáa suúy kén ji kirə́ʼ ke dzə̀ á wàa bùnrì Nyùy sho ki kù mày Jerusalem?»

²¹Jesus yòŋ jii, «Yaà, yuúrí kinyo ke m suuy ki. Ghán sí sí gheenè se bó á yòʼ dzəə́ wìy a nyàʼ fo dzə̀ á wáa bùnrì Nyùy, kìn dzə̀ é gwan fèn, kìn dzə̀ é Jerusalem.

²²Vèn bunrì kén Nyùy lèn, a bó á yòʼ kiiy kinyo ke á yii. A ver vee wír veé Judàa bunrì kér, aá kì, bìʼ fo Nyùy shoʼon ver, á wáa dìn mo wù wíy lùŋèr wíri.

²³Yii bèy, ghán se wíri wíy a bùnrì Nyùy e dzəə yee réŋ virə́ʼ vidzə̀m si sí wiyì, a sí sì é kiwo. Aáwune wíy a yu a dzə̀ fo Kiyoy ke Nyùy ki, e bó a bùnrì Nyùy e dzəə yee rú. Á mo Nyùy koŋ ji wíri wáa bùnrì wun.

²⁴Nyùy dzə̀ Kiyoy, a wír ve á bunrì wune kér fó a yu a dzə̀ fo Kiyoy ke Nyùy ki, e bó a bùnrì wun e dzəə yee rú.»

²⁵Wiíy və̀y lò, e sùúy jii, «M kù yòʼ kì ji *Mfə̀ə́r wo Nyùy‑iì kàʼàn, wo á yoŋ ji Kristu wíy wìy, é wù naari ver vinyo vidzə̀m.»

²⁶Jesus nèn sùúy sho jii, «Dzə̀ mo woo shó və̀n, mo wo m súŋnin e wò.»

²⁷Wón lìm Jesuse ku nèn a kfən e bàm, e yèn, a Jesus súŋnin wùn wiíy woó Samaria, a ker gháʼ. Yii bèy, la wìr yòʼ dzə̀r ji wiíy sà taʼ kaá, kìn kinyo ke ki yiìn, bo Jesus wáa suŋnín wùn wun.

²⁸Wiíy və̀y yiì lò, e màʼtì mbǐʼ mendzə̀v fó, e kfə̀n é mvə̀mlaʼ, a bi wíri jii,

²⁹«Vèn ku wìy, e yèn wír wo wù toʼtin vinyo ve mò‑oò rə́si yii vidzə̀m. A tàm bo dzə̀ Mfə̀ə́r wo Nyùy‑iì kàʼàn.»

³⁰Wíri nèn a lòkìr, a wìy ji á yén á Jesus.

³¹A wón və́ lìme kì sìíy ne, a boòrì jii, «Ŋgaà Yèʼey, ku yì kifá ki.»

³²Wù sháʼnín jii, «M kér vifá ve yi, a bó vèn yòʼ kì mo ví dzəə̀n.»

³³Á nèn a ghaynín ji wìr sà kì sìíy, e wìy e vifá ve yi vi, wù yí a?

³⁴Jesus suúy jii, «Vém vee vifá ve yi vi dzə̀ ji m yii kinyo ke wìr wo wù tumen mo, e màysì lim ye wù foon e mò e dzə̀m.

³⁵Vèn suuy kén ji ŋwee kù dzəə́ bér e kweè, é bo á wáa kav vifá fo kwaʼ, yii bèy, a m suuy kém jii, vèn leéy kijuŋ, e yèn á mo kwáʼa kiʼì. Vifá vi bìy ne bíyín.

³⁶Wìr wo wù yíi a kav kér vilaʼày, a wù sí káv vifá, báʼti, wáy a dzə̀ é dzə̀ʼə̀m yee là may, a ŋgaà lìm wùn ŋgaà kav yíi tatí, a sheʼrí adzə̀m.

³⁷Kí nen ghèén mo ŋgàn yìmòʼ yii suuy jii, ‹Ké ŋgaà lìm ki dzə̀ wáy, ké ŋgaà kav, káv.›

³⁸M nén a tum ven lèn ji vèn káv ri vifá ve bó vèn yòʼ‑oò lo lìm. Yì‑iì lìm wír ve səné, a vèn sí káv lèn, yú vijuŋ fo áwuné lìm.»

³⁹Mo wiíy və̀y fìʼtìn é mvə̀mlaʼ mo Jesus toʼtin vinyo ve wù‑uù rə́si yii vidzə̀m, wír veé Samaria foo fèyi nèn wày shilív e Jesus wùn anín.

⁴⁰Áwune wìy, e yèn wun, a lon ji wù ku dzə̀ʼtì a wùn áwune shishàr. Wù biímé, e shìíy fo vishiíy vibaà.

⁴¹Wíri yuúrí kinyo ke wù fiʼtì fo wùn shuù, e nèn kfə̀n a biimé aneénín, e shaà vé mbìyi,

⁴²a suúy e wiíy və̀y jii, «Vèr wày shilív e Jesus wùn lèn a dzə̀ bìʼ fo vèr yuun ne kinyo kfə́ e vituʼùr vér ví, bó yòʼ dzə̀ə́ bìʼ kinyo ke à kì fèrìn e vèr cáʼcáʼ. Vèr kìíy ne lèn kijuŋ ji wìr və̀n dzə̀ wo wù wíy lùŋèr kitú ke nsay kidzə̀m.»

⁴³Vishiíy vee vibaà viy vi shaà, Jesus nèn tòsín, e dù e mbìv wòŋ yee Galeli.

⁴⁴A wù‑uù yiì ne sùúy ji bó á yòʼ yii ghvə́m a *ŋgaà ntum Nyùy aáwuné wòŋ.

⁴⁵Yii bèy, wù meé é Galeli e ghan sin, á keérí wun kijuŋ, bìʼ fo vé‑eè duùn fó kiŋkàʼ e Jerusalem, e yèn vinyo ve wù yiìn fó vidzə̀m.

⁴⁶Wù kfən ghàn, e dù, e mèé e ntèʼ yee Kaana fo wù‑uù bìnèrìn mendzə́v é melùʼ e Galeli foo fèy. Wáa dzə e ghan see shooy, a wìr wo kuʼùn wùmòʼ dzə̀ é ntèʼ yee Kapeenahum, a wan və woo lumèn joy e ŋàŋ.

⁴⁷Wù yú ji Jesus lò ne fo wír veé Judàá mbìv wòŋ, e wìy e Galeli, e nèn dù, e yèn wun, a lon ji wù ku wìy, e fèr a wán və, wù waà sí kpú.

⁴⁸Jesus suúy shó jii, «Vèn dzə̀ ben, a bó yòʼ dzə̀ vèn wày shilív e mǒ wùn, a bó á yén ji m yiì kinyo ke kí wáa dìn vitaáví vé Nyùy.»

⁴⁹Wìr wo kuʼùn və̀y kú a lon kfə́ lonén jii, «Taàtá, ku wìy cér fo wan wom kpú.»

⁵⁰Wù nèn sùúy sho jii, «Kú a dù rì. Wan wò yíi lùŋ.» Wù ku nèn biìmé mo Jesus suuyin, a kfən fo laʼ.

⁵¹Wù lòo kfən, wùn à wónlè vəə́ tárnín, á suúy shó jii, wan və lùŋ a ne.

⁵²Wù ku nèn dzə̀r a dzə̀ ghán se shwéri kì koon wán. Á bìnèr jii, kinjàʼ ki‑ii maʼti wán é yooné, a sì á moo shúy e mòʼón.

⁵³Wù nèn kìíy ji dzə̀ á ghán se Jesus‑ee suuyin ji wàn yíi lùŋ. Wù nèn wày shilív e Jesus wùn, wír vee wùn laʼ adzə̀me wáy sá.

⁵⁴Mo Jesus yiìn kin kee kinyo, ke kí wáa dìn vitaáví vé Nyùy, wáa dzə ve ví meen vibaà ve wù ku lò fo wír veé Judàá mbìv wòŋ, e wìy, e yiì e Galeli.