Read Lamnso Joon 5 Bible Online

Joon 5 - Lamnso bible

Joon 5

¹Kee shooy ki shaà, kishiíy ké kiŋkàʼ ke wìr veé Juda kímóʼ kí nèn wìy ghèén, Jesus kfən lò, a koʼ e Jerusalem.

²Kisə̀m kímóʼ kí wáa dzə e Jerusalem foo fèy, aá yoŋ aáwuné Lǎm Hibru ji Besata, a kí dzə̀ é ghaa shùu kày wo vé‑eè yoŋ ji Shúu Kày Njiì. Aá bóm vibàn é ghaa kisə̀m fey vitàn,

³vé yàsíi wáa rəsí a neŋ e sar wo aneénín, aámóʼó dzə̀ amfìr, ámóʼó ve virə́ʼ ví‑iì kpuun, ámóʼó aŋkivkìr. [Aá dzə́ fo, shiy ghán se ndzə́ví‑iì lo, yí wàa bìnkìr,

⁴bìʼ fo nshìylav Nyùy kù‑uù lo, yì wìy, a wùr ndzə́v yee shooy. Wù lóo wùr, wìr wo wù tòmbìy nə̀ə́ sho nèn bònén, a wù fə̀m kì joy a dzə̀ ka.]

⁵Wìr wùmòʼ wáa dzə sa fo, a wù gón ne kiyá nshòv waamé e mtaár.

⁶Jesus lòo wìy fo, e yèn wír və̀y, e kìíy ji wù‑uù sí néŋ fo a fo ŋgùʼ, wù dzə́r shó jii, «À taʼ, e bonén a?»

⁷Ŋgaà gòn və̀y nèn sùúy jii, «Taàtá, bó m yòʼ kér wír wo dzə̀ wù lì mo, e wày é kisə̀m é ghan se kí binkìrì. Kí lóo bìnkìr, m lo ji m ŋaayì, e dù, e meé fo, a wìr wo sən kì nə̀ə́ ne fo mbìy.»

⁸Jesus suúy shó jii, «Nànèn ri, e lì gham yée, a dù.»

⁹Wù ku nèn bònén bèy kàŋ mòʼón, e lì gham rə́, a dù. Kí wáa koóy bèy, a kishiíy kee shooy ki dzə̀ kév ké bam.

¹⁰Vé wòŋe yén, a ŋgaà bònén və̀y béʼ gham rə́, á nèn a saʼ jii, «Lán dzə̀ kishiíy ké bam, a dzə̀ nsər fo wìr wáa beʼ kifá.»

¹¹Wù bìnèr kfə́ jii, «Kì sùúy wír wo wù kì fèrìn mo ji m li á gham yém, a dù.»

¹²Á nèn a dzətí sho jii, «Kì dzə̀ la woo shooy, e bóo suúy ji à wáa beʼ gham yé, a ghan sho?»

¹³A bó wìr və̀y yòʼ fə̀m kì wír wo wù kì fèrìn wun, bìʼ fo Jesus kì fèrìn, e nèn bìn, e lày e màŋgòŋ mvəm.

¹⁴Jesus yiì sìíy, e lòo dù e *lav cù, e kfə̀n yèn wír və̀y fo, e sùúy sho jii, «Yén mo à bonen ne. Á yen rì fó kfə̀n a yiì vinyo ve bi ví, fo ŋgeʼ ye yì wíy koóy wò wìy fòy, e shaà ye mbìy.»

¹⁵Wìr və̀y ku nèn lò fo fo, e dù, e sùúy e vé wòŋ vìyi ji á yoŋ wír wo wù kì fèrìn wun və̀y a ji Jesus.

¹⁶Mo Jesus‑eè yiìn kinyo kìn a dzə̀ é kishiíy ké bam, vé wòŋe nèn kèʼ, a ròn wúu rə́.

¹⁷Jesus nèn lò, e tòʼ lám aáwune jii, «Bó Tàr wor yòʼ yii meemè lim, a bó yòʼ dzə̀ sá, m meèmè.»

¹⁸Kinyo kìy ki màysì, e yiì, vé wòŋe wáa tàʼ, e yuyrí Jesus, bìʼ fo wù‑uù yoŋ Nyùy ji Tàr wov, a dzə̀ ji wù sí fiʼsìn kitú kfə́ wùn Nyùy, a bó yòʼ mày cáʼ ji wù bívir a nsər kishìíy ké bam.

¹⁹Jesus nèn lò, a suúy aáwune jii, «Vèn wáa kiíy rú ji bó yòʼ dzə̀ Wàn Nyùy wàa yiì kinyo ji yii wun, wù kù yii yii kinyo a dzə̀ ke wù yén, a Tàr wov yii. A Tàr yiì ka, bo Wàn kù yii kíwun,

²⁰bìʼ fo Tàr wov koŋ wun e ŋàŋ, din vinyo ve wù yii sho vidzə̀m. A wù kfə̀n wíy dìn, é Wàn wáa yiì vinyo ve ví shaàn ve vèn yén vìn, é vèn wáa leéy, a ker gháʼ.

²¹Mo Tàr wov fəər wíri fó kpu, aá kfə́n atin, dzə̀ sá réŋréŋ mo Wàn luŋèr wír wo wù koŋè.

²²A bó Nyùy Tàr yòʼ wíy a tinén nsaʼ wìr wùmòʼ gheéy. Wù fò ne kee shooy kee kilíŋ a dzə̀ e Wan və,

²³é wìr dzə̀m fíʼ a ghvəm Wán və réŋréŋ mo á ghvə́m wun woo Tàr. A wìr dzə̀ là fó a ghvəm Wan Nyùy, bo bó ŋgaàŋ yòʼ ghvə́m sa Tàr wov wo wù tumen wun.

²⁴«Vèn wáa kiíy rúrú jii, wìr wo wù yú kinyo ke suuy mo, wáy shilív e ŋgaà wo wù tumen mó wùn, sí kér dzəʼə̀m yee là may. Ŋgaàŋ yòʼ dzəə́ wìy nəə́ e nsaʼ. Wù bòy ne fo kpu, e nə̀ə́ e dzə̀ʼə̀m yee là may.

²⁵Vèn kfə́n a kiíy rú jii, ghán sí wíy gheén, a sí sì é kiwo, é wír ve á kpukin nee yú mo jì Wàn Nyùy yoŋ áwune, é wír ve á yuun adzə̀me luŋ.

²⁶A kí dzə̀ bey, bìʼ fo Nyùy Tàr wo kù yii wun, bo wíri wáa lùŋ, foon ne sa vitaáví vee shooy e Wan və.

²⁷Wù kfən fò vitaáví shó ji wáa tinén wun woo Wán nsaʼ wìr dzə̀m, bìʼ fo dzəə̀n wun wo yírí dzəə̀n *Wanwìr.

²⁸«Lá vèn yòʼ a ker gháʼ e kinyò fèn. Vèn kú a kiíy rú ji ghán sí wíy gheén, é wír ve vé‑eè kpukin ne adzə̀me yú jí Wàn Nyùy, e fəə̀kír fo sày,

²⁹é wír ve vé‑eè yii vinyo ve ru vií nèn nə̀ə́ e dzə̀ʼə̀m yee là may, é wír ve vé‑eè yii a dzə̀ ve bi vií nəə́ kév é nsaʼ ye bó yòʼ dzə̀ á bòy fó fo.

³⁰A bó yòʼ dzə̀ m yiì kinyo ji yiì a mo. M kù yú a dzə̀ fo Tàr wor, tínen nsaʼ wìr réŋréŋ mo yì dzəə̀n, bìʼ fo kém kí dzəə̀n ji m wáa yiì kinyo a dzə̀ ke ŋgaà wo wù tumen mo suuyì, bó m yòʼ yii a dzə̀ ke kwaʼ mo.

³¹«A dzə̀ ji wáa naàrì mo kinyo kém, bo bó wìr yòʼ kér fó biimé.

³²Yii bèy, a wìr wùmòʼ dzə̀ shó wo wù naarì kinyo kém, a m kì ji kinyo ke wù din ki dzə̀ ke ru kí.

³³Bó vèn yòʼ‑oò lo tùm wíri fo Joon a? Kinyo ke wù‑uù naàrìn kùm mo kí dzə̀ ke ru kí.

³⁴A bó m yòʼ fə̀m leey ji wáa naàrì wír mo kinyo kém kí dzəə̀n. M suuy kin cáʼcáʼ ji vèn fiʼ biìmé, e wìy lùŋ.

³⁵Joon‑eè fiʼtì bèy, a wù dzə̀ moo kikaʼày ke kí shwí, bán, a virə́ʼ ví ráné, a vèn‑eè ló a ghan e mvə̀m ran foo fèy shishàr, a sheʼrí.

³⁶«Kinyo kímóʼ kí nén a dzə sho, ke kí din mo m dzəə̀n, a kí shaà ké Joon. A kí dzə̀ jii, Tàr wor fò ne lim ye m wáa lìm. Vinyo ve m yii vìn vi nén a dìn ji tùm rú á Tàr wor mo.

³⁷Tàr wor wáa tum mo, a wù‑uù sí rə́si naarì mo m dzəə̀n, a bó vèn yòʼ yii yú mo wù súŋninè, a bó á yòʼ yén sa mo wù dzəə̀n.

³⁸Vinyo və́ ví yòʼ tíy e věn meliv, bìʼ fo vèn yòʼ wáy shilív e ŋgaà wo wù tumén wùn.

³⁹Vèn rə́si tar vinyo fo Ŋwàʼ Nyùy, kwaʼtì ji dzə̀ fo vèn wíy lùŋ, a ker dzəʼə̀m yee là may. A ŋwàʼ woo shooyi kù din a dzə̀ mo m dzəə̀n.

⁴⁰Yii bèy, vèn ku tèn fó way shilív e mǒ wùn, é m fó ven dzəʼə̀m yee là may.

⁴¹«A bó m yòʼ fə̀m suuy bèn ji wáa binsí wír kinyo kém.

⁴²A bó yòʼ fə̀m dzə̀ vèn bìnsí. M kì ven kijuŋ, vèn yòʼ koŋ Nyùy e shilív shí.

⁴³M wìy ne lèn, a suúy ji tùm Tàr wor mo, la vèn yòʼ a yuurí kinyo kém gheéy. Vèn lóo yìi yen, a wìr wùmòʼ wíy, a suúy kinyo ji suuy wun, é vèn nèn a yuurí.

⁴⁴A bó yòʼ dzə̀ vèn wày shilív e mǒ wùn, bìʼ fo vèn koŋ fó a yiì vinyo a dzə̀ ve wáa binsí wíri, e làa yòʼ a leéy ji wáa binsí Nyùy wo kù jòʼsìn wun ji Nyùy.

⁴⁵Lá vèn yòʼ a kwàʼtì ji m suuy bèn ji m fíʼ lì ajay vén, a bi Tàr wor shó. Wìr wo wù sí bí ajay vén vee shooy dzə̀ Mooser wo vèn wayin vifií é wùn wó.

⁴⁶A vèn kì biìmé rú kinyo ke Mooser və̀n‑eè saŋen, bo vèn lo wày sá shilív e mǒ wùn, bìʼ fo wù din a dzə̀ mo m dzəə̀n.

⁴⁷Mo bó vèn yòʼ fə̀m biíme kinyo ke Mooser‑iì saŋen, bo dzə̀ vèn biìmé kinyo ke suuy mo é le?»