Read Lamnso Joon 8 Bible Online

Joon 8 - Lamnso bible

Joon 8

¹Jesus yiì fəə̀ fó lav cù fèy, e kòʼ é gwan wo á yoŋ ji wo Vicì vé Oliv.

²Ndzə bvəə́shí, e jàv, wù kfən dù e lav cù. Wíri báʼtí e wùn ghaŋ adzə̀m, wù nèn dzə̀ʼə̀m fo nsay, a yeʼéy áwune.

³Wír ve á yii duŋrì nsər Nyùy wùn à wír veé mbìv *Farasi ámóʼó nèn wìy e wiíy, aá koó é kwaʼ viŋkar. Á tiír wiíy və̀y fo ntìntìn,

⁴e sùúy e Jesus jii, «Ŋgaà Yèʼey, vèr kù koò wiíy və̀n e kileèmè, a dzə̀ wùn lùmèn wùmòʼ.

⁵A Mooser‑iì lo fò vèsən nsər ji á yúyrí á wiíy woo ben e tíyí. À yèn ké ji ka?»

⁶Áwune kù‑uù yutì a dzə̀ shúu və́ ji á fiʼ kòóy kinyo kée lor wun sho. Jesus ku gvə̀ʼə́r a dzə̀ kitú kfə́, a saŋ kifá fo nsay e wàn kiwo.

⁷Á ku nèn a tiy fo, a soòsì. Wù yiì lò, e nàn kitú, e bìnèr jii, «Vèn li ri, a yuyrí e tíyí, é ku yòʼ tòmbìy tsə̀m wír wo bó wù yòʼ‑oò yiì ne yiì kinyo ke bi kí.»

⁸Wù nèn kfə̀n gvə̀ʼə́r kitú kfə́, a saŋ kifá fo nsay.

⁹Mo á yuun kee shooy, e nèn kèʼ, a làykìr amòʼón amòʼón, e kèʼ fo ŋgày sé wìr si, nèn sìíy jòʼsì Jesus wùn wiíy və̀y, a wù kù tíy fo.

¹⁰Jesus nàn kitú, e dzə̀r shó jii, «Yaà, vé ve nsaʼ vìyi bèé? Wìr wùmòʼ yoʼ sùúy ji à kù kér fó kpu à?»

¹¹Wù bìnèr jii, «Taàtá, wìr yoʼ sùúy.» Jesus nèn sùúy jii, «A bó yòʼ dzə̀ sá, m sùúy. Ku yòʼ a dù. À du, lá à yòʼ dzə́ə a bùʼtì vinyo.»][3]

¹²Jesus nèn kfə̀n a suŋnín e wíri, a suúy jii, «Dzə̀ mo rán ye yí kaʼày wír veé ndzə. A wìr ghán e mǒ bàm, la wù yòʼ dzə́ə a ghan fo mesənér. Wù sí ghán, yén rán, a yí kaʼày wun, a wù du, e nəə́ e dzə̀ʼə̀m yee là may.»

¹³Wír veé mbìv Farasii nèn a suúy sho jii, «Mo kù naarì wò kitú ké, bo bó kinyè kí yòʼ dzə̀ é kinyò ke à suuyì.»

¹⁴Jesus bìnèr jii, «A fə̀m naarì mo kitú kém, bo kinyo ke m suuy ki dzə̀ rú. M kì fo m loòn, a m kì fo m du, a bó vèn yòʼ kì.

¹⁵Vèn sáyri kinyo ke wìr a dzə̀ mo vifií vén ví dzəə̀n. A bó yòʼ fə̀m dzə̀ m wàa sayrí kinyo ke wìr.

¹⁶A m kì lò ji m wáa sayrí, m kù yèn rú mo kí dzəə̀n, bìʼ fo bó m yòʼ sáyri a dzə̀ fo mǒ vifii, kù dzə̀ vèr Tàr wor wo wù tumen mo.

¹⁷ Vé‑eè sàŋ e věn Ŋwàʼ Nsər jii, a wíri tíy vinjen abaà, suuy kinyo kimòʼón, bo dzə̀ á kinyo ke ru kí.

¹⁸Mo m naarì kitú kém, dzə̀ réŋréŋ mo Tàr wor wo wù tumen mo naarì sa mo m dzəə̀n.»

¹⁹Á ku nèn sàyín jii, «Tàr won wo à yoŋ və̀n dzə̀ feé?» Jesus bìnèr jii, «Vèn yòʼ kì mo m dzəə̀n, a bó vèn yòʼ kì sá Tàr wor. A vèn kì kì mo m dzəə̀n, vèn nèn kìíy sa Tàr wor.»

²⁰Jesus wáa suúy vinyo vìn e ghan se wù‑uù yéʼey wíri é lav cù, aáwune kaárí a dzə̀ é shùu buu fo á yii fó mbàm se Nyùy. A bó yòʼ‑oò dzə̀ wír, wù ghàr wun, bìʼ fo ghán se Nyùy‑iì sìysìn sí yòʼ‑oò ló ne ghèén.

²¹Wù yiì lò, e kfə̀n a suúy jii, «M sí du, a vèn wíy siíy, a tàʼ mo, e kpu vèn à njò yen. A bó yòʼ dzə̀ vèn wìy fo m du.»

²²Vé wòŋe nèn a ghaynín jii, «Wù yíi yuyrí kitú kfə́ yuyrín a, e bó a suúy ji bó yòʼ dzə̀ vèsən wìy fo wù du?»

²³Wù nèn sùúy aáwune jii, «Vèn lò fo ndzə fèn, m ló kém a dzə̀ fó yuv. Vèn nén a dzə wír veé ndzə fèn, a bó m yòʼ dzə̀ wír woó ndzə fèn.

²⁴Mo m kì suuyin ne e vèn ji vèn wíy kpukír vèn à njò yen, a vèn dzə̀ là fó biimé jii, ‹Dzə̀ mo wo dzəə̀n mo›,[4] bo vèn kù wíy kpu vèn à njò yen.»

²⁵Á nèn dzə̀r shó jii, «Dzə̀ wò la woo shoon?» Jesus bìnèr jii, «M dzə̀ ŋgaàŋ wo mò‑oò sí suuy e vèn, e kèʼ fo kèʼ.

²⁶A kì dzə̀ m wàa suúy vinyo vinín, a sayrí vinyo vén. Yii bèy, a m fiʼtì kém kinyo e wír veé ndzə fène a dzə̀ ke mò‑oò yuun fo ŋgaà wo wù‑uù tumen mo, a vinyo və́ ví kù yii dzə́ ve ru ví.»

²⁷Wù suúy bey, la á yòʼ kìíy ji wù yoŋ ŋgaàŋ a dzə̀ á Nyùy woo Tàr wov.

²⁸Jesus nèn kfə̀n sùúy aáwune jii, «Vèn wíy koʼór ŋgaà wo yírí dzəə̀n *Wanwìr və̀n e kici, é vèn nèn kìíy jii, ‹Dzə̀ mo wo dzəə̀n mo›, e kfə̀n kiíy ji bó m yòʼ yii vinyo a dzə̀ á fo mǒ vitaaví. M suuy vinyo a dzə̀ ve Tàr wor‑iì dìnèn e mò.

²⁹Vèn wáa kiíy ji Tàr wor wo wù tumen mo kù dzə̀ vèr wun, a bó wù yoʼ màʼtì, m wáa dzə vèr mòʼón, bìʼ fo m kù yii yii vinyo a dzə̀ ve ví boŋ wun.»

³⁰Mo Jesus fer vinyo vìn bèy, wír aníne nèn a way shilív e wun wùn.

³¹Jesus nèn a suŋnín lèn a dzə̀ e wír ve vé‑eè sí wáy shilív e wùn wó vìyi, a suúy jii, «A vèn lò, a tiy a dzə̀ e mǒ kinyò, bo vèn dzə̀ rú wír vém,

³²é vèn nèn wìy kìíy kinyo ke dzəə̀n ke ru kí, é kí yii, é vèn boy fó vikwàn.»

³³Á nèn njàʼàm jii, «Vèr dzə̀ rám Abraham, a bó vèr yòʼ‑oò yiì rèŋ vikwàn fo wìr gheéy. À wáa suúy ké ji vèr wíy bòy fo vikwàn a dzə̀ viné ví?»

³⁴Jesus bìnèr jii, «Vèn wáa kiíy rúrú jii, wìr wo wù yii vinyo ve bi ví dzə̀ kwǎn vinyò ve bi ví.

³⁵A bó kwàné yòʼ yii dzə́ ji wír woó laʼ ŋkuuŋkùŋ, kù yii dzə́ wír wo dzəə̀n wán woó laʼ.

³⁶Kí nén a dzə jii, a tìn Wán wo dzəə̀n ji wo Nyùy ven fó vikwàn, bo vèn bòy ne ŋkuuŋkùŋ.

³⁷M kì sá ji vèn dzə̀ rám Abraham. Yii bèy, a vèn kù taʼ ji á yúyrí mo, bìʼ fo kinyo kém kí yòʼ nəə e věn meliv.

³⁸M fiʼtì vinyo a dzə̀ ve mò‑oò yenen e Tàr wór laʼ, a vèn yii kén vinyo a dzə̀ ve vén vee atàrí‑iì dànèn ven shó.»

³⁹Á nèn bìnèr jii, «Tàr wor kù dzə̀ Abraham.» Jesus suúy aáwune jii, «A vèn kì dzə̀ rú rám Abraham, bo vèn kù yii vinyo, a dzə̀ ve wù‑uù yii.

⁴⁰M fiʼtì kinyo e vèn a dzə̀ ké ru kí, a m yù a dzə̀ fo Nyùy, a vèn kù taʼ ji á yúyrí mo yúyrín, a bó yòʼ dzə̀ mo Abraham‑eè yii.

⁴¹Vèn yii kinyo a dzə̀ ké wóon woo tàr.» Áwune nèn sàyín jii, «Vèr yòʼ dzə̀ atáfójiy, vèr kì tàr wor e mòʼón, a dzə̀ Nyùy.»

⁴²Jesus bìnèr jii, «A Nyùy kì dzə̀ rú Tàr won, bo vèn ku lò a kòŋ mo, bìʼ fo m dzəə̀n fen, a m lò a dzə̀ fo Nyùy. A bó m yòʼ‑oò wìy fo mǒ kitu. Yì‑iì tùm Nyùy mo.

⁴³Vèn kì kinyo ke kí yii, bo vèn wáa meŋ vinyo ve m suuyì a? Dzə̀ bìʼ fo vèn yú, wáŋ waŋén.

⁴⁴Tàr won dzə̀ Satan, a vèn nèn wáy vifií a dzə̀ é vinyò ve koŋ wóon woo tàr. Wù kù‑uù sì rim kèʼ fo ŋgùʼ, ban kinyo ke ru kí bánen, bìʼ fo wù yòʼ kér kinyo ke ru kí e wùn shiliv gheéy shishàr, e bó a dor. Wù lóo boʼtí kinyo, bo kù dzə̀ nóliì və, bìʼ fo wù dzəə̀n kfə́ ji ŋgaà kimboʼtì, a yì‑iì kèʼ wun kimboʼtì kidzə̀m.

⁴⁵Vèn nén a ten kinyo kém, bìʼ fo m suuy a dzə̀ kinyo ke ru kí.

⁴⁶A bó yòʼ dzə̀ wìr fo vèn dìn kinyo ke mò‑oò yiìn ne jày. Mo m suuy a dzə̀ kinyo ke dzəə̀n ke ru kí, yiì ka, bo vèn tén fó biimé?

⁴⁷Wìr wo tàr wov dzəə̀n rú Nyùy yii yuúri kinyo ke Nyùy suuyì. Vèn yòʼ dzə̀ wón Nyùy gheéy. Á kinyo ke kí yiìn, bo vèn wáa ten fó a yuurí.»

⁴⁸Wír vìyi nèn lò, a kuùrì kuùrìn jii, «Vèr ku lò sùúy rú ji à dzə̀ á rim woó *Samaria, *nyùy wùmòʼ jívir wò.»

⁴⁹Wù bìnèr jii, «Bó m yòʼ yii shém ŋgoo anyùy. Kinyo ke m yii ki dzə̀ ji yír Tàr worí wáa dù. Vèn shoor mo shoórín.

⁵⁰M yii bèy, a bó m yòʼ leey ji wíri wáa burí a dzə̀ mo. Kù gwarìr Nyùy kee shooy, a kù wíy bìnèr wun fo fo.

⁵¹«Vèn wáa kiíy rúrú jii, a wìr yú kinyo kém, yii mo kí dzəə̀n, la ŋgaàŋ yòʼ dzəə wìy kpù.»

⁵²Wír vìyi nèn kfə̀n sùúy jii, «Vèr kìíy ne rú lèn ji à shèm ŋgoo anyùy. Abraham woo tàr à ram yér‑iì lo kpù, *aŋgàa ntum Nyùy adzə̀me kpúkír sá. Aà suuy ké fèn ji a wìr yú kinyo ké, lemè, la wù yòʼ dzəə wìy kpù.

⁵³À shaà tàr wor Abraham wo wù‑uù kpuun, e kfə̀n shaà sa aŋgàa ntum Nyùy ve á kù‑uù kpúkirì à? À kwaʼtì ji à dzə̀ la?»

⁵⁴Jesus bìnèr jii, «A m lò, a suúy kitú kém, bo dzə̀ kinyo kisáŋ. Kù din Tàr wor mo m dzəə̀n. A kù dzə̀ wun woo shó wo vèn yoŋ ji Nyùy won.

⁵⁵Yii bèy, a bó vèn yòʼ kì wun gheéy. Kù kì mo. A m lò, a shaʼnín ji bó m yòʼ kì, bo m dzə̀ ŋgaà kimboʼtì sa moo ven. M kì wun feyì, a m yú kinyo kfə́, lemè.

⁵⁶Abraham woo tàr à ràm yén‑eè ló a njèʼ feyì ji wun ku yèn ghán se m wiyì. A wù‑uù lo yèn, a sheʼrí.»

⁵⁷Wír vìyi nèn shùsín jii, «À wáa dzə ben, a bó à yóʼ ne fə̀m mèé kiyá mtàn, a taŋrí ji wò‑oò yèn Abraham e gha?»

⁵⁸Jesus bìnèr jii, «Vèn wáa kiíy rúrú jii, bo á wáa dzəə́ Abraham, a m sì.»[5]

⁵⁹Áwune yú kee shooy, e nèn tàyrí tíy ji á yúyri wun sho. Yii bèy, Jesus bìn, e lày, e fəə̀ fó maàndzə lav cù fèy.